WETA 16
Mì Diọnukunsọ Lẹgba po Ayiha Wintinwintin Etọn lẹ Po
“Mì diọnukunsọ Lẹgba; e nasọ họ̀n.”—JAKOBU 4:7.
1, 2. Mẹnu lẹ wẹ nujijọ baptẹm tọn nọ hẹn homẹhun?
EYIN hiẹ ko to Jehovah sẹ̀n sọn owhe susu die, a sọgan ko sè hodidọ baptẹm tọn susu to plidopọ mítọn lẹ ji. Ṣogan, mahopọnna whla nẹmu he a ko wá nujijọ mọnkọtọn lẹ tẹnmẹ, e yọnbasi dọ hiẹ ni gbẹsọ nọ yin whinwhàn to whedepopenu he ojlẹ lọ sọ bọ mẹhe sinai do oján nukọn tọn ji to azava sá lẹ ṣite nado ze yede jo na baptẹm. To ojlẹ enẹ mẹ, mẹplidopọ lẹpo nọ gọ́ na ayajẹ bo nọ do numọtolanmẹ yetọn hia gbọn pẹhiho ahundopo tọn de dali. Hiẹ sọgan kùn dasin ayajẹ tọn dile a mọ pipli mẹyiwanna devo lẹ tọn he ko de nado nọgodona Jehovah. Lehe mí nọ jaya to ojlẹ enẹlẹ mẹ do sọ!
2 Mí ma nọ mọ nujijọ baptẹm tọn whlasusu to owhe dopo gblamẹ to lẹdo mítọn mẹ, ṣigba angẹli lẹ tindo lẹblanulọkẹyi lọ nado mọ nujijọ ehelẹ whlasusu. Be a sọgan yí nukun homẹ tọn do pọ́n lehe ‘ayajẹ na ko sù to olọn mẹ’ do dile yé mọ omẹ fọtọ́n susu lẹdo aihọn pé he nọ yin yiyidogọ adà yinukundomọ titobasinanu Jehovah tọn to sẹmẹsẹmẹ ya? (Luku 15:7, 10) Matin ayihaawe, ayajẹ angẹli lẹ tọn nọ gọfla nado mọ jideji ehe!—Hagai 2:7.
LẸGBA ‘TO ZỌNLINZIN PÉ DI KINNIKINNI HE TO LÌLÌ’
3. Naegbọn Satani do to zọnlinzin pé “di kinnikinni he to lìlì,” podọ etẹwẹ e jlo na wà?
3 Ṣigba, to vogbingbọn mlẹnmlẹn mẹ, nudida gbigbọnọ devo lẹ tin he nọ tin to adi ji to nujijọ baptẹm tọn enẹlẹ whenu. Na Satani po aovi etọn lẹ po, homẹgblenu wẹ e yin nado mọ gbẹtọ fọtọ́n susu he de nado gbẹ́ aihọn gblezọn ehe dai. To popolẹpo mẹ, Satani ko yí-nùgo dọ gbẹtọvi depope ma nọ sẹ̀n Jehovah sọn owanyi nujọnu tọn mẹ podọ dọ mẹdepope ma na gbọṣi nugbonọ-yinyin mẹ to whlepọn sinsinyẹn glọ. (Job 2:4, 5) Whedepopenu he mẹde yin whinwhàn nado klan gbẹzan ede tọn do wiwe na Jehovah, Satani nọ yin didohia di lalonọ. E taidi dọ Satani nọ mọ tómẹ míawu fọtọ́n susu yí to sẹmẹsẹmẹ wẹ nkọ. Abajọ e do ‘to zọnlinzin pé di kinnikinni he to lìlì bo to mẹhe e na tlẹndu dín!’ (1 Pita 5:8) “Kinnikinni” ehe to jejeji nado tlẹ́n mí dù to gbigbọ-liho bo sisẹ́ mí nado hẹn haṣinṣan he mí tindo hẹ Jiwheyẹwhe gble kavi nado tlẹ sánkanna ẹn.—Psalm 7:1, 2; 2 Timoti 3:12.
Whedepopenu he mẹde klan gbẹzan ede tọn do wiwe na Jehovah bo yin bibaptizi, Satani nọ yin didohia di lalonọ
4, 5. (a) Aliho titengbe awe tẹlẹ mẹ wẹ Jehovah ko glọnalina huhlọn Satani tọn te? (b) Jide tẹwẹ Klistiani nugbo de sọgan tindo?
4 Dile etlẹ yindọ mí pannukọn kẹntọ fifiẹtọ de, mí ma dona yin ahungbàdona po obu po. Etẹwutu? Na Jehovah ko glọnalina huhlọn “kinnikinni he to lìlì” enẹ tọn to aliho titengbe awe mẹ. Aliho tẹlẹ mẹ wẹ? Tintan whẹ́, Jehovah ko dọ dọdai dọ “gbẹtọ susugege” Klistiani nugbo lẹ tọn na lùn “nukunbibia daho” he ja lọ tọ́n. (Osọhia 7:9, 14) Dọdai Jiwheyẹwhe tọn lẹ ma nọ gbọ̀vọ́ gbede. Enẹwutu, Satani lọsu dona yọnẹn dọ alọ emitọn ma sọgan plá omẹ Jiwheyẹwhe tọn lẹpo to pọmẹ.
5 Aliglọnnamẹnu awetọ yin hinhẹn họnwun to ohó nugbo dodonu tọn he dopo to sunnu nugbonọ hohowhenu Jiwheyẹwhe tọn lẹ mẹ dọ mẹ. Yẹwhegán Azalia dọna Ahọlu Asa dọmọ: “OKLUNỌ tin to mì dè, [dile e na dẹnsọ bọ] mìwlẹ tin to ewọ dè.” (2 Otannugbo lẹ 15:2; 1 Kọlintinu lẹ 10:13) Kandai apajlẹ susu tọn dohia dọ to ojlẹ he wayi lẹ mẹ, Satani ma nọ penugo nado tlẹ́n depope to devizọnwatọ Jiwheyẹwhe tọn lẹ mẹ he tẹdo Jiwheyẹwhe go pẹkipẹki dù gbede. (Heblu lẹ 11:4-40) To egbehe, Klistiani he tẹdo Jiwheyẹwhe go pẹkipẹki sọgan diọnukunsọ Lẹgba bo tlẹ gbawhàn etọn. Na nugbo tọn, Ohó Jiwheyẹwhe tọn na jide mí dọmọ: “Mì diọnukunsọ Lẹgba; e nasọ họ̀n sọn mì dè.”—Jakobu 4:7.
‘MÍ TO AHIDIHẸ HUHLỌN GBIGBỌ YLANKAN TỌN LẸ’
6. Nawẹ Satani nọ diahi hẹ Klistiani dopodopo gbọn?
6 Satani ma sọgan duto awhàn yẹhiadonu tọn lọ ji, ṣigba e sọgan duto dopodopo mítọn ji eyin mí hẹn aṣejininọ mítọn bu. Satani yọnẹn dọ emi sọgan tlẹ́n mí dù eyin emi gbẹ́ sọgan dekanpona haṣinṣan mítọn hẹ Jehovah. Nawẹ Satani nọ tẹnpọn nado wà ehe gbọn? E nọ yangbé mítọn klinkán-klinkán, nọ yangbé mẹdopodopo tọn tlọlọ bosọ nọ yí ayikinkan gigẹdẹ lẹ zan. Mì gbọ mí ni gbadopọnna ayiha wintinwintin tangan Satani tọn ehelẹ.
7. Naegbọn Satani to ogbé omẹ Jehovah tọn lẹ tọn yàn klinkán-klinkán?
7 Mẹgbeyinyan sinsinyẹn lẹ. Apọsteli Johanu dọmọ: “Aihọn lẹpo sọ mlọnai to mẹylankan lọ mẹ.” (1 Johanu 5:19) Ohó ehe bẹ avase de hẹn na Klistiani nugbo lẹpo. To whenuena e yindọ alọ Satani tọn ko jẹ gbẹtọ ylankan aihọn ehe tọn lẹ blebu go, todin e sọgan ze ayidonugo etọn do mẹhe alọ etọn ma ko plá kakajẹ din lẹ ji bo yangbé yetọn klinkán-klinkán dogọ—enẹ wẹ omẹ Jehovah tọn lẹ. (Mika 4:1; Johanu 15:19; Osọhia 12:12, 17) E to adi sinsinyẹn ji na e yọnẹn dọ whenu gli de wẹ emi tindo. Enẹ wẹ zọ́n bọ e hẹn mẹgbeyinyan lọ sinyẹn dogọ. To egbehe, mí to pipehẹ vivẹnudido ylankan etọn godo tọn nado hẹn haṣinṣan mítọn hẹ Jiwheyẹwhe gble. Enẹwutu, todin hugan gbede pọ́n, mí dona ‘tunwun ojlẹ lẹ nado yọ́n nuhe mí dona wà.’—1 Otannugbo lẹ 12:32.
8. Etẹ dọ wẹ apọsteli Paulu te whenuena e dọ dọ mí to “ahidihẹ” gbigbọ ylankan lẹ?
8 Ahididi mẹdopodopo tọn. Apọsteli Paulu na avase Klistiani hatọ lẹ dọmọ: ‘Míwlẹ to ahidihẹ huhlọn gbigbọ ylankan tọn lẹ to otẹn he tin to olọn lẹ mẹ.’ (Efesunu lẹ 6:12) Naegbọn Paulu yí hogbe lọ ‘ahididi’ zan? Na ahididi zẹẹmẹdo avùn he nọ biọ dọ yè ni takitina ogbẹ́ mẹtọn. Enẹwutu, gbọn hogbe enẹ yiyizan dali, Paulu zinnudeji dọ dopodopo mítọn dona diahi hẹ gbigbọ ylankan lẹ tlọlọ. Vlavo mí nọ nọ̀ otò he mẹ mẹhe tindo yise to gbigbọ ylankan lẹ mẹ sù te kavi lala, mí ma dona wọn gbede dọ gbeegbe mí klan míde do wiwe na Jehovah, mí hẹ oplò avùnhiho tọn lọ ji to yẹhiadonu-liho. E whè gbau sọn whenue Klistiani dopodopo ko klan ede do wiwe sọyi, e lẹzun dandan dọ ni hoavùn. Abajọ Paulu dotuhomẹna Klistiani lẹ to Efesu pludopludo nado “nọte” gli kavi “nọavunte” nado sọgan diahi hẹ gbigbọ ylankan lẹ!—Efesunu lẹ 6:11, 13, 14.
9. (a) Naegbọn Satani po aovi lẹ po nọ yí ‘ayiha wintinwintin’ voovo lẹ zan? (b) Naegbọn Satani nọ tẹnpọn nado sọtadona nulẹnpọn mítọn, podọ nawẹ mí sọgan nọavunte sọta vivẹnudido etọn lẹ gbọn? (Pọ́n apotin lọ “Họ́ Dewe Sọta Oklọ Satani Tọn!”) (c) Ayiha wintinwintin tẹwẹ mí na gbadopọnna todin?
9 Ayikinkan gigẹdẹ lẹ. Paulu dotuhomẹna Klistiani lẹ nado nọavunte sọta “bublu” kavi ayiha wintinwintin Satani tọn lẹ. (Efesunu lẹ 6:11) E jẹna ayidego dọ hogbe dowhenu tọn he Paulu yizan tofi dohia dọ ayiha wintinwintin mọnkọtọn susu lẹ wẹ tin. Gbigbọ ylankan lẹ nọ yí ayikinkan gigẹdẹ voovo lẹ zan—podọ na whẹwhinwhẹ́n dagbe. To whenuho gblamẹ, yisenọ delẹ he ko nọavunte sọta whlepọn wunmẹ tangan de ko jogbe to whenuena yé pehẹ whlepọn devo. Enẹwutu, Lẹgba po aovi lẹ po nọ to nuyiwa dopodopo mítọn lẹ tọn ṣọ́ nado mọ fie mí yin madogánnọ te hugan. Enẹgodo, yé nọ yí madogán gbigbọmẹ tọn depope he mí sọgan tindo zan. Ṣigba, mí dopẹ́ dọ mí ma tin to wunvi mẹ gando aliho susu he Lẹgba nọ yizan lẹ go na yé ko yin didohia mí hezeheze to Biblu mẹ wutu. (2 Kọlintinu lẹ 2:11) To bẹjẹeji owe ehe tọn mẹ, mí ko dọhodo ayiha wintinwintin Satani tọn delẹ ji taidi oklọ agbasanu lẹ bibẹpli tọn, gbẹdido ylankan, po fẹnnuwiwa zanhẹmẹ tọn po. Todin, mì gbọ mí ni gbadopọnna devo—afinyọnnuwiwa.
AFINYỌNNUWIWA—NUYIWA NUGBONỌ-MAYIN TỌN
10. (a) Etẹwẹ afinyọnnuwiwa yin? (b) Nukun tẹwẹ Jehovah nọ yí do pọ́n afinyọnnuwiwa, podọ nukun tẹwẹ hiẹ nọ yí do pọ́n ẹn?
10 Gbọn alọdido to afinyọnnuwiwa mẹ dali, mẹde nọ tindo kanṣiṣa tlọlọ hẹ gbigbọ ylankan lẹ. Dọṣẹdidọ, azé, fákinkan, po hodidọ hẹ oṣiọ lẹ po yin wunmẹ afinyọnnuwiwa tọn delẹ. Dile mí yọnẹn ganji do, Jehovah nọ pọ́n afinyọnnuwiwa hlan taidi “osùnú de.” (Deutelonomi 18:10-12; Osọhia 21:8) To whenuena e yindọ mílọsu dona “gbẹwanna nuhe ylan,” nuhe ma sọgbe paali wẹ e na yin dọ mí ni dogbẹ́ hẹ gbigbọ ylankan lẹ. (Lomunu lẹ 12:9) Nuyiwa hiọawu nugbonọ-mayin tọn nankọ die enẹ na yin hlan Otọ́ olọn mẹ tọn mítọn, Jehovah!
11. Naegbọn Satani na mọ whẹwhinwhẹ́n susu nado jẹaglin eyin e penugo bo klọ mí nado lẹhlan afinyọnnuwiwa kọ̀n? Na apajlẹ.
11 Nalete, to whenuena e yindọ alọdido to afinyọnnuwiwa mẹ yin nuyiwa ylankan nugbonọ-mayin tọn hlan Jehovah, Satani ko magbe nado dọ̀n delẹ to mí mẹ biọ e mẹ. Whedepopenu he Klistiani de yin kiklọ nado doalọ to afinyọnnuwiwa mẹ, Satani nọ mọ whẹwhinwhẹ́n susu nado jẹaglin. Etẹwutu? Lẹnnupọndo apajlẹ ehe ji: Eyin awhànfuntọ de yin linlẹndiọna nado gbẹ́ awhànpa etọn dai bo kọnawudopọ hẹ awhànpa kẹntọ lẹ tọn, homẹ awhàngán awhànpa kẹntọ lọ tọn na hùn taun. E tlẹ sọgan deawhànfọ bo jlá pàdutọ lọ gbọn mẹlẹpo nukọn taidi mẹhe mọ nunina awhàngbigba tọn de yí nado sọgan zín adí na awhàngán awhànpa he mẹ e te dai lọ tọn. Mọdopolọ, eyin Klistiani de lẹhlan afinyọnnuwiwa kọ̀n, e na zẹẹmẹdo dọ e yọnẹn ganji bo desọn ojlo mẹ nado gbẹ́ Jehovah dai bo ze ede do anademẹ Satani tọn glọ tlọlọ. Yí nukun homẹ tọn do pọ́n lehe homẹ Satani tọn na hùn nado deawhànfọ bo jlá pàdutọ lọ taidi mẹhe mọ nunina awhàngbigba tọn de yí do sọ! Be depope to mí mẹ na jlo nado na Lẹgba awhàngbigba mọnkọtọn wẹ ya? Paali! Mí ma yin pàdutọ.
KANBIỌ LẸ YIYIZAN NADO FỌ́N AYIHAAWE DOTE
12. Aliho tẹwẹ Satani nọ yizan nado yinuwado nukun he mí nọ yí do pọ́n afinyọnnuwiwa ji?
12 Dile e na dẹnsọ bọ mí gbẹwanna afinyọnnuwiwa, Satani ma sọgan yí ì zan nado duto mí ji. Enẹwutu, Satani mọdọ emi dona diọ nulẹnpọn mítọn. Gbọnna? E nọ dín aliho lẹ nado hẹn Klistiani lẹ biọ bẹwlu mẹ jẹ obá lọ mẹ bọ mẹdelẹ na lẹndọ ‘dagbe yin oylan bọ oylan yin dagbe.’ (Isaia 5:20) Nado wà ehe, Satani nọ saba yí dopo to aliho he nọ wazọ́n na ẹn taun sọn hohowhenu lẹ mẹ zan—enẹ wẹ kanbiọ lẹ yiyizan nado fọ́n ayihaawe dote.
13. Nawẹ Satani ko yí kanbiọ lẹ zan nado fọ́n ayihaawe dote gbọn?
13 Doayi lehe Satani yí aliho enẹ zan to hohowhenu do go. E kanse Evi to jipa Edẹni tọn mẹ dọmọ: ‘Ojé, Jiwheyẹwhe ko dọmọ mì ma na dù to atin lẹ mẹ he tin to jipa mẹ lẹ depope?’ To ojlẹ Job tọn mẹ, Satani fọ́n kanbiọ dote to opli he yin bibasi hẹ angẹli lẹ to olọn mẹ de whenu dọmọ: ‘Be Job dibusi Jiwheyẹwhe na ovọ́ wẹ?’ Podọ to bẹjẹeji lizọnyizọn Jesu tọn to aigba ji whenu, Satani diọavunnukunsọ Klisti dọmọ: ‘Eyin hiẹ yin Ovi Jiwheyẹwhe tọn, degbena zannu helẹ ni lẹzun akla.’ Pọ́n bo—to whẹho Jesu tọn mẹ, Satani tindo jintli lọ nado ṣàn Jehovah kò po hogbe he Jehovah lọsu ko yizan to nudi osẹ ṣidopo jẹnukọn lẹ po dọmọ: ‘Ehe wẹ Visunnu ṣie, mẹvivẹ ṣie, mẹhe mẹ homẹ ṣie vivi te tlala!’—Gẹnẹsisi 3:1; Job 1:9; Matiu 3:17; 4:3.
14. (a) Nawẹ Satani nọ yí ayiha wintinwintin etọn nado fọ́n ayihaawe dote gando afinyọnnuwiwa go zan gbọn? (b) Etẹwẹ mí na gbadopọnna todin?
14 To egbehe, Lẹgba nọ yí ayiha wintinwintin dopolọ zan bo nọ tẹnpọn nado fọ́n ayihaawe dote nado dohia dọ afinyọnnuwiwa ma ylan sọmọ. E blawu dọ, e ko tindo kọdetọn dagbe to yisenọ delẹ hinhẹn tindo ayihaawe mẹ. Yé ko jẹ ayihaawe tindo ji vlavo eyin wunmẹ afinyọnnuwiwa tọn delẹ ylan sọmọ nugbonugbo. Na taun tọn, yé to linlẹn dọ, ‘Be nugbo ka wẹ ya?’ (2 Kọlintinu lẹ 11:3) Nawẹ mí sọgan gọalọna omẹ mọnkọtọn lẹ nado jla pọndohlan yetọn do gbọn? Etẹwẹ mí sọgan wà nado hẹn ẹn diun dọ ayiha wintinwintin Satani tọn lẹ ma yinuwado mí ji? Nado na gblọndo, mì gbọ mí ni gbadopọnna adà awe gbẹzan tọn he Satani ko gbọn oklọ dali hẹnflu po adà afinyọnnuwiwa tọn lẹ po. Yé wẹ ayidedai po nukunpedomẹgo agbasalilo tọn po.
LẸGBA NỌ YÍ OJLO PO NUHUDO MÍTỌN LẸ PO ZAN
15. (a) Nukun tẹwẹ mẹsusu nọ yí do pọ́n afinyọnnuwiwa to otò he hunnukun lẹ mẹ? (b) Nawẹ pọndohlan aihọn lọ tọn gando afinyọnnuwiwa go ko yinuwado Klistiani delẹ ji gbọn?
15 Titengbe to otò he hunnukun lẹ mẹ, awògbẹ́, azé, po wunmẹ afinyọnnuwiwa tọn devo lẹ po nọ yin pinpọnhlan taidi numadinu. Hugan gbede pọ́n tọn, sinimoto, owe, tito-to-whinnu televiziọn tọn lẹ, po aihundida ọdinatẹẹ ji tọn lẹ po nọ do afinyọnnuwiwa hia taidi nuyiwa ayidedai tọn he nọ do bibi hia bo ma nọ gbleawunamẹ lẹ. Sinimọto po owe delẹ po he nọ sinai do afinyọnnuwiwa ji ko gbayipe sọmọ bọ mẹhe tindo ojlo sinsinyẹn na yé lẹ ko wleawuna pipli he nọ do godonọnamẹ mlẹnmlẹn hia lẹ. E họnwun dọ, aovi lẹ ko tindo kọdetọn dagbe to vivẹnudido yetọn mẹ nado do owù he tin to afinyọnnuwiwa mẹ lẹ hia taidi numadinu. Be pọndohlan lọ nado yí nukunpẹvi do pọ́n afinyọnnuwiwa ko yinuwado Klistiani lẹ ji wẹ ya? E ko yinuwado nulẹnpọn mẹdelẹ tọn ji. To aliho tẹ mẹ? Nado na apajlẹ jọnun dopo, to whenuena Klistiani de ko pọ́n sinimọto he sinai do afinyọnnuwiwa ji de godo, e dọmọ, “N’pọ́n sinimọto lọ, ṣigba n’ma doalọ to afinyọnnuwiwa mẹ.” Naegbọn nulẹnpọn mọnkọtọn ma do sọgbe?
16. Naegbọn e do yin owùnu nado de ayidedai he sinai do afinyọnnuwiwa ji lẹ?
16 Dile etlẹ yindọ vogbingbọn tin to afinyọnnuwiwa pinpọn po alọdido to e mẹ po ṣẹnṣẹn, ehe ma zẹẹmẹdo dọ afinyọnnuwiwa pinpọn ma yin owùnu gba. Etẹwutu? Lẹnnupọndo ehe ji: Ohó Jiwheyẹwhe tọn dohia dọ Satani kavi aovi etọn lẹ ma tindo nugopipe lọ nado yọ́n nuhe tin to linlẹn mítọn mẹ lẹ.a Enẹwutu, dile e ko yin nùdego do wayi, nado yọ́n nuhe lẹn mí te bo mọ fie madogán gbigbọmẹ tọn mítọn te, gbigbọ ylankan lẹ dona ṣọ́ nuyiwa mítọn lẹ ganji—ehe bẹ nudide mítọn gando ayidedai go hẹn. Eyin nuyiwa Klistiani de tọn dohia dọ e nọ duvivi sinimọto kavi owe he sinai do gbigbọ kẹnsi tọn, bojijlẹ, aovinuwiwa po mọmọ po sọyi ji, be e to owẹ̀n dohlan aovi lẹ niyẹn. Na taun tọn, madogán etọn dohia yé wẹ e te! Taidi kọdetọn de, aovi lẹ sọgan diahi hẹ Klistiani enẹ dogọ nado sọgan yí madogán etọn he e ko dohia yé zan kakajẹ whenue yé zìn ìn dai to yẹhiadonu-liho. Na nugbo tọn, mẹdelẹ he ayidedai he nọ do afinyọnnuwiwa hia sisẹ́ to tintan whenu nado jẹ wanyina walọ ylankan ehe ji lẹ ko wá doalọ to e mẹ to godo mẹ.—Galatianu lẹ 6:7.
Mọaleyi sọn godonọnamẹ Jehovah tọn mẹ to whenuena a to azọ̀njẹ
17. Ayiha wintinwintin tẹwẹ Satani sọgan yizan nado klọ mẹhe to azọ̀njẹ lẹ?
17 E ma yin ojlo mítọn na ayidedai kẹdẹ wẹ Satani nọ tẹnpọn nado yizan gba, e sọ nọ yí nukunpedomẹgo agbasalilo tọn he mí tindo nuhudo etọn zan ga. Gbọnna? Klistiani he azọ̀n etọn to sinsinyẹn dogọ mahopọnna vivẹnudido susu nado mọ pọngbọ sọgan jẹflumẹ pete. (Malku 5:25, 26) Enẹ sọgan hùn dotẹnmẹ dagbe dotena Satani po aovi lẹ po nado klọ ẹ. Yé yọnẹn ganji dọ Ohó Jiwheyẹwhe tọn na avase sọta ‘alọgọ yé he to azọ́n ylankan wà lẹ tọn’ dindin. (Isaia 31:2) Nado hẹn Klistiani de vẹtolina avase enẹ, aovi lẹ sọgan whlé awutunọ de pọ́n nado yin ahunmẹduna zẹjlẹgo gbọn ninọmẹ etọn dali bo dín pọngbọ kavi aliho nukunpedomẹgo tọn he bẹ yizan “huhlọn he dazì” tọn kavi afinyọnnuwiwa hẹn—yèdọ nuhe gọ́ na owù taun. (Isaia 1:13, NW ) Eyin ayiha wintinwintin aovi lẹ tọn enẹ wazọ́n, e sọgan dekanpona haṣinṣan he awutunọ lọ tindo hẹ Jiwheyẹwhe. To aliho tẹ mẹ?
18. Aliho nukunpedomẹgo tọn wunmẹ tẹlẹ wẹ Klistiani de dona dapana, podọ etẹwutu?
18 Jehovah na avase Islaelivi he lẹhlan “huhlọn he dazì” lẹ dọmọ: “Whenuena mì dlẹn alọ mìtọn, yẹn na yí nukun ṣie whlá do mì: nugbo, whenuena mì hodẹ̀ susu, yẹn ma na sè.” (Isaia 1:15) Na nugbo tọn, mí ma jlo gbede nado doalọ to nudepope mẹ he sọgan glọnalina odẹ̀ mítọn lẹ bo de alọgọ he mí nọ mọyi sọn Jehovah dè pò—titengbe to whenuena mí to azọ̀njẹ. (Psalm 41:3) Enẹwutu, eyin e taidi dọ aliho he na yin yiyizan nado yọ́n kavi penukundo azọ̀n de go bẹ afinyọnnuwiwa hẹn, Klistiani nugbo de dona gbẹ́ ẹ dai.b (Matiu 6:13) Gbọnmọ dali, e na deji dọ emi na to godonọnamẹ Jehovah tọn mọyi zọnmii.—Pọ́n apotin lọ “Be Afinyọnnuwiwa Wẹ E Yin Nugbo Ya?”
WHENUE OTÀN LẸ GBAYIPE GANDO NUYIWA AOVI LẸ TỌN GO
19. (a) Etẹwẹ Lẹgba ko doyẹklọ mẹsusu nado yise gando huhlọn etọn go? (b) Otàn tẹlẹ wẹ Klistiani nugbo lẹ dona dapana?
19 To whenuena e yindọ susu mẹhe nọ nọ̀ otò he hunnukun lẹ mẹ tọn ma nọ dibuna nuyiwadomẹji huhlọn Satani tọn, to adà aihọn lọ tọn devo lẹ mẹ, mẹsusu wẹ nọ to sijọsijọ ji. To otò enẹlẹ mẹ, Lẹgba ko doyẹklọ mẹsusu nado yise dọ emi tindo huhlọn zẹ̀ nuhe yé nọ lẹn go. Mẹdelẹ nọ nọgbẹ̀, dùnú, wazọ́n, bo nọ damlọn to obu mẹ na gbigbọ ylankan lẹ. Otàn he gando nuyiwa huhlọnnọ aovi lẹ tọn go gbayipe. Gbẹtọ lẹ nọ saba pìntàn mọnkọtọn lẹ po awuvivi po, podọ otàn lọ lẹ nọ yọ́nsè na mẹsusu. Be mílọsu dona hẹn otàn mọnkọtọn lẹ gbayipe wẹ ya? Lala, devizọnwatọ Jiwheyẹwhe nugbo lọ tọn lẹ ma nọ wàmọ na whẹwhinwhẹ́n titengbe awe wutu.
20. Nawẹ mẹde sọgan hẹn linlẹn Satani tọn gbayipe etlẹ yin to mayọnẹn mẹ gbọn?
20 Tintan whẹ́, mẹhe to otàn lẹ hẹn gbayipe gando nuyiwa aovi lẹ tọn go to godonọna Satani to vivẹnudido etọn lẹ mẹ. Gbọnna? Ohó Jiwheyẹwhe tọn yigbe dọ Satani sọgan wà azọ́n huhlọnnọ lẹ, ṣigba e sọ na avase dọ e nọ yí ‘ohia lalo tọn lẹ’ po “oklọ” po zan. (2 Tẹsalonikanu lẹ 2:9, 10) To whenuena e yindọ Satani wẹ mẹklọtọ-gán lọ, e yọ́n lehe yè nọ yinuwado ayiha mẹhe yiwanna afinyọnnuwiwa lẹ tọn ji do podọ lehe e na hẹn yé nado yí lalo sè do. Omẹ mọnkọtọn lẹ sọgan yise po ahundopo po dọ emi mọ bo sè onú delẹ podọ yé sọgan dọ numimọ yetọn lẹ taidi nuhe jọ nugbonugbo. To nukọn mẹ, gbẹtọ lẹ nọ wá dósin otàn yetọn lẹ ji gbọn vivọ́ yé dọ whẹwhẹ dali. Na taun tọn, eyin Klistiani de hẹn otàn mọnkọtọn lẹ gbayipe, ojlo Lẹgba, ‘otọ́ lalo tọn’ wà wẹ e te. E na gbọnmọ dali to linlẹn Satani tọn hẹn gbayipe.—Johanu 8:44; 2 Timoti 2:16.
21. Etẹ ji wẹ mí dona nọ ze hodidọ mítọn lẹ sinai do?
21 Awetọ, eyin Klistiani de tlẹ tindo kanṣiṣa hẹ gbigbọ ylankan lẹ nugbonugbo to ojlẹ he wayi lẹ mẹ, e ma dona nọ to otàn onú mọnkọtọn lẹ tọn pìn na yisenọ hatọ lẹ gbọzangbọzan. Etẹwutu? Mí yin tudohomẹna dọmọ: “Nọ pọnhlan Jesu he yin dòdó po opodo yise mítọn tọn po.” (Heblu lẹ 12:2) Mọwẹ, Klisti ji wẹ mí dona ze ayidonugo mítọn do, e ma yin Satani. E jẹna ayidego dọ to whenuena Jesu tin to aigba ji, e ma nọ to otàn gbigbọ ylankan lẹ tọn pìn na devi etọn lẹ gba, dile etlẹ yindọ e sọgan ko dọ nususu gando nugopipe Satani tọn lẹ go. Kakatimọ, Jesu ze ayidonugo do owẹ̀n Ahọluduta lọ tọn ji. Enẹwutu, gbọn apajlẹ Jesu po apọsteli lẹ po tọn hihodo dali, mí dona nọ ze hodidọ mítọn lẹ sinai do “azọ́n huhlọnnọ Jiwheyẹwhe tọn” lẹ ji.—Owalọ lẹ 2:11; Luku 8:1; Lomunu lẹ 1:11, 12.
22. Etẹwẹ mí sọgan to wiwà zọnmii nado yidogọna ‘ayajẹ he tin to olọn mẹ?’
22 Nugbo wẹ dọ Satani nọ yí ayiha wintinwintin susu he bẹ afinyọnnuwiwa hẹn zan, nado tẹnpọn bo hẹn haṣinṣan he mí tindo hẹ Jehovah gble. Etomọṣo, gbọn wangbigbẹna nuhe ylan bo tẹdo nuhe yin dagbe go dali, mí nọ sú ali lẹpo do Lẹgba ma nado dekanpona gbemima mítọn nado gbẹ́ afinyọnnuwiwa wunmẹ lẹpo dai. (Efesunu lẹ 4:27) Yí nukun homẹ tọn do pọ́n ‘ayajẹ daho he na tin to olọn mẹ’ eyin mí zindonukọn nado ‘nọte gli sọta ayiha wintinwintin Lẹgba tọn lẹ’ kakajẹ whenue e yin vivasudo!—Efesunu lẹ 6:11.
a Oyín zẹẹmẹ basinamẹ tọn he yin nina Satani lẹ (Agọjẹdomẹtọ, Mẹhẹngbletọ, Mẹklọtọ, Mẹwhlepọntọ, Lalonọ) ma dohia dọ e tindo nugopipe lọ nado yọ́n nuhe tin to ahun po ayiha mítọn mẹ lẹ po gba. Ṣigba, to vogbingbọn mẹ, Jehovah yin zẹẹmẹ basina taidi mẹhe “to ayiha whlepọn” bọ Jesu yin alọdlẹndo taidi mẹhe “nọ dla homẹ po ayiha po pọ́n.”—Howhinwhẹn lẹ 17:3; Osọhia 2:23.
b Nado mọ nudọnamẹ dogọ, pọ́n hosọ lọ “Une thérapeutique appropriée?” to Atọ̀họ̀-Nuhihọ́ Lọ Tọn [Flansegbe] 15 décembre 1994, weda 19-22, po hosọ lọ po “D’après la Bible . . . Vos choix en matière de traitement médical: ont-ils de l’importance?” to Réveillez-vous! 8 janvier 2001 mẹ.