Jesu Wẹ “Akla Ogbẹ̀ Tọn Lọ”

To whèzẹtẹn-waji ohù Galili tọn, Jesu na núdùdù gbẹtọ fọtọ́n susu podọ to enẹgodo e họnyi to whenue yé jlo na yí i do doahọlu. To ozán enẹ mẹ, e zinzọnlin gbọn ohù he to adán ji lọ ji bo whlẹn Pita, mẹhe zinzọnlin gbọn osin ji ga, ṣigba bo jẹ sisiọ ji to whenue yise etọn depò. Jesu sọ doalọtena jẹhọn, vlavo nado whlẹn devi etọn lẹ na ohún yetọn nikaa siọ.

Todin, Jesu lẹkọwa whèyihọ-waji ohù lọ tọn to lẹdo Kapẹlnaumi tọn mẹ. Mẹhe e na núdùdù to azọ́njiawu-liho lọ lẹ mọ ẹn bo kanbiọ ẹ dọ: “Whetẹnu wẹ hiẹ wáfi?” Jesu wọhẹ yé bo dọna yé dọ yé to dindin emi na yé to nukundo nado dùnú whladopo dogọ wutu. E dotuhomẹna yé nado “wazọ́n, e ma yin na núdùdù he nọ gble gba, ṣigba na núdùdù he nọ gbọṣi aimẹ kakajẹ ogbẹ̀ madopodo.” Enẹwutu, yé kanse e dọmọ: “Etẹwẹ mí na wà nado wà azọ́n he Jiwheyẹwhe kẹalọyi lẹ?”—Johanu 6:25-28.

Yé sọgan ko to nulẹnpọn do nubiọtomẹsi he yin kinkan do Osẹ́n lọ mẹ lẹ ji, ṣigba Jesu zinnudo azọ́n he họakuẹ hugan lọ ji dọmọ: “Ehe wẹ azọ́n he Jiwheyẹwhe kẹalọyi, dọ mì ni do yise hia to mẹhe Ewọ dohlan lọ mẹ.” Ṣigba mahopọnna nuhe Jesu ko wà lẹpo, gbẹtọ lọ lẹ ma tindo yise mọnkọtọn to ewọ mẹ. Yé biọ to e si nado wà azọ́njiawu de, na yé nido sọgan yise to ewọ mẹ. Yé kanse e dọmọ: “Azọ́n tẹ wà wẹ hiẹ te?” bo yidogọ dọmọ: “Tọgbo mítọn lẹ dù manna to danfafa ji kẹdẹdile e yin kinkandai do dọ, ‘Ewọ na yé akla sọn olọn mẹ nado dù.’”—Johanu 6:29-31; Psalm 78:24.

Gando obiọ gbẹtọgun lọ tọn dọ Jesu ni wà azọ́njiawu de na yé go, ewọ dọ̀n ayidonugo yetọn wá Mẹlọ he nọ hẹn azọ́njiawu lẹ yọnbasi na taun tọn ji dọmọ: “Yẹn dọna mì dọ, E ma yin Mose wẹ na mì akla sọn olọn mẹ gba, ṣigba Otọ́ ṣie wẹ na mì akla nugbo lọ sọn olọn mẹ. Na akla Jiwheyẹwhe tọn lọ wẹ ewọ he jẹte sọn olọn mẹ wá bo na ogbẹ̀ aihọn lọ.” Na yé ma mọnukunnujẹ nuhe ji e to nùzindo lọ mẹ wutu, yé vẹ̀ ẹ dọmọ: “Oklunọ, nọ na mí akla ehe to whepoponu.” (Johanu 6:32-34) Ṣigba, “akla” tẹ hodọ wẹ Jesu te?

E basi zẹẹmẹ dọmọ: “Yẹn wẹ akla ogbẹ̀ tọn. Huvẹ ma na hù ewọ he wá dè e gbede, podọ nugbla ma na hù ewọ he do yise hia to yẹn mẹ pọ́n gbede. Ṣigba, yẹn ko dọna mì dọ, Mìwlẹ tlẹ ko mọ mi ṣogan mì ma yise. . . . Yẹn ko jẹte sọn olọn mẹ wá, e ma yin nado wà ojlo ṣie gba, ṣigba ojlo ewọ he do mi hlan tọn. Ehe wẹ ojlo mẹhe do mi hlan tọn, dọ yẹn hẹn depope to mẹhe ewọ ko na mi lẹ mẹ bu blo ṣigba dọ yẹn ni fọ́n yemẹpo sọnku to azán godo tọn gbè. Na ehe wẹ ojlo Otọ́ ṣie tọn, dọ mẹdepope he yọ́n Visunnu lọ bo do yise hia to ewọ mẹ ni tindo ogbẹ̀ madopodo, yẹn nasọ fọ́n ẹn sọnku to azán godo tọn gbè.”—Johanu 6:35-40.

Hodidọ ehe hẹn Ju lẹ gblehomẹ, podọ yé jẹ nuhlundọ gando ewọ go ji. Naegbọn e na do dọ dọ emi “wẹ akla he jẹte sọn olọn mẹ wá lọ”? (Johanu 6:41) To linlẹn yetọn mẹ, visunnu gbẹtọvi tọn de poun wẹ ewọ yin bo wá sọn Galili to tòdaho Nazalẹti tọn mẹ. Gbẹtọ lọ lẹ kanse dọmọ: “Be e ma yin Jesu visunnu Josẹfu tọn, mẹhe mí yọ́n otọ́ po onọ̀ etọn po lọ die ya?”—Johanu 6:42.

Jesu gblọn dọmọ: “Mì gbọ nuhlundọ to mìdelẹ ṣẹnṣẹn. Mẹdepope ma sọgan wá dè e adavo Otọ́ he do mi hlan dọ̀n ẹn; yẹn nasọ fọ́n ẹn sọnku to azán godo tọn gbè. E yin kinkandai to owe Yẹwhegán lẹ tọn mẹ dọ, ‘Yemẹpo nasọ yin pinplọn gbọn Jehovah dali.’ Mẹdepope he nọ dotoaina Otọ́ bo nọ yin pinplọn gbọn ewọ dali nọ wá dè e. E ma yindọ mẹdepope ko mọ Otọ́ lọ pọ́n wẹ gba, adavo yẹn mẹhe wá sọn Jiwheyẹwhe dè; yẹn kẹdẹ wẹ mọ Otọ́ lọ pọ́n. Nugbonugbo wẹ yẹn dọna mì dọ, Ewọ he yise tindo ogbẹ̀ madopodo.”—Johanu 6:43-47; Isaia 54:13.

To whenue Jesu to hodọ hẹ Nikodẹmi wayi, e donù ogbẹ̀ madopodo go bo dohia dọ e tindo kanṣiṣa hẹ yise tintindo to Visunnu gbẹtọ tọn mẹ bo dọmọ: “Mẹdepope he do yise hia to [Visunnu detọ́n dopo akàn Jiwheyẹwhe tọn] mẹ ma nado yin vivasudo adavo nado tindo ogbẹ̀ madopodo.” (Johanu 3:15, 16) Ṣigba todin, todoaitọ susu wẹ e to hodọna, bo to didọna yé dọ azọngban he emi tindo nado hẹndi wẹ na gọalọna yé nado tindo ogbẹ̀ madopodo, ehe manna lọ kavi akla he yé sọgan mọ to lẹdo Galili tọn mẹ ma sọgan na yé. Enẹwutu, nawẹ mẹde sọgan tindo ogbẹ̀ madopodo gbọn? Jesu vọ́ ohó dopolọ dọ dọmọ: “Yẹn wẹ akla ogbẹ̀ tọn lọ.”—Johanu 6:48.

Hodọdopọ ehe gando akla sọn olọn mẹ wá go zindonukọn, bo wá tadona ayidego tọn de kọ̀n to whenue Jesu to mẹplọn to sinagọgu de mẹ to Kapẹlnaumi.