Weta 98

Devi lẹ to Núdọ̀n Dile Okú Jesu Tọn to Sisẹpọ

JESU po devi etọn lẹ po ko sẹpọ Otọ̀ Jọdani tọn, fie yé dasá sọn agbegbe Pelea tọn mẹ biọ Judé mẹ. Mẹsusu devo lẹ to gbejizọnlinzin hẹ yé jei Juwayi owhe 33 W.M., ehe pò nudi osẹ dopo poun.

Jesu to zọnlinzin to nukọn na devi etọn lẹ, bọ e sọ paṣa yé na gbemima adọgbigbo tọn etọn. Flindọ to osẹ vude lẹ die jẹnukọn to whenuena Lazalọsi kú bọ Jesu to na tlọ́n Pelea yì Judé, Tọmasi na tuli mẹhe pò lẹ dọmọ: “Mì gbọ mí ni yì ga, na mí nido kú hẹ ẹ.” Flin ga dọ to whenuena Jesu fọ́n Lazalọsi sọnku godo, Tòhódọtọ Ju lẹ tọn dowé dopọ nado hù Jesu. Abajọ obu do to didi devi lẹ dile yé biọ Judé mẹ whladopo dogọ todin.

Nado wleawuna yé dote na nuhe tin to nukọn ja, Jesu hẹn omẹ 12 lẹ yì nuglọ bo dọna yé dọmọ: “Pọ́n, míwlẹ hẹji jei Jelusalẹm, yè nasọ jo Ovi gbẹtọ tọn do alọ ogán yẹwhenọ lẹ tọn tọn mẹ, po wekantọ lẹ po; yé nasọ gblewhẹ okú tọn do e, bo nasọ jo e do alọ Kosi lẹ tọn mẹ; yé na vlẹ ẹ kò, bo túntán do e go, bo hò e bo nasọ hù i; podọ azán atọ̀ntọ gbè e na fọ́n.”

Whla atọ̀ntọ die to osun agọe tọn lẹ mẹ he Jesu ko dọna devi etọn lẹ dogbọn okú po fọnsọnku etọn po dali. Podọ dile etlẹ yindọ yé dotoai hlan ẹn, yé gboawupo nado mọnukunnujẹemẹ. Vlavo e sọgan yin na yé yise to hẹngọwa ahọluduta Islaeli tọn to aigba ji mẹ wutu wẹ, bọ yé to nukọnpọnhlan nado duvivi gigo po gbégbigbò po tọn to ahọluduta aigba ji tọn de mẹ hẹ Klisti.

Salomi, onọ̀ apọsteli Jakobu po Johanu po tọn, tin to mẹhe to gbejizọnlinzin jei Juwayi lẹ lọ mẹ. Jesu ko ylọ sunnu helẹ dọ “Visunnu osò tọn lẹ,” matin ayihaawe na jijọ nuyiwa aplà yetọn tọn wutu. Na ojlẹ de omẹ awe ehelẹ ko tindo ojlo zogbe nado yin mẹhe diyin lẹ to Ahọluduta Klisti tọn mẹ, bọ yé ko hẹn ojlo yetọn zun yinyọnẹn na onọ̀ yetọn. Todin ewọ dọnsẹpọ Jesu na yetọn wutu, dẹ́ ede to nukọn na ẹn po sisi po, bo biọ nukundagbe de.

“Etẹwẹ hiẹ jlo?” wẹ Jesu kanse.

E gblọn dọmọ: “Degbe dọ ovi sunnu ṣie awe helẹ ni do sinai, dopo to adusilọ towe mẹ, awetọ to amiyọnlọ towe mẹ to ahọludu towe mẹ.”

Yinyọ́n asisa obiọ lọ tọn, Jesu dọna Jakobu po Johanu po dọmọ: “Mìwlẹ ma yọ́n onú he mì [to] bibiọ gba. Be mìwlẹ tin sọgan nado nù kọfo lọ he yẹn wleawu nado nù?”

“Míwlẹ tin sọgan,” wẹ yé gblọn. Dile etlẹ yindọ Jesu ko ṣẹṣẹ dọna yé dọ emi na pehẹ homẹkẹn sinsinyẹn bo na yin hùhù to godo mẹ, e họnwun dọ yé ma ko mọnukunnujẹemẹ dọ ehe wẹ yin nuhe e to yiylọ dọ “kọfo” lọ he emi wleawu nado nù.

Nalete, Jesu dọna yé dọmọ: “Nugbo wẹ mìwlẹ na nù kọfo ṣie; ṣigba nado sinai to adusilọ ṣie mẹ podọ to amiyọnlọ ṣie mẹ, ma yin ṣie nado na omẹ gba, adavo mẹhe yè ko wleawu etọn dai na lẹ sọn Otọ́ ṣie dè.

To madẹnmẹ apọsteli ao he pò lẹ sè nuhe Jakobu po Johanu po ko biọ, bọ homẹ sọ gble yé. Vlavo Jakobu po Johanu po wẹ yin tọ́ntlọngbọ́n to nudindọn he jẹnukọn to apọsteli lẹ ṣẹnṣẹn dogbọn mẹhe klohugan lọ dali. Obiọ yetọn alọnu tọn dohia dọ yé ma ko yí ayinamẹ he Jesu na do whẹho lọ ji do yizan mẹ gba. E blawu dọ, ojlo yetọn na yindidi gbẹ́ sinyẹn sọmọ.

Enẹwutu nado didẹ̀ nudindọn alọnu tọn ehe po mẹhẹndohomẹ he e ko fọndote po, Jesu ylọ yé omẹ 12 lọ lẹ pli dopọ. To ayinamẹ nina yé po owanyi po mẹ, e dọmọ: “Mìwlẹ yọnẹn dọ gandutọ Kosi lẹ tọn nọ dùklunọ to yé ji, podọ mẹgángán yetọn lẹ nọ zan huhlọn to yé ji. E ma to na yin mọ to mì mẹ gba: ṣigba mẹdepope he jlo na lẹzun kiklo to mì mẹ na yin devi mìtọn; mẹdepope he sọ jlo na yin nukọntọ to mì mẹ na yin afanumẹ mìtọn.”

Jesu ko ze apajlẹ he yé dona hodo dai, dile e basi zẹẹmẹ do dọmọ: “Dile Ovi gbẹtọ tọn ma wá nado yilizọn na, adavo nado yilizọn na omẹ, podọ nado yí ogbẹ̀ etọn do basi ofligọ na omẹ susu.” E ma yindọ Jesu ko yilizọn do ota mẹdevo lẹ tọn mẹ kẹdẹ wẹ gba ṣigba e na wà mọ kakajẹ obá kúkú na gbẹtọvi lẹ tọn mẹ! Devi lẹ tindo nuhudo jijọ taidi Klisti tọn dopolọ nado nọ tindo ojlo nado wadevizọn kakati nado yin lizọnyina podọ nado yin mẹhe whè hugan kakati nado tin to otẹn he diyin de mẹ. Matiu 20:17-28; Malku 3:17; 9:33-37; 10:32-45; Luku 18:31-34; Johanu 11:16.

▪ Naegbọn devi lẹ do jẹ obu di ji todin?

▪ Nawẹ Jesu wleawuna devi etọn lẹ dote na nuhe tin to nukọn ja lọ gbọn?

▪ Obiọ tẹwẹ yin bibasi dohlan Jesu, podọ nawẹ e yinuwado apọsteli he pò lẹ ji gbọn?

▪ Nawẹ Jesu didẹ̀ nuhahun lọ to apọsteli etọn lẹ ṣẹnṣẹn gbọn?