Weta 55

Devi Susu Lẹkọ sọn Jesu Godo

JESU to mẹplọn to sinagọgu de mẹ to Kapẹlnaumi gando azọngban etọn go taidi akla nugbo lọ sọn olọn mẹ wá. E họnwun dọ hodidọ etọn yin nukọnyiyi hodọdopọ he bẹjẹeji hẹ gbẹtọ lẹ to whenuena yé mọ ẹn to kọlilẹ yetọn sọn whèzẹtẹn-waji Ohù Galili tọn whenu, fie yé ko dùnú te sọn blẹdi po whèvi heyin awuwlena to azọ́njiawu liho lẹ po mẹ.

Jesu zindonukọn to zẹẹmẹ etọn lẹ mẹ, dọmọ: “Akla he yẹn na na lọ wẹ olàn ṣie, ehe yẹn na na na ogbẹ̀ aihọn tọn.” Owhe awe poun die jẹnukọn, to amàkikọ-whenu owhe 30 W.M., Jesu dọna Nikodemi dọ Jiwheyẹwhe yiwanna aihọn susu sọmọ bọ e do wleawu Visunnu etọn tọn taidi Mẹwhlẹngantọ de. Gbọnmọ dali, Jesu to didohia dọ mẹdepope sọn aihọn gbẹtọvi lẹ tọn mẹ he dù agbasa etọn to yẹhiadonu liho, gbọn yise yiyizan to avọ́sinsan he ewọ na basi to madẹnmẹ lọ mẹ dali, sọgan mọ ogbẹ̀ madopodo yí.

Ṣigba, ohó Jesu tọn lẹ hẹn gbẹtọ lọ lẹ dahli. “Nawẹ dawe he sọgan yí olàn etọn na mí nado dù do?” wẹ yé kanse. Jesu jlo dọ todoaitọ etọn lẹ ni mọnukunnujẹemẹ dọ olàn etọn dùdù na yin to yẹhiadonu liho. Enẹwutu, nado zinnudo ehe ji, e dọ nude he sọgan gbẹ́ yin agọjẹdo taun eyin yé pọ́n ẹn hlan to aliho paa de mẹ.

“Adavo mì dù olàn Ovi gbẹtọ tọn, bosọ nù ohùn etọn, mì ma tindo ogbẹ̀ to mì mẹ gba,” wẹ Jesu lá dọ. “Mẹdepope he dù olàn ṣie, bosọ nù ohùn ṣie, e tindo ogbẹ̀ madopodo; yẹn nasọ fọ́n ẹn dote to azán pòdo gbè. Na olàn ṣie wẹ akla nugbo, ohùn ṣie sọ wẹ núnùnù nugbo. Mẹhe dù olàn ṣie, bosọ nù ohùn ṣie, ewọ to ninọ̀ yẹn mẹ, yẹn sọ to ninọ̀ ewọ mẹ.”

Nugbo wẹ dọ, nuplọnmẹ Jesu tọn na taidi nuhe ma yọ́n sè paali eyin ayinamẹ gbẹtọlàn-dùdù tọn wẹ ewọ to nina. Ṣigba, na nugbo tọn, Jesu ma to ayinamẹ olàn paa dùdù kavi ohùn nùnù tọn na gba. Nuhe ji e to nùzindo poun wẹ yindọ mẹhe kẹalọyi ogbẹ̀ madopodo lẹpo dona do yise hia to avọ́sinsan he ewọ na wá basi mẹ to whenuena e na yí agbasa gbẹtọ pipé etọn do sanvọ́ bo sọ̀n ohùn ogbẹ̀ tọn etọn dai. Ṣogan, susu to devi etọn lẹ mẹ wẹ ma tlẹ ze afọdide depope nado mọnukunnujẹ nuplọnmẹ etọn mẹ bo jẹagọdo dọmọ: “Ohó he sinyẹnawu tlala wẹ ehe; mẹnu wẹ sọgan sè e?”

To yinyọnẹn dọ susu to devi etọn lẹ mẹ wẹ to hùnhlún, Jesu dọmọ: “Ehe hẹn mì nado dahli wẹ? Be etẹwẹ eyin mì mọ bọ Ovi gbẹtọ tọn hẹji jei fihe e sọn wá? . . . Ohó he yẹn dọ hlan mì nẹlẹ, gbigbọ wẹ yé, ogbẹ̀ sọ wẹ yé. Ṣigba mẹdelẹ tin to mì mẹ, he ma yise.”

Jesu zindonukọn dọmọ: “Enẹwutu wẹ yẹn do dọ hlan mì, dọ, Mẹde ma sọgan wá dee, adavo yè na ẹn sọn Otọ́ ṣie dè.” Na enẹ tọn wutu, susu to devi etọn lẹ mẹ lẹkọ bo ma sọ hodo e ba. Enẹwutu Jesu lẹhlan apọsteli 12 etọn lẹ bo kanse dọmọ: “Mìwlẹ jlo na yì ga?

Pita gblọn dọmọ: “Oklunọ, mẹnu dè míwlẹ na yì? Hiẹ wẹ tindo ohó ogbẹ̀ madopodo tọn. Míwlẹ ko sọ yise, bosọ yọnẹn dọ, hiẹ wẹ Klisti lọ, Ovi Jiwheyẹwhe ogbẹnọ tọn.” Apajlẹ hogbe nugbonọ-yinyin tọn nankọ die, dile etlẹ yindọ Pita po apọsteli diẹ lẹ po sọgan ko gọ̀n ma mọnukunnujẹ nuplọnmẹ Jesu tọn do whẹho ehe ji to gigọ́ mẹ!

Dile etlẹ yindọ gblọndo Pita tọn hẹn homẹ etọn hùn, Jesu basi zẹẹmẹ dọmọ: “Mì omẹ wiawe ma wẹ yẹn dè, bọ dopo mìtọn yin lẹgba de?” Ewọ to hodọ dogbọn Juda Iskaliọti dali. Vlavo to ojlẹ ehe mẹ Jesu doayi “bẹjẹeji,” kavi afọdide, aliho ylankan de tọn go to Judasi mẹ.

Jesu ko ṣẹṣẹ hẹn gbẹtọ lẹ jẹflumẹ gbọn gbigbẹ́ afọdide yetọn lẹ nado yí ì do dù ahọlu dai dali, bọ yé sọgan ko to nulẹnpọn dọ, ‘Nawẹ omẹ ehe sọgan yin Mẹssia lọ gbọn eyin ewọ ma na kẹalọyi nado jẹ otẹn he jẹ na Mẹssia lọ mẹ?’ Ehe ga, na yin whẹho yọyọ de to ayiha gbẹtọ lẹ tọn mẹ. Johanu 6:51-71; 3:16.

▪ Mẹnu lẹ wẹ Jesu yí olàn etọn na, podọ nawẹ omẹ ehelẹ ‘dù olàn etọn’ gbọn?

▪ Hodidọ yinukọn Jesu tọn tẹlẹ wẹ hẹn gbẹtọ lẹ dahli, ṣogan etẹ ji wẹ ewọ to nùzindo?

▪ To whenuena mẹsusu lẹkọ sọn Jesu godo, etẹwẹ yin gblọndo Pita tọn?