Nupinplọn 10

Walọyizan He Jiwheyẹwhe Gbẹwanna Lẹ

Etẹwẹ dona yin numọtolanmẹ towe gando nuhe Jiwheyẹwhe dọ dọ e ylan lẹ go? (1)

Wunmẹ walọ zanhẹmẹ tọn tẹlẹ wẹ ylan? (2)

Nukun tẹwẹ Klistiani de dona yí do pọ́n lalodido? (3) akọhiho? (3) ajojijẹ? (3) danuwiwa? (4) afinyọnnọnuwiwa? (5) ahannumu? (6)

Nawẹ mẹde sọgan tunkanna ede sọn walọ ylankan lẹ si gbọn? (7)

1. Devizọnwatọ Jiwheyẹwhe tọn lẹ yiwanna nuhe yọ́n. Ṣigba yé sọ dona plọn nado gbẹwanna nuhe ylan ga. (Psalm 97:10) Enẹ zẹẹmẹdo didapana walọ delẹ he Jiwheyẹwhe gbẹwanna. Etẹwẹ yin delẹ to walọ enẹlẹ mẹ?

2. Ogalilọ: Zanhẹmẹ jẹnukọnna alọwle, ayọdide, zanhẹmẹ gbẹtọ po kanlin po tọn, hẹnnumẹ dedidọ, podọ zanhẹmẹ sunnu po sunnu po tọn yin ylando sinsinyẹn lẹ jẹagọdo Jiwheyẹwhe go. (Levitiku 18:6; Lomunu lẹ 1:26, 27; 1 Kọlintinu lẹ 6:9, 10) Eyin asu po asi po de ma wlealọ ṣigba nọ nọ pọ, yé dona klan kavi wlealọ sọgbe hẹ osẹ́n.—Heblu lẹ 13:4.

3. Lalodido, Akọhiho, Ajojijẹ: Jehovah Jiwheyẹwhe ma sọgan do lalo gba. (Titu 1:2) Mẹhe jlo nukundagbe etọn lẹ dona dapana lalodido. (Howhinwhẹn lẹ 6:16-19; Kọlọsinu lẹ 3:9, 10) Wunmẹ akọhiho tọn lẹpo yin hinhẹn kudiho gbọn nukunkẹn dali. Enẹwutu Klistiani lẹ ma nọ tindo mahẹ to wunmẹ akọhiho tọn depope mẹ, taidi loteli lẹ, agbàwhinwhlẹn osọ́ tọn, po bingo po. (Efesunu lẹ 5:3-5) Podọ Klistiani lẹ ma nọ jajo gba. Yé ma nọ yọnẹn do họ̀ nuhe yin finfin lẹ kavi ze onú mẹtọn lẹ ma biọgbè.—Eksọdusi 20:15; Efesunu lẹ 4:28.

4. Homẹgble, Danuwiwa: Homẹgble he yé ma dava sọgan planmẹ jẹ walọ danuwiwa tọn kọ̀n. (Gẹnẹsisi 4:5-8) Gbẹtọ danuwatọ de ma sọgan yin họntọn Jiwheyẹwhe tọn gba. (Psalm 11:5; Howhinwhẹn lẹ 22:24, 25) E ma sọgbe nado yiahọsu kavi yí oylan do suahọ onú ylankan he mẹdevo lẹ sọgan ko wà na mí tọn.—Howhinwhẹn lẹ 24:29; Lomunu lẹ 12:17-21.

5. Bogbè Sisà po Afinyọnnọnuwiwa po: Mẹdelẹ nọ vẹvẹna huhlọn gbigbọ lẹ tọn nado tẹnpọn bo hẹnazọngbọ. Mẹdevo lẹ nọ sà bogbè do kẹntọ yetọn lẹ nado hẹn yé jẹazọ̀n kavi nado hù yé. Huhlọn he tin to godo na walọ ehelẹ po wẹ Satani. Enẹwutu Klistiani lẹ ma dona tindo mahẹ depope to yé mẹ. (Deutelonomi 18:9-13) Dindọnsẹpọ Jehovah wẹ yin hihọ́-basinamẹ he yọ́n hugan lọ sọn bogbè he sọgan yin sisa do mí gbọn mẹdevo lẹ dali si.—Howhinwhẹn lẹ 18:10.

6. Ahannumu: E ma ylan nado nù vẹẹn, bia, kavi ahàn sinsinyẹn devo depope pẹẹde. (Psalm 104:15; 1 Timoti 5:23) Ṣigba ahàn nùnù zẹjlẹgo kavi ahannumu yin nuhe ma sọgbe to nukun Jiwheyẹwhe tọn mẹ. (1 Kọlintinu lẹ 5:11-13; 1 Timoti 3:8) Ahàn nùnù zẹjlẹgo sọgan hẹn agbasalilo towe gble bo gbà whẹndo towe kija. E sọ sọgan hẹn we joawuna whlepọn devo lẹ po awubibọ po.—Howhinwhẹn lẹ 23:20, 21, 29-35.

7. Mẹhe nọ wà nuhe Jiwheyẹwhe dọ dọ e ylan lẹ ma to “ogú ahọludu Jiwheyẹwhe tọn na du.” (Galatianu lẹ 5:19-21) Eyin hiẹ yiwanna Jiwheyẹwhe nugbonugbo bo jlo na hẹn homẹ etọn hùn, hiẹ sọgan tunkanna dewe sọn walọ ehelẹ si. (1 Johanu 5:3) Plọn nado gbẹwanna nuhe Jiwheyẹwhe dọ dọ e ylan. (Lomunu lẹ 12:9) Dogbẹ́ hẹ gbẹtọ he tindo walọ jijọ-di-Jiwheyẹwhe tọn lẹ. (Howhinwhẹn lẹ 13:20) Gbẹdido hẹ Klistiani he whèwhín lẹ sọgan sọawuhia nado yin asisa alọgọ tọn de. (Jakobu 5:14) To popolẹpo mẹ, ganjẹ alọgọ Jiwheyẹwhe tọn go gbọn odẹ̀ dali.—Filippinu lẹ 4:6, 7, 13.

[Yẹdide lẹ to weda 20, 21]

Jiwheyẹwhe gbẹwanna ahannumu, ajojijẹ, akọhiho, po walọyizan danuwiwa tọn lẹ po