Plọnnu sọn Nikodemi Dè

“EYIN mẹde na jlo hodo mi, gbọ e ni mọ́n ede, bosọ ze [yatin] etọn egbesọ, bo hodo mi.” (Luku 9:23) Whèhutọ whiwhẹnọ lẹ po takuẹ-ṣinyantọ he yè gbẹwanna lẹ po kẹalọyi oylọ-basinamẹ enẹ to afọdopolọji. Yé jo onú lẹpo dai bo hodo Jesu.—Matiu 4:18-22; Luku 5:27, 28.

Oylọ-basinamẹ Jesu tọn gbẹ́ to yinyin sisè to egbehe, bọ mẹsusu ko sọ yigbe. Ṣigba, delẹ to mẹhe nọ duvivi Biblu pinplọn hẹ Kunnudetọ Jehovah tọn lẹ nọ dọngbàn nado ‘mọ́n yede bo ze yatin yetọn.’ Yé nọ whleawu nado didá azọngban po lẹblanulọkẹyi devi Jesu tọn yinyin tọn po.

Etẹwutu mẹdelẹ nọ whleawu nado kẹalọyi oylọ-basinamẹ Jesu tọn bo klan yede do wiwe hlan Jehovah Jiwheyẹwhe? Nugbo wẹ dọ, mẹhe mayin pinpọn e go whẹ́n to sinsẹ̀n Ju lẹ po Klistiani lẹ po tọn mẹ lẹ sọgan tindo nuhudo ojlẹ susu tọn whẹpo do mọnukunnujẹ tintin Jiwheyẹwhe ganhunupotọ, nujọnu tọn de mẹ. Ṣogan, to whenuena yé ko yin dududeji dọ Jiwheyẹwhe yin omẹ nujọnu tọn de godo, mẹdelẹ nọ gbẹ́ ma nado hodo afọdòmẹ Jesu tọn. Yé sọgan to budi na nuhe hẹnnumẹ po họntọn yetọn lẹ po na lẹn gando yé go eyin yé lẹzun Kunnudetọ Jehovah tọn. Mẹdevo, he ma nọ yọ́n niyaniya-yinyin ojlẹ he mẹ mí to gbẹnọ te tọn lẹ, nọ lẹhlan afọdidona yindidi po adọkun po kọ̀n. (Matiu 24:36-42; 1 Timoti 6:9, 10) Depope he whẹho lọ yin, na mẹhe to nudide yetọn sisẹ hlan nukọn nado lẹzun hodotọ Jesu tọn, nuplọnmẹ de tin he yé sọgan plọn sọn kandai Nikodemi, heyin nukọntọ adọkunnọ Juvi lẹ tọn de to azán Jesu tọn gbè dè.

Yin Nina Dotẹnmẹ Hundote Jiawu Lẹ

To nudi osun ṣidopo godo poun he Jesu bẹ lizọnyizọn aigba ji tọn etọn jẹeji, Nikodemi yọ́n Jesu ‘taidi mẹplọntọ he wá sọn Jiwheyẹwhe dè.’ Na azọ́njiawu he Jesu wà to madẹnmẹ wayi to Jelusalẹm to Juwayi 30 W.M. yinuwado ewọ ji wutu, Nikodemi wá to zánmẹ, nado dohia dọ emi yise to Jesu mẹ podọ nado plọnnu dogọ gando mẹplọntọ ehe go. To enẹ yinyọnẹn mẹ, Jesu dọ nugbo he siso de na Nikodemi gando nuhudo nado yin ‘vivọji’ go nado sọgan biọ Ahọluduta Jiwheyẹwhe tọn mẹ. To ojlẹ ehe mẹ, Jesu sọ dọ hogbe ehelẹ ga dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì se ma nado dọ̀n, ṣigba e nido tindo ogbẹ̀ madopodo.”—Johanu 3:1-16.

Nukundido jiawu nankọ die tin to nukọn na Nikodemi! E sọgan lẹzun gbẹdohẹmẹtọ pẹkipẹki Jesu tọn, bo yí nukun do mọ adà voovo gbẹzan aigba ji Jesu tọn. Taidi nukọntọ Ju lẹ tọn po mẹplọntọ de po to Islaeli, Nikodemi tindo oyọnẹn dagbe Ohó Jiwheyẹwhe tọn. E sọ tindo wuntuntun dagbe, heyin didohia gbọn yinyọ́n Jesu taidi mẹplọntọ he Jiwheyẹwhe dohlan de dali. Nikodemi tindo ojlo to onú gbigbọmẹ tọn lẹ mẹ, podọ e sọ whiwhẹ taun. Lehe e na sinyẹnawu na hagbẹ whẹdatẹn he yiaga hugan Ju lẹ tọn de nado kẹalọyi visunnu whlẹpatọ de tọn taidi mẹhe yin didohlan gbọn Jiwheyẹwhe dali do sọ! Jẹhẹnu enẹ lẹpo họakuẹ taun nado sọgan yin devi Jesu tọn de.

E ma taidi dọ ojlo he Nikodemi tindo to dawe he wá sọn Nazalẹti ehe mẹ depò gba. To owhe awe-daa godo, to Hùnwhẹ Gòhọtúntún tọn whenu, Nikodemi yì opli Tohodọtọ Ju lẹ tọn de. Nikodemi gbẹ́ “yin dopo to yé mẹ” to ojlẹ ehe mẹ. Yẹwhenọ daho lẹ po Falesi lẹ po do awhànfuntọ lẹ hlan nado wle Jesu. Awhànfuntọ lọ lẹ lẹkọ bosọ na linlin dọmọ: “Mẹde ma dọho domọ gbede.” Falesi lẹ jẹ yé ṣanko ji dọmọ: “Be yè hẹn mìwlẹ danbú ga wẹ? Be mẹde yí ì se to ogán lẹ mẹ, kavi to Falesi lẹ mẹ? Ṣigba agundaho he ma yọ́n [Osẹ́n] lọ wẹ yè hodẹdo.” Nikodemi ma sọgan nabọẹ ba. E dọho dọmọ: “Be osẹ́n mítọn nọ dawhẹna mẹde whẹpo se sọn ewlọsu dè, bosọ yọ́n nuhe e wà?” E lẹzun yanwle homọdọdomẹgo Falesi lẹ tọn sọn ojlẹ enẹ mẹ dọmọ: “Galili tọn wẹ hiẹ ga? Dín, bo pọ́n: dọ yẹwhegán de ma fọ́n sọn Galili gba.”—Johanu 7:1, 10, 32, 45-52.

To osun ṣidopo godo, to Azán Juwayi owhe 33 W.M. whenu, Nikodemi mọ oṣiọ Jesu tọn dile e to yinyin dide sọn yatin ji. E kọnawudopọ hẹ Josẹfu Alimate tọn, heyin hagbẹ Tohodọtọ Ju lẹ tọn devo, to awuwiwlena agbasa Jesu tọn na ṣiọdidi mẹ. Na lẹndai enẹ tọn wutu, Nikodemi hẹn “oflusọ zuya po aloe po tọn wá” he pẹnzin sọ kilo 33. E vẹahi taun. E sọ biọ adọgbigbo to e si nado do ede hia taidi hagbẹ “mẹklọtọ nẹ” tọn, dile Falesi hagbẹ etọn lẹ nọ ylọ Jesu dọ. To awuwiwlena agbasa Jesu tọn na ṣiọdidi po awuyiya po mẹ, yé omẹ awe lẹ tẹ́ Jesu do yọdò yọyọ he tin to yakẹ de mẹ. Ṣigba, kakajẹ ojlẹ ehe mẹ Nikodemi ma ko do ede hia taidi devi Jesu tọn de gba!—Johanu 19:38-42; Matiu 27:63; Malku 15:43.

Nuhewutu E Ma Yinuwa

Johanu ma dọ to kandai etọn mẹ nuhewutu Nikodemi gbẹ́ ‘nado ze yatin etọn’ bo hodo Jesu gba. Ṣigba, e na nudọnamẹ delẹ he sọgan basi zẹẹmẹ nuhewutu Falesi ehe ma basi nudide tọn.

Tintan, Johanu dohia dọ nukọntọ Juvi lẹ tọn lọ “wá Jesu dè to zánmẹ.” (Johanu 3:2) Weyọnẹntọ Biblu tọn dopo dọmọ: “Nikodemi wá to zánmẹ, e mayin obu wutu gba, ṣigba nado dapana gbẹtọgun he na ko glọnalina ẹn ma nado kanhose Jesu lẹ.” Ṣigba, Johanu dlẹnalọdo Nikodemi taidi “mẹhe wá [Jesu] dè dai to zánmẹ” to lẹdo hodidọ tọn dopolọ he mẹ e dlẹnalọdo Josẹfu Alimate tọn taidi “nuplọntọ Jesu tọn de, ṣigba e mayin to gbangba, na [obu] Ju lẹ tọn wutu” te. (Johanu 19:38, 39) Enẹwutu, e yọnbasi dọ Nikodemi yì Jesu dè to zánmẹ na “obu Ju lẹ tọn wutu,” kẹdẹdile mẹhe nọgbẹ̀ to ojlẹ etọn mẹ delẹ dibu nado tindo kọndopọ depope hẹ Jesu do.—Johanu 7:13.

Be hiẹ ko sisẹ nudide lilẹzun devi Jesu tọn de do nukọn na nuhe hẹnnumẹ, họntọn, kavi hagbẹ towe lẹ sọgan dọ wutu wẹ ya? “Obu gbẹtọ tọn wẹ nọ hẹn omọ̀ wá,” wẹ howhinwhẹn de dọ. Nawẹ hiẹ sọgan duto obu enẹ ji gbọn? Howhinwhẹn lọ zindonukọn dọmọ: “Ṣigba mẹdepope he yí otù etọn do OKLUNỌ go, wẹ yè na ze daga.” (Howhinwhẹn lẹ 29:25) Nado sọgan wleawuna jidide enẹ to Jehovah mẹ, hiẹ dona mọ na dewe dọ Jiwheyẹwhe na penukundo hiẹ go to whenuena a tin to ninọmẹ sinsinyẹn mẹ. Hodẹ̀ hlan Jehovah, bo biọ dọ e ni na we adọgbigbo nado basi nudide he tlẹ whè hugan he gando sinsẹ̀n-bibasi towe go lẹ. Vudevude, yise po jidide towe do Jehovah go po na jideji jẹ obá he mẹ hiẹ na penugo nado basi nudide daho lẹ to kọndopọmẹ hẹ ojlo Jiwheyẹwhe tọn te.

Otẹn po yindidi Nikodemi tọn po taidi hagbẹ gandudu lọ tọn de sọgan ko glọnalina ẹn sọn afọdide nujọnu tọn heyin ede mimọ́n tọn zize mẹ ga. To ojlẹ enẹ mẹ, e sọgan gbẹsọ tẹdo otẹn etọn go pẹkipẹki taidi hagbẹ Tohodọtọ Ju lẹ tọn de. Be hiẹ nọ whleawu nado yinuwa nado lẹzun hodotọ klisti tọn de na hiẹ sọgan hẹn otẹn nukundeji de bu to lẹdo towe mẹ kavi dona yí nukundido delẹ do sanvọ́ na nukọnyiyi wutu wẹ ya? Onú ehelẹ depope ma họakuẹ sọ gbégbò he nọ wá sọn Gigogán wẹkẹ lọ blebu tọn sinsẹ̀n mẹ, he nọ jlo nado na we obiọ towe he tin to kọndopọmẹ hẹ ojlo etọn lẹ.—Psalm 10:17; 83:18; 145:18.

Whẹwhinwhẹ́n devo he wutu Nikodemi sọgan ko sisẹ nudide etọn hlan nukọn sọgan gando adọkunnu lẹ go. Taidi Falesi de, e sọgan ko yin nuyiwadeji gbọn mẹhe ‘yiwanna akuẹ lẹ’ dali. (Luku 16:14) Nugbo lọ dọ e penugo nado họ̀ oflusọ zuya po aloe po tọn dohia dọ e yin adọkunnọ. To egbehe mẹdelẹ nọ whleawu nado basi nudide nado didá azọngban Klistiani tọn lẹ na yé nọ tin to lẹnpọnmẹ gando nutindo agbasa tọn yetọn lẹ go wutu. Ṣigba, Jesu dotuhomẹna hodotọ etọn lẹ dọmọ: “Mì yin vivẹnunọ na ogbẹ̀ mìtọn blo, dọ, etẹ mì na dù podọ etẹ mì na nù, kavi na agbasa mìtọn dọ etẹ mì na ṣinyọ́n. . . . Otọ́ mìtọn olọn tọn sọ yọnẹn dọ mì ma sọgan nọ ma tindo onú helẹ pó gba. Ṣigba mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.”—Matiu 6:25-33.

Nususu Wẹ E Hẹn Gú

Po awuvivi po, kandai Nikodemi tọn, he sọawuhia to Wẹndagbe Johanu tọn kẹdẹ mẹ, ma dọ vlavo eyin e lẹzun hodotọ Jesu tọn pọ́n gbede kavi lala. Sọgbe hẹ nudọnamẹ aṣa tọn de, Nikodemi lẹzun devi Jesu tọn de, yin bibaptizi, yin homẹkẹndo gbọn Juvi lẹ dali, yin didesẹ sọn otẹn etọn mẹ, bosọ yin yinyan dogbé sọn Jelusalẹm to godo mẹ. Depope he whẹho lọ yin, onú dopo họnwun: Nususu wẹ gú i na e whleawu nado basi nudide to whenuena Jesu tin to aigba ji tofi wutu.

Eyin Nikodemi ko jẹ hihodo Jesu ji to whenuena e dukosọ hẹ Oklunọ to tintan whenu wẹ, e sọgan ko lẹzun devi pẹkipẹki Jesu tọn de. Na Nikodemi tindo oyọnẹn, wuntuntun, whiwhẹ bosọ yọn nuhudo gbigbọmẹ tọn etọn wutu, e sọgan ko lẹzun devi nukundeji de. Mọwẹ, e sọgan ko se hodidọ mẹpaṣa Mẹplọntọ Daho lọ tọn lẹ, plọn nuplọnmẹ titengbe lẹ sọn oló Jesu tọn lẹ mẹ, yí nukun do mọ azọ́njiawu mẹpaṣa tọn he Jesu wà lẹ, bosọ mọ huhlọn yí sọn ayinamẹ godo tọn he Jesu na apọsteli etọn lẹ mẹ. Ṣigba ehe lẹpo wẹ gú i.

Nudide he Nikodemi ma basi zẹẹmẹdo nususu hinhẹngú mẹ na ẹn. Dopo to nuhe gú i lẹ mẹ wẹ oylọ basinamẹ zohunhunnọ Jesu tọn dọmọ: “Mì wá dè e, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì. Mì yí zẹgẹ ṣie do okọ̀ mìtọn, na mì ni sọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ [kọfanamẹ] hlan alindọn mìtọn lẹ. Na zẹgẹ ṣie bọawu, agbàn ṣie sọ fua.” (Matiu 11:28-30) Nikodemi gbọ̀ dotẹnmẹ hundote kọfanamẹ tọn ehe tintindo sọn Jesu dè tlọlọ go!

Etẹwẹ Dogbọn Hiẹ Dali?

Sọn 1914 gbọ́n, Jesu Klisti ko tin to olọn mẹ taidi Ahọlu Ahọluduta olọn mẹ tọn Jiwheyẹwhe tọn. To dọdai nuhe na jọ to tintin to finẹ etọn whenu tọn didọ mẹ, e dọ gọna onú devo dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) Whẹpo opodo lọ na wá, azọ́n yẹwhehodidọ lẹdo aihọn pé enẹ dona yin wiwadotana. Jesu Klisti nọ hùnhomẹ dọ gbẹtọvi mapenọ lẹ ni tindo mahẹ to e mẹ. Hiẹ lọsu sọgan tindo mahẹ to azọ́n ehe mẹ.

Nikodemi yọnẹn dọ Jiwheyẹwhe dè wẹ Jesu wá sọn. (Johanu 3:2) Hiẹ lọsu sọgan ko wá tadona mọnkọtọn de kọ̀n sọn Biblu pinplọn mẹ. Hiẹ sọgan ko basi diọdo lẹ to aliho gbẹzan tọn towe mẹ nado sọgbe hẹ nujinọtedo Biblu tọn lẹ. Hiẹ tlẹ sọgan to opli Kunnudetọ Jehovah tọn lẹ tọn yì nado yí oyọnẹn dogọ Biblu tọn. A jẹna pipà na vivẹnudido mọnkọtọn lẹ. Ṣogan, Nikodemi dona ko wà hugan yinyọnẹn poun dọ Jiwheyẹwhe wẹ do Jesu hlan. E dona ‘mọ́n ede, bo ze yatin etọn egbesọegbesọ, bo to hihodo Jesu zọnmii.’—Luku 9:23.

Hẹn nuhe apọsteli Paulu dọna mí do ahun mẹ. E wlan dọmọ: “Enẹwutu míwlẹ, di azọ́nwatọ dopọ po e po, to mì vẹ̀ ga dọ mì yí ojọmiọn Jiwheyẹwhe tọn to ovọ́ mẹ blo. Na e dọmọ, Yẹn ko sèhó towe to ojlẹ he yè kẹalọyi tọn de mẹ, to azán whlẹngán tọn gbè wẹ yẹn ko gọalọna we: doayi e go, dinvie wẹ ojlẹ he yè kẹalọyi lọ: doayi e go, dinvie wẹ azán whlẹngán tọn.”—2 Kọlintinu lẹ 6:1, 2.

Din wẹ ojlẹ lọ nado wleawuna yise he na sisẹ we hlan nuwiwa kọ̀n. Nado sọgan wà enẹ, nọ lẹnayihamẹpọn do nuhe a to pinplọn to Biblu mẹ lẹ ji. Nọ hodẹ̀ hlan Jehovah, bo nọ biọ dọ e ni gọalọna we nado do yise mọnkọtọn hia. Dile a to numimọ alọgọ etọn tọn tindo, pinpẹn-nutọn-yinyọnẹn po owanyi towe na ẹn po na sisẹ we nado jlo na ‘mọ́n dewe bo ze yatin towe egbesọegbesọ bo to hihodo Jesu Klisti zọnmii.’ Be hiẹ na yinuwa todin ya?

[Yẹdide to weda 9]

To tintan whenu, Nikodemi yiavunlọ na Jesu po adọgbigbo po

[Yẹdide to weda 9]

Mahopọnna nukundiọsọmẹ, Nikodemi gọalọ nado wleawuna agbasa Jesu tọn na ṣiọdidi

[Yẹdide to weda 10]

Oplọn mẹdetiti tọn po odẹ̀ po sọgan na we huhlọn nado yinuwa

[Yẹdide to weda 10]

Be hiẹ na kẹalọyi lẹblanulọkẹyi nado wazọ́n to nukọntọ-yinyin Jesu Klisti tọn glọ ya?