Weta 61
Yè Hẹnazọngbọna Visunnu He Tindo Gbigbọ Aovi Tọn
WHENUE Jesu, Pita, Jakobu, po Johanu po ma tin to finẹ, bo sọgan ko tin to Osó Helmoni ji aga, devi he pò lẹ biọ nuhahun de mẹ. To kọlilẹ etọn whenu, Jesu mọ to afọdopolọji dọ onú de ko jẹdò. Gbẹtọgun de pli lẹdo devi etọn lẹ to finẹ, bọ wekantọ lẹ to núdọ̀n hẹ yé. To Jesu mimọ mẹ, e paṣa gbẹtọ lọ lẹ taun bọ yé sọ họ̀nwezun yì nado dọnudo e. “Etẹwẹ mì to kinkanbiọ yé?” wẹ e kanse.
Sọn gbẹtọgun lọ ṣẹnṣẹn, dawe de sẹ̀ wá nukọn bo jẹklo to Jesu nukọn bo basi zẹẹmẹ dọmọ: “Mẹplọntọ, yẹn hẹn visunnu ṣie he tindo gbigbọ unbọpẹn de wá dè we; fidepope e ze e te e nọ dlẹn ẹn; e nọ to fútúfutuyẹn, e nọ to adúkúnkún dù, bosọ nọ dakú; yẹn sọ dọ hlan nuplọntọ towe lẹ na yé ni yàn ẹn jẹgbonu; yé ma sọ sọgan.”
E họnwun dọ wekantọ lẹ basi nuhe go yé pé lẹpo na awugbopo devi lẹ tọn nado hẹnazọ̀ngbọna dẹpẹ lọ, vlavo bo to vivẹnudido yetọn ṣankò. To ojlẹ awusinyẹn tọn ehe mẹ pẹpẹ, wẹ Jesu wá. “Whẹndo mayisenọ,” wẹ e dọ, “nawẹ yẹn na nọ̀ dẹn to mì dè sọ? Nawẹ yẹn na sinyẹnlin dẹn to mì dè sọ?”
E taidi dọ mẹhe tin to finẹ lẹpo wẹ Jesu to ohó etọn lẹ dọ hlan, ṣigba matin ayihaawe titengbe wekantọ lẹ wẹ e to alọdlẹndo, mẹhe ko to nuhahun dọndai na devi etọn lẹ. Enẹgodo, Jesu dọ dogbọn dẹpẹ lọ dali dọmọ: “Hẹn ẹn wá dee.” Ṣigba dile dẹpẹ lọ wá Jesu dè, gbigbọ aovi tọn he e tindo lọ sọ zìn in dai bọ adingbè sinsinyẹn ze e. Dẹpẹ lọ bli gbọn kọmẹ bo yẹ̀n fútúfútú sọn onù mẹ.
“Nawẹ e dẹn sọ sọn whenuena ehe ko wá na ẹn?” wẹ Jesu kanse.
“Sọn ovu gbọ́n,” wẹ otọ́ lọ dọ. “Whẹwhẹ wẹ e [gbigbọ aovi tọn lọ] nọ ze e dlan miyọ́n mẹ, podọ do osin mẹ, nado hù i sudo.” Enẹgodo otọ́ lọ vẹvẹ dọmọ: “Eyin hiẹ sọgan wà onú depope, walẹblanuna mí, bo gọalọna mí.”
Vlavo na owhe susu, otọ́ lọ ko to alọgọ dín. Podọ todin, po awugbopo devi Jesu tọn lẹ tọn po, todido matindo etọn ko lẹzun daho. To didesọn ovẹvivẹ todido matindo dawe lọ tọn mẹ, Jesu dọ po tulinamẹ po dọmọ: “Eyin hiẹ sọgan yise, onú lẹpo wẹ wiwà hlan ewọ mẹhe yise.”
“Yẹn yise,” wẹ otọ́ lọ dawhá dọ to afọdopolọji, ṣigba e vẹvẹ dọmọ: “Gọalọna mayise ṣie.”
To ayididego dọ gbẹtọgun lọ to yedelẹ bẹpli do yé ji, Jesu wọhẹ gbigbọ aovi tọn lọ dọmọ: “Hiẹ gbigbọ unbọpẹn, tókunọ, yẹn dọ hlan we, tọ́n sọn e mẹ, a sọ biọ e mẹ ba blo.” Dile gbigbọ aovi tọn lọ tọ́n jei, whladopo dogọ e hẹn dẹpẹ lọ nado dawhá jẹgbonu bosọ ze e biọ adingbè mẹ whlasusu. Enẹgodo dẹpẹ lọ mlọnai whii do kọmẹ, bọ suhugan gbẹtọ lẹ tọn jẹ didọ ji dọmọ: “E kú.” Ṣigba Jesu hẹn alọ dẹpẹ lọ tọn go, bọ e sọ fọ́n.
Jẹnukọn dai, to whenuena devi lọ lẹ yin didohlan nado dọyẹwheho, yé ko yàn gbigbọ aovi lẹ jẹgbonu. Enẹwutu todin, to whenuena yé biọ họmẹ, yé kanse Jesu to nuglọ dọmọ: “Etẹwutu wẹ míwlẹ ma sọgan yàn ẹn jẹgbonu?”
To didohia mẹ dọ na yise matindo yetọn wutu wẹ, Jesu gblọn dọmọ: “Ehe hunkọ ma sọgan tọnjẹgbonu wá gbọn nudepope mẹ, adavo gbọn odẹ̀ po nùbla po dali.” Kunnudenu dohia dọ e biọ awuwle nado sọgan yàn gbigbọ aovi tọn huhlọnnọ vonọtaun he whẹho ehe bẹhẹn jẹgbonu. Nuhudo tin na yise sinsinyẹn to pọmẹ po odẹ̀ po nado biọ alọgọ huhlọn Jiwheyẹwhe tọn.
Podọ enẹgodo Jesu yidogọ dọmọ: “Nugbo wẹ yẹn dọ hlan mì, Eyin mìwlẹ tindo yise di okún mutaldi tọn dopo, mìwlẹ na dọ hlan osó he, dọmọ, Sẹtẹn sọn ofi yì odọ́n nẹ: e nasọ sẹtẹn; podọ onú depope ma nasọ glo mì gba.” Lehe yise tindo huhlọn do sọ!
Aliglọnnamẹnu po awusinyẹnnamẹnu lẹ po he nọ glọnalina nukọnyiyi to sinsẹ̀nzọn Jehovah tọn mẹ sọgan taidi nuhe ma yọ́n dududeji podọ he ma yọ́n tẹnsẹna taidi osó he klo taun de. Ṣogan, Jesu to didohia dọ eyin mí wleawuna yise to ahun mítọn lẹ mẹ, bo nọ húsin na ẹn podọ nọ to tulina ẹn nado whẹ́n, e na yinukọn jẹ whinwhẹ́n kọ̀n bo na hẹn mí penugo nado duto aliglọnnamẹnu po awusinyẹnnamẹnu he taidi osó mọnkọtọn lẹ po ji. Malku 9:14-29; Matiu 17:19, 20; Luku 9:37-43.
▪ Ninọmẹ tẹwẹ Jesu pehẹ to whenuena e lẹkọ sọn Osó Helmoni tọn ji?
▪ Tulinamẹ tẹwẹ Jesu na otọ́ dẹpẹ he tindo gbigbọ aovi tọn lọ?
▪ Naegbọn devi lẹ ma penugo nado yàn gbigbọ aovi tọn lọ?
▪ Nawẹ Jesu do lehe yise sọgan tindo huhlọn sọ hia gbọn?