Weta 132
To Adusilọ Jiwheyẹwhe Tọn Mẹ
KINKỌ̀N jẹgbonu gbigbọ wiwe tọn to Pẹntikọsti yin kunnudenu dọ Jesu ko lẹkọyi olọn mẹ. Numimọ lọ heyin nina devi Stefani to ojlẹ gli de to enẹgodo sọ dohia ga dọ E ko lẹkọyi. Tlolo jẹnukọnna yinyin zannu dlan do na kunnudide nugbonọ etọn tọn wutu, Stefani lá dọmọ: “Pọ́n, yẹn mọ olọn lẹ hùn, po Ovi gbẹtọ tọn po to ote to adusilọ Jiwheyẹwhe tọn mẹ.”
Dile e tin to adusilọ Jiwheyẹwhe tọn mẹ, Jesu to tenọpọn gbedide lọ sọn Otọ́ etọn dè dọmọ: “To ahọludu to ṣẹnṣẹn kẹntọ towe lẹ tọn.” Ṣigba jẹnukọnna ojlẹ lọ, kakajẹ whenuena e na yinuwa sọta kẹntọ etọn lẹ, etẹwẹ Jesu to wiwà? E to gandu, kavi to ahọludu, do devi yiamisisadode etọn lẹ ji, bo to anadena yé to azọ́n yẹwhehodidọ tọn yetọn mẹ bo to awuwlena yé gbọn fọnsọnku dali, nado lẹzun ahọlu gbẹdohẹmẹtọ lẹ hẹ ẹ to Ahọluduta Otọ́ etọn tọn mẹ.
Di apajlẹ, Jesu de Saulu (heyin yinyọnẹn ganji to godo mẹ gbọn yinkọ Lomu tọn etọn, Paulu dali) nado yin tọ́ntlọngbọ́n to azọ́n devi-bibasi tọn mẹ to aigba devo lẹ ji. Saulu yin zohunhunnọ na Osẹ́n Jiwheyẹwhe tọn, ṣogan e yin hinhẹn buali gbọn sinsẹ̀ngan Juvi lẹ tọn dali. Taidi kọdetọn de, e ma yindọ Saulu yigbena hùhù Stefani tọn kẹdẹ wẹ gba ṣigba e yì Damasku po aṣẹ sọn yẹwhenọ daho Kaifa po dè nado wle sunnu kavi yọnnu depope he e mọ to finẹ he yin hodotọ Jesu tọn lẹ wá Jelusalẹm. Ṣigba, dile Saulu tin to aliho ji jei, hinhọ́n gblegede de tá lẹdo e to ajiji mẹ bọ e sọ jai jẹ aigba.
Ogbè de sọn asisa mayinukundomọ mẹ kanse dọmọ: “Saulu, Saulu, etẹwutu wẹ hiẹ to homẹkẹndo mi?” Saulu sọ kanse dọmọ: “Hiẹ mẹnu wẹ, Oklunọ?”
Gblọndo lọ wá dọmọ: “Yẹn Jesu mẹhe hiẹ to homẹkẹndo wẹ.”
Saulu, mẹhe hinhọ́n azọ́njiawu tọn lọ ko tọ́nnukun na, yin didọna gbọn Jesu dali nado biọ Damasku mẹ bo nọtepọn anademẹ lẹ. Enẹgodo to numimọ de mẹ, Jesu sọawuhia Anania heyin dopo to devi etọn lẹ mẹ. Gando Saulu go, Jesu dọna Anania dọmọ: “Núzinzan dide de wẹ [dawe ehe] yin hlan mi, nado hẹn oyín ṣie yì Kosi lẹ, po ahọlu lẹ po, po ovi Islaeli tọn lẹ po nukọn.”
Na nugbo tọn, po godonọnamẹ Jesu tọn po, Saulu (heyin yinyọnẹn todin taidi Paulu) po wẹndagbe-jlatọ devo lẹ po tindo kọdetọn dagbe he sẹhundaga to azọ́n yẹwhehodidọ po mẹpinplọn tọn yetọn po mẹ. Na nugbo tọn, nudi owhe 25 to awusọhia Jesu tọn hlan ẹn to aliho Damasku tọn ji godo, Paulu wlan dọ “wẹndagbe” lọ ko yin “yẹwheho [etọn dọ] hlan mẹhe tin to olọn glọ lẹpo.”
To owhe susu devo lẹ godo, Jesu na numimọ debọdo-dego lẹ hlan apọsteli yiwanna etọn, Johanu. Gbọn numimọ ehelẹ he Johanu basi zẹẹmẹ etọn to owe Biblu tọn Osọhia mẹ gblamẹ, ewọ nọgbẹ̀ nado mọ gigọwa Jesu tọn to huhlọn Ahọluduta tọn mẹ to godo mẹ. Johanu dọ dọ, “to gbigbọ mẹ” emi yin hinhẹn yì nukọn to ojlẹ mẹ yì “azán Oklunọ tọn gbè.” Etẹwẹ “azán” ehe yin?
Nupinplọn sọwhiwhe tọn dogbọn dọdai Biblu tọn lẹ dali, gọna dọdai Jesu lọsu tọn gando azán godo tọn lẹ go, dohia dọ “azán Oklunọ tọn” bẹjẹeji to owhe whenuho tọn 1914 mẹ! Enẹwutu to 1914 wẹ Jesu gọwa to mayinukundomọ mẹ, matin ajògidi gbangba tọn bọ devizọnwatọ nugbonọ etọn lẹ kẹdẹ wẹ yọnẹn dogbọn gigọwa etọn dali. To owhe enẹ mẹ Jehovah degbe na Jesu nado yì bo to gandu to kẹntọ etọn lẹ ṣẹnṣẹn!
To tonusise mẹ na gbedide Otọ́ etọn tọn, Jesu klọ́ olọn lẹ wé sọn Satani po aovi etọn lẹ po si, bo yàn yé dlan odò to aigba ji. To mimọ ehe jọ to numimọ mẹ godo, Johanu sè ogbè olọn mẹ tọn de lá dọmọ: “Dinvie wẹ whlẹngán, huhlọn, ahọludu Jiwheyẹwhe mítọn tọn, po huhlọn Klisti etọn tọn po wá.” Mọwẹ, to 1914 Klisti jẹ gandu ji taidi Ahọlu!
Wẹndagbe nankọ die ehe yin na sinsẹ̀n-basitọ Jehovah tọn he tin to olọn mẹ lẹ! Yé yin tudohomẹna dọmọ: “Mì to ayajẹ, mì olọn lẹ emi, po mì he nọ nọ̀ yé mẹ lẹ po.” Ṣigba etẹwẹ yin ninọmẹ lọ na mẹhe tin to aigba ji lẹ? Ogbè he sọn olọn lọ zindonukọn dọmọ: “Dindọ̀n hlan aihọnmẹnu lẹ, podọ hlan yé he tin to ohù mẹ lẹ, na Lẹgba lọ ko jẹte wá mì dè, po homẹgble daho po wutu, na e yọnẹn dọ whenu gli de wẹ e tindo.”
Ojlẹ whenu gli enẹ tọn mẹ wẹ mí tin te to alọnu din. To alọnu din gbẹtọ lẹ to didohia vlavo eyin yé jẹ nado biọ aihọn yọyọ Jiwheyẹwhe tọn mẹ kavi nado jiya vasudo tọn. Nugbo lọ wẹ yindọ, lehe hiẹ yigbe hlan wẹndagbe Ahọluduta Jiwheyẹwhe tọn he to yinyin yẹwheho etọn dọ lẹdo aihọn pé to anademẹ Klisti tọn glọ gbọn wẹ na do nuhe na jọ do hiẹ lọsu titi go hia.
Jesu Klisti to enẹgodo na yinuwa taidi Nuyizan Jiwheyẹwhe tọn nado zà titonu Satani tọn pete po mẹhe to godonọna ẹn lẹpo po sẹ̀ sọn aigba ji. Jesu na de kanyinylan sẹ̀ to awhàn he yin yiylọ to Biblu mẹ dọ Ha-Magẹdọni, kavi Amagẹdọni mẹ. Enẹgodo, Jesu, heyin Mẹhe klohugan to wẹkẹ lọ mẹ he bọdo Jehovah Jiwheyẹwhe lọsu go, na wle Satani po aovi etọn lẹ po bo na dogàn yé họ̀ owhe fọtọ́n to “odò mapote” de mẹ, enẹ wẹ yin, ninọmẹ nude-mayiwa taidi okú tọn de mẹ. Owalọ lẹ 7:55-60; 8:1-3; 9:1-19; 16:6-10; Psalm 110:1, 2; Heblu lẹ 10:12, 13; 1 Pita 3:22; Luku 22:28-30; Kọlọsinu lẹ 1:13, 23; Osọhia 1:1, 10; 12:7-12; 16:14-16; 20:1-3; Matiu 24:14.
▪ To agahihẹ yì olọn mẹ Jesu tọn godo, fie wẹ e yin mimọ te, podọ etẹwẹ e nọtepọn?
▪ Mẹnu lẹ ji wẹ Jesu dugán do to agahihẹ yì olọn mẹ etọn godo, podọ nawẹ gandudu etọn sọawuhia gbọn?
▪ Whetẹnu wẹ “azán Oklunọ tọn” bẹjẹeji, podọ etẹwẹ jọ to bẹjẹeji etọn whenu?
▪ Nawẹ azọ́n yẹwhehodidọ tọn he to nukọnzindo to egbehe gando dopodopo mítọn lẹ go gbọn?
▪ To whenuena azọ́n yẹwhehodidọ tọn ehe na yin tadona, nujijọ tẹwẹ na bọdego?