Nuhewutu Jesu Ma Yawu Yì

JESU sè dọ họntọn vivẹ́ emitọn Lazalọsi to azọ̀njẹ sinsinyẹn. Malia po Malta po he yin nọviyọnnu Lazalọsi tọn lẹ wẹ domẹhlan nado yì dọna Jesu. Wẹnsagun lọ wá sọn Bẹtani, fihe Lazalọsi po nọviyọnnu etọn lẹ po nọ nọ̀. Nọviyọnnu lọ lẹ yise dọ Jesu sọgan hẹnazọ̀ngbọna nọvisunnu yetọn dile etlẹ yindọ fidindẹn wẹ yé nọ nọ̀ to adà awetọ Tọ̀sisa Jọdani tọn ji. Yé yọnẹn dọ ewọ nọ fihe dẹn do gbẹtọ lẹ bo hẹnazọ̀ngbọna yé pọ́n.—Matiu 8:5-13; Johanu 11:1-3.

To whenuena wẹnsagun lọ mọ Jesu bo do owẹ̀n awubla tọn lọ na ẹn, Jesu ma yí nude wà gandego. Biblu dọmọ: “E gbẹ́ gbọṣi fihe e te lọ na azán awe dogọ.” (Johanu 11:6) Be hiẹ yọ́n nuhewutu Jesu ma yawu nado gọalọna Lazalọsi ya?—a Gbọ mí ni gbadopọnna.

Jesu yọnẹn dọ azọ̀n lọ ko hù Lazalọsi. Enẹwutu, e dọna apọsteli etọn lẹ dọmọ: “Mì gbọ mí ni yì Jude whladopo dogọ.” Yé jẹagọdo e dọmọ: “To agọe poun wẹ omẹ Jude tọn lẹ to dindin nado dlan zannu do we, bọ hiẹ nasọ vọ́ yì finẹ ya?” Jesu basi zẹẹmẹ dọmọ: “Lazalọsi họntọn mítọn to gbigbọjẹ, ṣigba yẹn jei finẹ nado fọ́n ẹn sọn amlọn mẹ.”

Apọsteli lẹ gblọn dọmọ: “Oklunọ, eyin gbigbọjẹ wẹ e te, e na jẹgangan.” Whenẹnu wẹ Jesu dọmọ: “Lazalọsi ko kú.” Enẹgodo, e dọ nude he na ko paṣa yé dọmọ: “Yẹn sọ jaya na mìtọn wutu dọ yẹn ma tin to finẹ . . . Ṣigba, mì gbọ mí ni yì e dè.”

Tọmasi dọ po adọgbigbo po dọmọ: ‘Mì gbọ mí ni yì na mí nido sọgan kú hẹ Jesu.’ Tọmasi yọnẹn dọ kẹntọ lẹ nasọ tẹnpọn nado hù Jesu, podọ apọsteli lẹ lọsu sọgan yin hùhù ga. Ṣigba, yemẹpo yì. To azán awe kavi nuhe yì mọ godo, yé wá Bẹtani, yèdọ lẹdo he mẹ Lazalọsi nọ nọ̀. Filọ dẹn do Jelusalẹm na nudi kilomẹtlu atọ̀n.—Johanu 11:7-18.

Be hiẹ yọ́n nuhewutu Jesu do jaya dọ emi ma yì finẹ domẹwhenu ya?— Nugbo wẹ dọ Jesu fọ́n mẹdevo lẹ sọnku wayi, ṣigba gànhiho vude poun wẹ juwayi to okú omẹ enẹlẹ tọn godo bọ Jesu do gọ̀ yé wá ogbẹ̀. (Luku 7:11-17, 22; 8:49-56) Ṣigba, agbasa Lazalọsi tọn ko to yọdò mẹ na azán susu. Mẹlẹpo wẹ yọnẹn dọ e ko kú nugbonugbo!

To whenuena Malta, nọviyọnnu Lazalọsi tọn sè dọ Jesu sẹpọ Bẹtani, e họ̀nwezun nado yì pé e. “Oklunọ, eyin hiẹ ko tin tofi wẹ, nọvisunnu ṣie ma na ko kú,” wẹ e dọ. Jesu na ẹn jide dọmọ: “Nọvisunnu towe na fọ́n.” Malta họ̀nwezun lẹkọ bo dọna nọviyọnnu etọn to nuglọ dọmọ: “Mẹplọntọ lọ ko wá bo to yiylọ we.”

To afọdopolọji, Malia dedo Jesu dè. Ṣigba, gbẹtọgun he to finẹ lọ lẹndọ ewọ jei yọdò lọ kọ̀n wẹ, enẹwutu yé jẹgodona ẹn. To whenue Jesu mọ Malia po gbẹtọgun he hodo e po to avivi, ewọ lọsu “kùn dasin.” E ma dẹn bọ yemẹpo jẹ yọdò he ji zannu daho de te lọ kọ̀n. Jesu degbe dọmọ: “Mì de zannu lọ sẹ̀.” Ṣigba, Malta jẹagọdo dọmọ: “Oklunọ, e na ko to wánlùn todin, na azán ẹnẹtọ die.”

Gbẹtọ lọ lẹ setonuna Jesu bo de zannu lọ sẹ̀. Enẹgodo, e hodẹ̀ jẹnukọn bo dopẹna Jiwheyẹwhe na huhlọn he e yọnẹn dọ Jiwheyẹwhe na na emi nado fọ́n Lazalọsi. Jesu “yí ogbè lélé do dawhá dọmọ: ‘Lazalọsi, tọ́njẹgbonu wá!’” Podọ Lazalọsi tọ́njẹgbonu po ‘avọ̀ he yin biblá lẹdo e go’ po. Enẹwutu, Jesu degbe dọmọ: “Mì tún in bo gbọ e ni yì.”—Johanu 11:19-44.

Be hiẹ mọnukunnujẹ nuhewutu Jesu ma do yawu yì mẹ todin ya?— E yọnẹn dọ eyin emi dọngbàn, emi na penugo nado dekunnu to aliho dagbe mẹ gando Otọ́ emitọn, Jehovah go. Podọ na e yí ojlẹ dagbe hugan lọ zan wutu, mẹsusu lẹzun yisenọ. (Johanu 11:45) Be hiẹ mọ nuhe mí sọgan plọn sọn apajlẹ Jesu tọn mẹ ya?—

Hiẹ lọsu sọgan de ojlẹ dagbe de nado dekunnu gando onú jiawu he Jiwheyẹwhe ko wà bo nasọ wà to sọgodo lẹ go. Vlavo, hiẹ sọgan dọhona wehọmẹvigbẹ́ kavi mẹplọntọ towe lẹ gando yé go. Etlẹ yin to nupinplọn whenu to klasi, jọja delẹ ko yí dotẹnmẹ hundote lọ zan nado dọhodo dona jiawu he Ahọluduta Jiwheyẹwhe tọn na hẹnwana gbẹtọvi lẹ ji. Nugbo wẹ dọ hiẹ ma sọgan fọ́n oṣiọ, ṣigba hiẹ sọgan gọalọna mẹdevo lẹ nado yọ́n Jiwheyẹwhe he penugo bo na hẹn mẹyiwanna mítọn lẹ gọwá ogbẹ̀.