Weta 45
Mẹhe Yè Ma Lẹn Nado Yin Devi De
NUMIMỌ budonamẹ tọn nankọ die dile Jesu to ageji jẹ! Dawe kanylantọ he dobu taun awe jẹgbonu wá sọn ṣiọditẹn he tin to yakẹ lọ bo dowezun wá e dè. Yé to yinyin tuklado gbọn aovi lẹ dali. To whenuena e yindọ vlavo dopo to yé mẹ yin danuwatọ taun hugan awetọ bo ko sọ jiya dẹn hugan to nuyiwadomẹji aovi tọn glọ, ewọ ji wẹ ayidonugo yin zizedo hugan.
Na ojlẹ dindẹn de dawe awublanọ ehe ko tin to omẹ́ bo nọ nọ̀ yọdo lẹ ṣẹnṣẹn. To whepoponu, to okle po ozán po, e nọ to awhádo bo nọ yí zannu lẹ do nọ to awugblena ede. E nọ wà danu sọmọ bọ mẹdepope ma tindo adọgbigbo lọ nado gbọ̀n aliho enẹ lọ ji gba. Vivẹnu lẹ ko yin dido nado blá ẹ, ṣigba e nọ wẹ́n gẹdẹ lẹ do voovo bo nọ gbà ogàn lẹ sọn afọ etọn lẹ. Mẹdepope ma tindo huhlọn lọ nado whiwhẹ ẹ gba.
Dile dawe lọ dọnsẹpọ Jesu bo họ́ jai to afọ etọn kọ̀n, aovi he to anadena ẹn lẹ hẹn ẹn nado dawhá jẹgbonu gángán dọmọ: “Etẹwẹ yẹn tindo nado wà hẹ we, Jesu, hiẹ Ovi Jiwheyẹwhe Gigogán tọn? [Yẹn yí we do whiwhle glọ to Jiwheyẹwhe nukọn, NW ], dọ hiẹ doya na mi blo.”
“Jẹgbonu wá, hiẹ gbigbọ mawé sọn dawe lọ mẹ,” wẹ Jesu to didọ zọnmii. Ṣigba to enẹgodo Jesu kanse dọmọ: “Etẹwẹ oyín towe?”
“Legioni wẹ oyín ṣie, na mẹsusu wẹ mí,” wẹ yin gblọndo lọ. Aovi lẹ nọ tindo pekọ to mimọ yajiji mẹhe yé penugo nado sayana lẹ tọn mẹ, na e họnwun dọ yé nọ tindo homẹhunhun nado hòpli do yé ji to gbigbọ mẹgbeyinyan obu tọn mẹ. Ṣigba whenuena yé pannukọn Jesu, yé vẹvẹ ma nado yin dido hlan odò mapote mẹ. Whladopo dogọ mí mọ dọ Jesu tindo huhlọn daho; e penugo nado gbawhàn etlẹ yin aovi ylankan hugan lẹ tọn. Ehe sọ dohia ga dọ aovi lẹ yọnẹn dọ didohlan odò mapote mẹ yetọn to pọmẹ hẹ nukọntọn yetọn, yèdọ Satani Lẹgba, yin owhẹ̀ he Jiwheyẹwhe na dá na yé to godo mẹ.
Kanlinpo nudi ohàn 2 000 tọn delẹ to núdù sẹpọ to osó lọ ji. Enẹwutu aovi lọ lẹ dọmọ: “Dó mí hlan ohàn lẹ mẹ, na mí ni biọ yé mẹ.” E họnwun dọ aovi lọ lẹ nọ tindo homẹhunhun he mayin jọwamọ tọn, he sọ ylan nado nọ gbidikọna agbasalan nudida gbẹ̀te lẹ. To whenuena Jesu jo yé do nado biọ ohàn lọ lẹ mẹ, yé 2 000 lọ lẹpo wẹ to linlọ́n dasá zannu huto tọn lẹ bo tlọ biọ ohù mẹ.
To whenuena mẹhe to nukunpedo ohàn lọ lẹ go mọ ehe, yé dowezun yì nado yì na linlin to todaho lọ po lẹdo etọn lẹ po mẹ. Gbọnmọ dali, gbẹtọ lẹ jẹgbonu wá nado pọ́n nuhe ko jọ. To whenuena yé wá, yé mọ dawe he mẹ aovi lẹ ko jẹgbonu sọn lọ. Etẹ, yèdọ ewọ do avọ̀ podọ to ayiha whiwhẹ tọn etọn mẹ, e sinai to afọ Jesu tọn lẹ kọ̀n!
Kunnudetọ yí nukundomọ lẹ dọ lehe dawe lọ yin hinhẹn jẹ gángán do. Yé sọ dọna gbẹtọ lẹ dogbọn okú budonamẹ ohàn lọ lẹ tọn dali. To whenuena gbẹtọ lẹ sè ehe, obu daho jẹ yé ji, bọ yé sọ vẹ̀ Jesu vẹkuvẹku nado tọ́n sọn otò yetọn mẹ. Enẹwutu ewọ setonu bosọ biọ tọjihun mẹ. Mẹhe tindo aovi dai lọ vẹvẹna Jesu nado gbọna ewọ ni hodo e yì. Ṣigba Jesu dọna ẹn dọmọ: “Yì owhé, jẹ họntọn towe lẹ dè, bo dọ na yé le Oklunọ wà onú daho lẹ na we do, podọ le e yí lẹblanu hia we do.”
Jesu nọ saba dọna mẹhe e hẹnazọngbọna lẹ ma nado dọna mẹdepope, to whenuena e yindọ ewọ ma jlo dọ gbẹtọ lẹ ni wá tadona lẹ kọ̀n do dodonu linlin numọtolanmẹ tọn lẹ ji. Ṣigba nujijọ he gbọnvo ehe sọgbe na mẹhe tindo aovi dai lọ na to kunnude to gbẹtọ he vlavo Jesu ma na tindo dotẹnmẹ hundote lọ todin nado jẹ yé dè lẹ ṣẹnṣẹn. Humọ, tintin to finẹ dawe lọ tọn na wleawuna kunnudenu dogbọn huhlọn Jesu tọn nado wazọ́n dagbe dali, bo na jẹagọdo linlin he ma sọgbe depope he sọgan yin hinhẹn gbayipe do ohàn lọ lẹ hinhẹnbú ji.
To tonusise na anademẹ Jesu tọn, dawe he tindo aovi dai lọ yì. E jẹ nuhe Jesu ko wà na ẹn lẹpo lá ji gbọn Dekapolé lẹpo mẹ, podọ awú jí gbẹtọ lọ lẹ taun. Matiu 8:28-34; Malku 5:1-20; Luku 8:26-39; Osọhia 20:1-3.
▪ Na vlavo tọn, naegbọn ayidonugo yin zizedo dopo to dawe he tindo aovi lọ lẹ mẹ ji to whenuena e yindọ yé omẹ awe lẹ wẹ tin to finẹ?
▪ Etẹwẹ dohia dọ aovi lẹ yọnẹn dogbọn odò mapote sọgodo tọn de dali?
▪ Dile e họnwun do, naegbọn aovi lẹ nọ jlo nado biọ gbẹtọ lẹ po kanlin lẹ po mẹ?
▪ Naegbọn Jesu yinuwa to aliho he gbọnvo de mẹ hẹ dawe he tindo aovi dai lọ, bo dọna ẹn nado dọna mẹdevo lẹ dogbọn nuhe Ewọ wà na ẹn dali?