Weta 106

Yin Gòhunna Gbọn Oló Vẹngle Tọn lẹ Dali

JESU tin to tẹmpli mẹ. E ko ṣẹṣẹ dọn sinsẹ̀ngan lẹ he kanse nado yọ́n aṣẹpipa mẹhe tọn ewọ yí do to onú lẹ wà biọ bẹwlu mẹ wẹ. Whẹpo yé do tlọ́n bẹwlu yetọn mẹ, Jesu kanse dọmọ: “Ṣigba etẹwẹ mì lẹn?” Podọ to enẹgodo gbọn oló de dali, e do wunmẹ gbẹtọ he yé yin nugbonugbo hia yé.

“Dawe de tindo visunnu awe,” wẹ Jesu dọ. “E wá tintan dè, bo dọmọ, ‘Ovi, yì wazọ́n to vẹngle mẹ to egbé.’ E sọ gblọn bo dọmọ, ‘yẹn na yì,’ ṣigba ma yì gba. To dindọnsẹpọ awetọ mẹ, e dọ onú dopolọ. To gblọndo mẹ ehe dọ, ‘yẹn ma na yì gba.’ To godo mẹ e diọlinlẹnna ede, bosọ yì. Be mẹnu to yé omẹ awe lẹ mẹ wẹ basi ojlo otọ́ etọn tọn?, NW .” wẹ Jesu kanse.

“Awetọ lọ,” wẹ agọjẹdomẹtọ etọn lẹ gblọn.

Enẹwutu Jesu basi zẹẹmẹ dọmọ: “Nugbo wẹ yẹn dọ hlan mì dọ tòkuẹṣinyantọ lẹ po gàlọtọ lẹ po to ahọludu Jiwheyẹwhe tọn mẹ biọ jẹnukọn na mì.” Tokuẹṣinyantọ lẹ po gàlọtọ lẹ po, na taun tọn, gbẹ́ nado sẹ̀n Jiwheyẹwhe to tintan whenu. Ṣigba to godo mẹ, taidi visunnu awetọ lọ, yé lẹnvọjọ bosọ sẹ̀n ẹn. To alọ devo mẹ, sinsẹ̀ngan lẹ, taidi visunnu tintan lọ, yigbe nado to Jiwheyẹwhe sẹ̀n, ṣogan, dile Jesu doayi e go do: “Na Johanu [Baptizitọ] gbọn aliho dodowiwa tọn ji wá mì dè, ṣigba mì ma yí ì sè. Nalete tòkuẹṣinyantọ lẹ po gàlọtọ lẹ po yí ì sè, podọ mìwlẹ, dile mì tlẹ mọ ẹn do sọ, ma diọlinlẹn to godo mẹ nado sọgan yí ì sè gba.”

To enẹgodo Jesu dohia dọ awugbopo sinsẹ̀ngan enẹlẹ tọn mayin to gbigbẹ́ nado sẹ̀n Jiwheyẹwhe kẹdẹ mẹ wutu wẹ gba. Lala, ṣigba yé yin mẹylankan lẹ na nugbo tọn, yèdọ gbẹtọ kanylantọ lẹ. “Dawe de tin, yèdọ whénọ de,” wẹ Jesu dọ, “he do vẹngle de bosọ dopá lẹdo e bo kùn ahandatẹn do e mẹ bosọ do atọ̀họ̀ de, bosọ ẹ haya na glesi lẹ, bo zìn gbejizọnlin yì otò devo mẹ. Whenuena ojlẹ sinsẹ́n tọn lẹ dọnsẹpọ, e do afanumẹ etọn lẹ hlan glesi lọ lẹ nado yí sinsẹ́n etọn lẹ. Ṣigba, glesi lọ lẹ wle afanumẹ etọn lẹ, bo hò ode, bo hù awetọ, bosọ dlan zannu do devo. E sọ vọ́ do afanumẹ devo hlan hú tintan tọn, ṣigba nudopolọ wẹ yé wà hlan omẹ ehelẹ.”

“Afanumẹ” lọ lẹ wẹ yẹwhegán lẹ he “whénọ” lọ, yèdọ Jehovah Jiwheyẹwhe, dohlan “glesi” he nọ penukundo “vẹngle” etọn go lẹ. Glesi ehelẹ wẹ nukọntọ nukunmọnu akọta Islaeli tọn lẹ, yèdọ akọta he Biblu dohiagona taidi “vẹngle” Jiwheyẹwhe tọn.

To whenuena e yindọ “glesi lẹ” yinuwa to aliho agọ̀ mẹ hẹ “afanumẹ lẹ” bosọ hù yé, Jesu basi zẹẹmẹ dọmọ: “To godo mẹ [mẹhe tindo vẹngle lọ] do visunnu etọn hlan yé, dọmọ, ‘Yé na gbògbéna visunnu ṣie.’ To visunnu lọ mimọ mẹ glesi lọ lẹ dọ to yedelẹ ṣẹnṣẹn dọ, ‘Whédutọ lọ die; mì wá, mì gbọ mí ni hù i bo dù ogu etọn!’ Enẹwutu yé wle e bo ze e dlan sọn vẹngle lọ mẹ bo hù i.”

Todin, to hodidọ hlan sinsẹ̀ngan lẹ mẹ, Jesu kanse dọmọ: “To whenuena mẹhe tindo vẹngle lọ na wá, etẹwẹ e na wà hlan glesi nẹlẹ?”

“Na yé yin omẹ ylankan lẹ wutu,” wẹ sinsẹ̀ngan lẹ gblọn, “e na hẹn vasudo ylankan wá yé ji bo nasọ haya vẹngle etọn na glesi devo lẹ, ehe na na sinsẹ́n ẹn to ojlẹ yetọn mẹ.”

Gbọnmọ dali gbọn mayọnẹn dali yé lá whẹdida do yedelẹ ji, to whenuena e yindọ yé yin apadewhe “glesi” Islaelivi Jehovah tọn lẹ heyin akọta “vẹngle” Islaeli tọn. Sinsẹ́n he Jehovah nọ donukun sọn glesi mọnkọtọn lẹ dè wẹ yise to Visunnu etọn mẹ, yèdọ Mẹssia nugbo tọn lọ. Na awugbopo yetọn nado wleawuna sinsẹ́n mọnkọtọn lẹ, Jesu na avase dọmọ: “Be mìwlẹ ma ko hia to Owe-wiwe lẹ mẹ gbede [to Psalm 118:22, 23], dọ, ‘Zannu he họdotọ lẹ gbẹdai doponẹ wẹ yè hẹn yin gángánsu họlọnglọnẹn tọn. Sọn Jehovah dè wẹ ehe ko wá yin mọ, podọ e yin nujiawu to nukun mítọn mẹ?’ Enẹwutu wẹ yẹn dọ hlan mì, dọ, Yè na yí ahọludu Jiwheyẹwhe tọn sọn mì dè yè nasọ yí na akọta de he nọ dè sinsẹ́n etọn jẹgbonu. Humọ, mẹhe jai jẹ zannu he ji na yin gbigbà hanyanhanyan. Ṣigba mẹdepope he ji e na jai jẹ, e na vúnvún in di kọ́gudu.”

Todin wekantọ lẹ po ogán yẹwhenọ lẹ tọn po yọnẹn dọ Jesu to hodọ gando yewlẹ go, podọ yé jlo nado hù i, yèdọ “whédutọ” he tindo jlọjẹ lọ. Enẹwutu lẹblanulọkẹyi yinyin gandutọ lẹ to Ahọluduta Jiwheyẹwhe tọn mẹ na yin yíyí sọn yé si taidi akọta de, podọ akọta yọyọ ‘vẹngle-lẹtọ lẹ’ tọn de na yin awuwlena, yèdọ dehe na dè sinsẹ́n dagbe lẹ jẹgbonu.

Na sinsẹ̀ngan lẹ dibusi agundaho lọ lẹ, he pọ́n Jesu hlan taidi yẹwhegán de wutu, yé ma tẹnpọn nado hù i to nujijọ ehe whenu gba. Matiu 21:28-46; Malku 12:1-12; Luku 20:9-19; Isaia 5:1-7.

▪ Mẹnu lẹ wẹ ovi awe he tin to oló tintan Jesu tọn mẹ lẹ nọtena?

▪ To oló awetọ lọ mẹ, mẹnu lẹ wẹ yin tenọna gbọn “whénọ” lọ, “vẹngle” lọ, “glesi lẹ,” “afanumẹ lẹ,” po “whédutọ lọ” po dali?

▪ Etẹwẹ na jọ do ‘glesi vẹngle lọ’ tọn lẹ go, podọ mẹnu wẹ na yí tẹnmẹ yetọn?