Weta 131

Awusọhia Godo Tọn lẹ, po Pẹntikọsti 33 W.M. Po

TO OJLẸ tangan de mẹ Jesu basi tito na apọsteli etọn 11 lẹpo nado pé e to osó de ji to Galili. E họnwun dọ devi devo lẹ yin didọna dogbọn opli lọ dali, bọ lẹndopọ gbẹtọ sọha he hugan 500 lẹ wẹ plidopọ. Plidopọ ayajẹ tọn nankọ die ehe sọawuhia nado yin to whenuena Jesu sọawuhia bo jẹ nuplọn yé ji!

Na taun tọn, Jesu basi zẹẹmẹ na gbẹtọgun daho lọ dọ Jiwheyẹwhe ko na ẹn aṣẹ lẹpo to olọn mẹ podọ to aigba ji. E dotuhomẹna yé dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì ni sọ nọ plọn yé nado nọ doayi onú lẹpo go nudepope he yẹn degbena mì.”

Lẹnnupọndeji! Sunnu lẹ, yọnnu lẹ, po ovi lẹ po, yemẹpo wẹ mọ gbedide ehe dopolọ yí nado tindo mahẹ to azọ́n devi-bibasi tọn lọ mẹ. Nukundiọsọmẹtọ lẹ na tẹnpọn nado doalọtena yẹwhehodidọ po mẹpinplọn yetọn po, ṣigba Jesu miọnhomẹna yé dọmọ: “Bo pọ́n, yẹn tin to mì dè to whepoponu, kakajẹ opodo aihọn tọn.” Jesu tin po hodotọ etọn lẹ po gbọn gbigbọ wiwe lọ gblamẹ, nado gọalọna yé nado hẹn lizọnyizọn yetọn di.

To pọmẹ, Jesu do ede hia devi etọn lẹ gbẹ̀te na ojlẹ azán 40 tọn bọdo fọnsọnku etọn go. To awusọhia ehelẹ whenu e plọn yé dogbọn Ahọluduta Jiwheyẹwhe tọn dali, podọ e zinnudo nuhe yin azọngban yetọn ji taidi devi etọn lẹ. To nujijọ dopo whenu e tlẹ sọawuhia hlan nọvisunnu daa etọn Jakobu bo hẹn mayisenọ dai tọn ehe kudeji dọ Emi wẹ Klisti lọ nugbonugbo.

To whenuena apọsteli lọ lẹ gbẹ́ pò to Galili, e họnwun dọ Jesu dọna yé nado lẹkọyi Jelusalẹm. To whenuena e to opli basi hẹ yé to finẹ, e dọna yé dọmọ: “[Mì] yì sọn Jelusalẹm blo, ṣigba [mì] ni nọtepọn opagbe Otọ́ tọn, ehe, mì ko sè sọn onù ṣie mẹ. Na nugbo wẹ Johanu yí osin do baptizi; ṣigba yè na yí [gbigbọ wiwe] do baptizi mì, e ma yin azán susu sọn dinvie gba.”

To godo mẹ Jesu pli whladopo dogọ po apọsteli etọn lẹ po bo plan yé tọ́n sọn tòdaho lọ mẹ kaka yì Bẹtani, ehe yin didoai do agbàdo whèzẹtẹn-waji Osó Olivie tọn mẹ. Po nupaṣamẹ po, mahopọnna nuhe e ko dọ dogbọn olọn mẹ yìyì etọn agọgbọnẹnmẹ tọn etọn lẹpo dali, yé gbẹ́ yise dọ Ahọluduta etọn na yin zizedai to aigba ji. Enẹwutu yé kanse dọmọ: “Oklunọ, hiẹ na gọ̀ ahọludu jo hlan Islaeli to ojlẹ he mẹ lò?”

Kakati nado tẹnpọn whladopo dogọ nado vọ́ linlẹn agọ̀ yetọn jlado, Jesu gblọn poun dọmọ: “E ma tin na mìwlẹ nado yọ́n whenu kavi ojlẹ he Otọ́ yí do huhlọn ede tọn mẹ gba.” Enẹgodo, to nuzinzindo azọ́n he yé dona wà ji whladopo dogọ, e dọmọ: “Mìwlẹ na mọ huhlọn yí whenuena [gbigbọ wiwe] wá mì ji: mìwlẹ nasọ yin kunnudetọ na mi to Jelusalẹm mẹ, to Judé lẹpo mẹ, po Samalia po, podọ jẹ opodo aigba tọn.”

Dile yé gbẹ́ pò to pinpọn, Jesu jẹ agayi ji hlan olọn mẹ, podọ to enẹgodo aslọ yí ì sọn nukun yetọn mẹ. To agbasalan etọn zizedai godo, e hẹji yì olọn mẹ taidi gbẹtọ gbigbọnọ de. Dile omẹ 11 lọ lẹ to nukun zín do agahomẹ, sunnu 2 sọawuhia to apá na yé to alavọ wéwé mẹ. Angẹli he ze agbasa gbẹtọ tọn dó ehelẹ kanse dọmọ: “Mì dawe Galili tọn lẹ, etẹwutu wẹ mì ṣite bo to nukun zín do olọn mẹ? Jesu he lọ, he yè yí do olọn mẹ sọn mì dè, nasọ lẹgọ wá dile mì mọ ẹn bọ e jei olọn mẹ.”

Aliho he mẹ Jesu ṣẹṣẹ jo aigba ji do te ma yin po ajògidi gbangba tọn po gba podọ hodotọ nugbonọ etọn lẹ kẹdẹ wẹ yọnẹn. Enẹwutu e na lẹkọwa to aliho dopolọ mẹ—matin ajògidi gbangba tọn podọ hodotọ nugbonọ etọn lẹ kẹdẹ wẹ na yọnẹn dọ e ko lẹkọwa bo ko bẹ tintin tofi etọn to huhlọn Ahọluduta tọn mẹ jẹeji.

Todin apọsteli lẹ jẹte sọn Osó Olivie tọn ji, dasá Agbàdo Kidlọni tọn, bo biọ Jelusalẹm mẹ whladopo dogọ. Yé gbọṣi finẹ to tonusise mẹ na gbedide Jesu tọn. To azán ao godo, to Hùnwhẹ Juvi lẹ tọn heyin Pẹntikọsti 33 W.M. tọn whenu, dile nudi devi 120 pli dopọ to abò aga tọn de mẹ to Jelusalẹm, awhá he taidi jẹhọn sinsinyẹn de tọn gọ́ ohọ̀ lọ pete mẹ to ajijimẹ. Odẹ́ lẹ he taidi miyọ́n yin mimọ, bọ dopodopo etọn jẹ do mẹhe tin to finẹ lẹ dopodopo ji, podọ devi lọ lẹpo jẹ hodọ ji to ogbè voovo lẹ mẹ. Ehe wẹ yin kinkọ̀n jẹgbonu gbigbọ wiwe tọn he Jesu ko dopagbe etọn! Matiu 28:16-20; Luku 24:49-52; 1 Kọlintinu lẹ 15:5-7; Owalọ lẹ 1:3-15; 2:1-4.

▪ Mẹnu lẹ wẹ Jesu na anademẹ e zun whedenu tọn to osó de ji to Galili, podọ etẹwẹ anademẹ ehelẹ yin?

▪ Homẹmiọnnamẹ tẹwẹ Jesu wleawu etọn na devi etọn lẹ, podọ nawẹ e na tin po yé po gbọn?

▪ Nawẹ e dẹn sọ to fọnsọnku etọn godo bọ Jesu do to awusọhia devi etọn lẹ, podọ etẹwẹ e plọn yé?

▪ Mẹhe kunnudenu dohia dọ e ma ko yin devi de jẹnukọnna okú Jesu tọn tẹwẹ Jesu sọawuhia?

▪ Opli godo tọn awe tẹlẹ wẹ Jesu basi po apọsteli etọn lẹ po, podọ etẹwẹ jọ to nujijọ ehelẹ whenu?

▪ Nawẹ e yin gbọn dọ Jesu na lẹkọwa to aliho dopolọ he mẹ e yì te?

▪ Etẹwẹ jọ to Pẹntikọsti 33 W.M.?