Nupinplọn 14
Lehe Kunnudetọ Jehovah Tọn lẹ Yin Tito-Basina Do
Whetẹnu wẹ whenuho egbezangbe Kunnudetọ Jehovah Tọn lẹ tọn bẹjẹeji? (1)
Nawẹ opli Kunnudetọ Jehovah Tọn lẹ tọn nọ yin anadena gbọn? (2)
Nawẹ akuẹzinzan lẹ nọ yin nukunpedego gbọn? (3)
Mẹnu wẹ nọ deanana onú lẹ to agun dopodopo mẹ? (4)
Opli daho tẹlẹ wẹ nọ yin bibasi to owhe dopodopo mẹ? (5)
Azọ́n tẹwẹ nọ yin wiwà to tatọ-tẹnnọ po alahọ yetọn lẹ po mẹ? (6)
1. Whenuho egbezangbe Kunnudetọ Jehovah Tọn lẹ tọn bẹjẹeji sọn owhe 1870 lẹ mẹ. To tintan whenu, yé yin yiylọ dọ Nuplọntọ Biblu tọn lẹ. Ṣigba to 1931 yé kẹalọyi yinkọ he sinai do Owe wiwe lẹ ji lọ heyin Kunnudetọ Jehovah Tọn lẹ. (Isaia 43:10) Sọn bẹjẹeji vude lẹ titobasinanu lọ jideji jẹ Kunnudetọ livi lẹ, he hẹn alọnu yetọn ján to yẹwhehodidọ to nuhugan aigba 230 lẹ ji.
2. Suhugan agun Kunnudetọ Jehovah Tọn lẹ tọn nọ tindo opli whla atọ̀n to osẹ dopodopo mẹ. Hiẹ yin oylọ-basina nado yì depope to ehelẹ mẹ. (Heblu lẹ 10:24, 25) Biblu wẹ yin dodonu lọ na nuhe nọ yin pinplọnmẹ lẹ. Opli lẹ nọ bẹjẹeji bo nọ yin tadona po odẹ̀ po. “Ohàn gbigbọnọ” sọn ahun mẹ wá lẹ nọ yin jiji to suhugan opli lẹ tọn ji. (Efesunu lẹ 5:18, 19) Họmẹbibiọ yin vọnu, podọ yè ma nọ biọmẹ akuẹ gba.—Matiu 10:8.
3. Suhugan agun lẹ tọn nọ basi opli lẹ to Plitẹnhọ Ahọluduta Tọn de mẹ. Ehelẹ nọ yin ohọ̀ paa de he yin gbigbá gbọn Kunnudetọ mẹdezejotọ́ lẹ dali. Hiẹ ma na mọ yẹdide lẹ, satin lẹ, kavi onú mọnkọtọn lẹ depope to Plitẹnhọ Ahọluduta Tọn mẹ gba. Akuẹzinzan lẹ nọ yin súsú gbọn nunina sọn ojlo mẹ wá lẹ dali. Na mẹhe jlo na basi nunina lẹ, apotin nunina tọn de tin.—2 Kọlintinu lẹ 9:7.
4. To agun dopodopo mẹ, mẹho lẹ, kavi nugopọntọ lẹ tin. Yé nọ yin nukọntọ to mẹpinplọn to agun lọ mẹ. (1 Timoti 3:1-7; 5:17) Yé nọ yin alọgọna gbọn devizọnwatọ lizọnyizọnwiwa tọn lẹ dali. (1 Timoti 3:8-10, 12, 13) Sunnu ehelẹ ma yin zize daga do mẹhe pò to agun lọ mẹ lẹ ji gba. (2 Kọlintinu lẹ 1:24) Yé ma yin nina tẹnmẹ-yinkọ vonọtaun lẹ gba. (Matiu 23:8-10) Yé ma nọ sọnú to aliho he gbọnvona mẹdevo lẹ tọn mẹ gba. Mọ yé ma nọ yin ahọsuna na azọ́n yetọn gba. Mẹho lẹ nọ penukundo nuhudo gbigbọmẹ agun lọ tọn lẹ go po ojlo po. Yé sọgan wleawuna homẹmimiọn po anademẹ po to ojlẹ tukla tọn lẹ mẹ.—Jakobu 5:14-16; 1 Pita 5:2, 3.
5. Kunnudetọ Jehovah Tọn lẹ sọ nọ basi plidopọ lẹ kavi plidopọ daho lẹ to owhe dopodopo mẹ. To ojlẹ ehelẹ whenu agun susu lẹ nọ plidopọ na tito-to-whinnu nupinplọn Biblu tọn vonọtaun de. Baptẹm devi yọyọ lẹ tọn yin ada gbesisọmẹ tọn tito-to-whinnu plidopọ kavi plidopọ daho dopodopo tọn.—Matiu 3:13-17; 28:19, 20.
6. Tatọ-tẹnnọ aihọn tọn heyin Kunnudetọ Jehovah Tọn lẹ tọn tin to New York. Hagbẹ Anademẹtọ lọ tin to finẹ, pipli mẹho numimọnọ lẹ tọn he nọ penukundo agun lẹdo aihọn pe lọ go. Hugan wekantẹn alahọ tọn 100 lẹ wẹ tin lẹdo aihọn pe. To nọtẹn ehelẹ mẹ, mẹdezejotọ́ lẹ nọ gọalọ nado zin owe Biblu tọn lẹ jẹgbonu bo yí yé dohlan. Anademẹ sọ nọ yin nina nado basi-tito na azọ́n yẹwhehodidọ tọn lọ. Naegbọn hiẹ ma na do basi tito dlapọn de tọn sọyì wekantẹn alahọ tọn he sẹpọ we mẹ?