Mẹnu Na Taun Tọn Wẹ to Gandu Do Aihọn lọ Ji?

Mẹsusu na na gblọndo kanbiọ he tin to aga ehe tọn po hogbe dopo gee po—yèdọ Jiwheyẹwhe. Ṣigba po ayidonugo po, Biblu ma dọ to fidepope dọ vlavo Jesu Klisti kavi Otọ́ etọn wẹ yín ogan aihọn ehe tọn taun lẹ gba. Jẹagọdo ehe, Jesu dọmọ: “Yè na yàn ahọvi aihọn he tọn jẹgbonu.” Podọ e yidogọ dọmọ: “Ahọvi aihọn tọn lọ wá, ewọ ma sọ tindo núde to yẹn mẹ” gba.—Johanu 12:31; 14:30; 16:11.

Enẹwutu ogan aihọn ehe tọn tin to nukundiọsọmẹ mẹ hẹ Jesu. Mẹnu wẹ ehe sọgan yin?

Nudọnamẹ Kleun de Gando Ninọmẹ Aihọn Tọn Lẹ Go

Mahopọnna vivẹnudido gbẹtọvi nuyọnẹntọ lẹ tọn, aihọn lọ ko jiya zẹjlẹgo gbọn gblagbla whenuho tọn mẹ. Ehe nọ paṣa gbẹtọ lẹnpọn dagbenọ lẹ, dile linlinwe kantọ he ko kú, David Lawrence ko basi do: “‘Jijọho to aigba ji’—dibla yin mẹlẹpo wẹ to dindin in. ‘Nukundagbe hlan gbẹtọ lẹ’—é dibla yin mẹlẹpo to aihọn mẹ wẹ nọ tindo numọtolanmẹ etọn na yenọzo. To whelọnu lo etẹwẹ whannu? Naegbọn awhan do yín nukunvandomẹnu sọmọ mahopọnna ojlo jọwamọ gbẹtọ lẹ tọn?”

E taidi nuhe sọta ede, kavi é ma yín mọ wẹ ya? To Whenuena é yindọ ojlo jọwamọ gbẹtọ lẹ tọn wẹ nado tin to jijọho mẹ, na paa tọn yé nọ gbẹwanna bo nọ hù ode awetọ yetọn lẹ—yédọ po kanyinylan mọnkọtọn po. Lẹnnupọn dogbọn ohùn sọ̀ndai zẹjlẹgo he tin to kanyinylan walọyizan ylankan lẹ mẹ dali. Gbẹtọvi lẹ ko yí glọ̀ndo jẹhọn ylankan tọn lẹ, opá mẹginglọn tọn lẹ, awhanfunnu miyọnnọn he nọ fiọ onú glunmuglunmu lẹ, bọmbu miyọnnọ lẹ, po aliho walọyizan ylankan devo lẹ po nado sayanamẹ podọ nado hù ode awetọ mẹtọn matin awubla zan.

Be hiẹ yise dọ gbẹtọvi he to jijọho po ayajẹ po din lẹ, penugo to yedelẹ ṣẹnṣẹn, na ylanwiwa pligidi mọnkọtọn lẹ, sọta mẹdevo lẹ ya? Huhlọn tẹlẹ wẹ sisẹ gbẹtọ lẹ jẹ nuyiwa he hiọawu talala mọnkọtọn lẹ kọn kavi he diọkọna yé biọ ninọmẹ lẹ fie yé nọ yin whinwhan nado wà danu lẹ te? Be e ko paṣa we pọn gbede vlavo eyin huhlọn ylankan, mayinukundomọ delẹ to nuyiwa do gbẹtọ lẹ ji nado wà onu dakandakan mọnkọtọn lẹ ya?

Ogán Aihọn Tọn Lẹ Yin Didohia

Nuhudo depope matin nado dowùn whẹho lọ mẹ gba, na Biblu dohia hezeheze dọ gbẹtọ nùyọnẹntọ, he ma yọnmọ de ko to anadena gbẹtọ lẹ po akọta lẹ po. É dọmọ: “Aihọn lẹpo sọ mlọnai to omẹ ylankan lọ mẹ.” Podọ Biblu do é hia, bo dọmọ: “He yè nọ ylọ Lẹgba, podọ Satani, he nọ to aihọn lẹpo klọ.”—1 Johanu 5:19; Osọhia 12:9.

To nujijọ de mẹ to whenuena Jesu yín “whiwhlepọn gbọn Lẹgba dali,” Jesu ma dọnnu do azọngban Satani tọn ji taidi ogán aihọn ehe tọn gba. Biblu basi zẹẹmẹ nuhe jọ tọn dọmọ: “Lẹgba sọ vọ́ ẹ zé yì osó he yìaga de ji, bo sọ do ahọlu yigba aihọn tọn lẹpo, po gigo yetọn po hia ẹ; é bo sọ dọ hlan ẹn, dọmọ, Onú helẹ pó wẹ yẹn na na we, eyín hiẹ na jẹklo bo litai na mi. Whenẹnu wẹ Jesu dọ hlan ẹn dọmọ, Tọ́n sọn ofi, Satani.”—Matiu 4:1, 8-10.

Lẹnnupọn dogbọn ehe dali. Satani whle Jesu pọn gbọn zize “ahọlu yigba aihọn tọn lẹ” donukọnna ẹn dali. Ṣogan, be nuzedonukọnnamẹ Satani tọn na yín whlepọn taun de eyin Satani na nugbo tọn ma yín ogán ahọlu yigba ehelẹ tọn ya? Lala, é ma na yínmọ gba. Podọ doayi é go, Jesu ma gbẹ́ dọ gandudu aihọn tọn ehe lẹpo ma yin Satani tọn gba, ehe é na ko basi eyin Satani ma tindo huhlọn do yé ji. Enẹwutu, to whelọnu lo, Satani Lẹgba na taun tọn wẹ yin ogán mayinukundomọ aihọn tọn! Na nugbo tọn, Biblu ylọ ẹ dọ “yẹwhe owhenu he tọn.” (2 Kọlintinu lẹ 4:4) Ṣogan, nawẹ omẹ ylankan mọnkọtọn tlẹ wa gbọn do jẹ otẹn huhlọnnọ ehe mẹ?

Mẹhe lẹzun Satani lọ ko yin angẹli de he Jiwheyẹwhe da, ṣigba é whanwu do otẹ̀n Jiwheyẹwhe tọn go. É diọavunnukunsọ jlọjẹ-yinyin gandudu Jiwheyẹwhe tọn. Hlan yanwle ehe kọn é yí odan de zan taidi hoyidọtọ de nado klọ yọnnu tintan lọ, Evi, bo gbọnmọ dali do penugo nado wle ewọ po asu etọn, Adam po, nado wà ojlo etọn kakati nado sètonuna Jiwheyẹwhe. (Gẹnẹsisi 3:1-6; 2 Kọlintinu lẹ 11:3) E sọ sọalọakọn dọ emi sọgan lẹkọna ovi he Adam po Evi po na wá ji lẹpo sọn Jiwheyẹwhe de. Enẹwutu Jiwheyẹwhe na dotẹnmẹ Satani nado tẹnpọn bo do alọsọakọn etọn hia, ṣigba Satani ma ko tindo kọdetọn dagbe gba.—Job 1:6-12; 2:1-10.

Po ayidonugo titengbe po, Satani ma tin ede ṣokẹdẹ to gandudu etọn mẹ do aihọn ji gba. É tindo kọdetọn dagbe to hinhẹn angẹli devo delẹ nado kọnawudopọ hẹ ẹ to atẹṣiṣi etọn sọta Jiwheyẹwhe mẹ. Ehelẹ lẹzun aovi lẹ, yedọ alọgọnamẹtọ nado waylan gbigbọnọ etọn lẹ. Biblu dọho dogbọn yé dali to whenuena é vẹ̀ Klistiani lẹ dọmọ: “Mì . . . nọte pehẹ bublu Lẹgba tọn. Na é ma yín agbasalan po ohùn po wẹ míwlẹ to ahidi hẹ gba, ṣigba . . . hẹ nukọntọ zinvlu aihọn he tọn lẹ, hẹ nútẹgbẹ̀ gbigbọnọ lẹ to otẹn he tin to olọn lẹ mẹ.”—Efesunu lẹ 6:11, 12.

Diọnukunsọ Gbigbọ Ylankan Lẹ

Nukọntọ ylankan mayinukundomọ aihọn tọn ehelẹ ko kudeji nado hẹn gbẹtọvi lẹpo buali, bo lẹkọ na yé sọn sinsẹ̀n-bibasi Jiwheyẹwhe tọn mẹ. Aliho dopo he mẹ gbigbọ ylankan lẹ nọ wà ehe te wẹ yin gbọn zize linlẹn lùnlùntọ́n to okú godo tọn daga, dile é tlẹ yindọ Ohó Jiwheyẹwhe tọn dohia hezeheze dọ oṣiọ lẹ ma yọn nude. (Gẹnẹsisi 2:17; 3:19; Ezekiẹli 18:4; Psalm 146:3, 4; Yẹwhehodọtọ 9:5, 10) Gbọnmọ, gbigbọ ylankan de, he to apajlẹ ogbè mẹhe ko kú tọn de hodo, sọgan dọho hẹ hẹnnumẹ kavi họntọn omẹ lọ tọn he tin to ogbẹ̀ lẹ, gbọn gbigbọ kẹnsinọ de kavi vlavo “ogbè” de sọn lẹdo mayinukundomọ tọn mẹ. “Ogbè” lọ nọ doyẹklọmẹ nado yin mẹhe ko kú lọ, ṣogan na nugbo tọn aovi de wẹ!

Enẹwutu eyin hiẹ tlẹ wá sè “ogbè” mọnkọtọn de, yé klọ we blo. Gbẹ nudepope he é dọ dai, bo vọ hogbe Jesu tọn ehe lẹ dọ: “Tọ́n sọn ofi, Satani.” (Matiu 4:10; Jakobu 4:7) Ma dike tlintlindo dindin dogbọn lẹdo gbigbọ tọn lọ dali ni hẹn we nado lẹzun mahẹtindotọ po gbigbọ ylankan lẹ po blo. Mahẹ tintindo mọnkọtọn nọ yin yiylọ yin afiyọnnọnuwiwa, podọ Jiwheyẹwhe gbẹnuna sinsẹ̀n-basitọ etọn lẹ gando é go to alọpa etọn lẹpo mẹ. Biblu gblewhẹdo omẹ depope “he nọ zan aṣẹ . . . kavi wédotọ de po gbigbọ aovi tọn de po, kavi azetọ de, kavi aṣẹtúndomẹtọ de.”—Deutelonomi 18:10-12; Galatianu lẹ 5:19-21; Osọhia 21:8.

To whenuena afinyọnnọnuwiwa nọ hẹn omẹ de biọ nuyiwadomẹji aovi tọn lẹ glọ, diọnukunsọ nuyiwa etọn lẹpo mahopọnna lehe é sọgan yín aihundanu, kavi awuvivinamẹnu do sọ. Nuyiwa ehelẹ bẹ bọlu Klistali tọn he yé do nọ dindonanu, owhlẹ̀ fakikan tọn lẹ, odọṣẹ, dogbapọn basina ohù alọpahomẹ mẹde tọn lẹ, po sunwhlẹvu pinpọn po. Aovi lẹ ko sọ hẹn awhagbe lẹ po nujijọ ajiji to agbasaliho devo lẹ po to owhé he yé yí do basi aigba-denamẹ yétọn lẹ mẹ.

To yidogọmẹ, gbigbọ ylankan lẹ nọ yí ninọmẹ ylandonọ gbẹtọvi lẹ tọn zan gbọn owe lẹ, sinimọto lẹ, po tito-to-whinnu television tọn lẹ po he nọ do walọ mawe po ehe ma yín jọwamọ fẹnnuwiwa zanhẹmẹ zizedaga tọn hia po dali. Aovi lẹ yọnẹn dọ linlẹn agọ lẹ eyin yé ma yin didesẹ sọn ayiha mẹ sọgan tindo nuyiwadomẹji he ma sọgan yọn súnsún sẹ̀ bo deanana gbẹtọvi lẹ nado zan walọ mawe tọn—taidi aovi lẹ lọsu.—Gẹnẹsisi 6:1, 2; 1 Tẹssalonikanu lẹ 4:3-8; Juda 6.

Na nugbo tọn, mẹsusu sọgan deafu do linlẹn lọ dọ gbigbọ ylankan lẹ wẹ to gandu do aihọn ehe ji. Ṣigba mayise yetọn ma yín nupaṣamẹ gba, na Biblu dọmọ: “Satani lọsu nọ diọadazùn angẹli hinhọ̀n tọn.” (2 Kọlintinu lẹ 11:14) Oklọ wlẹnwin he yiaga hugan etọn ko yín nado tọ́nnukunna mẹsusu hlan nugbo lọ dọ ewọ po aovi etọn lẹ po tin na taun tọn. Ṣigba yé klọ we blo! Lẹgba po aovi etọn lẹ po tin nugbo, podọ hiẹ dona to nukundiọsọ yé zọnmii.—1 Pita 5:8, 9.

Po awuvivi po, ojlẹ lọ ko dọnsẹpọ todin to whenuena Satani po hagbẹ́ etọn lẹ po ma nasọ tin ba! “Aihọn [po nukọntọ aovi etọn lẹ po] sọ to juju jei,” Biblu na mí jide, “ṣigba ewọ he to ojlo Jiwheyẹwhe tọn wà wẹ na nọte kakadoi.” (1 Johanu 2:17) Pọngbọ nankọ wẹ é na yin nado de nuyiwadomẹji aovi tọn enẹ sẹ sọn aimẹ! Enẹwutu, na mí ni tin to omẹ he to ojlo Jiwheyẹwhe tọn wà lẹ mẹ bo duvivi ogbẹ̀ tọn kakadoi to aihọn yọyọ dódówiwa Jiwheyẹwhe tọn mẹ.—Psalm 37:9-11, 29; 2 Pita 3:13; Osọhia 21:3, 4.

Adavo é yin didohia to alọpa devo mẹ, Wefọ he yin dide to owe ehe mẹ lẹ wá sọn Biblu Wiwe lọ, Gun-Alada mẹ.