Weta 101

To Bẹtani, to Owhé Simọni Tọn Gbè

TO WHENUENA Jesu tọ́n sọn Jẹliko, e pànta Bẹtani. Yé dibla yí azán lọ blebu do zìn gbejizọnlin, to whenuena e yindọ pópló hihẹ́ kilomẹtlu 19 tọn gbọn aigba he ma jlọ de ji wẹ. Jẹliko yí nudi mẹtlu 250 do yìdo na osin ohù tọn, podọ Bẹtani yí nudi mẹtlu 760 do yiaga na osin ohù tọn. Dile hiẹ sọgan flin do, Bẹtani wẹ yin owhé Lazalọsi po nọviyọnnu etọn lẹ po tọn. Gbetato kleun lọ yin nudi kilomẹtlu 3 sọn Jelusalẹm, bo yin didoai to agbàdo whèzẹtẹn-waji Osó Olivie tọn ji.

Mẹsusu ko wá Jelusalẹm na Juwayi lọ. Yé ko yawu wá jẹnukọn nado klọ́ yedelẹ wé na hùnwhẹ lọ. Vlavo yé ko doalọ oṣiọ de go kavi ko wà nudevo lẹ he hẹn yé yin mawé. Enẹwutu yé hodo aliho nuwiwa tọn lẹ nado klọ́ yedelẹ wé nado sọgan basi hùnwhẹ Juwayi tọn lọ po alọkẹyi po. Dile mẹhe yawu wá ehelẹ plidopọ to tẹmpli lọ mẹ, mẹsusu to linlẹnpọn vlavo eyin Jesu na wá Juwayi lọ tẹnmẹ.

Jelusalẹm yin ahọ́nkan nudindọn tọn de gando Jesu go. Oyọnẹn he gbayipe de wẹ e yin dọ sinsẹ̀ngan lẹ jlo nado wle e bo hù i. Na nugbo tọn, yé ko na gbedide lẹ dọ eyin mẹdepope yọ́n fie e tin te, yé dona dọ ẹ na yé. Whlaatọ̀n to osun delẹ mẹ wayi—to Hùnwhẹ Gòhọtúntún tọn whenu, to Hùnwhẹ Klandowiwe tọn tẹnmẹ, podọ to whenuena e fọ́n Lazalọsi sọnku godo—nukọntọ ehelẹ ko tẹnpọn nado hù i. Enẹwutu, e to pipaṣa gbẹtọ lẹ dọ, be Jesu na sọawuhia to gbangba whladopo dogọ wẹ ya? “Etẹwẹ mì lẹn?” wẹ yé kanse ode awetọ.

To madẹnmẹ, Jesu wá Bẹtani azán ṣidopo jẹnukọnna Juwayi lọ, ehe jẹ do Nisan 14 ji sọgbe hẹ sunzanhiawe Juvi lẹ tọn. Jesu jẹ Bẹtani to ojlẹ de mẹ to whèjai vendredi tọn, ehe yin bẹjẹeji Nisan 8 tọn. E ma sọgan ko basi gbejizọnlin lọ yì Bẹtani to samedi gba na gbejizọnlin bibasi to Gbọjẹzangbe—sọn họyiyi owhè tọn to vendredi jẹ họyiyi owhè tọn to samedi—yin gbigbẹ́ gbọn osẹ́n Juvi lẹ tọn dali. Vlavo Jesu yì owhé Lazalọsi tọn gbè, dile e ko wà do dai, bo yí zanmẹ vendredi tọn lọ zan to finẹ.

Ṣigba, tomẹnu Bẹtani tọn devo basi oylọ na Jesu po gbẹdohẹmẹtọ etọn lẹ po na núdùdù de to whèjai samedi tọn. Dawe lọ wẹ Simọni, yèdọ pòtọnọ dai tọn de, he vlavo Jesu ko hẹn jẹ gángán to ojlẹ de mẹ wayi. To kọndopọmẹ hẹ walọyizan azọ́n sinsinyẹn wiwà tọn etọn, Malta to lizọnyi na jonọ lọ lẹ. Ṣigba, dile e ko nọ basi do, Malia to todoai na Jesu, to ojlẹ ehe mẹ to aliho de mẹ he fọ́n nudindọn dote.

Malia hùn agbán alabasta tọn de, kavi ogò pẹvi de, ehe hẹn nudi kilo daa amisisa owán gblingblinnọ tọn de, yèdọ ‘nusisá nadi tọn.’ Ehe yin nuhọakuẹ taun. Na nugbo tọn, akuẹ etọn sọzẹn hẹ nudi azọ́nkuẹ owhe dopo tọn! To whenuena Malia kọ̀n amì lọ do ota na Jesu podọ do afọ etọn lẹ go bosọ yí oda etọn do to afọ etọn lẹ súnsún, owán gblingblin lọ gọ́ ohọ̀ lọ pete mẹ.

Devi lẹ gblehomẹ bo kanse dọmọ: “Etẹwẹ yè to onú he hẹngu na?” Enẹgodo Juda Iskaliọti dọmọ: “Etẹwutu wẹ yè ma sà nusisá he yin fatakakuẹ fọdekanweko, bo yin nina hlan wamọnọ lẹ?” Ṣigba Juda mayin ahunmẹduna na nugbo tọn dogbọn wamọnọ lẹ dali gba, na ewọ ko to fìnfìn sọn apotin akuẹ tọn he devi lẹ to sisẹdo mẹ.

Jesu yiavunlọ na Malia. “Mì gbọ sọn e go,” wẹ e degbè dọ. “Etẹwutu wẹ mì to tuklado e? Azọ́n dagbe de wẹ e wà do ojí e. Na mì tindo wamọnọ lẹ to whepoponu to mì dè, whedepopenu mì jlo mì sọgan wà dagbe na yé; ṣigba mì ma tindo yẹn whepoponu gba. E wà onú he e sọgan; e ko sá amisisa na agbasa ṣie jẹnukọnna oṣiọ didi lọ. Nugbo wẹ yẹn dọ hlan mì, to fidepope yè na dọyẹwheho wẹndagbe he tọn te to aihọn lẹpo mẹ, yè na dọho ehe nawe he wà tọn to finẹ ga, na oflin etọn.”

Jesu ko tin to Bẹtani na nuhe hugan ganhiho 24 todin, podọ tintin to finẹ etọn ko yin didọ gbayipe. Enẹwutu, mẹsusu wá owhé Simọni tọn gbè nado pọ́n Jesu, ṣigba yé sọ wá nado pọ́n Lazalọsi ga, mẹhe tin to finẹ ga. Enẹwutu ogán yẹwhenọ lẹ tọn blasé nado hù e mayin Jesu kẹdẹ gba ṣigba Lazalọsi lọsu ga. Ehe yinmọ na mẹsusu to yise dohia to Jesu mẹ na mimọ mẹhe ewọ ko fọnsọnku tin to ogbẹ̀ wutu! Na nugbo tọn, lehe sinsẹ̀ngan ehelẹ yin kanylantọ lẹ do sọ! Johanu 11:55–12:11; Matiu 26:6-13; Malku 14:3-9; Owalọ lẹ 1:12.

▪ Hodọdopọ tẹwẹ to yìyì to tẹmpli he tin to Jelusalẹm mẹ, podọ etẹwutu?

▪ Naegbọn Jesu dona ko jẹ Bẹtani to vendredi kakati nido yin to samedi?

▪ To whenuena Jesu jẹ Bẹtani, fie wẹ e taidi dọ e zan Gbọjẹzan lọ te?

▪ Nuyiwa Malia tọn tẹwẹ fọ́n nudindọn dote, podọ nawẹ Jesu yiavunlọ na ẹn gbọn?

▪ Etẹwẹ do kanyinylan sinsinyẹn ogán yẹwhenọ lẹ tọn hia?