Weta 67
Yé Gboawupo Nado Wle E
DILE Hùnwhẹ Gòhọtúntún tọn lọ gbẹ́ pò to yìyì alọnu, sinsẹ̀ngan lẹ do ponọ-gán lẹ hlan nado wle Jesu. Ewọ ma tẹnpọn nado whlá ede gba. Kakatimọ, Jesu zindonukọn nado to mẹplọn to gbangba, dọmọ: “Whenu vude dogọ́ wẹ yẹn tin to mì dè, yẹn bo na yì mẹhe do mi hlan dè. Mì na dín mi, mì ma nasọ mọ mi: podọ fihe yẹn te, finẹ mì ma na sọgan wá.”
Ju lẹ ma mọnukunnujẹemẹ, podọ enẹwutu yé kanse to yedelẹ ṣẹnṣẹn dọmọ: “Fie e na yì, bọ míwlẹ ma na mọ ẹn? Be ewọ jei mẹhe gbàpe to Kosi lẹ ṣẹnṣẹn dè, bosọ to Kosi lẹ plọn wẹ? Ohó tẹ hunkọ wẹ ehe e dọ, dọmọ, Mì na dín mi, mì ma nasọ mọ mi; podọ fihe yẹn te, finẹ mì ma na sọgan wá?” Na nugbo tọn, Jesu to hodọ dogbọn okú etọn he to sisẹpọ lọ dali po fọnsọnku hlan ogbẹ̀ olọn mẹ tọn po, fie kẹntọ etọn lẹ ma sọgan hodo e yì.
Azán ṣinawetọ heyin azán godo tọn hùnwhẹ lọ tọn wá. To afọnnu dopodopo hùnwhẹ lọ tọn, yẹwhenọ de nọ kọ̀n osin, he e bà sọn Otándo Siloami tọn mẹ lọ jẹgbonu, na e nido sọgan sà jẹ dodonu agbà lọ tọn kọ̀n. Vlavo nado sọgan flin gbẹtọ lẹ dogbọn hùnwhẹ egbesọ tọn ehe dali, Jesu dawhá jẹgbonu dọmọ: “Eyin ovẹ́ hú mẹdepope, mì gbọ e ni wá dè e, bo nù. Mẹdepope he yí mi sè, dile Owe-wiwe dọ, sọn ohò etọn mẹ otọ̀ osin ogbẹ̀ tọn na nọ sà sọn.”
Na nugbo tọn, Jesu to hodọ tofi dogbọn kọdetọn daho hugan lẹ dali to whenuena gbigbọ wiwe lọ na yin kinkọ̀n jẹgbonu. To owhe he bọdego mẹ kinkọ̀n jẹgbonu gbigbọ wiwe tọn ehe jọ to Pẹntikọsti. To finẹ, asisa osin ogbẹ̀ tọn sà jẹgbonu to whenuena devi 120 lẹ jẹ devizọnwa hlan gbẹtọ lẹ ji. Ṣigba kakajẹ whenẹnu, gbigbọ depope ma ko tin gba to linlẹn lọ mẹ dọ devi Klisti tọn depope ma ko yin amisisadode po gbigbọ wiwe po bo ko yin yiylọ hlan ogbẹ̀ olọn mẹ tọn gba.
To gbeyiyi mẹ hlan mẹpinplọn Jesu tọn, mẹdelẹ jẹ didọ ji dọmọ: “Sọn nugbo de mẹ ehe wẹ Yẹwhegán lọ,” kunnudenu dohia dọ yé to alọdlẹndo yẹwhegán lọ he klohugan Mose he yin opagbe etọn do nado wá. Mẹdelẹ dọmọ: “Ehe wẹ Klisti lọ.” Ṣigba mẹdevo lẹ jẹagọdo dọmọ: “Etẹ, Galili wẹ Klisti tọ́n sọn wá? Be Owe-wiwe ma ko dọmọ, Klisti na sọn okún Davidi tọn mẹ wá, podọ sọn otò Bẹtlẹhẹm tọn mẹ, fihe Davidi ko te?”
Enẹwutu kinklan de fọ́n to gbẹtọgun lọ ṣẹnṣẹn. Mẹdelẹ jlo dọ Jesu ni yin wiwle, ṣigba mẹdepope ma doalọ e go gba. To whenuena ponọ-gán lẹ lẹkọwa bo ma wle Jesu, yẹwhenọ daho lẹ po Falesi lẹ po kanse dọmọ: “Etẹwutu mì ma hẹn ẹn wá?”
“Omẹ de ma dọho domọ gbede,” wẹ ponọ-gán lọ lẹ gblọn dọ.
Yin gigọ́ po homẹgble po, sinsẹ̀ngan lọ lẹ wleawu nado ṣanmẹkò, dọ onú agọ̀, bo to mẹzùn. Yé davlẹ dọmọ: “Be yè hẹn mìwlẹ danbú ga wẹ? Be mẹde yí ì sè to ogán lẹ mẹ, kavi to Falesi lẹ mẹ? Ṣigba agundaho he ma yọ́n osẹ́n lọ wẹ yè hodẹdo.”
To ehe sisè mẹ, Nikodemi, yèdọ Falesi de he sọ yin ogán Ju lẹ tọn de (enẹ wẹ yin, hagbẹ Tòhódọtọ Ju lẹ tọn), yí adọgbigbo do dọho do ota Jesu tọn mẹ. Hiẹ sọgan flin dọ to owhe awe daa die wayi, Nikodemi wá Jesu dè to zanmẹ bo do yise hia to ewọ mẹ. Todin Nikodemi dọmọ: “Be osẹ́n mítọn nọ dawhẹna mẹde whẹpo sè sọn ewọ lọsu dè, bosọ yọ́n onú he e wà?”
Homẹ sọ vọ́ gble Falesi lẹ taun dọ mẹde to yedetiti lẹ mẹ tlẹ sọ to avunlọ yí na Jesu. “Galili tọn wẹ hiẹ ga?” wẹ yé yí adi do dọ. “Dín, bo pọ́n: dọ yẹwhegán de ma fọ́n sọn Galili gba.”
Dile etlẹ yindọ Owe-wiwe lẹ ma dọ tlọlọ dọ yẹwhegán de na wá sọn Galili, yé dlẹnalọdo Klisti dọ e na wá sọn finẹ, bo dọ dọ “hinhọ́n daho” na yin mimọ to agbegbe ehe mẹ. Humọ, Jesu yin jiji to Bẹtlẹhẹm, podọ e sọ yin ovivi Davidi tọn. Dile etlẹ yọnbasi dọ Falesi lẹ yọ́n ehe, e taidi dọ yewlẹ wẹ to nukunnumọjẹnumẹ agọ̀ he gbẹtọ lẹ tindo dogbọn Jesu dali lọ lẹ hẹn gbayipe. Johanu 7:32-52; Isaia 9:1, 2; Matiu 4:13-17.
▪ Etẹwẹ nọ jọ to afọnnu hùnwhẹ lọ tọn lẹpo, podọ nawẹ Jesu sọgan ko to ayidonugo dọ̀n wá ehe ji gbọn?
▪ Naegbọn ponọ-gán lọ lẹ gboawupo nado wle Jesu, podọ nawẹ sinsẹ̀ngan lẹ yinuwa gbọn?
▪ Mẹnu wẹ Nikodemi yin, etẹwẹ yin walọyizan etọn hlan Jesu, podọ nawẹ Falesi hatọ etọn lẹ yinuwa hẹ ẹ gbọn?
▪ Kunnudenu tẹwẹ tin dọ Klisti lọ na wá sọn Galili?