Weta 125

Awufiẹsa to Pòtin Ji

TO PỌMẸ hẹ Jesu, jaguda awe yin pinplan jei nado yin hùhù. E ma dẹn do tòdaho lọ mẹ gba, mẹhe doawhàn jei lọ lẹ nọte do fide heyin yiylọdọ Gọlgọta, kavi Nọtẹn Taká tọn.

Awù gantọ lọ lẹ tọn yin dide sọn yé go. Enẹgodo ovẹn he yin fuflusọ po zuya po yin awuwlena. E họnwun dọ yọnnu Jelusalẹm tọn lẹ wẹ wleawu etọn, podọ Lomunu lẹ ma gbẹ́ nuṣakadopọ awufiẹsa-depò tọn ehe na mẹhe na yin whiwhè do atin go lẹ gba. Ṣigba, to whenuena Jesu dọ́ ẹ pọ́n, e gbẹ́ nado nù. Etẹwutu? Kunnudenu dohia dọ e jlo nado tindo nugopipe nado deanana huhlọn nulẹnpọn tọn etọn lẹpo to whlepọn daho yise etọn tọn ehe whenu.

Todin Jesu ko yin dindlẹn do atin go po alọ etọn lẹ po to aga ota etọn tọn. Enẹgodo awhànfuntọ lẹ whè oṣó daho lẹ do alọ etọn lẹ mẹ podọ do afọ etọn lẹ mẹ. E to sísló to awufiẹsa mẹ dile oṣó lọ lẹ to lùnlùn biọ agbasalan po agbasa-kàn lẹ po mẹ. To whenuena atin lọ yin jijlọ dote, awufiẹsa lọ zẹjlẹgo, na zínpinpẹn agbasa tọn tlẹ́n apà oṣó lọ tọn lẹ. Ṣogan, kakati nado vannukundomẹ, Jesu hodẹ̀ na awhànfuntọ Lomu tọn lọ lẹ dọmọ: “Otọ́, jona yé; na yé ma yọ́n nuhe yé to wiwà gba.”

Pilati ko whè ohia de do atin lọ go he hia dọmọ: “Jesu Nazalẹti tọn, Ahọlu Ju lẹ tọn.” E họnwun dọ, e kàn ehe e mayin na e na sisi Jesu wutu kẹdẹ wẹ gba ṣigba na e gbẹwanna yẹwhenọ Juvi lẹ na yé gbidikọna ẹn nado dawhẹ okú tọn na Jesu wutu. Na mẹlẹpo nido sọgan hia ohia lọ, Pilati wlan ẹn do ogbè atọ̀n mẹ—to Heblu mẹ, to Latin heyin alọkẹyi mẹ, podọ to Glẹki he gbayipe mẹ.

Agbọpé ogán yẹwhenọ lẹ tọn, gọna Kaifa po Anna po. Nulila mẹpipa tọn ehe hẹn ganhiho ayajẹ awhàngbigba tọn yetọn gble. Enẹwutu yé jẹagọdo dọmọ: “A wlan dọ, Ahọlu Ju lẹ tọn blo; ṣigba dọ ewọ dọmọ, Yẹn wẹ Ahọlu Ju lẹ tọn.” Nado do homẹgble hia na e ko yin yiyizan nado hẹn lẹndai yẹwhenọ lẹ tọn di wutu, Pilati gblọn po adì sinsinyẹn po dọmọ: “Onú he yẹn ko wlan, yẹn ko wlan.”

Yẹwhenọ lẹ, to pọmẹ po gbẹtọgun daho de po, todin pli do mẹhùtẹn lọ, bọ yẹwhenọ lẹ jẹagọdo kunnudenu ohia lọ tọn. Yé vọ́ kunnudenu lalo tọn he yin nina jẹnukọn to whẹdida Tòhódọtọ Ju lẹ tọn tẹnmẹ dọ. Enẹwutu, abajọ bọ aligbọntọ lẹ do to ohó mẹzunzun tọn dọ, bo to ota yetọn lẹ mìmí po vlẹko po dọmọ: “Hiẹ mẹhe [na] họ́ fiwiwe lọ bosọ dó e to azán atọ̀n mẹ, whlẹn dewe. Eyin hiẹ yin Ovi Jiwheyẹwhe tọn, jẹte sọn [yatin, NW ] go.”

“E nọ whlẹn mẹdevo lẹ; e ma sọgan whlẹn ede” wẹ ogán yẹwhenọ lẹ tọn po họntọn sinsẹ̀n tọn alọmayiemẹ yetọn lẹ po dọ. “Eyin ewọ yin Ahọlu Islaeli tọn, ni jẹte sọn [yatin, NW ] go dinvie, míwlẹ nasọ yí ì sè. E dotu to Jiwheyẹwhe mẹ: gbọ e ni whlẹn ẹn gán dinvie, eyin e yiwanna ẹn: na e dọmọ, Ovi Jiwheyẹwhe tọn wẹ yẹn.”

Yin bibẹpla gbọn gbigbọ lọ dali, awhànfuntọ lẹ lọsu yí Jesu do davlẹ. Yé na ẹn ovẹn he vẹsin nado vlẹ ẹ kò, bọ e họnwun dọ yé ze e daga zẹ nùflo etọn he ko hú na osin wutu go. Yé ṣàn ẹn kò dọmọ: “Eyin Ahọlu Ju lẹ tọn wẹ hiẹ, whlẹn dewe.” Yèdọ jaguda lẹ lọsu—he dopo yin whiwhè do adusilọ Jesu tọn mẹ, bọ awetọ to amiyọnlọ etọn mẹ—ṣàn ẹn kò. Lẹn enẹ pọ́n! Dawe klohugan lọ he nkọtọn ma nọgbẹ̀ pọ́n, mọwẹ, omẹ lọ he tindo mahẹ po Jehovah Jiwheyẹwhe po to onú lẹpo didá mẹ, yí tenọgligo-hinhẹn do jiya nuyiwahẹmẹ agọ̀ ehe lẹpo!

Awhànfuntọ lọ lẹ yí awugbó Jesu tọn lẹ bo má ẹn do ẹnẹ ji. Yé dèvò nado yọ́n mẹhe tọn ehelẹ na yin. Ṣigba, awu odòtọn lọ, ma tindo titọ̀tẹn de gba, na e yin dehe họakuẹ tlala wutu. Enẹwutu awhànfuntọ lọ lẹ dọhlan ode awetọ dọmọ: “Mì dike mí tlẹ́n ẹn blo, ṣigba mí ni do ovò e ji, mẹhe tọn e na yin.” Gbọnmọ dali, to mayọnẹn mẹ, yé hẹn wefọ lọ di he dọmọ: “Yé má avọ̀ ṣie to yede ṣẹnṣẹn, bosọ do ovò awu ṣie ji.”

To madẹnmẹ, dopo to jaguda lọ lẹ mẹ wá mọnukunnujẹemẹ dọ na nugbo tọn Jesu dona yin ahọlu de. Enẹwutu, to wiwọhẹ awetọ etọn mẹ, e dọmọ: “Be hiẹ ma dibuna Jiwheyẹwhe, mimọ hiẹ tin to whẹgbledo dopolọ mẹ? Míwlẹ, nugbonugbo po dodo po, ale azọ́n mítọn tọn dù wẹ mí te: ṣigba dawe he ma wà onú jẹagọ de gba.” Enẹgodo e dọho hlan Jesu, po obiọ vẹkuvẹku po dọmọ: “Flin mi, whenuena hiẹ jẹ ahọludu towe mẹ.”

Jesu gblọn dọmọ: “Nugbo wẹ yẹn dọhlan we to egbehe, Hiẹ na nọhẹ mi to Paladisi mẹ.” (NW ) Opagbe ehe na yin hinhẹndi to whenuena Jesu na dugán taidi Ahọlu to olọn mẹ bo na fọ́n ylandonọ he lẹnvọjọ ehelẹ sọnku do ogbẹ̀ aigba ji tọn mẹ to Paladisi he mẹhe lùn Amagẹdọni tọ́n lẹ po gbẹdohẹmẹtọ yetọn lẹ po na tindo lẹblanulọkẹyi nado wleawuna lọ mẹ. Matiu 27:33-44; Malku 15:22-32; Luku 23:27, 32-43; Johanu 19:17-24.

▪ Naegbọn Jesu do gbẹ́ nado nù ovẹn he yin fuflusọ po zuya po?

▪ Dile e họnwun do, naegbọn ohia de do yin whiwhè do pòtin Jesu tọn go, podọ hodidọ tẹlẹ wẹ ehe fọndote to Pilati po ogán yẹwhenọ lẹ tọn po ṣẹnṣẹn?

▪ Mẹzunzun yinukọn dogọ tẹlẹ wẹ Jesu mọyi to atin lọ go, podọ etẹwẹ kunnudenu dohia dọ e fọ́n ẹn dote?

▪ Nawẹ dọdai yin hinhẹndi to nuhe yin wiwà na awu Jesu tọn lẹ mẹ gbọn?

▪ Diọdo tẹwẹ dopo to jaguda lọ lẹ mẹ basi, podọ nawẹ Jesu na hẹn obiọ etọn di gbọn?