Jesu Dohuhlọn Hú Aovi Lẹ

BE A gbẹsọ flin nuhe zọ́n bọ angẹli Jiwheyẹwhe tọn dopo do lẹzun Satani Lẹgba ya?⁠— Ojlo ṣejannabi tọn etọn wẹ zọ́n bọ e ṣiatẹ sọta Jiwheyẹwhe bo jlo dọ mẹlẹpo ni nọ sẹ̀n emi. Be angẹli devo lẹ lẹzun hodotọ Satani tọn wẹ ya?⁠— Mọwẹ, devo lẹ wàmọ. Biblu ylọ yé dọ ‘angẹli Satani tọn lẹ,’ kavi aovi lẹ.​—⁠Osọhia 12:⁠9.

Be angẹli ylankan ehelẹ, kavi aovi lẹ yise to Jiwheyẹwhe mẹ ya?⁠— ‘Aovi lẹ yise dọ Jiwheyẹwhe tin,’ wẹ Biblu dọ. (Jakobu 2:19) Ṣigba yé to budi todin. Na yé yọnẹn dọ Jiwheyẹwhe na sayana yé na onú ylankan he yé ko wà lẹ. Onú ylankan tẹlẹ wẹ yé wà?⁠—

Biblu dọ dọ angẹli ehelẹ jo otẹn yetọn to olọn mẹ do bo wá aigba ji nado nọgbẹ̀ taidi gbẹtọ. Yé wà ehe na yé jlo nado tindo kọndopọ zanhẹmẹ tọn hẹ yọnnu whanpẹnọ he to aigba ji lẹ wutu. (Gẹnẹsisi 6:​1, 2; Juda 6) Etẹwẹ yin kọndopọ zanhẹmẹ tọn?⁠—

Kọndopọ zanhẹmẹ tọn yin whenuena sunnu po yọnnu po sẹpọ yedelẹ to aliho vonọtaun de mẹ. Enẹgodo, viyẹyẹ de sọgan whẹ́n to yọnnu lọ homẹ. Ṣigba e ma sọgbe na angẹli lẹ nado tindo kọndopọ zanhẹmẹ tọn gba. Jiwheyẹwhe jlo dọ sunnu po yọnnu po he ko wlealọ hẹ yedelẹ kẹdẹ wẹ dona tindo kọndopọ zanhẹmẹ tọn. Enẹ na zọ́n bọ eyin ovi de yin jiji, asu po asi po lọ na penukundego ganji.

To whenuena angẹli lẹ ze agbasa gbẹtọ tọn dó bo zanhẹ yọnnu lẹ to aigba ji, ovi he yé ji lẹ whẹ́n bo lẹzun gbẹtọ asuka lẹ. Yé ylanhùn taun, bo nọ to awugblena gbẹtọ lẹ. Enẹwutu Jiwheyẹwhe hẹn singigọ daho de wá bo và gbẹtọ asuka lẹ po mẹylankan lẹpo po sudo. Ṣigba e dọna Noa nado gbá aki de, kavi tọjihun daho de, nado whlẹn omẹ vude he nọ wà nuhe sọgbe lẹ gán. Mẹplọntọ Daho lọ dọ dọ nuhe jọ to Singigọ lọ whenu yin onú titengbe de he mí dona flin.​—⁠Gẹnẹsisi 6:​3, 4, 13, 14; Luku 17:​26, 27.

To whenuena Singigọ lọ wá, be a yọ́n nuhe jọ do angẹli ylankan lẹ go ya?⁠— Yé jo agbasa gbẹtọ tọn he yé ko ze dó dai lẹ do, bo lẹkọyi olọn mẹ. Ṣigba yé ma sọgan yin angẹli Jiwheyẹwhe tọn lẹ ba, enẹwutu yé lẹzun angẹli Satani tọn, kavi aovi lẹ. Bọ etẹwẹ jọ do ovi yetọn he yin gbẹtọ asuka lọ lẹ go?⁠— Yemẹpo wẹ kú to Singigọ lọ mẹ. Podọ mọwẹ mẹhe ma setonuna Jiwheyẹwhe lẹpo kú do niyẹn.

Sọn ojlẹ Singigọ lọ tọn mẹ gbọ́n, Jiwheyẹwhe masọ dike na aovi lẹ ni lẹzun gbẹtọ ba. Ṣigba dile mí ma tlẹ sọgan mọ aovi lẹ do sọ, yé gbẹsọ nọ tẹnpọn nado hẹn gbẹtọ lẹ wà onú ylankan lẹ. Yé to nuhahun lẹ dọ̀n wá aimẹ hú gbede pọ́n tọn. Nuhe zọ́n wẹ yindọ yé ko yin yinyan sọn olọn mẹ wá aigba ji.

Be a yọ́n nuhe zọ́n bọ mí ma sọgan mọ aovi lẹ ya?⁠— Na yé yin gbigbọ mayinukundomọ lẹ wutu. Ṣigba mí sọgan deji dọ yé tin. Biblu dọ dọ Satani to ‘gbẹtọ aihọn lẹpo tọn klọ,’ podọ aovi etọn lẹ to alọgọna ẹn.​—⁠Osọhia 12:​9, 12.

Be Lẹgba po aovi etọn lẹ po sọgan klọ mílọsu wẹ ya?⁠— Mọwẹ, yé sọgan wàmọ eyin mí ma to aṣeji. Ṣigba mí ma dona dibu gba. Mẹplọntọ Daho lọ dọmọ: ‘Lẹgba ma tindo huhlọn do yẹn ji gba.’ Eyin mí dọnsẹpọ Jiwheyẹwhe, e na basi hihọ́na mí sọn Lẹgba po aovi etọn lẹ po si.​—⁠Johanu 14:⁠30.

E jẹ dọ mí ni yọ́n onú ylankan he aovi lẹ sọgan tẹnpọn nado klọ mí nado wà lẹ. Enẹwutu lẹnnupọndeji. Onú ylankan tẹlẹ wẹ aovi lẹ wà to whenuena yé wá aigba ji?⁠— Jẹnukọnna Singigọ lọ, yé tindo kọndopọ zanhẹmẹ tọn hẹ yọnnu lẹ, ehe yin nude he angẹli lẹ ma tindo jlọjẹ nado wà. To egbehe ga, aovi lẹ jlo dọ gbẹtọ lẹ ni vẹtoli na osẹ́n Jiwheyẹwhe tọn he gbẹ́ kọndopọ zanhẹmẹ tọn. Dọna mi, Mẹnu lẹ kẹdẹ wẹ dona tindo kọndopọ zanhẹmẹ tọn?⁠— A basi, mẹhe ko wlealọ lẹ kẹdẹ wẹ.

To egbehe, yọpọvu sunnu po yọnnu po delẹ nọ tindo kọndopọ zanhẹmẹ tọn, ṣigba ehe ma sọgbe gba. Biblu dọho dogbọn ‘vijinu’ sunnu tọn, kavi onẹ́ dali. (Levitiku 15:​1-3) Vijinu yọnnu tọn nọ yin yiylọdọ ayọ́. Jehovah dá awutugonu ehelẹ na lẹndai vonọtaun de he mẹhe ko wlealọ lẹ kẹdẹ wẹ sọgan duvivi etọn. Homẹ aovi lẹ tọn nọ hùn eyin gbẹtọ lẹ wà nuhe Jehovah ko dosẹ́n etọn lẹ. Di apajlẹ, homẹ aovi lẹ tọn nọ hùn to whenuena yọpọvu sunnu po yọnnu de po yí onẹ́ po ayọ́ ode awetọ yetọn lẹ tọn do daihun. Ṣigba mí ma jlo na hẹn homẹ aovi lẹ tọn hùn gba, kavi e mayin mọwẹ?⁠—

Onú devo sọ tin he aovi lẹ yiwanna ṣigba bọ Jehovah gbẹwanna. Be a yọ́n nulọ ya?⁠— Danuwiwa wẹ. (Psalm 11:⁠5) Danuwiwa yin kanyinylan po awugblena mẹdevo lẹ po. Flindọ, nuhe ovi aovi lẹ tọn he yin gbẹtọ asuka lẹ basi niyẹn.

Aovi lẹ sọ yiwanna nado nọ dobuna gbẹtọ lẹ. Yé nọ doyẹklọmẹ to whedelẹnu nado yin mẹhe ko kú lẹ. Yé tlẹ sọgan dọho di mẹhe ko kú lẹ. Gbọn mọwiwa dali, aovi lẹ nọ doyẹklọ mẹsusu nado yise dọ mẹkuku lẹ gbẹ́ pò to ogbẹ̀ bo sọgan dọho hẹ mẹhe ma ko kú lẹ. Mọwẹ, aovi lẹ nọ hẹn mẹsusu nado yise to gbigbọ mẹkuku lẹ tọn mẹ.

Enẹwutu mí dona tin to aṣeji bo ma na dike Satani po aovi etọn lẹ po ni klọ mí. Biblu na avase dọmọ: ‘Satani nọ tẹnpọn nado diọada zun angẹli dagbe de, podọ devizọnwatọ etọn lẹ lọsu nọ wàmọ ga.’ (2 Kọlintinu lẹ 11:​14, 15) Ṣigba, desọn nugbo de mẹ, mẹylankan wẹ aovi lẹ yin. Gbọ mí ni pọ́n lehe yé sọgan tẹnpọn nado hẹn mí nado wà nudopolọ hẹ yé gbọn.

Fie wẹ gbẹtọ lẹ nọ plọn nususu te gando danuwiwa, zanhẹmẹ he ma sọgbe, nudida gbigbọnọ po gbigbọ mẹkuku lẹ tọn po go te?⁠— Be e ma yin sọn aihun televiziọn po video tọn delẹ po mẹ wẹ ya? Kavi sọn sinimọto yìyì kavi gbẹdido ylankan lẹ to wehọmẹ po họntọn ylankan lẹ po dè wẹ ya? Be Jiwheyẹwhe wẹ onú ehelẹ wiwà nọ dọ̀n mí sẹpọ, kavi Lẹgba po aovi etọn lẹ po? Mẹnu wẹ hiẹ lẹn?⁠—

Mẹnu wẹ hiẹ lẹndọ e nọ jlo dọ mí ni dotoai bo pọ́n onú ylankan lẹ?⁠— Satani wẹ, ewọ po aovi etọn lẹ po. Enẹwutu, etẹwẹ hiẹ po yẹn po dona wà?⁠— Mí dona nọ hia, dotoai, bo pọ́n nuhe yin dagbe lẹ podọ enẹ na gọalọna mí nado sẹ̀n Jehovah. Be hiẹ yọ́n delẹ to onú dagbe he mí sọgan wà lọ lẹ mẹ ya?⁠—

Eyin mí nọ wà nuhe yin dagbe, mí ma dona nọ dibuna aovi lẹ gba. Jesu dohuhlọn hú yé, podọ yé nọ dibusi i. To gbèdopo, aovi lẹ dawhá hlan Jesu dọmọ: “Hiẹ wá nado hù mí sudo wẹ?” (Malku 1:24) Be homẹ mítọn ma na hùn to whenuena ojlẹ lọ na wá bọ Jesu na và Satani po aovi etọn lẹ po sudo ya?⁠— Ṣigba whẹpo ojlẹ enẹ nido sọ, mí sọgan deji dọ Jesu na basi hihọ́na mí sọn aovi lẹ si eyin mí dọnsẹpọ ewọ po Otọ́ etọn olọn mẹ tọn po.