Nupinplọn 11

Nuyise po Aṣa He Jiwheyẹwhe Gbẹwanna lẹ Po

Nuyise po aṣa alọpa tẹlẹ po wẹ ma sọgbe? (1)

Be Klistiani lẹ dona yise dọ Jiwheyẹwhe yin Atọ̀n-to-dopomẹ de ya? (2)

Etẹwutu Klistiani nugbo lẹ ma do nọ payi hùnwhẹ Noẹli, Paaki, po jijizan tọn lẹ po go? (3, 4)

Be oṣiọ lẹ sọgan gbleawuna mẹhe tin to ogbẹ̀ lẹ ya? (5)

Be Jesu kú do satin ji ya? (6)

Nawẹ e yin onú titengbe sọ nado hẹn homẹ Jiwheyẹwhe tọn hùn? (7)

1. E ma yin nuyise po aṣa lẹpo po wẹ ylan gba. Ṣigba Jiwheyẹwhe ma nọ kẹalọyi yé gba eyin yé wá sọn sinsẹ̀n lalo mẹ kavi jẹagọdo nuplọnmẹ Biblu tọn lẹ.—Matiu 15:6.

2. Atọ̀n-to-dopomẹ: Be Jehovah yin Atọ̀n-to-dopomẹ—gbẹtọ atọ̀n to Jiwheyẹwhe dopo mẹ de wẹ ya? Lala! Jehovah, Otọ́ lọ, yin ‘Jiwheyẹwhe nugbo dopo akàn lọ.’ (Johanu 17:3; Malku 12:29) Jesu wẹ yin Visunnu plọnji Etọn, podọ e tin to taliai mẹ na Jiwheyẹwhe. (1 Kọlintinu lẹ 11:3) Otọ́ lọ klo hugan Visunnu lọ. (Johanu 14:28) Gbigbọ wiwe ma yin gbẹtọ de gba; huhlọn yido wazọ́n Jiwheyẹwhe tọn wẹ e yin.—Gẹnẹsisi 1:2; Owalọ lẹ 2:18.

3. Noẹli po Paaki po: Jesu ma yin jiji to 25 décembre gba. E yin jiji to nudi 1^er octobre, ojlẹ owhe tọn de whenuena lẹngbọhọtọ lẹ nọ dè lẹngbọpa yetọn lẹ dote to zanmẹ. (Luku 2:8-12) Jesu ma degbena Klistiani lẹ nado basi hùnwhẹ jijizan etọn tọn gbede gba. Kakatimọ, e dọna devi etọn lẹ nado nọ basi hùnwhẹ oflin tọn, kavi flin, okú etọn. (Luku 22:19, 20) Noẹli po aṣa etọn lẹ po wá sọn sinsẹ̀n lalo hohowhenu tọn lẹ mẹ. Onú dopolọ yin nugbo gando aṣa Paaki tọn lẹ go, onú taidi yizan azìn po azui po tọn lẹ. Klistiani fliflimẹ tọn lẹ ma basi hùnwhẹ Noẹli kavi Paaki tọn gba, mọwẹ Klistiani nugbo lẹ lọsu to egbehe.

4. Jijizan lẹ: Hùnwhẹ jijizan tọn awe he Biblu dọhó etọn lẹ yin bibasi gbọn mẹhe ma nọ basi-sinsẹ̀n hlan Jehovah lẹ dali. (Gẹnẹsisi 40:20-22; Malku 6:21, 22, 24-27) Klistiani fliflimẹ tọn lẹ ma basi hùnwhẹ jijizan tọn lẹ gba. Aṣa jijizan lẹ bibasi tọn wá sọn sinsẹ̀n lalo hohowhenu tọn lẹ mẹ. Klistiani nugbo lẹ nọ namẹ nunina lẹ podọ nọ deayidai dopọ to ojlẹ owhe lọ tọn devo lẹ whenu.

5. Obu Oṣiọ lẹ tọn: Oṣiọ lẹ ma sọgan wà onú depope kavi tindo numọtolanmẹ depope gba. Mí ma sọgan gọalọna yé, podọ yé ma sọgan gbleawuna mí gba. (Psalm 146:4; Yẹwhehodọtọ 9:5, 10) Alindọn nọ kú; e ma nọ nọgbẹ̀ zọnmii to okú godo gba. (Ezekiẹli 18:4) Ṣigba to whedelẹnu angẹli ylankan lẹ, he yè nọ ylọ dọ aovi lẹ, nọ doyẹklọmẹ nado yin gbigbọ oṣiọ lẹ tọn. Aṣa depope he tindo onú nado wà po obu kavi sinsẹ̀n-bibasi oṣiọ lẹ tọn po ma sọgbe gba.—Isaia 8:19.

6. Satin: Jesu ma kú to satin de ji gba. E kú to pòtin, kavi atin jijlọ de ji. Hogbe Glẹki tọn he yin lilẹdogbedevomẹ do “satin” to Biblu susu mẹ zẹẹmẹdo pòtin dopo de poun. Yẹhiadonu satin tọn wá sọn sinsẹ̀n lalo hohowhenu tọn lẹ mẹ. Satin ma yin yiyizan kavi yin sinsẹ̀n-basina gbọn Klistiani fliflimẹ tọn lẹ dali gba. Enẹwutu, be hiẹ lẹndọ e na sọgbe nado yí satin de zan to sinsẹ̀n-bibasi mẹ ya?—Deutelonomi 7:26; 1 Kọlintinu lẹ 10:14.

7. E sọgan yin nuhe vẹawu taun nado gbẹ́ delẹ to nuyise po aṣa ehelẹ po mẹ dai. Hẹnnumẹ lẹ po họntọn lẹ po sọgan tẹnpọn nado hẹn we tindo nujikudo ma nado diọ nuyise towe lẹ. Ṣigba nado hẹn homẹ Jiwheyẹwhe tọn hùn yin onú titengbe hugan homẹ gbẹtọ lẹ tọn hinhẹn hùn.—Howhinwhẹn lẹ 29:25; Matiu 10:36, 37.

[Yẹdide to weda 22]

Jiwheyẹwhe ma yin Atọ̀n-to-dopomẹ de gba

[Yẹdide to weda 23]

Noẹli po Paaki po wá sọn sinsẹ̀n lalo hohowhenu tọn lẹ mẹ

[Yẹdide to weda 23]

Whẹwhinwhẹn depope matin nado basi-sinsẹ̀n hlan oṣiọ lẹ kavi dibusi yé gba