Aovi lẹ Nọ Na Tuli Atẹṣiṣi Sọta Jiwheyẹwhe

Ṣigba naegbọn Satani po aovi etọn lẹ po do nọ wazọ́n sinsinyẹn sọmọ nado klọ gbẹtọvi lẹ? Na yé jlo dọ mí ni kọnawudopọ hẹ yé to atẹṣiṣi yétọn mẹ wutu wẹ. Yé jlo dọ mí ni basi sinsẹ̀n hlan yé. Yé jlo dọ mí ni tindo yise to lalo yétọn lẹ mẹ podọ nado wà nuhe Jehovah gbẹwanna lẹ. Susu walọyizan ehe lẹ tọn bẹ aṣa he gando oṣiọ lẹ go hẹn.

Okú mẹyiwanna de tọn yin numimọ numọtolanmẹ awufiẹsa talala de tọn, podọ nuhe sọgbe bosọ jẹ de wẹ eyin nado blawu. To okú họntọn etọn Lazalọsi tọn godo, Jesu “viavi.”—Johanu 11:35.

Aṣa susu lẹ wẹ nọ zọnpọ hẹ oṣiọ, podọ ehe nọ gbọnvo talala lẹdo aihọn pe. Susu ma jẹagọdo nunọwhinnusẹ́n Biblu tọn lẹ gba. Ṣigba, aṣa delẹ sinai do linlẹn lọ ji dọ oṣiọ lẹ tin to ogbẹ̀ bosọ penugo nado mọ mẹhe tin to ogbẹ̀ lẹ. Jọnudidọ lẹ, awubla mapote lẹ, po huwhẹ agọwiwa pligidi lẹ po doadọ̀do do obú ma nado hẹnawugblena gbigbọ oṣiọ lẹ tọn ji. Ṣigba to whenuena oṣiọ lẹ “ma yọ́n núde,” enẹnọ lẹ he to onú mọnkọtọn lẹ basi to lalo Satani tọn zédaga.—Yẹwhehodọtọ 9:5.

Aṣa devo lẹ kavi hunwhẹ lẹ nọ fọndote sọn yise lọ mẹ dọ oṣiọ lẹ tindo nuhudo alọgọ tọn sọn mẹhe to ogbẹ̀ lẹ si bo nasọ gbleawuna yé eyin yè ma vẹvẹ na yé. To aigba delẹ ji zankinkọn po avọsinsan lẹ po nọ yin bibasi vlavo na azan 40 kavi owhe dopo blebu to okú mẹde tọn godo. Ehe nọ yin pinpọn dohlan vlavo nado gọalọ na mẹhe ko kú lọ nado ‘juwayi awa awetọ ji’ hlan lẹdo gbigbọ tọn mẹ. Nuwiwa he gbayipe devo wẹ núdùdù po ahan po nina mẹhe ko kú lẹ.

Onu ehelẹ jẹagọ na yé nọ zé lalo Satani tọn lẹ daga dogbọn oṣiọ lẹ dali. Be Jehovah na kẹalọyi nude tintindo mítọn nado wà hẹ aṣa lẹ he sinai do nuplọnmẹ aovi tọn lẹ ji ya? Gbede pọn!—2 Kọlintinu lẹ 6:14-18.

Devizọnwatọ Jiwheyẹwhe nugbo lọ tọn lẹ ma nọ tindo mahẹ to walọyizan lẹ he nọ nọ godo na lalo Satani tọn lẹ mẹ gba. Kakatimọ, yé gbọn owanyi dali do ze ayidonugo do alọgigọna mẹhe tin to ogbẹ̀ lẹ bosọ fahomẹ na yé. Yé yọnẹn dọ to afọdopolọji he mẹde kú, Jehovah dopo akan wẹ sọgan gọalọna omẹ mọnkọtọn.—Job 14:14, 15.

Afinyọnnọnuwiwa Yin Whẹgbledo Gbọn Jiwheyẹwhe Dali

Mẹdelẹ nọ tindo hodọdopọ hẹ aovi lẹ vlavo tọlọlọ kavi gbọn gbẹtọvi afinyọnnọ de dali. Ehe nọ yin yiylọ dọ afinyọnnọnuwiwa. Vodun, azé, bojijlẹ, dọṣẹdidọ, po dodinnanú sọn oṣiọ lẹ de po yin ada vovo afinyọnnọnuwiwa tọn de.

Biblu gblewhẹdo onu ehelẹ, bo dọmọ: “Yè ma na mọ omẹ depope to de we finẹ he hẹn visunnu etọn kavi viyọnnu etọn nado ju gbọn míọn mẹ yì gba, ode he nọ zán aṣẹ; ode he nọ yí apajlẹnu basi, kavi afinyọnnọ de, kavi owọntọ de. Kavi bojlẹtọ de, kavi wédotọ de po gbigbọ aovi tọn de po, kavi azétọ de, kavi aṣẹtúndomẹtọ de. Na mẹdepope he wà onú helẹ yín osùnú de hlan Oklunọ lọ [“Jehovah,” NW] Jiwheyẹwhe.”—Deutelonomi 18:10-12.

Naegbọn Jehovah do gbẹnuna mí sinsinyẹn sọmọ sọta walọyizan ehelẹ?

Na blẹomẹninọ mítọn wutu, Jehovah gbẹnúna mí jẹagọdo wunmẹ afinyọnnọnuwiwa tọn lẹpo go. E yiwanna bosọ nọ penukundo gbẹtọ lẹ go, podọ e yọnẹn dọ mẹhe kọnawudopọ hẹ aovi lẹ na jiya dandan.

Dopo to omẹ mọnkọtọn lẹ mẹ wẹ yin Nilda, he yin afinyọnnọ de to Brésil. Aovi lẹ hẹn gbẹ̀zan yọnnu lọ tọn zun nudabla de. É dọmọ: “Gbigbọ lẹ . . . ṣinyọn oyẹ ojie, to nuzọn mi lẹdope. Yẹn tin to gblagbla ninọmẹ nuyọnẹn tọn po nudemayọnẹn tọn po mẹ, podọ yẹn yin họ̀nsudo po nuhahun apọ̀nmẹ tọn lẹ po. Aovi lẹ do homẹkẹn mi sọmọ bọ e sọ yinuwa do tugbigbo ṣie ji. Podọ yẹn jẹ amasin tugbigbo tọn lẹ zan ji bosọ jẹ ahàn po siga po nù ji to gbesisọmẹ. Ehe zindonukọn domọ na owhe susu.”

Dile ojlẹ to yìyì, po alọgọ Jehovah tọn po gọna Kunnudetọ etọn he tin to aigba ji lẹ, Nilda yin tuntundote sọn huhlọn yizandomẹji aovi tọn lẹ si bosọ to gbẹzan họakuẹ de, he we ṣeke de zan todin. Ewọ dọmọ: “Yẹn na tuli mẹlẹpo, ma nado kọnawudopọ hẹ gbigbọ [ylankan] lẹ yedọ etlẹ yin na ojlẹ gli de pọn gbede blo.”