Jesu Lẹkọyi Olọn Mẹ

Jesu pli hẹ hodotọ etọn lẹ to Galili. E na yé gbedide titengbe de dọmọ: ‘Mì yì bo hẹn gbẹtọ lẹ sọn aigba lẹpo ji zun devi lẹ. Mì plọn yé nuhe yẹn ko plọn mì lẹ bo baptizi yé.’ Enẹgodo, e dopà dọmọ: ‘Mì flindọ, yẹn na tin po mì po to azán lẹpo gbè.’

To azán 40 he bọdo fọnsọnku etọn go lẹ gblamẹ, Jesu sọawuhia omẹ kanweko susu to devi etọn lẹ mẹ to Galili podọ to Jelusalẹm. E plọn yé onú titengbe delẹ bo wà azọ́njiawu susu. Enẹgodo, Jesu pli hẹ apọsteli etọn lẹ whla godo tọn to Osó Olivie tọn ji. E dọna yé dọ: ‘Mì ma tọ́n sọn Jelusalẹm blo. Mì nọtepọn opagbe he Otọ́ ko do.’

Apọsteli etọn lẹ ma mọnukunnujẹ nuhe dọ e te mẹ. Yé kanse e dọmọ: ‘Be hiẹ na lẹzun Ahọlu Islaeli tọn todin wẹ ya?’ Jesu dọna yé dọ: ‘Ojlẹ ma ko sọ̀ na Jehovah na yẹn nido lẹzun Ahọlu. To madẹnmẹ, mì na mọ huhlọn gbigbọ wiwe tọn yí, bọ mì na yin kunnudetọ ṣie lẹ. Mì yì dọyẹwheho to Jelusalẹm, Jude po Samalia po, podọ kaka yì awà he dẹn hugan aigba tọn lẹ ji.’

Enẹgodo, Jesu yin zize yì agahomẹ bọ aslọ ṣinyọ́n ẹn. Devi etọn lẹ zindonukọn nado to agahomẹ pọ́n, amọ́ e ko yì.

Devi lẹ jẹte sọn Osó Olivie tọn ji bo yì Jelusalẹm. Yé nọ pli dopọ to gbesisọ mẹ to abò aga tọn de mẹ bo nọ hodẹ̀. Yé to tenọpọn Jesu nado na yé anademẹ devo lẹ.