Nupinplọn 4

Mẹnu Wẹ Lẹgba?

Satani Lẹgba—fie wẹ e wá sọn? (1, 2)

Nawẹ Satani nọ klọ gbẹtọ lẹ gbọn? (3-7)

Naegbọn hiẹ dona nọavunte sọta Lẹgba? (7)

1. Hogbe lọ “lẹgba” zẹẹmẹdo mẹhe nọ dolalo ylankan dogbọn mẹdevo dali. “Satani” zẹẹmẹdo kẹntọ de kavi agọjẹdomẹtọ de. Ehelẹ wẹ yinkọ he yin nina kẹntọgán Jiwheyẹwhe tọn lọ. To tintan whenu, ewọ yin angẹli pipé de to olọn mẹ po Jiwheyẹwhe po. Ṣigba, to nukọnmẹ e lẹn ede titi tọn pọ́n zẹjlẹgo bosọ jlo sinsẹ̀n-bibasi he yin Jiwheyẹwhe tọn gbọn jlọjẹ dali.—Matiu 4:8-10.

2. Angẹli ehe, yèdọ Satani, dọhó na Evi gbọn yizan odàn de tọn dali. Gbọn lalo didona ẹn dali, e hẹn ẹn nado vẹtolina Jiwheyẹwhe. Satani gbọnmọ dali do yangbe nuhe yin yiylọ dọ “nupojipetọ-yinyin” Jiwheyẹwhe tọn, kavi otẹn taidi Gigogan. Satani fọ́n kanbiọ lọ dote dọ eyin vlavo Jiwheyẹwhe to gandu to aliho he jẹ mẹ podọ na ale mẹjidugando Etọn lẹ tọn. Satani sọ fọ́n ayihaawe lẹ dote eyin vlavo gbẹtọvi de na gbọṣi nugbonọ-yinyin hlan Jiwheyẹwhe mẹ. Gbọn ehe wiwà dali, Satani hẹn ede zun kẹntọ Jiwheyẹwhe tọn. Enẹwutu wẹ e wá lẹzun mẹhe yin yiylọ dọ Satani Lẹgba.—Gẹnẹsisi 3:1-5; Job 1:8-11; Osọhia 12:9.

3. Satani tẹnpọn nado doyẹklọ gbẹtọ lẹ biọ sinsẹ̀n-bibasi hlan ẹn mẹ. (2 Kọlintinu lẹ 11:3, 14) Aliho dopo he mẹ e nọ klọ gbẹtọ lẹ te wẹ gbọn sinsẹ̀n lalo gblamẹ. Eyin sinsẹ̀n de nọ plọnmẹ lalo dogbọn Jiwheyẹwhe dali, na nugbo tọn lẹndai Satani tọn wẹ e to azọ́nwa na. (Johanu 8:44) Gbẹtọ he yin hagbẹ sinsẹ̀n lalo tọn lẹ sọgan yise po ahun yetọn lẹpo po dọ yé to sinsẹ̀n-basi hlan Jiwheyẹwhe nugbo lọ. Ṣigba Satani sẹ̀n wẹ yé te na nugbo tọn. Ewọ wẹ ‘yẹwhe aihọn ehe tọn.’—2 Kọlintinu lẹ 4:4.

4. Afinyọnnọnuwiwa yin aliho devo he Satani do nọ hẹn gbẹtọ lẹ wá huhlọn etọn glọ. Yé sọgan ylọ gbigbọ lẹ nado basi hihọ́ na yé, nado gbleawuna mẹdevo lẹ, nado dọ nuhe na jọ to sọgodo, kavi nado wà azọ́njiawu lẹ. Satani wẹ huhlọn ylankan lọ he tin to godo na walọ mọnkọtọn lẹpo. Nado hẹn homẹ Jiwheyẹwhe tọn hun, mí dona dapana afinyọnnọnuwiwa mlẹnmlẹn.—Deutelonomi 18:10-12; Owalọ lẹ 19:18, 19.

5. Satani sọ nọ klọ gbẹtọ lẹ gbọn goyiyi akọ̀ tọn po sinsẹ̀n-bibasi hlan titobasinanu tonudidọ tọn lẹ po dali. Mẹdelẹ nọ lẹn dọ akọta kavi akọ̀ yetọn pọnte hugan devo lẹ. Ṣigba ehe ma yin nugbo gba. (Owalọ lẹ 10:34, 35) Mẹdevo lẹ nọ ganjẹ titobasinanu tonudidọ tọn lẹ go nado didẹ nuhahun gbẹtọvi tọn lẹ. Gbọn ehe bibasi dali, yé to Ahọluduta Jiwheyẹwhe Tọn gbẹdai. Ewu wẹ pọngbọ dopo kẹdẹ lọ na nuhahun mítọn lẹ.—Daniẹli 2:44.

6. Aliho devo he mẹ Satani nọ klọ gbẹtọ lẹ te wẹ gbọn whiwhle yé pọ́n po ojlo ylando tọn lẹ po. Jehovah dọna mí nado dapana walọ ylando tọn lẹ na e yọnẹn dọ yé na gbleawu na mí wutu wẹ. (Galatianu lẹ 6:7, 8) Mẹdelẹ sọgan jlo dọ hiẹ ni kọnawudopọ hẹ yé to walọ mọnkọtọn lẹ mẹ. Nalete, flindọ, Satani wẹ jlo dọ hiẹ ni wà onú ehelẹ nugbonugbo.—1 Kọlintinu lẹ 6:9, 10; 15:33.

7. Satani sọgan yí homẹkẹn kavi nukundiọsọmẹ zan nado hẹn we gbẹ́ Jehovah dai. Delẹ to mẹyiwanna towe lẹ mẹ sọgan gblehomẹ taun na hiẹ to Biblu plọn wutu. Mẹdevo lẹ sọgan ṣan we kò. Ṣigba mẹnu wẹ hiẹ duahọ ogbẹ̀ towe tọn do? Satani jlo na dobuna we na hiẹ nido doalọtena nupinplọn dogbọn Jehovah dali. Ma dike Satani ni gbawhàn blo! (Matiu 10:34-39; 1 Pita 5:8, 9) Gbọn ninọavunte sọta Lẹgba dali, hiẹ sọgan hẹn homẹ Jehovah tọn hun bo dohia dọ hiẹ to nupojipetọ-yinyin Etọn ze daga.—Howhinwhẹn lẹ 27:11.

[Yẹdide lẹ to weda 9]

Sinsẹ̀n lalo, afinyọnnọnuwiwa, po owanyi akọta mẹtọn tọn po nọ klọ gbẹtọ lẹ

[Yẹdide to weda 9]

Nọavunte sọta Satani gbọn zinzindonukọn nado plọnnu dogbọn Jehovah dali