Weta 54
“Akla Nugbo . . . sọn Olọn”
AZÁN he jẹnukọn ko yin dehe gọna nujijọ lẹ nugbonugbo. Jesu na núdùdù gbẹtọ fọtọ́n susu to azọ́njiawu liho podọ to enẹgodo họngán sọn vivẹnu gbẹtọ lẹ tọn nado yí ì do dù ahọlu mẹ. To ozán enẹ mẹ e zinzọnlin to agbówhẹn sinsinyẹn Ohù Galili tọn ji; whlẹn Pita gán, mẹhe jẹ sisiọ ji to whenuena e zinzọnlin to agbówhẹn osin tọn he to hihò yì godo yì nukọn lọ ji; bosọ doalọtena agbówhẹn lọ nado whlẹn devi etọn lẹ gán sọn ohún sisiọ si.
Todin mẹhe Jesu ko na núdùdù to azọ́njiawu liho to agewaji-whèzẹtẹn Ohù Galili tọn mẹ lẹ mọ ẹn sẹpọ Kapẹlnaumi bo kanse dọmọ: “Whetẹnu wẹ hiẹ wafi?” To wiwọhẹ yé mẹ, Jesu dọ dọ yé to dindin emi na yé to nukundo nado mọ núdùdù vọnu devo dù wutu poun wẹ. E dotuhomẹ na yé nado wazọ́n, e mayin na núdùdù he sọgan gble gba, ṣigba na núdùdù he nọ nọte kakajẹ ogbẹ̀ madopodo. Enẹwutu gbẹtọ lẹ kanse dọmọ: “Etẹwẹ mí ni basi, bọ mí nado sọgan wà azọ́n Jiwheyẹwhe tọn?”
Jesu donù azọ́n dopo gee go he tindo nuhọakuẹ he yiaga hugan. E basi zẹẹmẹ dọmọ: “Ehe wẹ azọ́n Jiwheyẹwhe tọn dọ mì ni yise to mẹhe e dohlan mẹ.”
Etomọṣo, gbẹtọ lẹ, ma do yise hia to Jesu mẹ gba, mahopọnna azọ́njiawu he ewọ ko basi lẹpo. Dehe ma yọ́n yise wẹ yindọ, etlẹ yin to azọ́njiawu he e ko basi lẹpo godo, yé kanse dọmọ: “Etẹwẹ hiẹ basi na ohia, na mí ni mọ, bo nado yí we sè? Azọ́n tẹwẹ hiẹ wà? Otọ́ mítọn lẹ dù manna to zungbo mẹ; kẹdẹdile yè wlanwe dọ, E hẹn akla sọn olọn wá na yé dù.”
To gblọndo mẹ hlan obiọ yetọn na ohia de, Jesu hẹn Asisa awuwledainanu azọ́njiawu lẹ tọn họnwun na yé, dọmọ: “Mose ma wẹ ko na akla nẹ mì sọn olọn gba; ṣigba Otọ́ ṣie wẹ yí akla nugbo nẹ na mì sọn olọn. Na akla Jiwheyẹwhe tọn wẹ enẹ he jẹte sọn olọn, bosọ yí ogbẹ̀ na aihọn.”
Gbẹtọ lẹ sọ dọmọ: “Oklunọ, nọ na akla he mí tẹgbẹ̀.”
“Yẹn wẹ akla ogbẹ̀ tọn,” wẹ Jesu dọ. “Mẹdepope he wá dee huvẹ ma na hù i, mẹhe sọ yí mi sè, ovẹ́ ma na hú i gbede. Ṣigba yẹn dọhlan mì, dọ, Mìwlẹ ko mọ mi ga, mì ma sọ yise. Onú he Otọ́ ṣie yí na mi lẹpo na wá dee, podọ mẹhe sọ wá dè e yẹn ma na yàn ẹn jẹgbonu, gbọn alọ depope mẹ. Na yẹn jẹte sọn olọn, e ma yin nado wà ojlo ṣie lọsu gba, adavo ojlo ewọ he do mi hlan tọn. Ehe wẹ ojlo mẹhe do mi hlan tọn, dọ to onú he e ko na mi lẹ mẹ yẹn hẹn depope bú to yé mẹ blo, ṣigba na yẹn ni fọ́n ẹn dote to azán pòdo gbè. Na ehe wẹ ojlo Otọ́ ṣie tọn, dọ mẹdepope he mọ Ovi, bosọ yí ì sè, nido tindo ogbẹ̀ madopodo.”
Na ehe tọn wutu Ju lẹ jẹ hùnhlún do Jesu go ji na ewọ dọ dọ, “Yẹn wẹ akla he jẹte sọn olọn wá” wutu. Yé ma mọ nudepope to ewọ mẹ he hugan visunnu mẹjitọ gbẹtọ agbasalan de tọn gba podọ enẹwutu to ninọmẹ dopolọ mẹ dile omẹ Nazalẹti tọn lẹ basi do, yé jẹagọdo dọmọ: “E ma yin ehe wẹ Jesu, ovi Josẹfu tọn, mẹhe mí yọ́n otọ́ etọn po onọ̀ etọn po? Etẹwutu wẹ e dọ dinvie, Yẹn jẹte sọn olọn wá?”
“Mì hlún to mìde ṣẹnṣẹn blo,” wẹ Jesu gblọn. “Mẹdepope ma sọgan wá dee, adavo Otọ́ he do mi hlan dọ̀n ẹn: yẹn nasọ fọ́n ẹn dote to azán pòdo gbè. Yè sọ wlan to owe yẹwhegán lẹ tọn mẹ dọ, Yè na plọn yé omẹ pó gbọn Jiwheyẹwhe dè. Enẹwutu mẹdepope he sè, bọ yè sọ plọn gbọn Otọ́ dè, ewọ wẹ to dee wá. E ma yin mẹdepope ko mọ Otọ́ gbede gba, adavo mẹhe yin Jiwheyẹwhe tọn, ewọ wẹ ko mọ Otọ́ lọ. Nugbo, nugbo, wẹ yẹn dọ hlan mi, Mẹhe yí mi sè tindo ogbẹ̀ madopodo.”
To nukọnzinzindo mẹ, Jesu basi dọvọdọ dọmọ: “Yẹn wẹ akla ogbẹ̀ tọn lọ. Otọ́ mìtọn lẹ dù manna to zungbo mẹ, bosọ kú. Ehe wẹ akla he jẹte sọn olọn wá, na gbẹtọ nido dù to e mẹ, bo ma kú. Yẹn wẹ akla ogbẹnọ lọ, ehe jẹte sọn olọn wá; eyin mẹdepope dù to akla he mẹ, e na tin to ogbẹ̀ kakadoi.” Mọwẹ, gbọn yise didohia to Jesu mẹ dali, yèdọ omẹ lọ heyin didohlan gbọn Jiwheyẹwhe dali, gbẹtọ lẹ sọgan tindo ogbẹ̀ madopodo. Manna depope, kavi akla devo depope, ma sọgan wleawuna enẹ gba!
E họnwun dọ hodọdopọ lọ he gando akla sọn olọn mẹ wá go bẹjẹeji to ojlẹ vude godo he gbẹtọ lẹ mọ Jesu sẹpọ Kapẹlnaumi. Ṣigba e zindonukọn, bo wá vivọnu to godo mẹ whenuena Jesu plọnmẹ to sinagọgu Kapẹlnaumi tọn mẹ. Johanu 6:25-51, 59; Psalm 78:24; Isaia 54:13; Matiu 13:55-57.
▪ Nujijọ tẹlẹ wẹ jẹnukọnna hodọdopọ Jesu tọn gando akla sọn olọn mẹ wá lọ go?
▪ To pọndohlan mẹ na nuhe Jesu ko ṣẹṣẹ basi lọ, naegbọn ohia de bibiọ do yin nuhe ma sọgbe?
▪ Naegbọn Ju lẹ do hlunnudọ do alọsọakọ́n Jesu tọn nado yin akla nugbo sọn olọn mẹ wá lọ go?
▪ Fie wẹ hodọdopọ lọ dogbọn akla sọn olọn mẹ wá dali wá aimẹ te?