Weta 12
Nọavunte Sọta Huhlọn Gbigbọ Ylankan Tọn Lẹ
1. Nawẹ Jesu yinuwa gbọn to whenuena e pehẹ gbigbọ ylankan lẹ?
TO BAPTẸM etọn godo tlolo, Jesu Klisti yì danfafa Juda tọn ji nado hodẹ̀ bo lẹnayihamẹpọn. To finẹ Satani Lẹgba tẹnpọn nado hẹn ẹn gbà osẹ́n Jiwheyẹwhe tọn. Ṣigba, Jesu gbẹ́ mọ̀donú Satani tọn dai bo ma yin kiklọ gba. Jesu pehẹ gbigbọ ylankan devo lẹ to lizọnyizọn etọn whenu to aigba ji. Ṣogan, sọn ojlẹ de mẹ jẹ devo mẹ, e wọhẹ yé bo nọavunte sọta yé.—Luku 4:1-13; 8:26-34; 9:37-43.
2. Kanbiọ tẹlẹ wẹ mí na gbadopọnna?
2 Kandai Biblu tọn he basi zẹẹmẹ nukundiọsọmẹtọ mọnkọtọn lẹ tọn dona duto mí ji dọ huhlọn gbigbọ ylankan lẹ tọn tin. Yé nọ tẹnpọn nado hẹn gbẹtọ lẹ buali. Nalete mí sọgan nọavunte sọta gbigbọ ylankan ehelẹ. Ṣigba, fie wẹ gbigbọ ylankan lẹ bẹjẹeji sọn? Naegbọn yé nọ tẹnpọn nado klọ gbẹtọvi lẹ? Podọ aliho nuwiwa tọn tẹlẹ wẹ yé nọ yizan nado jẹ yanwle yetọn lẹ kọn? Gblọndo kanbiọ he taidi ehelẹ tọn dindinmọ na gọalọna we nado nọavunte sọta huhlọn gbigbọ ylankan tọn lẹ.
GBIGBỌ YLANKAN LẸ—BẸJẸEJI YETỌN PO YANWLE YETỌN PO
3. Nawẹ Satani Lẹgba wá tintin mẹ gbọn?
3 Jehovah Jiwheyẹwhe dá susugege nudida gbigbọnọ lẹ tọn na whenu dindẹn whẹpo e do dá gbẹtọvi lẹ. (Job 38:4, 7) Dile e ko yin zẹẹmẹ etọn basi to Weta 6 mẹ do, dopo to angẹli ehelẹ mẹ wleawuna ojlo lọ nado yin sinsẹ̀n-basi-na gbọn gbẹtọvi lẹ dali kakati nado basi sinsẹ̀n hlan Jehovah. To afọdona yanwle enẹ mẹ, angẹli ylankan ehe jẹagọdo Mẹdatọ lọ bo hẹn ẹn gble, bo tlẹ dohia yọnnusi tintan lọ dọ lalonọ de wẹ Jiwheyẹwhe yin. To whelọnu lo, po gbesisọ po, nudida gbigbọnọ atẹṣitọ ehe wá yin yinyọnẹn taidi Satani (agọjẹdomẹtọ) Lẹgba (mẹhẹngbletọ).—Gẹnẹsisi 3:1-5; Job 1:6.
4. Nawẹ angẹli delẹ waylando to azán Noa tọn gbè gbọn?
4 Enẹgodo, angẹli devo lẹ kọnawudopọ hẹ Satani Lẹgba. To azán Noa dodonọ tọn gbe, delẹ to ehelẹ mẹ jó sinsẹ̀nzọn olọn mẹ tọn yetọn do bo zé agbasa gbẹtọ tọn do nado hẹn pekọwana ojlo kọndopọ zanhẹmẹ tọn hẹ yọnnusi aigba ji tọn lẹ. Matin ayihaawe Satani yinuwado angẹli enẹlẹ ji nado zé yanwle tolivivẹ tọn enẹ. E dekọtọn do lilẹzun mẹjitọ mẹgángán lẹ tọn he nọ yin yiylọdọ Nẹfilimi, he lẹzun danuwatọ kanylantọ lẹ. To whenuena Jehovah hẹn Osingigọ daho lọ wá, e và gbẹtọvi gblewanọ lẹ po okún mayin jọwamọ tọn heyin angẹli tolivẹtọ ehelẹ tọn po sudo. Angẹli atẹṣitọ lọ lẹ họngán sọn vasudo mẹ gbọn jijo agbasa gbẹtọ tọn yetọn lẹ dai bo gọyì lẹdo gbigbọ tọn mẹ dali. Ṣigba Jiwheyẹwhe hẹnalọdotena aovi ehelẹ gbọn nuyiwa hẹ yé taidi mẹhe na nọ nọ zinvlu gbigbọmẹ tọn mẹ dali. (Gẹnẹsisi 6:1-7, 17; Juda 6) Etomọṣo Satani, “ogán aovi lẹ tọn,” po angẹli ylankan etọn lẹ po ko zindonukọn po atẹṣiṣi yetọn po. (Luku 11:15) Etẹwẹ yin yanwle yetọn?
5. Yanwle tẹwẹ Satani po aovi etọn lẹ po tindo, podọ etẹwẹ yé nọ yizan nado wle gbẹtọ do omọ̀ mẹ?
5 Yanwle ylankan Satani po aovi etọn lẹ po wẹ nado diọkọna gbẹtọ lẹ sọn Jehovah Jiwheyẹwhe dè. Gbọnmọ dali, mẹylankan ehelẹ ko to mẹklọ, to budonamẹ, bo to yasana gbẹtọ lẹ gbọn gblagbla whenuho gbẹtọvi tọn lẹpo gblamẹ. (Osọhia 12:9) Apajlẹ egbezangbe tọn lẹ do nugbo-yinyin etọn hia dọ kanyinylan aovi tọn to sinsinyẹn taun todin hugan gbede pọ́n tọn. Nado sọgan wle gbẹtọ lẹ do omọ̀ mẹ, aovi lẹ nọ saba yí wunmẹ afinyọnnọnuwiwa tọn lẹpo zan. Nawẹ aovi lẹ nọ yí mọ̀donú ehe zán gbọn, podọ nawẹ hiẹ sọgan whlẹn dewe gbọn?
LEHE GBIGBỌ YLANKAN LẸ NỌ TẸNPỌN NADO KLỌ WE GBỌN
6. Etẹwẹ afinyọnnọnuwiwa yin, podọ etẹwẹ yin wunmẹ etọn delẹ?
6 Etẹwẹ afinyọnnọnuwiwa yin? Eyin wedide hẹ aovi lẹ, kavi hẹ gbigbọ ylankan lẹ, vlavo to aliho tlọlọ mẹ wẹo kavi gbọn gbẹtọvi gbigbọ kẹnsinọ de dali. Afinyọnnọnuwiwa na aovi lẹ nọ wà nuhe mọ̀donú nọ wà na sògbétọ lẹ: E nọ dọ̀n kanlin lẹ do omọ̀ mẹ. Podọ kẹdẹdile sògbétọ de nọ yí mọ̀donú voovo lẹ zan nado klọ kanlin lẹ do omọ̀ etọn mẹ do, mọdopolọ wẹ gbigbọ ylankan lẹ nọ na tuli wunmẹ afinyọnnọnuwiwa voovo lẹ nado hẹn gbẹtọvi lẹ wá anademẹ yetọn glọ. (Yijlẹdo Psalm 119:110 go.) Delẹ to wunmẹ ehelẹ tọn mẹ wẹ dọṣẹ, bojijlẹ, sọgodo dindin, azé, fakinkan, bogbèsisa, po hodọ hẹ oṣiọ lẹ po.
7. Nawẹ afinyọnnọnuwiwa gbayipe do sọ, podọ naegbọn e do suhugan etlẹ yin to otò he nọ yin yiylọdọ Klistiani tọn lẹ mẹ?
7 Mọ̀donú lọ lẹ nọ wazọ́n, na afinyọnnọnuwiwa nọ dọn gbẹtọ lẹpo dogo lẹdo aihọn pe. Mẹhe nọ nọ gbeta lẹ nọ yì pla amanuwatọ lẹ, podọ ahọluzọnwatọ todaho mẹ tọn lẹ nọ yì pla sunwhlẹvupọntọ lẹ. Afinyọnnọnuwiwa tlẹ gbayipe lọsu to otò he tlẹ nọ yin yiylọdọ Klistiani tọn lẹ mẹ. Dodinnanu lẹ dohia dọ to États-Unis kẹdẹ, nudi linlinnamẹwe 30 po mimá kọndopọ tọn he hugan 10 000 000 wẹ yin kinklandovo na nuyizan afinyọnnọnuwiwa tọn lẹ. Tovi Brésil lẹ nọ yí hugan dọla livi 500 zan do nuyizan afinyọnnọnuwiwa tọn lẹ ji to owhe dopodopo mẹ. Ṣogan, 80 to kanweko ji mẹhe nọ yì nọtẹn afinyọnnọnuwiwa tọn mẹ to otò enẹ mẹ lẹ yin Katholiki he ko yí baptẹm lẹ he sọ nọ yì Amísa. Na sinsẹ̀ngan delẹ nọ doalọ to afinyọnnọnuwiwa mẹ wutu, susu sinsẹ̀nnọ lẹ lẹndọ mahẹ tintindo to e mẹ yin nuhe Jiwheyẹwhe kẹalọyi wẹ sin. Ṣigba be mọwẹ ya?
NUHEWUTU BIBLU DO GBLEWHẸDO AFINYỌNNỌNUWIWA
8. Etẹwẹ yin pọndohlan Owe wiwe lẹ tọn gando afinyọnnọnuwiwa go?
8 Eyin hiẹ ko yin pinplọn dọ wunmẹ afinyọnnọnuwiwa delẹ tọn yin aliho de nado jẹ gbigbọ dagbe lẹ dè, e sọgan paṣa we nado sè nuhe Biblu dọ dogbọn afinyọnnọnuwiwa dali. Omẹ Jehovah tọn lẹ yin nugbẹna dọmọ: “Mì lẹ jẹ yé he tindo gbigbọ aovi tọn lẹ de blo, kavi azétọ lẹ de blo; mì din yé mọ blo, nado yin hinhẹngble gbọn yé dali.” (Levitiku 19:31; 20:6, 27) Owe Osọhia tọn na avase dọ “owọntọ lẹ” na yin vivasudo to “ofi he to miyọ́n jì po whèmi po tọn mẹ, ehe wẹ okú [madopodo] awetọ.” (Osọhia 21:8; 22:15) Wunmẹ afinyọnnọnuwiwa tọn lẹpo wẹ Jehovah Jiwheyẹwhe ma kẹalọyi gba. (Deutelonomi 18:10-12) Naegbọn whẹho lọ do yinmọ?
9. Naegbọn mí do sọgan wá tadona lọ kọ̀n dọ wẹndomẹ egbezangbe tọn lẹ sọn aihọn gbigbọ tọn mẹ ma wá sọn Jehovah dè gba?
9 Jehovah do gbigbọ dagbe lẹ, kavi angẹli dodo lẹ hlan, nado dọho hẹ gbẹtọ delẹ whẹpo Biblu do yin tadona. Sọn tadona etọn whenu gbọ́n, Ohó Jiwheyẹwhe Tọn ko wleawu anademẹ he gbẹtọvi lẹ tindo nuhudo etọn nado wà sinsẹ̀nzọn hlan Jehovah po alọkẹyi po. (2 Timoti 3:16, 17; Heblu lẹ 1:1, 2) E ma nọ lilẹ Ohó wiwe etọn do apadopo nado na wẹndomẹ gbigbọ kẹnsinọ lẹ gba. Wẹndomẹ egbezangbe tọn mọnkọtọn lẹpo sọn aihọn ylankan lọ mẹ wá sọn gbigbọ ylankan lẹ dè. Afinyọnnọnuwiwa sọgan dekọtọn do tukladomẹ gbọn gbigbọ ylankan lẹ dali kavi ogbẹ́ ylankan yetọn mẹ bibiọ. Enẹwutu, Jiwheyẹwhe gbọn owanyi dali do na mí avase ma nado doalọ to nuwiwa afinyọn tọn depope mẹ blo. (Deutelonomi 18:14; Galatianu lẹ 5:19-21) Humọ, eyin mí zindonukọn nado to alọdo afinyọnnọnuwiwa mẹ to yinyọ́n nukun he Jiwheyẹwhe do nọ pọ́n ẹn po godo, mí na to godonọna gbigbọ ylankan atẹṣitọ lẹ bo na yin kẹntọ Jiwheyẹwhe tọn lẹ.—1 samuẹli 15:23; 1 Otannugbo lẹ 10:13, 14; Psalm 5:4.
10. Etẹwẹ dọṣẹ zẹẹmẹdo, podọ naegbọn mí dona dapana ẹn?
10 Dopo to wunmẹ afinyọnnọnuwiwa tọn he gbayipe wẹ yin dọṣẹ—yèdọ tintẹnpọn nado dindona sọgodo kavi nuhe ma yin yinyọnẹn po alọgọ gbigbọ tọn lẹ po. Delẹ to wunmẹ afinyọnnọnuwiwa tọn lẹ mẹ wẹ sunwhlẹvu pinpọn, mẹpọnnumẹ pinpọn, zẹẹmẹ odlọ lẹ tọn bibasi, alọ-homẹ pinpọn, po yinyọ́n nuhe sọgodo bẹhẹn po gbọn yizan kalti bojijlẹ tọn lẹ po dali. Mẹsusu nọ pọ́n dọṣẹ hlan taidi awuvivinu he ma nọ gbleawunamẹ de, ṣigba Biblu dohia dọ sọgodo dintọ po gbigbọ ylankan lẹ po nọ zọ̀n afọsu-afọsi. Di apajlẹ, Owalọ lẹ 16:16-19 dọhodo mẹhe tindo “gbigbọ odọṣẹ tọn de” ji he nọ “yí odọṣẹ” zan. Ṣigba, nugopipe etọn nado dọ dọdai sọgodo tọn yin hinhẹnbu to whenuena aovi lọ yin yinyan jẹgbonu. E họnwun dọ, afinyọnnọnuwiwa yin mọ̀donú de he nọ yin yiyizan gbọn aovi lẹ dali nado klọ gbẹtọ lẹ biọ omọ̀ yetọn mẹ.
11. Nawẹ vivẹnudido nado dọho hẹ oṣiọ lẹ nọ dekọtọn do omọ̀ mẹ jijẹ gbọn?
11 Eyin hiẹ to awubla dogbọn hagbẹ yiwanna whẹndo tọn de kavi họntọn vivẹ́ de dali, hiẹ sọgan yin dindọn po awubibọ po gbọn mọ̀donú devo dali. Gbigbọ kẹnsinọ de sọgan na we nudọnamẹ vonọtaun tọn de kavi sọgan dọho to ogbè he taidi mẹhe kú lọ tọn de mẹ. Họ́ dewe! Tintẹnpọn nado dọho po oṣiọ po nọ dekọtọn do omọ̀ de mẹ. Etẹwutu? Na oṣiọ lẹ ma sọgan dọho. Matin ayihaawe dile hiẹ na ko flin do, Ohó Jiwheyẹwhe Tọn dọ hezeheze dọ to okú whenu omẹ lọ nọ “gọ̀ do okọ́ etọn dè; to azán nẹ gbè gee linlẹn etọn lẹ sudo.” Oṣiọ lẹ “ma yọ́n nude.” (Psalm 146:4; Yẹwhehodọtọ 9:5, 10) Humọ, aovi lẹ taun wẹ ko yin yinyọnẹn nado yí ogbè mẹhe kú lọ tọn zan bo na kẹnsinọ de nudọnamẹ dogbọn mẹhe kú lọ dali. (1 Samuẹli 28:3-19) Enẹwutu “mẹdepope he nọ kannubiọ sọn oṣiọ si” to yinyin wiwle do omọ̀ mẹ gbọn gbigbọ ylankan lẹ dali podọ to nuyiwa jẹagọdo ojlo Jehovah Jiwheyẹwhe tọn.—Deutelonomi 18:11, 12; Isaia 8:19.
SỌN MẸDỌNDOGO JẸ MẸGBEYINYAN KỌN
12, 13. Kunnudenu tẹwẹ tin to finẹ dọ aovi lẹ nọ zindonukọn magbọjẹ to gbẹtọ lẹ whiwhlepọn po tukla do yé po mẹ?
12 To whenuena hiẹ yinuwa sọgbe hẹ ayinamẹ Ohó Jiwheyẹwhe Tọn gando afinyọnnọnuwiwa go, hiẹ na gbẹ́ mọ̀donú aovi lẹ tọn dai. (Yijlẹdo Psalm 141:9, 10; Lomunu lẹ 12:9 go.) Be ehe zẹẹmẹdo dọ gbigbọ ylankan lẹ na doalọte to tintẹnpọn mẹ nado yangbe towe wẹ ya? Gbede pọ́n! To whiwhle Jesu pọ́n whlaatọ̀n po godo, Satani “fọnyi sọn e dè na osaa de.” (Luku 4:13) Mọdopolọ, e ma yindọ gbigbọ tasinyẹntọ lẹ nọ dọ̀n gbẹtọ lẹ dogo kẹdẹ wẹ gba ṣigba sọ nọ yangbe yetọn.
13 Flin hodidọ jẹnukọn mítọn gando gbeyinyan Satani tọn do devizọnwatọ Jiwheyẹwhe tọn lọ Job ji go. Lẹgba hẹn hẹnbu kanlinpa etọn po suhugan devi etọn lẹ tọn po wá. Satani tlẹ hù ovi Job tọn lẹ. Enẹgodo, e yí azọ̀n sinsinyẹn de do hò Job lọsu ga. Ṣigba Job hẹn tenọgligo etọn hlan Jiwheyẹwhe bo yin didona taun. (Job 1:7-19; 2:7, 8; 42:12) Sọn whenẹnu gbọ́n, aovi lẹ ko hẹn mẹdelẹ zun unbọpẹnnọ kavi zun nukuntọnnọ podọ bo ko zindonukọn to pekọ mimọyi to yajiji gbẹtọvi lẹ tọn mẹ. (Matiu 9:32, 33; 12:22; Malku 5:2-5) To egbehe, linlin lẹ dohia dọ aovi lẹ yí zanhẹmẹ do nọ sayana mẹdelẹ bo hẹn mẹdevo lẹ zun alẹnọ. Humọ yé nọ yí do ayihamẹ na mẹdelẹ nado hùmẹ kavi hù yede, he yin ylando he jẹagọdo Jiwheyẹwhe lẹ. (Deutelonomi 5:17; 1 Johanu 3:15) Etomọṣo, fọtọ́n susu mẹhe ko yin wiwle gbọn gbigbọ ylankan ehelẹ dali dai lẹ ko penugo nado họngán. Nawẹ ehe yọnbasi na yé gbọn? Yé ko wà mọ gbọn afọdide tangan delẹ zize dali.
LEHE YÈ SỌGAN NỌAVUNTE SỌTA GBIGBỌ YLANKAN LẸ DO
14. Sọgbe hẹ apajlẹ Klistiani Efesu owhe kanweko tintan mẹ tọn lẹ, nawẹ hiẹ sọgan nọavunte sọta gbigbọ ylankan lẹ gbọn?
14 Aliho dopo tẹ mẹ wẹ hiẹ sọgan nọavunte sọta gbigbọ ylankan lẹ bo basi hihọ́ na dewe po whẹndo towe po sọn omọ̀ gbigbọ ylankan tọn lẹ mẹ? Klistiani owhe kanweko tintan mẹ tọn lẹ to Efesu he ko doalọ to afinyọnnọnuwiwa mẹ jẹnukọnna lilẹzun yisenọ lẹ zé afọdide nujikudo tọn lẹ. Mí hia dọmọ “susu yetọn ga he nọ zan ana hunkọhunkọ bẹ́ owe yetọn lẹ plidopọ, bo mẹ yé to gbẹtọ lẹpo nukọn.” (Owalọ lẹ 19:19) Eyin hiẹ ma tlẹ ko doalọ to afinyọnnọnuwiwa mẹ, bẹ́ nuyizan afinyọn tọn depope kavi he gando e go dlan. Ehe bẹ owe lẹ, linlinwe lẹ, video lẹ, owe he yè nọ tlẹ́ do adógo lẹ, hànjigbán lẹ, po nuhe nọ yin yiyizan na lẹndai afinyọnnọnuwiwa tọn lẹ po hẹn. E sọ bẹ́ boṣiọ lẹ, dèfinfẹ̀n lẹ kavi obó devo lẹ he nọ yin sìnsìn na hihọ́, po nunina he nọ yin mimọyi sọn afinyọnnọnuwatọ lẹ si po hẹn ga. (Deutelonomi 7:25, 26; 1 Kọlintinu lẹ 10:21) Taidi dohia: Alọwlemẹ de to Thaïlande ko nọ yin budona na whenu dindẹn gbọn aovi lẹ dali. Enẹgodo yé bẹ́ nuyizan he gando afinyọnnọnuwiwa go lẹpo dlan. Etẹwẹ yin kọdetọn lọ? Yé mọ kọgbọ yí sọn mẹgbeyinyan lẹgba tọn lẹ si podọ to enẹgodo basi nukọnyiyi nujọnu gbigbọmẹ tọn.
15. To ninọavunte sọta huhlọn gbigbọ ylankan tọn lẹ mẹ, afọdide devo tẹwẹ yin nuhe jẹ?
15 Nado sọgan nọavunte sọta huhlọn gbigbọ ylankan tọn lẹ, afọdide titengbe devo wẹ nado yí ayinamẹ apọsteli Paulu tọn nado zé gbaja awhànfunnu gbigbọmẹ tọn he yin ninamẹ gbọn Jiwheyẹwhe dali lẹpo dogo. (Efesunu lẹ 6:11-17) Klistiani lẹ dona na huhlọn avunhonu yetọn lẹ sọta gbigbọ ylankan lẹ. Etẹwẹ afọdide ehelẹ bẹhẹn? “To popo lẹpo ji,” wẹ Paulu dọ, “mì yí sagba yise tọn hẹn, ehe mì na yí do ṣimiyọ́n ogá mẹylankan tọn lẹpo.” Na nugbo tọn, lehe yise towe tindo huhlọn do sọ, mọwẹ nugopipe towe nado nọavunte pehẹ huhlọn gbigbọ ylankan tọn lẹ na klo do sọ niyẹn.—Matiu 17:14-20.
16. Nawẹ hiẹ sọgan hẹn yise towe lodo gbọn?
16 Nawẹ hiẹ sọgan hẹn yise towe lodo gbọn? Gbọn nukọn zinzindo nado nọ plọn Biblu bo yí ayinamẹ etọn lẹ zan to gbẹzan towe mẹ wẹ. Huhlọn yise mẹde tọn tọn sinai taun do lilodo-yinyin dodonu etọn tọn ji—heyin oyọnẹn Jiwheyẹwhe tọn. Be hiẹ ma yigbe dọ oyọnẹn pegan he hiẹ ko mọyi bo hẹn do ahún mẹ dile hiẹ to Biblu plọn ko hẹn yise towe lodo ya? (Lomunu lẹ 10:10, 17) Enẹwutu, matin ayihaawe, dile hiẹ to nukọnzindo nado to nuplọn bo hẹn ẹn zun aṣa towe nado nọ yì opli Kunnudetọ Jehovah Tọn lẹ tọn, yise towe na yin huhlọn na hugan. (Lomunu lẹ 1:11, 12; Kọlọsinu lẹ 2:6, 7) Hihọ́ de wẹ e na yin sọta mẹgbeyinyan lẹgba tọn lẹ.—1 Johanu 5:5.
17. Afọdide yinukọn dogọ tẹlẹ wẹ sọgan yin dandannu nado nọavunte sọta huhlọn gbigbọ ylankan tọn lẹ?
17 Afọdide yinukọn dogọ tẹlẹ wẹ sọgan yin zize gbọn mẹhe tindo nujikudo nado nọavunte sọta gbigbọ ylankan lẹ dali? Klistiani Efesunu lẹ tindo nuhudo hihọ́ tọn na yé nọ nọ todaho he gọna nuwiwa aovi tọn mẹ wutu. Gbọnmọ dali, Paulu dọna yé dọmọ: “Mì nọ yí whepoponu do hodẹ̀.” (Efesunu lẹ 6:18) To whenuena e yindọ mí to gbẹ̀nọ to aihọn he gọna nuwiwa aovi tọn de mẹ, dẹ̀hiho vẹkuvẹku na hihọ́ Jiwheyẹwhe tọn yin onú titengbe nado nọavunte sọta gbigbọ ylankan lẹ. (Matiu 6:13) Alọgọ taun to pọndohlan ehe mẹ wẹ godonọnamẹ gbigbọnu lẹ tọn po odẹ̀ mẹho dide lẹ tọn po to agun Klistiani tọn mẹ.—Jakobu 5:13-15.
TO NUKỌNZINDO TO AVUNHIHO TOWE MẸ SỌTA GBIGBỌ YLANKAN LẸ
18, 19. Etẹwẹ sọgan yin wiwa eyin aovi lẹ dotukla mẹde whladopo dogọ?
18 Etomọṣo, to afọdide titengbe ehelẹ zize godo, mẹdelẹ ko tlẹ sọ yin tuklado gbọn gbigbọ ylankan lẹ dali. Di dohia, dawe de to Côte d’Ivoire plọn Biblu hẹ Kunnudetọ Jehovah Tọn lẹ bo va dèfinfẹ̀n etọn lẹpo sudo. Enẹgodo, e basi nukọnyiyi dagbe, klan gbẹzan etọn do wiwe hlan Jehovah bo yin bibaptizi. Ṣigba to osẹ dopo to baptẹm etọn godo, aovi lẹ sọ jẹ tuklado e ji, podọ ogbè lẹ dọna ẹn nado jó yise yọyọ he e mọyi lọ do. Eyin ehe jọ do gowe, be e na zẹẹmẹdo dọ hiẹ ma tindo hihọ́ Jehovah tọn wẹ ya? E ma yinmọ dandan gba.
19 Dile e tlẹ yindọ dawe pipé lọ Jesu Klisti tindo hihọ́ sọn olọn mẹ wá tọn, e sè ogbè nudida gbigbọ ylankan lọ Satani Lẹgba tọn. Jesu do nuhe na yin wiwà lọ hia to whẹho enẹ mẹ. E dọna Lẹgba dọmọ: “Tọ́n sọn ofi, Satani.” (Matiu 4:3-10) Mọdopolọ, hiẹ dona gbẹ́ nado dotoai hlan ogbè lẹ sọn lẹdo gbigbọ tọn mẹ. Nọavunte sọta gbigbọ ylankan lẹ gbọn yiylọ Jehovah na alọgọ dali. Mọwẹ, hodẹ̀ daga to oyín Jiwheyẹwhe tọn yiyizan mẹ. Howhinwhẹn lẹ 18:10 dọmọ: “Oyín Oklunọ tọn, wẹ ohọ̀ gángán: Dodonọ họ̀n biọ e mẹ, bosọ gán.” Dawe Klistiani Côte d’Ivoire tọn lọ wà ehe, podọ gbigbọ ylankan lọ lẹ doalọte nado nọ dotukla ẹ.—Psalm 124:8; 145:18.
20. To bladopọ mẹ, etẹwẹ hiẹ sọgan wà nado nọavunte sọta gbigbọ ylankan lẹ?
20 Jehovah ko na dotẹnmẹ gbigbọ ylankan lẹ nado gbọṣi tintin mẹ, ṣigba e nọ do huhlọn etọn hia, titengbe do ota omẹ etọn lẹ tọn mẹ, bọ oyín etọn nọ yin lilá lẹdo aigba lẹpo ji pe. (Eksọdusi 9:16) Eyin hiẹ dọnsẹpọ Jiwheyẹwhe, hiẹ ma dona dibusi gbigbọ ylankan lẹ gba. (Osọha lẹ 23:21, 23; Jakobu 4:7, 8; 2 Pita 2:9) Huhlọn yetọn tindo dogbo. Yé yin yasana to azán Noa tọn gbe, yé yin yinyan jẹgbonu sọn olọn mẹ to ojlẹ agọe tọn lẹ mẹ, bo to tenọpọn whẹdida godo tọn todin. (Juda 6; Osọhia 12:9; 20:1-3, 7-10, 14) Na nugbo tọn, yé tin to obu mẹ na vasudo yetọn he ja. (Jakobu 2:19) Enẹwutu vlavo gbigbọ ylankan lẹ nọ tẹnpọn nado dọn we dogo po wunmẹ mọ̀donú delẹ tọn po kavi yangbe towe to aliho depope mẹ, hiẹ sọgan nọavunte sọta yé. (2 Kọlintinu lẹ 2:11) Gbẹ́ wunmẹ afinyọnnọnuwiwa tọn lẹpo dai, yí ayinamẹ Ohó Jiwheyẹwhe Tọn tọn do yizan mẹ, bo din alọkẹyi Jehovah tọn. Wà ehe ma dọngban, na gbẹninọ towe sinai do avunteninọ sọta huhlọn gbigbọ ylankan tọn lẹ ji wutu!
TẸ́N OYỌNẸN TOWE PỌ́N
Nawẹ gbigbọ ylankan lẹ nọ tẹnpọn nado klọ gbẹtọ lẹ gbọn?
Naegbọn Biblu do gblewhẹdo afinyọnnọnuwiwa?
Nawẹ mẹde sọgan họngán sọn huhlọn gbigbọ ylankan lẹ tọn mẹ gbọn?
Naegbọn hiẹ dona nọavunte sọta gbigbọ ylankan lẹ zọnmii?
[Yẹdide to weda 110]
Nukun tẹwẹ hiẹ do nọ pọ́n wunmẹ afinyọnnọnuwiwa tọn lẹpo?