Be Hiẹ Nọ Flin Nado Dọ A Basi Ya?

BE A ko dùnú to egbé ya?⁠— Be a yọ́n mẹhe dà núdùdù lọ ya?⁠— Vlavo onọ̀ towe kavi mẹdevo de wẹ dà ẹ, ṣigba naegbọn mí dona dopẹ́ etọn na Jiwheyẹwhe?⁠— Na Jiwheyẹwhe wẹ hẹn ẹn yọnbasi na jinukun lọ nado wú bo sẹ́n. Ṣigba, mí sọ dona dopẹna mẹhe dà núdùdù lọ kavi mẹhe bà ẹ na mí ga.

Mí nọ wọnji to whedelẹnu nado dọ a basi to whenuena mẹdevo lẹ wà dagbe na mí, kavi e mayin mọwẹ? To whenuena Mẹplọntọ Daho lọ to aigba ji, pòtọnọ delẹ wọnji nado dọ a basi na ẹn.

Be a yọ́n nuhe pòtọnọ zẹẹmẹdo ya?⁠— Pòtọnọ yin mẹde he to pòzọ̀n jẹ. Azọ̀n enẹ tlẹ sọgan hẹn apadewhe agbasa mẹlọ tọn nado wọ̀ sẹ̀. To whenuena Jesu to aigba ji, pòtọnọ lẹ nọ̀ nọ fie dẹ̀n do gbẹtọ lẹ. Podọ eyin pòtọnọ de mọ gbẹtọ he to gángán de ja, e dona dawhá nado na avase mẹlọ nado nọlá na ẹn. Ehe dona yin wiwà na mẹdevo lẹ ni ma do dọnsẹpọ pòtọnọ lẹ nado yin bibẹpla.

Jesu do homẹdagbe hia pòtọnọ lẹ taun. To gbèdopo, to whenuena e jei Jelusalẹm, Jesu dona gbọn gbétatò pẹvi de mẹ. To whenuena e sẹpọ gbétatò lọ, pòtọnọ ao wá nado pé e. Yé ko sè dọ Jesu mọ huhlọn yí sọn Jiwheyẹwhe dè nado hẹn azọ̀n wunmẹ lẹpo gbọ̀ namẹ.

Pòtọnọ lọ lẹ ma sẹpọ Jesu. Ṣigba yé nọte to olá. Etomọṣo yé yise dọ Jesu sọgan hẹn pòzọ̀n yetọn gbọ̀. Enẹwutu to whenuena pòtọnọ lẹ mọ Mẹplọntọ Daho lọ, yé dawhá hlan ẹn dọ: ‘Jesu, Mẹplọntọ, gọalọna mí!’

Be lẹblanu mẹhe to azọ̀njẹ lẹ tọn nọ wà we ya? Lẹblanu yetọn nọ wà Jesu. E yọ́n lehe e blawu do sọ nado yin pòtọnọ. Enẹwutu e gblọnna yé bo dọmọ: “Mì yì, bo do mìde hia yẹwhenọ lẹ.”—Luku 17:11-14.

Naegbọn Jesu dọna yé nado wà ehe? Na osẹ́n he Jehovah na omẹ Etọn lẹ gando pòtọnọ lẹ go wutu wẹ. Osẹ́n lọ dọ dọ yẹwhenọ Jiwheyẹwhe tọn wẹ dona nọ pọ́n agbasa pòtọnọ lẹ tọn. Yẹwhenọ wẹ na dọna pòtọnọ lọ to whenuena azọ̀n lọ gbọ̀ na ẹn mlẹnmlẹn. To whenuena e jẹgangan, e sọgan jẹ pọ́nọ ji hẹ mẹhe to gángán lẹ.—Levitiku 13:16, 17.

Ṣigba azọ̀n lọ ma ko gbọ̀ na pòtọnọ ehelẹ gba. Enẹwutu, be yé yì yẹwhenọ lọ dè dile Jesu dọna yé do ya?⁠— Mọwẹ, yé wàmọ to afọdopolọji. Dawe ehelẹ dona ko yise dọ Jesu na hẹn azọ̀n yetọn gbọ̀ na yé. Etẹwẹ jọ?

Do glido, to whenuena yé to aliho ji jei yẹwhenọ lọ dè, azọ̀n yetọn gbọ̀ na yé. Agbasa yetọn jẹgangan. Bọ azọ̀n yetọn gbọ̀! Yise yetọn to huhlọn Jesu tọn mẹ hẹn ale wá. Lehe yé gọ́ na ayajẹ do sọ! Ṣigba, todin, etẹwẹ yé dona ko wà nado do pinpẹn nutọn yetọn hia? Eyin hiẹ wẹ, etẹwẹ a na ko wà?⁠—

Dopo to mẹhe yin azọ̀nhẹngbọna lẹ mẹ lẹkọwa Jesu dè. Bo jẹ gigopana Jehovah ji, bosọ to Jiwheyẹwhe pà. Onú dagbe wẹ e basi, na Jiwheyẹwhe dè wẹ huhlọn heyin yiyido hẹnazọ̀ngbọna ẹn lọ wá sọn. Dawe lọ sọ jẹklo to Mẹplọntọ Daho lọ nukọn bo dopẹna ẹn. Homẹ etọn hùn taun na nuhe Jesu wà na ẹn.

Ṣigba etẹwẹ dogbọn omẹ ṣinẹnẹ he pò lẹ dali? Jesu kanse dọ: ‘Pòtọnọ ao ma wẹ yin hinhẹn jẹgangan, kavi e mayin mọwẹ? Fie wẹ ṣinẹnẹ he pò lẹ te? Be dopo gee wẹ lẹkọwa nado pagigona Jiwheyẹwhe ya?’

Mọwẹ, nugbo wẹ. Dopo gee to omẹ ao lẹ mẹ wẹ pagigo, kavi dopẹna Jiwheyẹwhe bo lẹkọwa nado dopẹna Jesu. Mẹhe lẹkọwa lọ yin Samalianu de, dawe de he wá sọn otò devo mẹ. Omẹ ṣinẹnẹ he pò lẹ ma dopẹna Jiwheyẹwhe, podọ yé masọ wá dopẹna Jesu.—Luku 17:15-19.

Mẹnu wẹ hiẹ di to dawe ehelẹ mẹ? Mí jlo nado di dawe Samalianu lọ, kavi e mayin mọwẹ?⁠— Eyin mọwẹ, to whenuena mẹde wà dagbe na mí, etẹwẹ mí dona nọ flin nado wà?⁠— Mí dona nọ dopẹ́. Gbẹtọ lẹ nọ saba wọnji nado dọ a basi. Ṣigba e jẹ dọ mí ni nọ dọ a basi. Eyin mí wàmọ, homẹ Jehovah Jiwheyẹwhe tọn po Ovi etọn, Jesu tọn po nọ hùn.

Eyin a lẹnnupọn, a na flindọ gbẹtọ lẹ ko wà dagbe susu na we. Di apajlẹ, be a ko jẹazọ̀n pọ́n ya?⁠— Nugbo wẹ dọ a ma ko jẹazọ̀n di pòtọnọ ao enẹlẹ pọ́n gba, ṣigba a sọgan ko jẹ avivọ sinsinyẹn kavi homẹwle de pọ́n. Be e mayin mẹde wẹ penukundo gowe?⁠— Yé sọgan ko na we amasin delẹ kavi wà onú devo lẹ na we. Be homẹ towe ma hùn dọ yé gọalọna we nado hẹn we jẹgangan ya?⁠—

Dawe Samalianu lọ dopẹna Jesu na e hẹn ẹn jẹgangan wutu, podọ ehe hẹn homẹ Jesu tọn hùn. Be a lẹndọ homẹ onọ̀ towe kavi otọ́ towe tọn na hùn eyin a dọ a basi na yé to whenuena yé wà onú dagbe de na we ya?⁠— Mọwẹ, homẹ yetọn na hùn.

Mẹdelẹ nọ wà dagbe na we to azán lẹpo gbè kavi to osẹ lẹpo mẹ. Vlavo azọ́n yetọn wẹ e yin nado wà onú helẹ. Yé tlẹ sọgan nọ wà ẹ po ayajẹ po. Ṣigba a sọgan nọ wọnji nado dọ a basi. Mẹplọntọ towe to wehọmẹ sọgan nọ wazọ́n sinsinyẹn nado plọnnu we. Nugbo wẹ dọ azọ́n etọn niyẹn. Ṣigba homẹ etọn na hùn eyin a nọ dopẹna ẹn na alọ he e to gigọna we nado plọnnu.

Mẹdelẹ nọ wà nuhe ma yin nujọnu sọmọ lẹ na we to whedelẹnu. Be mẹde ko hùn ohọ̀n dote na we pọ́n nado biọ họmẹ ya? Kavi be mẹde ko ze núdùdù na we to tafo ji to núdùdù whèjai tọn whenu pọ́n ya? E na yọ́n nado dọ a basi na yé etlẹ yin na onú flinflin helẹ.

Eyin mí nọ flin nado dọ a basi na hatọ mítọn lẹ to aigba ji, e na bọawu na mí nado nọ flin nado dọ a basi na Otọ́ mítọn olọn mẹ tọn. Podọ onú susu lẹ wẹ tin he mí sọgan dopẹ́ etọn na Jehovah! E na mí ogbẹ̀ po onú dagbe he hẹn ogbẹ̀ vivi lẹ po. Enẹwutu mí tindo whẹwhinwhẹ́n lẹpo nado pagigona Jiwheyẹwhe gbọn ohó etọn didọ to aliho dagbe mẹ egbesọegbesọ dali.