Nuhewutu Mí Dona Yiwanna Jesu

MÍ NI dọ dọ hiẹ tin to tọjihun he to sisiọ de mẹ. Be a na jlo dọ mẹde ni wá whlẹn we ya?⁠— Eyin mẹde ka yí ogbẹ̀ ede tọn do sanvọ́ nado whlẹn we lo?⁠— Nuhe Jesu Klisti wà na mí niyẹn. Dile mí mọ to Weta 37tọ mẹ do, e yí ogbẹ̀ ede tọn do basi ofligọ de, na mí nido yin whinwhlẹngán.

Nugbo wẹ dọ, e mayin otọ̀-kúkú mẹ wẹ Jesu whlẹn mí sọn gba. Ṣigba etẹ mẹ wẹ e whlẹn mí sọn? Be a gbẹsọ flin ya?⁠— E whlẹn mí sọn ylando po okú po he mí dugu etọn sọn Adam dè si. Mahopọnna dọ mẹdelẹ ko wà nuhe ylan taun lẹ, Jesu kú na yelọsu ga. Be hiẹ sọgan ze ogbẹ̀ towe do sanvọ́ nado sọgan whlẹn omẹ mọnkọtọn lẹ ya?⁠—

Biblu dọ dọ: ‘Vlavo wẹ mẹde na jlo nado kú na dodonọ de: podọ vlavo taun wẹ mẹde na tlẹ jlo nado kú na mẹdagbe.’ Ṣogan, Biblu basi zẹẹmẹ dọ Jesu ‘kú na ylandonọ lẹ.’ Enẹ bẹ mẹhe ma tlẹ nọ sẹ̀n Jiwheyẹwhe lẹ hẹn ga! Biblu zindonukọn dọmọ: “Whenuena mí gbẹ́ to ylandonọ yin [kavi, gbẹ́ to onú ylankan lẹ wà], Klisti kú na mí.”—Lomunu lẹ 5:6-8.

Be a sọgan flin apọsteli de he ko wà onú ylankan taun dai ya?⁠— Apọsteli enẹ wlan dọmọ: ‘Klisti Jesu wá aihọn he mẹ nado whlẹn ylandonọ; mẹhe mẹ yẹn yin gángánsu te.’ Paulu wẹ. E dọ dọ emi ko yin “oklenọ” bo ko zindonukọn ‘to ojlo gbigble mẹ’ to ojlẹ de mẹ wayi.—1 Timoti 1:15; Titu 3:3.

Saa pọ́n lehe owanyi Jiwheyẹwhe tọn klo sọ nado do Ovi etọn hlan nado wá kú na ylandonọ lẹ. Jaale, ze Biblu towe bo hia ehe to Johanu weta 3, wefọ 16 mẹ. E hia to finẹ dọmọ: “Jiwheyẹwhe yiwanna aihọn [yèdọ, gbẹtọ he nọ nọ̀ aigba ji lẹ] sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.”

Jesu dohia dọ owanyi he nkọ Otọ́ etọn tindo na mí wẹ ewọ lọsu tindo na mí. Hiẹ na flindọ to Weta 30tọ owe ehe tọn mẹ, mí hia dogbọn oyà he Jesu ji to ozán he mẹ e yin wiwle lọ dali. E yin hinhẹn yì owhé Yẹwhenọ Daho Kaifa tọn gbè, fie E yin hinhẹn yì owhẹ̀ nukọn te. Kunnudetọ lalonọ lẹ yin hinhẹnwa finẹ nado dolalo dokọna Jesu, bọ gbẹtọ lẹ lì akotokún Jesu. To ojlẹ enẹ mẹ wẹ Pita mọ́n Jesu te. Todin mí ni dọ dọ mí tin to otẹn lọ mẹ bo to mimọ nuhe to jijọ lẹ tlọlọ.

Todin, e jẹ wunkẹngbe afọnnu. Jesu ma damlọn to ozán lọ pete mẹ gba. Na owhẹ̀ heyin didá to zánmẹ lọ ma sọgbe wutu, yẹwhenọ lẹ yawu ylọ Tohodọtọ Ju lẹ tọn, kavi whẹdatọ daho Juvi lẹ tọn pli, bo vọ́ owhẹ̀ lọ keje pọ́n. Whladopo dogọ, yé sọ vọ́ whẹsadokọna Jesu dọ e waylan do Jiwheyẹwhe go.

Enẹgodo yẹwhenọ lẹ degbè dọ Jesu ni yin biblá, bọ yé sọ hẹn ẹn yì togán Lomu tọn, Pilati nukọn. Nuhe yé dọna Pilati wẹ yindọ: ‘Jesu jẹagọdo gandudu etọn. E dona yin hùhù.’ Ṣigba Pilati mọdọ lalodo wẹ yẹwhenọ lẹ te. Enẹwutu Pilati dọna yé dọ: ‘Yẹn ma mọ oylan depope to dawe ehe mẹ. Yẹn na tún in dote.’ Ṣigba yẹwhenọ lẹ po gbẹtọ paa lẹ po dawhá dọmọ: ‘Lala! Hù i!’

To godo mẹ, Pilati sọ tẹnpọn nado dọna gbẹtọ lẹ dọ emi na tún Jesu dote. Ṣigba yẹwhenọ lẹ fọ́n gbẹtọgun lẹ dote nado dawhá dọ: ‘Eyin hiẹ tún in dote, be hiẹ lọsu jẹagọdo gandudu ga! Hù i!’ Awhá gbẹtọgun lọ tọn yiaga tlala. Be a yọ́n nuhe Pilati wà ya?⁠—

E kẹalọyi obiọ gbẹtọ lẹ tọn. Tintan whẹ́, e degbè bọ Jesu yin hihò. Enẹgodo e ze e do alọmẹ na awhànfuntọ lẹ nado hù i. Yé ṣinyọ́n ojẹgbakun owùn tọn do ota na Jesu bo yido na ẹn bosọ to vivlẹ ẹ kò. Enẹgodo yé didá atinpo, kavi atin daho de do ota na Jesu bosọ plan ẹn jẹ gbonu tòdaho lọ tọn fihe nọ yin yiylọdọ Taka Tẹnmẹ. Finẹ wẹ yé whè alọ po afọ Jesu tọn lẹ po do atin lọ go te. Enẹgodo yé jlọ atin lọ dote bọ Jesu tin to pipla do e go. Ohùn to sisà sọn e go, bọ awufiẹsa lọ sọ sù tlala.

Jesu ma kú to afọdopolọji gba. E nọ pipla to atin lọ go na ojlẹ de. Yẹwhenọ daho lẹ yí ì do davlẹ. Podọ aligbọntọ lẹ dọmọ: “Eyin hiẹ yin Ovi Jiwheyẹwhe tọn, jẹte sọn [yatin] go.” Ṣigba Jesu yọ́n nuhe Otọ́ etọn do e hlan nado wà. E yọnẹn dọ emi dona yí ogbẹ̀ pipé emitọn do sanvọ́ whẹpo mí nido sọgan tindo dotẹnmẹ lọ nado mọ ogbẹ̀ madopodo. To godo mẹ, to nudi ogàn atọ̀n mẹ to whèmẹ, Jesu dawhá hlan Otọ́ etọn bosọ kú.—Matiu 26:36–27:50; Malku 15:1; Luku 22:39–23:46; Johanu 18:1–19:30.

Lehe Jesu gbọnvona Adam do sọ! Adam ma do owanyi hia na Jiwheyẹwhe gba. Kakatimọ e vẹtoli na Jiwheyẹwhe. Mọdopolọ Adam ma do owanyi hia na mí gba. Na ylando etọn wutu, mímẹpo wẹ dugu ylando tọn. Ṣigba Jesu do owanyi hia na Jiwheyẹwhe podọ na mí. E setonuna Jiwheyẹwhe to whepoponu. Podọ e sọ yí ogbẹ̀ etọn do sanvọ́ nado sọgan de oylan he Adam bẹpla mí lọ sẹ̀.

Be hiẹ yọ́n pinpẹn onú jiawu he Jesu wà na mí tọn ya?⁠— Eyin a to dẹ̀ho hlan Jiwheyẹwhe, be a nọ dopẹna ẹn na Ovi etọn he e yí na mí ya?⁠— Apọsteli Paulu yọ́n pinpẹn nuhe Klisti wà na ẹn tọn. Paulu wlan dọ Ovi Jiwheyẹwhe tọn ‘yiwanna mi, bosọ yí ede na mi.’ (Galatianu lẹ 2:20) Jesu kú na hiẹ po yẹn po. E yí ogbẹ̀ pipé etọn do sanvọ́, na mí nido sọgan mọ ogbẹ̀ madopodo! Na taun tọn, enẹ yin whẹwhinwhẹn titengbe de he wutu mí dona yiwanna Jesu.

Apọsteli Paulu wlanwe hlan Klistiani he tin to otò Kọlinti tọn mẹ lẹ dọmọ: “Owanyi Klisti tọn nọ dozolanmẹ na mí.” Etẹwẹ hiẹ lẹndọ owanyi Klisti tọn dona dozolanmẹ na mí nado wà?⁠— Doayi gblọndo Paulu tọn go: “Klisti kú na mẹlẹpo na yé nido nọgbẹ̀ na Ewọ. Yé ma dona nọgbẹ̀ nado wà ojlo yede tọn gba.”⁠—Wekun flinflin lẹ yin mítọn; 2 Kọlintinu lẹ 5:14, 15, New Life Version.

Be a yọ́n aliho delẹ he mẹ a sọgan dohia te dọ a to gbẹ̀nọ nado wà ojlo Klisti tọn ya?⁠— Aliho dopo wẹ nado dọ nuhe hiẹ ko plọn dogbọn Jesu dali lẹ na mẹdevo lẹ. Kavi lẹnnupọndo ehe ji: Vlavo hiẹ dopokẹdẹ wẹ tin to fide, bọ onọ̀ kavi otọ́ towe ma sọgan mọ nuhe wà a te, mọjanwẹ gbẹtọ depope ma sọgan mọ we. Be a na pọ́n aihun televiziọn tọn lẹ kavi onú delẹ to Internet ji ehe a yọnẹn dọ e ma na hẹn homẹ Jesu tọn hùn wẹ ya?⁠— Flindọ, Jesu tin to ogbẹ̀ todin, podọ e sọgan mọ nuhe mí to wiwà lẹpo!

Onú devo he wutu mí dona yiwanna Jesu wẹ yindọ mí jlo nado hodo apajlẹ Jehovah tọn. Jesu dọ dọ “Otọ́ yiwanna mi.” Be a yọ́n nuhewutu e yiwanna Jesu bọ mílọsu dona sọ yiwanna ẹn ya?⁠— Na Jesu yigbe nado kú nado sọgan hẹn ojlo Jiwheyẹwhe tọn di. (Johanu 10:17) Enẹwutu dike mí ni wà nuhe Biblu dọna mí, he dọmọ: “Mì yin mẹhodotọ Jiwheyẹwhe tọn di ovi yiwanna lẹ; bo nọ zinzọnlin to owanyi mẹ, yèdọ dile Klisti yiwanna mí ga bọ e sọ yí ede na mí.”—Efesunu lẹ 5:1, 2.