Azọ́nwatọ lẹ to Vẹngle Mẹ — WESẸDOTẸN INTẸNẸT JI TỌN Watchtower Tọn

Weta 97

Azọ́nwatọ lẹ to Vẹngle Mẹ

“OMẸ susu he yin tintan na yin godotọ, podọ godotọ lẹ nasọ yin tintan,” wẹ Jesu ṣẹṣẹ dọ. Todin e basi dohia ehe tọn gbọn otàn de didọ dali. E bẹjẹeji dọmọ: “Na ahọludu olọn tọn sọ tin jijlẹ do dawe he yin whénọ de go, he tọ́n to afọnnufuu nado dà pàkànọ lẹ do vẹngle etọn mẹ.”

Jesu zindonukọn dọmọ: “Whenuena [whénọ lọ] whleahi hẹ pàkànọ lẹ na abọgan-kuẹ dopo egbesọ, e do yé hlan vẹngle etọn mẹ. E sọ tọ́n to ojlẹ ogàn atọ̀ntọ tọn mẹ, bo mọ adidọnọ devo lẹ ṣite to ahi mẹ. E sọ dọhlan yé, dọmọ, Mì yì vẹngle mẹ ga, onú depope he jẹ yẹn na na mì. Yé sọ yì. E sọ vọ́ tọ́n to ogàn ṣidopotọ po ṣinẹnẹtọ po mẹ, bosọ basi mọ. To ojlẹ ogàn widopotọ mẹ, e sọ tọ́n bo mọ devo lẹ ṣite, e sọ dọ hlan yé, dọmọ, Etẹwutu wẹ mìwlẹ ṣite tofi sọn gbẹnnẹ gbọ́n azọ́nmawà? Yé sọ dọ hlan ẹn, dọmọ, Na mẹde ma dapa mí wutu wẹ. E sọ dọ hlan yé, dọmọ, Mì yì vẹngle mẹ ga.”

Whétọ lọ, kavi mẹhe tindo vẹngle lọ, wẹ Jehovah Jiwheyẹwhe, podọ vẹngle lọ wẹ akọta Islaeli tọn. Azọ́nwatọ vẹngle lọ mẹ tọn lẹ wẹ mẹhe yin hinhẹn biọ alẹnu Osẹ́n tọn mẹ lẹ; na taun tọn yé yin Ju nẹlẹ he to gbẹnọ to azán apọsteli lẹ tọn gbè. Azọ́nwatọ azán blebu tọn lẹ kẹdẹ wẹ yè whleahi azọ́n-kuẹ tọn hẹ. Abọgan-kuẹ dopo wẹ yin azọ́n-kuẹ gbedopo tọn. To whenuena e yindọ “ojlẹ ogàn atọ̀ntọ tọn” yin ogàn 9:00 mẹ afọnnu, yé mẹhe yin yiylọ to ogàn 3tọ, 6tọ, 9tọ, po 11tọ po mẹ lẹ, wazọ́n na ganhiho 9, 6, 3, po 1 po poun.

Azọ́nwatọ ganhiho 12, kavi azán blebu tọn lẹ, nọtena nukọntọ Juvi lẹ tọn he ko hẹn alọnu ján to whepoponu to sinsẹ̀nzọn sinsẹ̀n tọn mẹ. Yé ma taidi devi Jesu tọn lẹ gba, he ko yí suhugan gbẹzan yetọn lẹ zan to azọ́n whèvi-hùhù tọn kavi agbasazọ́n devo lẹ mẹ. To vivọnu owhe 29 W.M. tọn wẹ “whénọ” lọ do Jesu Klisti hlan nado bẹ omẹ ehelẹ pli nado yin devi etọn lẹ. Yé gbọnmọ dali lẹzun “godotọ,” kavi azọ́nwatọ ganhiho 11tọ vẹngle mẹ tọn lẹ.

To godo mẹ, azọ́n-zán yẹhiadonu tọn lọ wá vivọnu po okú Jesu tọn po, bọ ojlẹ lọ wá nado suahọ azọ́nwatọ lẹ. Nunọwhinnusẹ́n ahọsumẹ tọn he ma nọ saba jọ heyin nado suahọ omẹ godotọ lọ jẹnukọn wẹ yin hihodo, dile e yin zẹẹmẹ basina do dọmọ: “Whenuena tenu dó, oklunọ vẹngle tọn dọ hlan họ̀nkọnsi etọn, dọmọ, Ylọ pàkànọ lẹ bo na azọ́n-kuẹ yetọn yé, hẹn ẹn sọn mẹhe gbọngodo ji, yì mẹtintan ji. Whenuena mẹhe yè dapa to ogàn widopotọ mẹ lẹ wá, dopodopo yetọn mọ abọgan-kuẹ dopodopo yí. Ṣigba whenuena omẹ nukọntọn lẹ wá, yé lẹndọ yé na mọyí hú mọ; dopodopo yetọn sọ mọ abọgan-kuẹ dopodopo yí. Whenuena yé yí ì, yé to hùnhlún do whénọ lọ go. Dọmọ, omẹ godo tọn helẹ wazọ́n ojlẹ dopo kẹdẹ, hiẹ sọ hẹn yé sọzẹn hẹ mí mẹhe hẹn agbàn po yozò azán tọn po. Ṣigba e gblọn bo dọhlan dopo to yé mẹ, dọmọ, Họntọn, yẹn ma waylan do we gba: e ma yin abọgan-kuẹ dopo ji wẹ hiẹ magbe hẹ mi do? Yí onú he yin towe bo tọ́n yì: ojlo ṣie wẹ nado na godotọ he dile yẹn na hiẹ do. Be e ma jẹ na yẹn ni yí onú he yin ṣie do wà onú he jlo mi? Nukun towe ylan na yẹn yin mẹdagbe wutu?” To tadona mẹ, Jesu vọ́ nuagokun he e ko dọ wayi de dọ, dọmọ: “Mọwẹ yé mẹhe yin godotọ lẹ na lẹzun nukọntọ, yé mẹhe sọ yin nukọntọ lẹ na lẹzun godotọ.”

Abọgan-kuẹ lọ mimọyi wá aimẹ, e mayin to okú Jesu tọn whenu gba, ṣigba to Pẹntikọsti owhe 33 W.M., whenuena Klisti, “họ̀nkọnsi” lọ, kọ̀n gbigbọ wiwe jẹgbonu do devi etọn lẹ ji. Devi Jesu tọn ehelẹ wẹ taidi “godotọ,” kavi azọ́nwatọ ganhiho 11tọ tọn lẹ. Abọgan-kuẹ lọ ma nọtena nunina gbigbọ wiwe tọn lọ na ede gba. Abọgan-kuẹ lọ yin nude he devi lẹ na yizan tofi to aigba ji. E yin nude he zẹẹmẹdo ogbẹ̀ yetọn, yèdọ ogbẹ̀ madopodo yetọn. E yin lẹblanulọkẹyi lọ nado yin Islaelivi gbigbọmẹ tọn de, he yè yiamisisadode nado dọyẹwheho dogbọn Ahọluduta Jiwheyẹwhe tọn dali.

To madẹnmẹ pàkànọ tintan lẹ doayi e go dọ devi Jesu tọn lẹ ko yin ahọ́ sú, bọ yé mọ yé to abọgan-kuẹ yẹhiadonu tọn lọ yizan. Ṣigba yé jlo hugan gbigbọ wiwe lọ po lẹblanulọkẹyi Ahọluduta tọn he e bẹhẹn lẹ po. Hùnhlún po agọjẹdomẹ yetọn po wá aimẹ to aliho homẹkẹndido devi Klisti tọn lẹ mẹ, yèdọ azọ́nwatọ “godotọ” vẹngle mẹ tọn lẹ.

Be hẹndi owhe kanweko tintan tọn enẹ kẹdẹ wẹ yin hẹndi oló Jesu tọn ya? Lala, nukọntọ sinsẹ̀n Mẹylọhodotọklisti tọn lẹ to owhe kanweko 20tọ ehe mẹ, na otẹn po azọngban yetọn lẹ po wutu, ko yin pàkànọ “tintan” he yin yiylọ na azọ́n to vẹngle yẹhiadonu Jiwheyẹwhe tọn mẹ. Yé pọ́n yẹwhehodọtọ klandowiwe he kọnawudopọ hẹ Watch Tower Bible and Tract Society lẹ hlan nado yin omẹ “godotọ” lẹ nado mọ azọ́ndenamẹ nujọnu tọn depope yí to sinsẹ̀nzọn Jiwheyẹwhe tọn mẹ. Ṣigba, na nugbo tọn, omẹ ehelẹ taun, he nukọntọ sinsẹ̀n tọn lẹ vlẹko, wẹ mọ abọgan-kuẹ lọ yí—heyin gbégbigbò sinsẹ̀nzọnwiwa taidi afọzedaitọ yiamisisadode Ahọluduta olọn mẹ tọn Jiwheyẹwhe tọn. Matiu 19:30–20:16.

▪ Etẹwẹ vẹngle lọ nọtena? Mẹnu lẹ wẹ yin tenọna gbọn mẹhe tindo vẹngle lọ podọ azọ́nwatọ ganhiho 12 tọn po ganhiho 1 tọn lẹ po dali?

▪ Whetẹnu wẹ azọ́n-zán yẹhiadonu tọn lọ wá vivọnu, podọ whetẹnu wẹ ahọsumẹ lọ yin bibasi?

▪ Etẹwẹ ahọsumẹ abọgan-kuẹ tọn lọ nọtena?