Weta 81
Vivẹnu Yinukọn Dogọ lẹ Nado Hù Jesu
TO WHENUENA e yindọ avivọ-whenu wẹ, Jesu to zọnlinzin gbọn lẹdo he tindo họta lọ mẹ ehe nọ yin yiylọdọ họ̀nnuwá Sọlọmọni tọn. E tin to apá na tẹmpli lọ. Tofi Ju lẹ lẹdo e pé bo to didọ dọmọ: “Nawẹ hiẹ na hẹn mí to númamọjẹnugo mẹ dẹnsọ? Eyin hiẹ wẹ Klisti lọ dọ na mí gbangba.”
Jesu gblọn dọmọ: “Yẹn ko dọ na mì, mì ma yise.” Jesu ma ko dọ na yé tlọlọ dọ ewọ wẹ yin Klisti lọ, dile e dọna yọnnu Samalianu lọ to dòtọ lọ kọ̀n do gba. Ṣogan, na taun tọn, e ko do mẹhe ewọ yin hia to whenuena e basi zẹẹmẹ na yé dọ agblò aga tọn mẹ wẹ emi wá sọn bo ko tin jẹnukọnna Ablaham.
Ṣigba, Jesu jlo dọ gbẹtọ lẹ ni wá tadona lọ kọ̀n na yedelẹ dọ ewọ wẹ Klisti lọ gbọn nuwiwa etọn lẹ yíyí jlẹdo nuhe Biblu dọ dọdai etọn dọ Klisti lọ na wadotana lẹ go dali. Enẹwutu wẹ e do degbe na devi etọn lẹ wayi ma nado dọna mẹdepope dọ ewọ wẹ Klisti lọ. Podọ enẹwutu wẹ e do zindonukọn nado dọna Ju tasinyẹntọ ehelẹ dọmọ: “Azọ́n he yẹn to wiwà to oyín Otọ́ ṣie tọn mẹ, ehelẹ to kunnude na mi. Ṣigba mì ma yise.”
Naegbọn yé ma do yise? Be na kunnudenu ma tin dọ Jesu wẹ yin Klisti lọ wutu wẹ ya? Lala, ṣigba na whẹwhinwhẹ́n he Jesu na lọ wutu wẹ to whenuena e dọna yé dọmọ: “Na mì ma yin lẹngbọ ṣie lẹ mẹ tọn wutu. . . . Lẹngbọ ṣie lẹ sè ogbè ṣie, yẹn sọ yọ́n yé, yé sọ nọ hodo mi: yẹn sọ na ogbẹ̀ madopodo hlan yé, yé ma na dọ̀n gbede, mẹde ma sọ to na dọ̀n yé sún sọn alọ ṣie mẹ. [Nuhe Otọ́ ṣie ko na mi yin nude he klohugan onú devo lẹpo, NW ], mẹde ma tin he sọgan dọ̀n nude sún sọn alọ Otọ́ lọ tọn mẹ.”
Enẹgodo Jesu basi zẹẹmẹ haṣinṣan pẹkipẹki etọn tọn hẹ Otọ́ etọn, dọmọ: “Dopo wẹ yẹn po Otọ́ po.” To whenuena e yindọ aigba ji wẹ Jesu tin te bọ Otọ́ etọn tin to olọn mẹ, e họnwun dọ ewọ ma to didọ dọ ewọ po Otọ́ etọn po to paa mẹ, kavi to agbasa mẹ, yin dopo gba. Kakatimọ, e zẹẹmẹdo dọ yé yin dopo to lẹndai mẹ, dọ yé tin to kọndopọ mẹ.
Yin homẹgblena po ohó Jesu tọn lẹ po, Ju lẹ ze zannu lẹ nado hù i, dile yé tlẹ ko basi do jẹnukọn, to Hùnwhẹ Gòhọtúntún tọn, kavi Azava tọn whenu. Dile e pannukọn mẹhe na wá hù i lẹ po adọgbigbo po, Jesu dọmọ: “Azọ́n dagbe susu wẹ yẹn yí hia mì sọn Otọ́ dè; etẹ to azọ́n nẹlẹ mẹ wẹ mì to zannu dlan do mi na?”
“Míwlẹ ma to zannu dlan do we na azọ́n dagbe de gba,” wẹ yé gblọn, “ṣigba na nùzinzan; podọ hiẹ he yin gbẹtọ yí dewe do basi [yẹwhe de, NW ] wutu.” To whenuena e yindọ Jesu ma sọalọakọ́n gbede nado yin yẹwhe de, naegbọn Ju lẹ do dọ ehe?
E họnwun dọ na Jesu dohia dọ emi tindo huhlọn delẹ ehe yé yise dọ Jiwheyẹwhe kẹdẹ wẹ tindo wutu wẹ. Di apajlẹ, e ko ṣẹṣẹ dọ dogbọn “lẹngbọ” lẹ dali dọ, “Yẹn sọ na ogbẹ̀ madopodo hlan yé,” ehe yin nude he gbẹtọ depope ma sọgan basi. Ṣigba, Ju lẹ yí nukun pẹvi do pọ́n nugbo lọ dọ Jesu yigbe aṣẹpipa mimọyi sọn Otọ́ etọn dè tọn.
Dọ Jesu sọalọakọ́n nado whè hugan Jiwheyẹwhe, e do ehe hia to enẹgodo gbọn kinkanse dali dọmọ: “Be yé ma ko wlan to osẹ́n mìtọn mẹ [to Psalm 82:6], Yẹn dọ, [yẹwhe] wẹ mì? Eyin e ylọ yé mẹhe dè ohó Jiwheyẹwhe tọn wá lẹ dọ [yẹwhe], be mì sọ dọ na ewọ tọn mẹhe Otọ́ klandowiwe, bosọ dohlan aihọn mẹ, dọ, Hiẹ to nùzan; na yẹn dọ, Ovi Jiwheyẹwhe tọn wẹ yẹn wutu?”
To whenuena e yindọ Owe-wiwe lẹ tlẹ ylọ whẹ̀datọ gbẹtọvi mawadodonọ lẹ tọn dọ “yẹwhe” lẹ, owhẹ̀ tẹwẹ Ju ehelẹ sọgan sadokọna Jesu na didọ dọ, “Ovi Jiwheyẹwhe tọn wẹ yẹn”? Jesu yidogọ dọmọ: “Eyin yẹn ma wà azọ́n Otọ́ ṣie tọn lẹ, mì yí mi sè blo. Ṣigba eyin yẹn basi yé, eyin mì ma yí mi sè, mì bo yí azọ́n lẹ sè: na mì nido yọnẹn, bosọ tunwun dọ, Otọ́ tin to yẹn mẹ, podọ yẹn to Otọ́ mẹ.”
To whenuena Jesu dọ ehe, Ju lẹ tẹnpọn nado wle e. Ṣigba e họnyi, dile e basi wayi do to Hùnwhẹ Gòhọtúntún tọn whenu. E tlọ́n Jelusalẹm bo zin gbejizọnlin dasá Otọ̀ Jọdani tọn yì fie Johanu bẹ baptẹm bibasi jẹeji te diblayi owhe ẹnẹ die jẹnukọn. E họnwun dọ nọtẹn ehe ma dẹn do hùwaji hùto Ohù Galili tọn, yèdọ gbejizọnlin azán awe kavi humọ tọn sọn Jelusalẹm.
Mẹsusu wá Jesu dè tofi bo jẹ didọ ji dọmọ: “Johanu nugbonugbo ma basi ohia de gba: ṣigba nuhe Johanu dọ na dawe he tọn lẹpo wẹ nugbo.” Gbọnmọ dali mẹsusu tindo yise to Jesu mẹ tofi. Johanu 10:22-42; 4:26; 8:23, 58; Matiu 16:20.
▪ To aliho tẹ mẹ wẹ Jesu jlo dọ gbẹtọ lẹ ni yọ́n ẹn taidi Klisti te?
▪ Nawẹ Jesu po Otọ́ etọn po yin dopo gbọn?
▪ Po kunnudenu po, naegbọn Ju lẹ do dọ dọ Jesu to ede yí do basi yẹwhe de?
▪ Nawẹ hoyidọ Jesu tọn sọn Psalm mẹ dohia dọ ewọ ma to alọsọakọ́n nado sọzẹn hẹ Jiwheyẹwhe gbọn?