Be Mẹhe Nọ Wà Onú Ylankan lẹ Sọgan Diọ Ya?

BE E ma na yọ́n taun eyin mẹlẹpo nọ wà dagbe to whelẹponu ya?⁠— Ṣigba mẹdepope ma tin he nọ wà dagbe to whepoponu gba. Be a yọ́n nuhe zọ́n bọ mímẹpo nọ wà onú ylankan to whedelẹnu etlẹ yin to whenuena mí jlo nado wà dagbe ya?⁠— Na mímẹpo wẹ dugu ylando tọn wutu wẹ. Ṣigba mẹdelẹ nọ wà onú ylankan susu. Yé nọ gbẹwanna mẹdevo lẹ bo nọ gbleawuna yé sọn ojlo mẹ wá. Be a lẹndọ omẹ ehelẹ sọgan diọ bo na jẹ dagbe wà ji ya?⁠—

Pọ́n dẹpẹ he a to mimọ to yẹdide lọ mẹ ehe. Ewọ wẹ to nukunpedo awù mẹhe to zannu dlan do Stefani lẹ tọn go. Oyín etọn to Heblugbe mẹ nọ yin Saulu, ṣigba to ogbè Lomu tọn mẹ, e nọ yin Paulu. E vivi na ẹn dọ yé to Stefani, he yin devi Mẹplọntọ Daho lọ tọn hù. Gbọ mí ni pọ́n nuhewutu Saulu do wà onú ylankan mọnkọtọn lẹ.

Saulu yin dopo to hagbẹ sinsẹ̀n Juvi lẹ tọn he nọ yin yiylọdọ Falesi lẹ mẹ. Falesi lẹ tindo Ohó Jiwheyẹwhe tọn, ṣigba yé ma nọ setonu na ẹn sọ nuplọnmẹ sinsẹ̀ngán yetọn delẹ tọn gba. Ehe wẹ hẹn Saulu nado wà onú ylankan lẹ.

Saulu lọsu tin to finẹ to whenuena Stefani yin wiwle to Jelusalẹm. Stefani yin hinhẹn yì whẹdatẹn de, fie delẹ to whẹdatọ lọ lẹ mẹ yin Falesi lẹ te. Dile yé tlẹ to onú ylankan lẹ dọ gando Stefani go, obu ma di i gba. E yí adọgbigbo do dọho bo dekunnu na whẹdatọ lẹ tlọlọ dogbọn Jehovah Jiwheyẹwhe po Jesu po dali.

Ṣigba homẹ whẹdatọ lọ lẹ tọn ma hùn na nuhe yé sè gba. Yé ko yọ́n onú susu dogbọn Jesu dali. To ojlẹ vude die wayi, yé ko degbè dọ Jesu ni yin hùhù! Ṣigba to enẹgodo, Jehovah fọ́n Jesu lẹkọyi olọn mẹ. Todin, kakati whẹdatọ ehelẹ ni lẹnvọjọ, yé jẹ avùnho hẹ devi Jesu tọn lẹ ji.

Whẹdatọ lọ lẹ wle Stefani bo dọ̀n ẹn jẹ gbonu tòdaho lọ tọn. Yé hò e kudaa-gbẹ̀daa bosọ dlan zannu do e. Podọ dile a to mimọ to yẹdide lọ mẹ do, Saulu lọsu tin to finẹ bo to yé pọ́n. E lẹndọ e sọgbe nado hù Stefani.

Be a yọ́n nuhewutu Saulu lẹnnupọn to aliho enẹ mẹ ya?⁠— Sọn ovu-whenu Saulu tọn wẹ e ko yin Falesi de, podọ e yise dọ nuplọnmẹ Falesi lẹ tọn wẹ sọgbe hugan. Apajlẹ Falesi lẹ tọn wẹ e nọ hodo.—Owalọ lẹ 7:54-60.

Etẹwẹ Saulu wà to whenuena Stefani ko yin hùhù godo?⁠— E tẹnpọn nado hù devi Jesu tọn he pò lẹ! E nọ yì owhé yetọn lẹ gbè tlọlọ bo nọ wle sunnu po yọnnu po, bosọ nọ bẹ yé do ganpamẹ. Enẹ zọ́n bọ susu devi lẹ tọn dona họnyi sọn Jelusalẹm, ṣigba yé ma doalọtena yẹwhehodidọ dogbọn Jesu dali gba.⁠—Owalọ lẹ 8:1-4.

Ehe hẹn Saulu nado sọ vọ́ wangbẹna devi Jesu tọn lẹ dogọ. Enẹwutu e yì Yẹwhenọ Daho Kaifa dè bo yí aṣẹ sọn e dè nado wle Klistiani he tin to tòdaho Damasku tọn mẹ lẹ. Saulu jlo nado hẹn yé wá Jelusalẹm taidi gàntọ nado sayana yé. Ṣigba dile Saulu to yìyì to aliho ji jei Damasku, onú jiawu de jọ.

Hinhọ́n de tá sọn olọn mẹ, bọ ogbè de dọmọ: “Saulu, Saulu, etẹwutu wẹ hiẹ to homẹkẹndo mi?” Jesu wẹ to hodọ sọn olọn mẹ! Hinhọ́n lọ họnwun sọmọ bo tọ́nnukun na Saulu, bọ mẹhe zọnhẹ Saulu lẹ wẹ hẹn alọ go na ẹn bo plan ẹn yì Damasku.

To azán atọ̀ntọ gbè, to numimọ de mẹ, Jesu sọawuhia dopo to devi etọn lẹ mẹ to Damasku he nọ yin Anania. Jesu dọna Anania dọ e ni dla Saulu pọ́n bo hùn nukun etọn lẹ bosọ dọhona ẹn. To whenuena Anania dọhona Saulu, e kẹalọyi nugbo Jesu tọn. Nukun etọn lẹ hùn. Gbẹzan etọn lẹpo diọ, bọ e lẹzun devizọnwatọ nugbonọ Jiwheyẹwhe tọn.⁠—Owalọ lẹ 9:1-22.

Be a mọ nuhe zọ́n bọ Saulu do nọ wà onú ylankan dai ya?⁠— Na onú ylankan ko yin pinplọn ẹn wutu wẹ. E hodo mẹhe mayin nugbonọ hlan Jiwheyẹwhe lẹ. Podọ e kọnawudopọ hẹ pipli gbẹtọ lẹ tọn de he nọ yí nukun nujọnu tọn do pọ́n linlẹn gbẹtọ tọn hú Ohó Jiwheyẹwhe tọn. Ṣigba etẹwutu wẹ Saulu diọ gbẹzan etọn bo jẹ dagbe wà ji, dile etlẹ yindọ Falesi hatọ etọn he pò lẹ zindonukọn to avùnhiho hẹ Jiwheyẹwhe mẹ?⁠— Nuhe zọ́n lọ wẹ yindọ Saulu ma gbẹwanna nugbo lọ gba. Enẹ wẹ zọ́n bọ to whenuena nugbo lọ yin didohia ẹ, e yawu setonuna ẹn.

Be a yọ́n mẹhe Saulu wá lẹzun to godo mẹ ya?⁠— Mọwẹ, e wá lẹzun apọsteli Paulu, kavi apọsteli Jesu tọn de. Podọ flindọ, Paulu kàn owe Biblu tọn susu hugan mẹdevo depope.

Gbẹtọ susu wẹ tin he sọgan diọ di Saulu. Ṣigba e ma nọ bọawu nado diọ. Na mẹde tin he to azọ́n sinsinyẹn wà nado hẹn gbẹtọ lẹ wà onú ylankan lẹ. Be a yọ́n dawe lọ ya?⁠— To whenuena Jesu sọawuhia Saulu to aliho Damasku tọn ji, Jesu dọho dawe lọ tọn. Jesu dọho hlan Saulu sọn olọn mẹ dọmọ: ‘Yẹn to dido we hlan nado hùn nukun na gbẹtọ lẹ, nado lẹ́ yé sọn zinvlu mẹ do hinhọ́n mẹ, podọ sọn huhlọn Satani tọn mẹ do Jiwheyẹwhe dè.’⁠—Owalọ lẹ 26:17, 18.

Mọwẹ, Satani Lẹgba wẹ to tintẹnpọn nado hẹn gbẹtọ lẹpo wà onú ylankan lẹ. Be e nọ vẹawu na we to whedelẹnu nado wà nuhe sọgbe wẹ ya?⁠— Mọwẹ, e nọ wàmọ na mímẹpo. Satani wẹ nọ hẹn ẹn vẹawu na mí. Ṣigba onú devo sọ tin he zọ́n bọ e ma nọ bọawu na mí to whepoponu nado wà nuhe sọgbe. Be a yọ́n nulọ ya?⁠— Na mí yin jiji do ylando mẹ wutu wẹ.

Ylando ehe wẹ nọ hẹn ẹn bọawu na mí nado wà nuhe ylan hú nado wà nuhe sọgbe. Enẹwutu, etẹwẹ mí dona wà?⁠— Mí dona dovivẹnu nado wà nuhe sọgbe. Eyin mí wàmọ, mí sọgan deji dọ Jesu he yiwanna mí, na gọalọna mí.

To whenuena Jesu to aigba ji, e dohia dọ emi yiwanna mẹhe nọ wà onú ylankan dai ṣigba bo ko diọ lẹ. E yọnẹn dọ e ma bọawu na yé nado diọ gba. Di apajlẹ, yọnnu delẹ tin he ko tindo kọndopọ zanhẹmẹ tọn hẹ sunnu susu. Nado dọ hójọhó, onú ylankan de wẹ ehe yin. Biblu ylọ yọnnu ehelẹ dọ galọtọ lẹ.

To gbèdopo, yọnnu galọtọ de sè dogbọn Jesu dali, bo wá Jesu dè to owhé Falesi de tọn gbè. E kọ̀n amisisa do afọ Jesu tọn ji bo yí oda etọn do súnsún dasin etọn sẹ̀ sọn afọ Jesu tọn lẹ go. E lẹnvọjọ sọn ylando etọn lẹ mẹ, enẹwutu Jesu jona ẹn. Ṣigba Falesi lọ ma jlo dọ ylando yọnnu lọ tọn ni yin jijona ẹn gba.⁠—Luku 7:36-50.

Be a yọ́n nuhe Jesu dọna delẹ to Falesi lọ lẹ mẹ ya?⁠— E dọna yé dọmọ: ‘Galọtọ lẹ to ahọluduta Jiwheyẹwhe tọn mẹ biọ jẹnukọnna mì.’ (Matiu 21:31) Jesu dọ ehe na galọtọ lọ lẹ tindo yise to ewọ mẹ, bo lẹnvọjọ sọn aliho ylankan yetọn ji wutu. Ṣigba Falesi lẹ zindonukọn to onú ylankan lẹ wiwà na devi Jesu tọn lẹ mẹ.

Enẹwutu eyin Biblu dohia dọ nuhe mí to bibasi ma sọgbe, mí dona yawu diọ. Podọ eyin mí plọn bo yọ́n nuhe Jehovah jlo dọ mí ni wà, mí dona yawu wà ẹ. Enẹ na zọ́n bọ homẹ Jehovah tọn na hùn do mí go bọ e nasọ na mí ogbẹ̀ madopodo.