Weta 18
Yí I Do Basi Yanwle Towe Nado Sẹ̀n Jiwheyẹwhe Kakadoi
1, 2. Etẹwẹ yin bibiọ to mẹsi gbọnvona oyọnẹn Jiwheyẹwhe tọn tintindo?
MÍ NI dọ dọ hiẹ nọte to ohọ̀n he ji yè dogan he tọ́n do abò he bẹ adọkun susu hẹn de mẹ nukọn. Mí ni dọ dọ mẹhe tindo gbedide de ko na we họnhungan lọ bo dọ na we nado hùn ohọ̀n lọ bo bẹ́ nuhọakuẹ lọ lẹ. Họnhungan enẹ ma na wà dagbe depope na we adavo hiẹ yí i zan. Mọdopolọ, hiẹ dona yí oyọnẹn zan eyin e na hẹn ale wà na we.
2 Ehe yin nugbo taun gando oyọnẹn Jiwheyẹwhe tọn go. Na nugbo tọn, oyọnẹn he pegan Jehovah Jiwheyẹwhe po Jesu Klisti po tọn zẹẹmẹdo ogbẹ̀ madopodo. (Johanu 17:3) Etomọṣo, pọndohlan enẹ ma sọgan yin hinhẹn diun gbọn oyọnẹn tintindo poun dali gba. Dile hiẹ na yí họnhungan họakuẹ de zan do, hiẹ dona yí oyọnẹn Jiwheyẹwhe tọn zan to gbẹzan towe mẹ. Jesu dọ dọ mẹhe to ojlo Jiwheyẹwhe tọn wà lẹ wẹ na ‘biọ ahọluduta lọ mẹ.’ Omẹ mọnkọtọn lẹ na tindo lẹblanulọkẹyi lọ nado sẹ̀n Jiwheyẹwhe kakadoi!—Matiu 7:21; 1 Johanu 2:17.
3. Etẹwẹ yin ojlo Jiwheyẹwhe tọn na mí?
3 To nuhe ojlo Jiwheyẹwhe tọn yin pinplọn godo, onú titengbe de wẹ e yin nado basi i. Etẹwẹ hiẹ lẹndọ ojlo Jiwheyẹwhe tọn zẹẹmẹdo na we? E sọgan yin bibladopọ ganji to hogbe ehelẹ mẹ dọmọ: Hodo apajlẹ Jesu tọn. Pita tintan 2:21 dọ na mí dọmọ: “Na ehe mẹ wẹ yè ylọ mì do: na Klisti jiya na mí ga, bo yí ohia dai na mí, na míwlẹ nido nọ gbọn afọ etọn ji.” Enẹwutu, nado wà ojlo Jiwheyẹwhe tọn, hiẹ dona hodo apajlẹ Jesu tọn pẹkipẹki dile e yọnbasi do. Lehe hiẹ na yí oyọnẹn Jiwheyẹwhe tọn do yizan mẹ do niyẹn.
LEHE JESU YÍ OYỌNẸN JIWHEYẸWHE TỌN ZAN DO
4. Naegbọn Jesu do yọ́n onú susu sọmọ dogbọn Jehovah dali, podọ nawẹ e ko yí oyọnẹn ehe zan gbọn?
4 Jesu Klisti tindo oyọnẹn he siso Jiwheyẹwhe tọn hugan mẹdevo lẹ. E nọgbẹ̀ bosọ wazọ́n po Jehovah Jiwheyẹwhe po to olọn mẹ na owhe madosọha lẹ whẹpo e do wá aigba ji. (Kọlọsinu lẹ 1:15, 16) Podọ etẹwẹ Jesu wà po oyọnẹn enẹ lẹpo po? E ma tindo pekọ to tintindo e poun mẹ gba. Jesu nọgbẹ̀ to gbesisọmẹ po e po. Enẹwutu wẹ e do yin mẹdọndogotọ, whiwhẹnọ, po owanyinanọ po to nuyiwa hẹ gbẹtọvi hatọ etọn lẹ mẹ sọmọ. Jesu gbọnmọ dali do to apajlẹ Otọ́ olọn mẹ tọn etọn hodo bosọ to nuyiwa sọgbe hẹ oyọnẹn etọn heyin aliho Jehovah tọn lẹ po gbẹtọ-yinyin etọn po.—Johanu 8:23, 28, 29, 38; 1 Johanu 4:8.
5. Naegbọn Jesu do yin bibaptizi, podọ nawẹ e nọgbẹ̀ sọgbe hẹ baptẹm etọn gbọn?
5 Oyọnẹn he Jesu tindo sọ whan ẹn nado ze afọdide sinsinyẹn de. E tọ́n sọn Galili wá Otọ̀ Jọdani tọn kọ̀n, fie Johanu baptizi i te. (Matiu 3:13-15) Etẹwẹ yin yẹhiadonu baptẹm Jesu tọn? Taidi Juvi de, e yin jìjì do akọta he klan ede do wiwe hlan Jiwheyẹwhe de mẹ. Gbọnmọ dali, Jesu ko yin kinklandowiwe sọn jìjì etọn whenu gbọ́n. (Eksọdusi 19:5, 6) Gbọn ede zizejo na baptẹm dali, e to ede dohia Jehovah nado wà ojlo sọn olọn mẹ wá etọn to ojlẹ enẹ mẹ. (Heblu lẹ 10:5, 7) Podọ Jesu nọgbẹ̀ sọgbe hẹ zẹẹmẹ baptẹm etọn tọn. E yí ede zan to sinsẹnzọn Jehovah tọn mẹ, bo nọ má oyọnẹn Jiwheyẹwhe tọn hẹ gbẹtọ lẹ to dotẹnmẹ hundote lẹpo whenu. Jesu mọ awuvivi to ojlo Jiwheyẹwhe tọn wiwà mẹ, bo tlẹ dọ dọ ehe tin taidi núdùdù na emi.—Johanu 4:34.
6. To aliho tẹ mẹ wẹ Jesu mọ́n ede te?
6 Jesu doayi e go to gigọ́mẹ dọ ojlo Jehovah tọn wiwà na yin nuhe họakuẹ taun—he tlẹ sọgan biọ ogbẹ̀ etọn. Etomọṣo, Jesu mọ́n ede, bo ze nuhudo mẹdetiti tọn etọn lẹ do otẹn awetọ mẹ. Ojlo Jiwheyẹwhe tọn wiwà nọ saba tin to otẹn tintan mẹ. To pọndohlan ehe tọn mẹ, nawẹ mí sọgan hodo apajlẹ pipé Jesu tọn pẹkipẹki gbọn?
AFỌDIDE HE NỌ PLANMẸ SỌYÌ OGBẸ̀ MADOPODO MẸ LẸ
7. Afọdide delẹ tẹwẹ mẹde dona ze nado tindo jẹhẹnu baptẹm tọn?
7 Gbọnvona Jesu, mí yin mapenọ bo sọgan jẹ otẹn ayidonugo tọn heyin baptẹm tọn mẹ kiki to afọdide tangan devo lẹ zize kẹdẹ godo. Ehe nọ bẹjẹeji gbọn oyọnẹn he pegan Jehovah Jiwheyẹwhe po Jesu Klisti tọn po yiyi hẹn do ahun mítọn lẹ mẹ dali. Ehe wiwà nọ hẹn mí nado tindo yise bosọ tindo owanyi he siso taun na Jiwheyẹwhe. (Matiu 22:37-40; Lomunu lẹ 10:17; Heblu lẹ 11:6) Tonusise na osẹ́n, nunọwhinnusẹ́n, po nujinọtedo Jiwheyẹwhe tọn lẹ po dona whàn mí nado lẹnvọjọ, bo do awubla jijọ-di-Jiwheyẹwhe tọn hia do ylando mítọn dai tọn lẹ ji. Ehe nọ planmẹ jẹ yinyin adadiọna kọ̀n, enẹ wẹ yin, nado diọ walọyizan mẹtọn bosọ gbẹ́ yanwle agọ̀ depope he mí ko hodo dai to whenuena mí ma ko tindo oyọnẹn Jiwheyẹwhe tọn. (Owalọ lẹ 3:19) Na paa tọn, eyin mí gbẹsọ po to mahẹ tindo to ylando delẹ mẹ to nuglọ kakati nado wà nuhe yin dodo, mí ma ko diọ walọyizan mítọn nugbo nugbo gba, mọjanwẹ mí ma sọgan klọ̀ Jiwheyẹwhe gba. Jehovah yọ́n yẹnuwiwa lẹpo.—Luku 12:2, 3.
8. Afọdide tẹwẹ hiẹ dona ze to whenuena hiẹ jlo na tindo mahẹ to azọ́n yẹwhehodidọ Ahọluduta lọ tọn mẹ?
8 Dinvie he hiẹ ko to oyọnẹn Jiwheyẹwhe tọn yí, be e ma na sọgbe nado gbadopọnna whẹho gbigbọmẹ tọn lẹ to aliho mẹdetiti tọn taun de mẹ ya? Vlavo hiẹ tin to jejeji nado dọ nuhe hiẹ to pinplọn na hẹnnumẹ towe lẹ, họntọn towe lẹ, po mẹdevo lẹ po. Na nugbo tọn, hiẹ tlẹ sọgan ko to ehe basi, yèdọ dile Jesu má wẹndagbe lọ hẹ mẹdevo lẹ to ninọmẹ mayin aṣa tọn de mẹ do. (Luku 10:38, 39; Johanu 4:6-15) Todin hiẹ sọgan jlo nado basi onú susu dogọ. Homẹ mẹho Klistiani lẹ tọn na hun nado dọho hẹ we nado yọnẹn eyin vlavo hiẹ tindo jẹhẹnu bosọ penugo nado tindo mahẹ delẹ to nuwiwa yẹwhehodidọ Ahọluduta lọ tọn heyin Kunnudetọ Jehovah Tọn lẹ tọn mẹ. Eyin hiẹ tindo jẹhẹnu lọ bosọ penugo, mẹho lẹ na basi tito lẹ na hiẹ nido hodo Kunnudetọ de to lizọnyizọn lọ mẹ. Devi Jesu tọn lẹ hodo ayinamẹ etọn lẹ nado sọgan penugo bo hẹn lizọnyizọn yetọn diun to ninọmẹ titojininọ tọn de mẹ. (Malku 6:7, 30; Luku 10:1) Hiẹ na mọaleyi sọn alọgọ dopolọ mẹ dile hiẹ na tindo mahẹ to owẹ̀n Ahọluduta lọ tọn lilá sọn whédegbè jẹ whédegbè mẹ podọ to aliho devo lẹ mẹ do.—Owalọ lẹ 20:20, 21.
9. Nawẹ mẹde nọ basi klandowiwe de hlan Jiwheyẹwhe gbọn, podọ nawẹ klandowiwe nọ gando ogbẹ̀ omẹ lọ tọn go gbọn?
9 Yẹwheho wẹndagbe lọ tọn didọ na wunmẹ gbẹtọ lẹpo tọn to aigba-denamẹ agun lọ tọn ji yin aliho de nado din mẹhe tindo ninọmẹ dodo tọn lẹ mọ podọ e tin to azọ́n dagbe he dohia dọ hiẹ tindo yise lẹ mẹ. (Owalọ lẹ 10:34, 35; Jakobu 2:17, 18, 26) Opli Klistiani tọn lẹ yìyì to gbesisọmẹ podọ mahẹ he gọna zẹẹmẹ de tintindo to azọ́n yẹwhehodidọ tọn mẹ sọ yin aliho lẹ nado dohia dọ hiẹ ko lẹnvọjọ bosọ yin adadiọna podọ todin magbè nado nọgbẹ̀ to gbesisọmẹ po oyọnẹn Jiwheyẹwhe tọn po. Etẹwẹ yin afọdide lẹnpọn dagbe tọn he bọdego lọ? Afọdide lọ wẹ nado basi klandowiwe de hlan Jehovah Jiwheyẹwhe. Ehe zẹẹmẹdo dọ, to odẹ̀ sọn ahun mẹ wá mẹ, hiẹ na dọ na Jiwheyẹwhe dọ hiẹ jlo podọ ze gbẹzan towe jo na ẹn nado wà ojlo etọn po ayiha towe lẹpo po. Ehe wẹ aliho lọ nado klan dewe do wiwe hlan Jehovah bosọ kẹalọyi zẹ̀gẹ̀ Jesu Klisti tọn he bọawu lọ.—Matiu 11:29, 30.
BAPTẸM—NUHE E ZẸẸMẸDO NA WE
10. Naegbọn hiẹ dona yin bibaptizi to dewe kinklandowiwe hlan Jehovah godo?
10 Sọgbe hẹ Jesu, mẹhe lẹzun devi etọn lẹpo dona yin bibaptizi. (Matiu 28:19, 20) Naegbọn ehe do yin dandannu to whenuena hiẹ ko basi klandowiwe de hlan Jiwheyẹwhe godo? To whenuena hiẹ ko klan dewe do wiwe hlan Jehovah, e yọnẹn dọ hiẹ yiwanna emi. Ṣigba matin ayihaawe hiẹ na jlo nado ze afọdide devo lẹ dogọ nado gbọna mẹdevo lẹ ni yọnẹn dogbọn owanyi towe hlan Jiwheyẹwhe dali. Eyọn, baptẹm nọ na we dotẹnmẹ hundote lọ nado hẹn klandowiwe towe hlan Jehovah Jiwheyẹwhe zun yinyọnẹn to gbangba.—Lomunu lẹ 10:9, 10.
11. Etẹwẹ yin zẹẹmẹ baptẹm tọn?
11 Baptẹm họakuẹ susu to yẹhiadonu liho. Dile hiẹ yin yinylọ́n, kavi yin “didi,” do osìn lọ glọ, e yin nuhe taidi dọ hiẹ ko kú hlan yanwle gbẹ̀mẹ tọn towe dai tọn. To whenuena hiẹ fọ́n wá aga sọn osìn lọ mẹ, e taidi dọ hiẹ to gigọwa ogbẹ́ yọyọ de mẹ, ode heyin anadena gbọn ojlo Jiwheyẹwhe tọn dali he mayin towe lọsu tọn. Nugbo wẹ dọ, enẹ ma zẹẹmẹdo dọ hiẹ ma na ṣinuwa ba gba, na mímẹpo yin mapenọ podọ gbọnmọ dali nọ waylando egbesọegbesọ. Ṣigba, taidi devizọnwatọ klandowiwe, he yin bibaptizi Jehovah tọn, hiẹ na ko biọ haṣinṣan vonọtaun de mẹ po e po. Na lẹnvọjọ towe podọ na mẹdezejo whiwhẹ tọn towe hlan baptẹm wutu, Jehovah tindo ojlo nado jona ylando towe lẹ to dodonu avọ́sinsan ofligọ Jesu tọn ji. Baptẹm gbọnmọ dali nọ planmẹ jẹ ayihadawhẹnamẹnu wiwe de kọ̀n to Jiwheyẹwhe nukọn.—1 Pita 3:21.
12. Etẹwẹ e zẹẹmẹdo nado yin bibaptizi (a) “do oyín Otọ́ tọn mẹ”? (b) ‘to oyín Ovi tọn mẹ’? (c) ‘to oyín gbigbọ wiwe tọn mẹ’?
12 Jesu degbena hodotọ etọn lẹ nado nọ baptizi devi yọyọ lẹ “do oyín Otọ́ tọn, po Ovi tọn po, po [g]bigbọ [w]iwe tọn po mẹ.” (Matiu 28:19) Etẹwẹ hogbe Jesu tọn lẹ zẹẹmẹdo? Baptẹm “do oyín Otọ́ tọn” mẹ dohia dọ mẹhe to yinyin bibaptizi lọ kẹalọyi Jehovah Jiwheyẹwhe sọn ahún mẹ wá mlẹnmlẹn taidi Mẹdatọ po Nupojipetọ wẹkẹ lẹpo tọn po he tindo jlọjẹ lọ. (Psalm 36:9; 83:18; Yẹwhehodọtọ 12:1) Yinyin bibaptizi ‘to oyín Ovi tọn mẹ’ zẹẹmẹdo dọ omẹ lọ kẹalọyi Jesu Klisti—podọ titengbe avọ́sinsan ofligọ Etọn—taidi aliho whlẹngan tọn dopo akàn lọ heyin awuwlena gbọn Jiwheyẹwhe dali. (Owalọ lẹ 4:12) Baptẹm ‘to oyín gbigbọ wiwe lọ tọn mẹ’ dohia dọ mẹhe ze yínkọ dai na baptẹm lọ yọ́n gbigbọ wiwe Jehovah tọn, kavi huhlọn-yido-wazọ́n etọn, taidi azọnwanu Jiwheyẹwhe tọn na hinhẹn lẹndai Etọn lẹ di podọ na hinhẹn devizọnwatọ Etọn lẹ tindo huhlọn nado wà ojlo dodo tọn Etọn to kọndopọ mẹ po titobasinanu he nọ yin anadena gbọn gbigbọ Etọn dali po.—Gẹnẹsisi 1:2; Psalm 104:30; Johanu 14:26; 2 Pita 1:21.
BE HIẸ KO WLEAWU FÓ NA BAPTẸM YA?
13, 14. Naegbọn mí ma dona dibu nado de nado sẹ̀n Jehovah Jiwheyẹwhe?
13 To whenuena e yindọ baptẹm zẹẹmẹdo onú susu sọmọ podọ e yin nujijọ titengbe hugan lọ to gbẹzan mẹde tọn mẹ, be afọdide de he yè dona dibu na wẹ e yin ya? Gbede pọ́n! Dile etlẹ yindọ dide lọ nado yin bibaptizi ma dona yin yíyí nukun pẹvi do pọ́n, matin ayihaawe dide nuyọnẹn hugan tọn lọ he hiẹ sọgan basi de wẹ e yin.
14 Baptẹm nọ na kunnudenu nudide towe tọn nado sẹ̀n Je-hovah Jiwheyẹwhe. Lẹnnupọn do mẹhe hiẹ jẹakọhẹ lẹ ji. To aliho de kavi devo mẹ, be dopodopo yetọn ma to devizọnwa na ogán de ya? Mẹdelẹ nọ yin kanlinmọ adọkun tọn. (Matiu 6:24) Mẹdevo lẹ po vivẹnudido po nọ doafọna yanwle yetọn kavi gbọn ṣejannabi dali do nọ sẹ̀n yede gbọn hinhẹn ojlo yedetiti tọn di gando gbẹzan yetọn go dali. Ṣogan mẹdevo lẹ nọ sẹ̀n yẹwhe jonọ lẹ. Ṣigba hiẹ ko basi nudide nado sẹ̀n Jiwheyẹwhe nugbo lọ, yèdọ Jehovah. Mẹdevo depope ma nọ do dagbewà, awuvẹmẹ, po owanyi po hia sọmọ gba. Jiwheyẹwhe hẹn gbẹtọvi lẹ jẹ na azọ́n he tindo lẹndai de he nọ deanana gbẹtọ lẹ jẹ whlẹngan kọ̀n? E na ale ogbẹ̀ madopodo tọn devizọnwatọ etọn lẹ. Na jide tọn, apajlẹ Jesu tọn hihodo podọ nina ogbẹ̀ towe Jehovah mayin yanwle he yè dona dibusi de gba. Na nugbo tọn, yanwle dopo akan lọ he yin lẹnpọn dagbe tọn jẹ oba pipé de mẹ wẹ e yin bosọ nọ hẹn homẹ Jiwheyẹwhe tọn hun.—1 Ahọlu lẹ 18:21.
15. Etẹwẹ yin afọklẹnnamẹnu baptẹm tọn paa delẹ?
15 Ṣogan, baptẹm mayin afọdide he dona yin zize na nuyiwadomẹji mẹdevo lẹ tọn wutu gba. Whẹho mẹdetiti tọn de wẹ e yin to hiẹ po Jehovah po ṣẹnṣẹn. (Galatianu lẹ 6:4) Dile hiẹ to nukọnyiyi gbigbọmẹ tọn basi, hiẹ sọgan ko kanse dọmọ: “Etẹwẹ hẹn mi do ote nado baptizi?” (Owalọ lẹ 8:35, 36) Hiẹ sọgan kanse dewe, ‘Be nukundiọsọmẹ whẹndo tọn wẹ to alọhẹndotena mi ya? Be yẹn gbẹsọ to alọ do to ninọmẹ he jẹagọdo owe wiwe delẹ kavi walọyizan ylando tọn lẹ mẹ ya? Be e sọgan yindọ obu to didi mi ma nado hẹn nukun dagbe bu to lẹdo lọ mẹ wẹ ya?’ Ehelẹ yin onú titengbe delẹ he ji yè dona lẹnnupọndo, ṣigba gbadopọnna yé to aliho lẹnpọn dagbenọ-yinyin tọn de mẹ.
16. Nawẹ hiẹ na duale sọn Jehovah sinsẹ̀n mẹ gbọn?
16 E mayin nuhe gọna lẹnpọn dagbe nado jlẹ ninọmẹ agọ̀ lọ lẹ pọ́n matin nulẹnpọn do ale Jehovah sinsẹ̀n tọn lẹ ji gba. Di dohia, lẹnnupọn do whẹho nukundiọsọmẹ whẹndo tọn ji. Jesu dopagbe dọ eyin devi etọn lẹ tlẹ hẹn hẹnnumẹ yetọn lẹ bu na hihodo emi wutu, yé na vọ́ duale whẹndo gbigbọmẹ tọn daho de tọn. (Malku 10:29, 30) Hagbẹ yisenọ ehelẹ na do owanyi mẹmẹsunnu tọn hia we, gọalọna we nado doakọnna homẹkẹn, bosọ nọgodona we to aliho he nọ planmẹ sọyì ogbẹ̀ mẹ lọ ji. (1 Pita 5:9) Mẹho agun tọn lẹ na titengbe tọn sọgan gọalọna we nado pehẹ nuhahun lẹ bosọ duto avùnnukundiọsọmẹnu devo lẹ ji po kọdetọn dagbe po. (Jakobu 5:14-16) Na nuhe du nukun dagbe hinhẹnbu to aihọn ehe mẹ tọn, hiẹ sọgan wà dagbe nado kanse dewe dọ, ‘Onú devo tẹwẹ yọnbasi nado yijlẹdo alọkẹyi Mẹdatọ wẹkẹ lọ tọn tintindo go, he nọ hẹn ẹn nado jaya do yanwle gbẹ̀mẹ tọn he yẹn de lẹ ji?’—Howhinwhẹn lẹ 27:11.
GBẸNINỌ TO GBESISỌMẸ HẸ KLANDOWIWE PO BAPTẸM TOWE PO
17. Naegbọn hiẹ dona pọ́n baptẹm hlan taidi bẹjẹeji de kakati nado yin vivọnu de?
17 Onú titengbe wẹ e yin nado flin dọ baptẹm mayin vivọnu nukọnyiyi gbigbọmẹ tọn towe gba. E nọ dohiagona bẹjẹeji sinsẹnzọn gbẹwhenu lẹpo tọn hlan Jiwheyẹwhe taidi lizọnyizọnwatọ dide podọ dopo to Kunnudetọ Jehovah Tọn lẹ mẹ. Dile etlẹ yindọ baptẹm yin onú titengbe tangan de, e mayin nuhe nọ hẹnmẹ tindo jide whlẹngan tọn gba. Jesu ma dọ dọ: ‘Mẹhe yin bibaptizi lẹpo na yin whinwhlẹngan gba.’ Kakatimọ, e dọmọ: “Mẹhe doakọnna kaka jẹ opodo, mẹdopolọ wẹ yè na whlẹn gan.” (Matiu 24:13) Enẹwutu, onú titengbe wẹ e yin dọ hiẹ ni din Ahọluduta Jiwheyẹwhe Tọn whẹ́ gbọn hinhẹn ẹn zun nuduahunmẹnamẹ titengbe to gbẹzan towe mẹ dali.—Matiu 6:25-34.
18. To baptẹm godo, yanwle tẹlẹ wẹ dona yin afọdona?
18 Nado doakọnnanu to sinsẹnzọn towe hlan Jehovah mẹ, hiẹ na jlo nado ze yanwle gbigbọmẹ tọn lẹ do nukọn na dewe. Yanwle he jẹ dopo wẹ nado hẹn oyọnẹn Jiwheyẹwhe tọn towe gblodeji gbọn oplọn mẹdetiti tọn heyin Ohó etọn tọn to gbesisọmẹ dali. Basi tito na Biblu hihia egbesọegbesọ tọn. (Psalm 1:1, 2) Nọ yì opli Klistiani tọn lẹ to gbesisọmẹ, na gbẹdido he hiẹ na mọ to finẹ na gọalọna we nado lodo to gbigbọmẹ. Na hiẹ tọn, naegbọn hiẹ ma nado hẹn ẹn zun yanwle towe nado na gblọndo to opli agun tọn lẹ ji bo gbọnmọ dali do pagigona Jehovah bosọ din nado jlọ mẹdevo lẹ dote? (Lomunu lẹ 1:11, 12) Yanwle devo sọgan yin nado hẹn jẹhẹnu odẹ̀ towe lẹ tọn pọnte dogọ.—Luku 11:2-4.
19. Jẹhẹnu tẹlẹ wẹ gbigbọ wiwe sọgan gọalọna we nado dohia?
19 Eyin hiẹ na nọgbẹ̀ to gbesisọmẹ hẹ zẹẹmẹ baptẹm towe tọn, hiẹ dona payi nuhe hiẹ nọ basi go po sọwhiwhe po, bo gbọ na gbigbọ wiwe Jiwheyẹwhe tọn ni wleawu jẹhẹnu mọnkọtọn lẹ taidi owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, po mawazẹjlẹgo po to hiẹ mẹ. (Galatianu lẹ 5:22, 23; 2 Pita 3:11) Flindọ, Jehovah nọ na gbigbọ wiwe etọn hlan mẹhe nọ hodẹ̀ na ẹn bosọ nọ setonuna ẹn taidi devizọnwatọ nugbonọ etọn lẹpo. (Luku 11:13; Owalọ lẹ 5:32) Enẹwutu hodẹ̀ hlan Jiwheyẹwhe na gbigbọ etọn bo biọ alọgọ to e si nado do jẹhẹnu he nọ hẹn homẹ etọn hun lẹ hia. Jẹhẹnu mọnkọtọn lẹ na sọawuhia ganji to hogbe po walọ towe lẹ po mẹ dile hiẹ na yigbe hlan nuyiwadomẹji gbigbọ Jiwheyẹwhe tọn do. Nugbo wẹ dọ, dopodopo mẹhe tin to agun Klistiani tọn mẹ lẹ to vivẹnudo vẹkuvẹku nado wleawuna “dawe yọyọ” lọ nado sọgan lẹzun mẹhe tin taidi Klisti dogọ. (Kọlọsinu lẹ 3:9-14) Dopodopo mítọn wẹ nọ pannukọn avùnnukundiọsọmẹ voovo lẹ to ehe wiwà mẹ na dopodopo mítọn tin to nukọnyiyi gbigbọmẹ tọn voovo lẹ mẹ. To whenuena e yindọ hiẹ yin mapenọ, hiẹ dona wazọ́n sinsinyẹn nado tindo gbẹtọ-yinyin jijọ-di-Klisti tọn de. Ṣigba ma hẹn todido bu pọ́n gbede to pọndohlan ehe mẹ blo, na e yọnbasi po alọgọ Jiwheyẹwhe tọn po.
20. Aliho tẹlẹ mẹ wẹ hiẹ sọgan hodo apajlẹ Jesu tọn to lizọnyizọn lọ mẹ te?
20 To yanwle gbigbọmẹ towe tọn lẹ mẹ wẹ enẹ heyin apajlẹ ayajẹ Jesu tọn hihodo pẹkipẹki hugan tọn tin te. (Heblu lẹ 12:1-3) E yiwanna lizọnyizọn lọ. Eyin hiẹ tindo lẹblanulọkẹyi lọ nado tindo mahẹ to nuwiwa yẹwhehodidọ Ahọluduta lọ tọn mẹ, to whelọnu lo, ma dike e ni lẹzun onú aṣa tọn de poun blo. Din nado mọ pekọ yí to mẹdevo lẹ pinplọn dogbọn Ahọluduta Jiwheyẹwhe Tọn dali dile Jesu basi do. Yí ayinamẹ he agun lọ wleawuna lẹ do yizan mẹ nado gọalọna we nado hẹn ninọmẹ towe pọnte dogọ taidi mẹplọntọ de. Podọ tindo jide dọ Jehovah sọgan na we nuhudo huhlọn he tọn hiẹ tindo nado zindonukọn to lizọnyizọn towe mẹ.—1 Kọlintinu lẹ 9:19-23.
21. (a) Nawẹ mí wagbọn do yọnẹn dọ Jehovah nọ yọ́n pinpẹn omẹ nugbonọ he yin bibaptizi de tọn? (b) Etẹwẹ dohia dọ baptẹm yin onú titengbe na mí nado lùn whẹdida hinhẹnṣẹ Jiwheyẹwhe tọn tọ́n do titonu ylankan ehe ji?
21 Mẹhe klan ede do wiwe, bo yin bibaptizi de he to vivẹnudo po nugbonọ-yinyin po nado hodo Jesu yin omẹ vonọtaun de hlan Jiwheyẹwhe. Jehovah nọ gbadopọnna ahun gbẹtọvi liva susu lẹpo tọn bosọ nọ yọ́n lehe mẹdopodopo mọnkọtọn lẹ gbọnvo na yede taun do. E nọ lẹnnupọn do yé ji nado yin nuhọakuẹ lẹ, yèdọ ‘nuhe yè tindo ojlo na lẹ.’ (Hagai 2:7) Dọdai Biblu tọn lẹ dohia dọ Jiwheyẹwhe nọ pọ́n omẹ mọnkọtọn lẹ hlan taidi mẹhe yè dohiagona nado lùn whẹdida hinhẹnṣẹ etọn tọ́n he na wá titonu ylankan ehe ji to madẹnmẹ. (Ezekiẹli 9:1-6; Malaki 3:16, 18) Be hiẹ “tin to ninọmẹ he jẹ na ogbẹ̀ madopodo mẹ” ya? (Owalọ lẹ 13:48, NW ) Be ojlo vẹkuvẹku towe wẹ e yin nado yin hiadogona taidi mẹhe to Jiwheyẹwhe sẹ̀n de ya? Klandowiwe po baptẹm po yin apadewhe ohia enẹ tọn, podọ yé yin onú titengbe na lunluntọ́n.
22. Nukundido tẹlẹ wẹ “gbẹtọ susugege” lẹ to nukọn pọnhlan na?
22 To Osìngigọ globu tọn lọ godo, Noa po whẹndo etọn po tọ́n jẹgbonu sọn alki lọ mẹ biọ aigba klọwe de ji. Mọdopolọ to egbehe, “gbẹtọ susugege” he yí oyọnẹn Jiwheyẹwhe tọn zan to gbẹzan yetọn mẹ bosọ duale alọkẹyi Jehovah tọn lẹ tindo nukundido lùnlùn opodo titonu ylankan ehe tọn tọ́n nado duvivi ogbẹ̀ madopodo tọn to aigba he yin kiklọwe kakadoi de ji. (Osọhia 7:9, 14) Nawẹ ninọmẹ ogbẹ̀ tọn na nọ to Paladisi enẹ mẹ?
TẸ́N OYỌNẸN TOWE PỌ́N
Nawẹ Jehovah jlo dọ hiẹ ni yí oyọnẹn etọn towe zan gbọn?
Afọdide tẹlẹ wẹ nọ planmẹ jẹ baptẹm kọ̀n?
Naegbọn baptẹm ma do yin vivọnu ṣigba bẹjẹeji de?
Nawẹ mí sọgan nọgbẹ̀ to gbesisọmẹ hẹ klandowiwe po baptẹm mítọn po gbọn?
[Yẹdide to weda 172]
Be hiẹ ko basi klandowiwe hlan Jiwheyẹwhe to odẹ̀ mẹ ya?
[Yẹdide to weda 174]
Etẹwẹ hẹnalọdotena we ma nado yin bibaptizi?