Weta 127

Yin Didi to Vendredi—Yọdo He Jẹvọ́ de to Dimanche

TODIN e ko jẹ vendredi whèmẹ, podọ Gbọjẹzan Nisan 15 tọn na bẹjẹeji to whèjai. Oṣiọ Jesu tọn tin to sẹgẹ́sẹgẹ́ to atin go, ṣigba jaguda awe he tin to apá na ẹn lẹ gbẹ́ pò to ogbẹ̀. Vendredi whemẹ nọ yin yiylọdọ Awuwle-zán, na ehe wẹ yin whenue gbẹtọ lẹ nọ dà núdùdù lẹ bo nọ dotana azọ́n niyaniya tọn devo lẹ he ma sọgan nọte kakajẹ Gbọjẹzan lọ godo.

Gbọjẹzan he na bẹjẹeji to madẹnmẹ lọ ma yin Gbọjẹzan paa (azán ṣinawetọ osẹ mẹ tọn) de poun gba ṣigba awe-pọmẹ tọn de, kavi Gbọjẹzan “daho” lọ. E nọ yin yiylọ do mọ na Nisan 15 ehe yin azán tintan azán-ṣinawe Hùnwhẹ Akla Madotọ́n tọn (bo nọ yin Gbọjẹzan to whepoponu, mahopọnna azán depope he ji e jẹ do to osẹ mẹ), jẹ do azán dopolọ ji hẹ Gbọjẹzan paa lọ.

Sọgbe hẹ Osẹ́n Jiwheyẹwhe tọn, oṣiọ lẹ ma dona yin jijodo sẹgẹ́sẹgẹ́ to atin go kakajẹ wunkẹngbe gba. Enẹwutu Ju lẹ biọ to Pilati si nado hẹn okú mẹhe to yinyin hùhù lọ lẹ tọn yá gbọn afọ yetọn lẹ winwẹ́n dali. Enẹwutu, awhànfuntọ lọ lẹ wẹ́n afọ jaguda awe lọ lẹ tọn. Ṣigba to whenuena e yindọ Jesu sọawuhia taidi mẹhe kú, afọ etọn lẹ ma yin winwẹ́n gba. Ehe hẹn owe-wiwe lọ di he dọmọ: “Ohú etọn de ma na yin gbigbà.”

Etomọṣo, nado de ayihaawe depope sẹ̀ dọ Jesu ko kú nugbonugbo, dopo to awhànfuntọ lọ lẹ mẹ sọ́ owhán adaja mẹ na ẹn. Owhán lọ sọ́ ẹ yì adà ahun etọn tọn kọ̀n, podọ to afọdopolọji ohùn po osin po tọ́n jẹgbonu. Apọsteli Johanu, mẹhe mọ nujijọ lọ po nukun po, na linlin dọ ehe sọ hẹn dọdai owe-wiwe tọn devo di dọmọ: “Yé na to pinpọ́n mẹhe yè sọwhán.”

Mẹdevo he sọ tin to mẹhutẹn lọ wẹ Josẹfu sọn tòdaho Alimate tọn mẹ, yèdọ hagbẹ Tòhódọtọ Ju lẹ tọn de he tindo oyín dagbe. Ewọ gbẹ́ nado nọgodona nuwiwa agọ̀ whẹdatẹn daho lọ tọn sọta Jesu. Josẹfu na taun tọn yin devi Jesu tọn, dile etlẹ yindọ e dibu nado do ede hia taidi devi de. Ṣigba, todin e do adọgbigbo hia bo yì Pilati dè nado biọ oṣiọ Jesu tọn. Pilati ylọ awhàngán he to nukunpedego, podọ whenuena awhàngán lọ dekunnu dọ Jesu ko kú godo, Pilati jo oṣiọ lọ do alọmẹ na ẹn.

Josẹfu ze oṣiọ lọ bo blá ẹ do avọ̀ wéwé dagbedagbe de mẹ to awuwle mẹ na ṣiọdidi lọ. Nikodemi, heyin hagbẹ Tòhódọtọ Ju lẹ tọn devo gọalọna ẹn. Nikodemi lọsu ko gboawupo nado yigbe yise etọn to Jesu mẹ na obu otẹn etọn hinhẹnbú tọn wutu. Ṣigba todin e hẹn avọ̀ de wá he tindo zuya he yì nudi ojlẹ Lomunu lẹ tọn kanweko po aloe akuẹgegenu tọn po. Agbasa Jesu tọn yin biblá do avọ̀ he mẹ nuwhẹ́nwan ehelẹ tin te mẹ, kẹdẹdi aṣa Ju lẹ tọn na awuwlena oṣiọ na ṣiọdidi.

Enẹgodo oṣiọ lọ yin titẹ́ do yọdo yọyọ oflin tọn Josẹfu tọn he yin kùnkùn do osé he tin to jipa he to yakẹ lọ mẹ. To godo mẹ, zannu daho de yin bibli do nukọn yọdo lọ tọn. Nado dotana ṣiọdidi lọ jẹnukọnna Gbọjẹzan lọ, oṣiọ lọ yin awuwlena po awuyiya po. Enẹwutu, Malia Magdaleni po Malia onọ̀ Jakobu Pẹvi lọ tọn po, mẹhe vlavo to alọgọ po awuwiwle lọ po, yawu yì whégbè nado wleawuna nuwhẹ́nwan po amì owán gblingblinnọ susu po dogọ. To Gbọjẹzan lọ godo, yé basi tito nado penukundo agbasa Jesu tọn go dogọ nado sọgan glọnalina ẹn sọn gbigble mẹ na ojlẹ dindẹn.

To wunkẹngbe, ehe yin samedi (Gbọjẹzan lọ), ogán yẹwhenọ lẹ tọn po Falesi lẹ po yì Pilati dè bo dọmọ: “Baba, míwlẹ flin dọ mẹklọtọ nẹ dọ whenuena e tin to ogbẹ̀, dọmọ, To azán atọ̀n godo yẹn na fọ́n. Enẹwutu degbe na yè ni payi olidò lọ go dagbedagbe kakajẹ azán atọ̀ntọ gbè, nuplọntọ etọn lẹ nikaa wá to ozán mẹ bo fìn in sọyi, bo na dọ hlan gbẹtọ lẹ, dọmọ, E fọ́n sọn oṣiọ lẹ mẹ: búbú godo mẹ tọn bo na ylan hú nukọntọn.”

Pilati gblọn dọmọ: “Mì tindo hihọ́tọ: mì yì, na mì ni basi dagbedagbe dile mì sọgan do.” Enẹwutu yé yì bo basi hihọ́na yọdo lọ gbọn zannu lọ yíyí do sú i dali bo ze awhànfuntọ Lomunu lẹ do e ji taidi hihọ́tọ lẹ.

To afọnnu-fuu dimanche, Malia Magdaleni po Malia onọ̀ Jakobu tọn po, gọna Salomi, Joana, po yọnnu devo lẹ po, hẹn nuwhẹ́nwan lẹ wá yọdo lọ kọ̀n nado zan na agbasa Jesu tọn. To aliho ji yé to didọ na ode awetọ dọmọ: “Mẹnu wẹ na bli zannu sọn ohọ̀n yọwhé tọn go sẹ̀ na mí?” Ṣigba to finẹ jijẹ godo, yé mọdọ aigba sisọsisọ de ko jọ bọ angẹli Jehovah tọn ko bli zannu lọ sẹ̀. Hihọ́tọ lọ lẹ ko yì, bọ yọdo lọ ko jẹvọ́! Matiu 27:57–28:2; Malku 15:42–16:4; Luku 23:50–24:3, 10; Johanu 19:14, Johanu 19:31–20:1; 12:42; Levitiku 23:5-7; Deutelonomi 21:22, 23; Psalm 34:20; Zekalia 12:10.

▪ Naegbọn vendredi nọ yin yiylọdọ Awuwle-zán, podọ etẹwẹ yin Gbọjẹzan “daho” lọ?

▪ Owe-wiwe tẹlẹ wẹ yin hinhẹndi to kọndopọmẹ hẹ agbasa Jesu tọn?

▪ Etẹwẹ Josẹfu po Nikodemi po tindo nado yí wà po ṣiọdidi Jesu tọn po, podọ etẹwẹ yin haṣinṣan yetọn hẹ Jesu?

▪ Etẹwẹ yẹwhenọ lẹ biọ to Pilati si, podọ nawẹ e yigbe gbọn?

▪ Etẹwẹ jọ to afọnnu-fuu dimanche tọn?