Weta 92
Pòtọnọ Ao Yin Azọ̀nhẹngbọna to Gbejizọnlin He Gbọngodo Jesu Tọn Yì Jelusalẹm Whenu
JESU hẹn vivẹnudido Tòhódọtọ Ju lẹ tọn nado hù i zun ovọ́ gbọn tintlọ́n Jelusalẹm bo zin gbejizọnlin sọyi tòdaho Eflaimi tọn mẹ dali, vlavo nudi kilomẹtlu 24 poun kavi hugan mọ do agewaji-whèzẹtẹn Jelusalẹm tọn. E gbọṣi finẹ po devi etọn lẹ po, bo dẹn sọn kẹntọ etọn lẹ dè.
Ṣigba, ojlẹ Juwayi owhe 33 W.M. tọn to sisẹpọ, podọ to madẹnmẹ Jesu ko sọ bẹ gbejizọnlin jẹeji whladopo dogọ. E zin gbejizọnlin gbọn Samalia yì Galili. Ehe wẹ yin gbejizọnlin etọn godo tọn yì lẹdo ehe mẹ jẹnukọnna okú etọn. Whenuena e wá Galili, vlavo ewọ po devi etọn lẹ po kọnawudopọ hẹ mẹdevo lẹ he to gbejizọnlin zin jei Jelusalẹm na hùnwhẹ Juwayi tọn lọ. Yé ze aliho he gbọn agbegbe Pelea tọn mẹ, to whèzẹtẹn Otọ̀ Jọdani tọn.
To bẹjẹeji gbejizọnlin lọ tọn, whenue Jesu to gbetato de mẹ biọ vlavo to Samalia kavi to Galili, dawe ao he tindo pòzọ̀n pé e. Azọ̀n ylankan ehe nọ to adà agbasa gbẹtọ tọn lẹ dù dẹẹdẹ—alọvi etọn lẹ, afọvi etọn lẹ, otó etọn lẹ, awọntin etọn, po nùflo etọn lẹ po. Nado basi hihọ́na mẹdevo lẹ sọn yinyin bibẹpla mẹ, Osẹ́n Jiwheyẹwhe tọn dọ gando pòtọnọ go dọmọ: “E nasọ ṣinyọnnu nùflo etọn aga tọn ji, bo na dawhá dọ, Mawé, mawé. Azán he mẹ [azọ̀nylankan, NW ] lọ tin to ewọ mẹ lẹpo ewọ na yin mawé. . . . Osla lọ godo wẹ fininọ etọn na te.”
Pòtọnọ ao lọ lẹ payi alọhẹndotenamẹ Osẹ́n tọn na pòtọnọ lẹ go bo nọte to fidindẹn sọn Jesu dè. Ṣogan, yé dawhá jẹgbonu po ogbè lele po dọmọ: “Jesu, Oklunọ, walẹblanuna mí.”
Mimọ yé to olá, Jesu degbe dọmọ: “Mì yì, bo do mìde hia yẹwhenọ lẹ.” Jesu dọ ehe na Osẹ́n Jiwheyẹwhe tọn na aṣẹ yẹwhenọ lẹ nado lá pòtọnọ he ko jẹgangan sọn azọ̀n yetọn mẹ lẹ taidi mẹhe ko yin azọ̀nhẹngbọna. To aliho ehe mẹ omẹ mọnkọtọn lẹ nọ yin alọkẹyi nado nọhẹ mẹhe to gángán lẹ whladopo dogọ.
Pòtọnọ ao lọ lẹ tindo jide to huhlọn azọ́njiawu Jesu tọn lẹ mẹ. Enẹwutu yé dogete nado yì mọ yẹwhenọ lẹ, dile etlẹ yindọ yé ma ko yin azọ̀nhẹngbọna to whenẹnu. To whenue yé tin to aliho ji, yise yetọn to Jesu mẹ yin ahọsuna. Yé jẹ mimọ bo to numọtolanmẹ agbasalilo yetọn he ko yin gigọdotẹnmẹ lọ tọn tindo ji!
Ṣinẹnẹ to pòtọnọ he ko yin hinhẹn zun wiwe lẹ mẹ wlealì yetọn, ṣigba pòtọnọ dopo, Samalianu de, lẹkọwa nado dín Jesu mọ. Etẹwutu? Na e gọ́ na pẹdido na nuhe ko jọ do e go wutu. E pà Jiwheyẹwhe po ogbè lélé po, podọ whenuena e mọ Jesu, e jẹklo to afọ etọn kọ̀n, bo to pẹdo na ẹn.
To gblọndo mẹ Jesu dọmọ: “Pòtọnọ ao ma wẹ yè lẹ̀wé? Fie wẹ ṣinẹnẹ lẹ lọ te? Yè ma mọ mẹhe lẹgọ nado pagigona Jiwheyẹwhe gba, adavo jonọ he.”
Enẹgodo e dọna dawe Samalianu lọ dọmọ: “Fọ́n, bo yì; yise towe ko whlẹn we gán.”
To whenuena mí hia dogbọn azọ̀nhẹngbọnamẹ Jesu tọn na pòtọnọ ao lẹ dali, mí dona kẹalọyi oplọn he kanbiọ etọn bẹhẹn dọmọ: “Fie wẹ ṣinẹnẹ lẹ lọ te?” Pinpẹn-nutọn-mayọnẹn he ṣinẹnẹ he pò lẹ dohia yin nuṣiwa sinsinyẹn de. Be míwlẹ, taidi Samalianu lọ, nọ do pinpẹn nutọn hia na nuhe mí mọyi sọn Jiwheyẹwhe dè lẹ, gọna opagbe dejido ogbẹ̀ madopodo tọn to aihọn yọyọ dodowiwa Jiwheyẹwhe tọn mẹ ya? Johanu 11:54, 55; Luku 17:11-19; Levitiku 13:16, 17, 45, 46; Osọhia 21:3, 4.
▪ Nawẹ Jesu hẹn vivẹnudido lẹ nado hù i zun ovọ́ gbọn?
▪ Fie wẹ Jesu zin gbejizọnlin yì to enẹgodo, podọ fie wẹ e jei taun?
▪ Naegbọn pòtọnọ lọ lẹ nọte to olá, podọ naegbọn Jesu dọna yé nado yì yẹwhenọ lẹ dè?
▪ Nuplọnmẹ tẹwẹ mí dona plọn sọn numimọ ehe mẹ?