Kanbiọ lẹ sọn Wehiatọ lẹ Dè

Etẹwẹ ‘ogbẹ̀ tintindo to ede mẹ’ zẹẹmẹdo?

Biblu dọho gando Jesu Klisti go taidi mẹhe tindo “ogbẹ̀ to ede mẹ” podọ gando hodotọ etọn lẹ go taidi mẹhe tindo ‘ogbẹ̀ to yedelẹ mẹ.’ (Johanu 5:26; 6:53) Ṣigba, wefọ awe ehelẹ ma tindo zẹẹmẹ dopolọ gba.

“Dile Otọ́ tindo ogbẹ̀ to ede mẹ,” wẹ Jesu dọ, “mọkẹdẹ wẹ e yí na Ovi ga nado tindo ogbẹ̀ to ede mẹ.” Jẹnukọnna ohó ayidego tọn ehe didọ, Jesu dọmọ: “Nugbo, nugbo, wẹ yẹn dọ hlan mì, Mẹdepope he se ohó ṣie, bosọ yí mẹhe do mi hlan sè, e tindo ogbẹ̀ madopodo . . . Ojlẹ lọ ja, dinvie sọ wẹ, whenuena oṣiọ lẹ na sè ogbè Ovi Jiwheyẹwhe tọn tọn: mẹhe sọ sè lẹ na tin to ogbẹ̀.” Tofi Jesu to alọdlẹndo huhlọn jiawu he Otọ́ etọn na ẹn—yèdọ nugopipe lọ nado na gbẹtọvi lẹ teninọ dagbe de to Jiwheyẹwhe nukọn. Humọ, Jesu penugo nado fọ́n mẹhe to amlọndọ to okú mẹ lẹ bo na yé ogbẹ̀. Na Jesu, tintindo “ogbẹ̀ to ede mẹ” zẹẹmẹdo dọ e yin nina huhlọn ehelẹ. Enẹwutu taidi Otọ́ lọ, Ovi lọsu tindo ‘nunina ogbẹ̀ tọn to ede mẹ,’ dile hogbe lọ sọgan sọ yin zẹẹmẹ basina do. (Johanu 5:24-26) Etẹwẹ dogbọn hodotọ etọn lẹ dali?

Nudi owhe dopo godo, Jesu dọhona todoaitọ etọn lẹ, dọmọ: “Nugbo, nugbo, wẹ yẹn dọ hlan mì, Adavo mì dù olàn Ovi gbẹtọ tọn tọn, bosọ nù ohùn etọn, mì ma tindo ogbẹ̀ to [mìde] mẹ gba. Mẹdepope he dù olàn ṣie, bosọ nù ohùn ṣie, e tindo ogbẹ̀ madopodo; yẹn nasọ fọ́n ẹn do ote to azán podo gbè.” (Johanu 6:53, 54) Tofi Jesu yí hodidọ lọ tintindo ‘ogbẹ̀ to mìde mẹ’ jlẹdo “ogbẹ̀ madopodo” mimọyi go. Hodidọ he tindo dodonu Glẹkigbe tọn dopolọ lẹ taidi tintindo ‘ogbẹ̀ to mìde mẹ’ yin mimọ to fidevo lẹ to Owe-wiwe Glẹki tọn mẹ. Apajlẹ voovo awe die, “Mì do ojẹ̀ to mìlọsu homẹ” podọ “to mimọ to ohò yede tọn mẹ, ale nuṣiwa yetọn tọn.” (Malku 9:50; Lomunu lẹ 1:27) To whẹho ehelẹ mẹ, hodidọ lọ lẹ ma zẹẹmẹdo dọ yé tindo huhlọn nado na ojẹ̀ mẹdevo lẹ kavi nado na ale mẹde gba. Kakatimọ, e do Nblebu-yinyin, kavi gigọ́-yinyin homẹ tọn hia. Enẹwutu, hodidọ lọ ‘ogbẹ̀ to mìde mẹ’ heyin yiyizan to Johanu 6:53 zẹẹmẹdo ogbẹ̀ gigọ́ mimọyi poun.

To alọdindlẹndo hodotọ etọn lẹ taidi mẹhe tindo ogbẹ̀ to yede mẹ, Jesu donu agbasalan po ohùn etọn po go. To godo mẹ, to Tenu Núdùdù Oklunọ tọn zizedai whenu, Jesu sọ dọho gando agbasalan po ohùn etọn po go bosọ dọna hodotọ etọn he na yin hinhẹn biọ alẹnu yọyọ lọ mẹ lẹ nado tindo mahẹ to yẹhiadonu akla madotọ́n po ovẹn lọ po mẹ. Be ehe zẹẹmẹdo dọ Klistiani yiamisisadode he tin to alẹnu yọyọ lọ mẹ hẹ Jehovah Jiwheyẹwhe lẹ kẹdẹ wẹ mọ ogbẹ̀ gigọ́ mọnkọtọn yí ya? Lala. Vogbingbọn owhe dopo tọn wẹ tin to nujijọ awe lọ lẹ ṣẹnṣẹn. Mẹhe se ohó Jesu tọn heyin kinkàndai to Johanu 6:53, 54 mẹ lẹ ma yọ́n nudepope gando hùnwhẹ whemẹwhemẹ tọn po yẹhiadonu he nọtena agbasalan po ohùn Klisti tọn po go gba.

Sọgbe hẹ Johanu weta 6, Jesu yí agbasalan etọn jlẹdo manna go jẹnukọn, bo dọmọ: “Otọ́ mìtọn lẹ dù manna to zungbo mẹ, bosọ kú. Ehe wẹ akla he jẹte sọn olọn wá, na gbẹtọ nido dù to e mẹ, bo ma kú. Yẹn wẹ akla ogbẹ̀nọ lọ, ehe jẹte sọn olọn wá; eyin mẹdepope dù to akla he mẹ, e na tin to ogbẹ̀ kakadoi.” Agbasalan Jesu tọn, po ohùn etọn po, klo tlala hugan manna paa lọ. Gbọnna? To linlẹn lọ mẹ dọ agbasalan etọn yin nina na “ogbẹ̀ aihọn tọn,” bo hẹn ogbẹ̀ madopodo yọnbasi.a Enẹwutu, hodidọ lọ heyin tintindo ‘ogbẹ̀ to mìde mẹ’ to Johanu 6:53 mẹ gando mẹhe na mọ ogbẹ̀ madopodo yí lẹpo go—to olọn mẹ kavi to aigba ji.—Johanu 6:48-51.

Whetẹnu wẹ hodotọ Klisti tọn lẹ mọ ogbẹ̀ yí to yede mẹ, kavi mọ ogbẹ̀ gigọ́ yí? Na whédutọgbẹ́ yiamisisadode Ahọluduta lọ tọn lẹ, ehe nọ jọ to fọnsọnku yetọn yì ogbẹ̀ olọn mẹ tọn whenu taidi nudida gbigbọnọ jọmaku lẹ. (1 Kọlintinu lẹ 15:52, 53; 1 Johanu 3:2) “Lẹngbọ devo” Jesu tọn lẹ na mọ ogbẹ̀ gigọ́ yí to vivọnu Gandudu Owhe Fọtọ́n etọn tọn godo. To whenẹnu, yé na ko yin whiwhlepọn, bo yin mimọ nado yin nugbonọ, bosọ yin lilá di dodonọ na ogbẹ̀ madopodo to aigba Paladisi tọn ji.—Johanu 10:16; Osọhia 20:5, 7-10.

[Nudọnamẹ Odò tọn]

[Yẹdide to weda 31]

Klistiani nugbo lẹpo sọgan tindo ‘ogbẹ̀ to yede mẹ’