Weta 124
Yè Ze E Do Alọmẹ Na Yé Bọ Yé Sọ Hẹn Ẹn Yì
TO WHENUENA Pilati, yin whinwhàn gbọn gbégbigbò abọẹninọ Jesu he ko yin yasana lọ tọn dali, tẹnpọn whladopo dogọ nado jo e, ogán yẹwhenọ lẹ tọn vọ́ adì dù dogọ́. Yé magbe ma nado dike nudepope ni hẹnalọdotena lẹndai kanyinylan tọn yetọn. Enẹwutu awhá yetọn vọ́ sinyẹn dọmọ: “Whè e do [yatin, NW ] go! Whè e do [yatin, NW ] go!”
Pilati gblọn dọmọ: “Mìlọsu [ni] yí ì, bo whè e do [yatin, NW ] go.” (To vogbingbọn mẹ na alọsọakọ́n yetọn he jẹnukọn, Ju lẹ sọgan tindo aṣẹ nado hù sẹ́ngbàtọ lẹ na whẹhuhu sinsẹ̀n tọn he sinyẹn jẹ obá de mẹ.) Enẹgodo, e whè gbau whla atọ́ntọ, Pilati lá Jesu taidi homẹvọnọ, dọmọ: “Yẹn ma mọ ylando de to ewọ mẹ gba.”
Ju lẹ, to mimọ mẹ dọ whẹsadokọnamẹ tònudidọ tọn yetọn lẹzun ovọ́, yé lẹhlan whẹsadokọnamẹ sinsẹ̀n tọn heyin nùzinzan he ko yin yiyizan to ganhiho delẹ die jẹnukọn to whẹdida na Jesu to Tòhódọtọ Ju lẹ tọn nukọn. Yé dọmọ: “Míwlẹ tindo osẹ́n de, podọ gbọn osẹ́n nẹ dali e jẹ nado kú, na ewọ yí ede do basi Ovi Jiwheyẹwhe tọn wutu.”
Onú yọyọ de wẹ whẹsadokọnamẹ ehe yin na Pilati, bọ e hẹn ẹn nado dibu dogọ. Todin e yọnẹn dọ Jesu ma yin gbẹtọ tata de gba, yèdọ dile odlọ asi etọn tọn po hlọnhlọn gbẹtọ-yinyin ayidego Jesu tọn dohia do. Ṣigba “Ovi Jiwheyẹwhe tọn” ya? Pilati yọnẹn dọ Jesu wá sọn Galili. Ṣogan, be e yọnbasi dọ ewọ na ko nọgbẹ̀ pọ́n dai wẹ ya? Hinhẹn ẹn lẹkọyi họ̀nmẹ lọ whladopo dogọ, Pilati kanse dọmọ: “Fie wẹ hiẹ sọn?”
Jesu ma kẹ̀nu. Jẹnukọn e ko dọna Pilati dọ emi yin ahọlu de ṣigba dọ Ahọluduta emitọn ma yin apadewhe aihọn ehe tọn gba. Zẹẹmẹ yinukọn dogọ depope ma sọgan hẹn lẹndai dagbe de di todin gba. Ṣigba, gbigbẹ́ Jesu tọn ma nado na gblọndo fọ́n goyiyi Pilati tọn dote, bọ adì etọn fọndote do Jesu ji po hogbe lọ lẹ po dọmọ: “Hiẹ ma dọhó hlan mi? Be hiẹ ma yọnẹn dọ yẹn tindo aṣẹ nado whè we do [yatin, NW ] go, bosọ tindo aṣẹ nado dè we dote?”
“Hiẹ ma do ko tindo aṣẹ de to oji e gba, adavo yè na we sọn aga,” wẹ Jesu gblọn po sisi po. E to alọdlẹndo huhlọn aṣẹpipa tọn he Jiwheyẹwhe na gandutọ gbẹtọvi lẹ tọn nado penukundo whẹho aigba ji tọn lẹ go. Jesu yidogọ dọmọ: “Enẹwutu wẹ ewọ he jo mi hlan we . . . tindo ylando klohú.” Na nugbo tọn, yẹwhenọ daho lọ Kaifa po hagbẹ etọn lẹ po gọna Juda Iskaliọti wẹ hẹn agbàn he pẹ̀n taun hugan Pilati tọn na nuyiwahẹmẹ agọ̀ heyin bibasi na Jesu.
Yin nuyiwadeji dogọ gbọn Jesu dali podọ obu dọ Jesu sọgan tindo dodonu sọn olọn mẹ wá, Pilati vọ́ vivẹnudo nado tún in dote. Ṣigba, Ju lẹ gbẹ́ na Pilati gbidigbidi. Yé vọ́ nùzindo whẹsadokọnamẹ tònudidọ tọn yetọn ji, bo gbọn ayiha wintinwintin dali dobuna ẹn dọmọ: “Eyin hiẹ jo dawe he dai, be hiẹ ma yin họntọn Sesali tọn gba: mẹdepope he yí ede do basi ahọlu de, jẹagọdo Sesali.”
Mahopọnna owù sinsinyẹn he e bẹhẹn, Pilati hẹn Jesu jẹgbonu whladopo dogọ. E vọ́ tudohomẹna yé dọmọ: “Mì pọ́n ahọlu mìtọn!”
“Dè e sẹ̀, dè e sẹ̀, whè e do [yatin, NW ] go.”
Pilati kanse po flumẹjijẹ po dọmọ: “Be yẹn na whè Ahọlu mìtọn do [yatin, NW ] go?”
Agbọ́ ko pé Ju lẹ to gandudu Lomunu lẹ tọn glọ. Na nugbo tọn, yé gbẹwanna gandudomẹji Lomu tọn! Ṣogan, po yẹnuwiwa po, ogán yẹwhenọ lẹ tọn dọmọ: “Míwlẹ ma tindo ahọlu de, adavo Sesali.”
Na budidi na otẹn tònudidọ tọn po yinkọ dagbe etọn po wutu, Pilati to godo mẹ jogbe na obiọ madoalọte Ju lẹ tọn. E ze Jesu do alọmẹ na yé. Awhànfuntọ lẹ de avọ̀ gefunwunmẹ Jesu tọn sọn okọ̀ na ẹn bo dó awugbó etọn na ẹn. Dile Jesu yin pinplan jei nado yin whiwhe do atin go, yé hẹn ẹn nado didá yatin ewọ lọsu tọn.
E ko yin afọnnu vendredi tọn todin, to Nisan 14; vlavo ogàn wiawe whèmẹ tọn ko to sisẹpọ. Jesu ko tin to ote sọn afọnnu jeudi tọn gbọ́n, podọ e ko jiya numimọ awufiẹsa debọdo-dego tọn. E họnwun dọ, hlọnhlọn etọn vọ̀ pete to madẹnmẹ na zínpinpẹn yatin lọ tọn wutu. Enẹwutu aligbọntọ de, yèdọ Simọni Silene tọn to Aflika, wẹ yé yí huhlọn do hẹn nado hẹn ẹn na ẹn. Dile yé to yìyì, gbẹtọ susu, gọna yọnnu lẹ, to hihodo yé, bo to avihàndo to awubla mẹ bo to avigbedo na Jesu.
Jesu lẹhlan yọnnu lọ lẹ, bo dọmọ: “Mì viyọnnu Jelusalẹm tọn, mì viavi na mi blo, ṣigba mì viavi na mìde, podọ na ovi mìtọn lẹ. Na, pọ́n, azán lẹ ja, ehe mẹ yé na dọmọ, [Ayajẹnọ, NW ] wẹ wẹnsinọ lẹ, podọ adọ̀ he ma jivi gbede, podọ anọ́ he yè ma nọ́ gbede. . . . Na eyin yé wà onú helẹ to atin mú mẹ etẹwẹ yè na wà to húhú mẹ?”
Jesu to alọdlẹndo atin akọta Juvi lẹ tọn, ehe gbẹ́ tindo osin ogbẹ̀ tọn delẹ to e mẹ na tintin to finẹ Jesu tọn po tintin pipòtọ mẹhe yí ì sè lẹ tọn po wutu. Ṣigba to whenuena omẹ ehelẹ na yin didesẹ sọn akọta lọ mẹ, atin gbigbọmẹ tọn kúkú lẹ kẹdẹ wẹ na gbẹ́ pò, mọwẹ, yèdọ titobasinanu akọta tọn he ko hú. Ṣo, whẹwhinwhẹ́n nankọtọn die nado viavi to whenuena awhànpa Lomu tọn lẹ, he to nuyiwa taidi whẹdida-hẹnṣẹtọ Jiwheyẹwhe tọn lẹ, na và akọta Juvi lẹ tọn sudo! Johanu 19:6-17; 18:31; Luku 23:24-31; Matiu 27:31, 32; Malku 15:20, 21.
▪ Owhẹ̀ tẹwẹ sinsẹ̀ngan lẹ sadokọna Jesu to whenuena whẹsadokọnamẹ tònudidọ tọn yetọn gboawupo nado tindo kọdetọn dagbe?
▪ Naegbọn obu do vọ́ Pilati di?
▪ Mẹnu lẹ wẹ hẹn agbàn ylando tọn hugan na nuhe jọ do Jesu go?
▪ To godo mẹ, nawẹ yẹwhenọ lẹ hẹn Pilati nado jo Jesu do alọmẹ na yé na hùhù gbọn?
▪ Etẹwẹ Jesu dọna yọnnu lọ lẹ he viavi na ẹn, podọ etẹwẹ e tindo to ayiha mẹ gbọn alọdindlẹndo atin taidi tintin to “mú” po “húhú” po dali?