Titobasinanu po Azọ́n Lẹdo Aihọn Pé Yetọn Po
ALIHO susu wẹ tin he nọ yin yiyizan nado deanana azọ́n kunnudide tọn to aigba hugan 230 lẹ ji fie e nọ yin bibasi te. Anademẹ daho hugan lẹ nọ wá sọn Hagbẹ Anademẹtọ lọ dè to tatọ-tẹnnọ aihọn tọn he tin to Brooklyn, New York lọ mẹ. Hagbẹ Anademẹtọ lọ nọ do afọzedaitọ lẹ hlan awà voovo lẹ ji lẹdo aihọn pé to owhe dopodopo mẹ nado na nudọnamẹ afọzedaitọ alahọ tọn he tin to awà enẹlẹ ji. To wekantẹn alahọ tọn lẹ mẹ, Wedegbẹ́ Alahọ tọn lẹ nọ tin he nọ bẹ nudi hagbẹ atọ̀n jẹ ṣinawe hẹn nado penukundo azọ́n lọ go to aigba he tin to nukunpedomẹgo yetọn glọ lẹ ji. Delẹ to alahọ lọ lẹ mẹ nọ tindo azọ́nwanu lẹ na wezinzin, delẹ nọ yí zòmọ wezinzin tọn he nọ yawu tlala lẹ zan. Otò kavi awà he nọ yin nukunpedego gbọn alahọ dopodopo dali lẹ yin mimá do agbegbe lẹ mẹ, podọ agbegbe lọ lẹ, lọsu nọ yin mimá do lẹdo lẹ mẹ. Lẹdo dopodopo nọ tindo nudi agun 20 to e mẹ. Nugopọntọ agbegbe tọn de nọ dlá lẹdo he tin to agbegbe etọn mẹ lẹ pọ́n to aliho debọdo-dego tọn mẹ. Plidopọ awe nọ yin bibasi to whemẹwhemẹ na lẹdo dopodopo. Nugopọntọ lẹdo tọn sọ tin ga, podọ e nọ saba basi dlapọn whlaawe to owhe dopo mẹ na dopodopo agun he tin to lẹdo etọn mẹ lẹ, bo nọ to alọgọna Kunnudetọ lẹ nado basi tito na azọ́n yẹwhehodidọ lọ tọn podọ nado wà ẹ to aigba-denamẹ he yin dide na agun enẹ lọ ji.
Agun he tin to lẹdo lọ mẹ po Plitẹnhọ Ahọluduta he e nọ yizan po wẹ yin ahọ́nkan wẹndagbe lọ lilá tọn to lẹdo towe mẹ. Otò he tin to agun dopodopo glọ lẹ nọ yin mimá do aigba-denamẹ kleunkleun lẹ mẹ. Ehelẹ nọ yin dide na Kunnudetọ dopodopo he nọ dovivẹnu nado basi dlapọn bo dọho hẹ gbẹtọ lẹ to owhé dopodopo he tin to e ji lẹ gbè. Agun dopodopo, he nọ bẹ sọha Kunnudetọ vude jẹ 200 hẹn lẹ, nọ tindo mẹho heyin dide lẹ nado penukundo azọngban voovo lẹ go. Lilátọ wẹndagbe lọ tọn dopodopo wẹ yin nujọnu to titobasinanu Kunnudetọ Jehovah tọn lẹ tọn mẹ. Dopodopo Kunnudetọ lẹ tọn, vlavo yé to sinsẹ̀nzọnwà to tatọ-tẹnnọ aihọn tọn, alahọ lẹ, kavi to agun lẹ mẹ, nọ wà azọ́n kunnudide tọn ehe nado dọna mẹdevo lẹ dogbọn Ahọluduta Jiwheyẹwhe tọn dali.
To godo mẹ linlin nuwiwa ehe tọn lẹ nọ wá tatọ-tẹnnọ aihọn tọn lọ mẹ, bọ Annuaire whemẹwhemẹ tọn de nọ yin awuwlena bo nọ yin zinzinjẹgbonu. Mọdopolọ, apotin de nọ yin zinzinjẹgbonu to owhe dopodopo mẹ do zinjẹgbonu Atọ̀họ̀-Nuhihọ́ Lọ Tọn 1er janvier tọn mẹ. Owe awe ehelẹ nọ namẹ linlin gigọ́ gando wadotana owhe dopodopo mẹ tọn go to kunnudide na Jehovah po Ahọluduta etọn to Jesu Klisti glọ po mẹ. To owhe agọe tọn lẹ mẹ nudi Kunnudetọ 14 000 000 po jlodotọ lẹ po wẹ ko yì Oflin okú Jesu tọn to whemẹwhemẹ. Kunnudetọ Jehovah tọn lẹ yí nuhe hugan ganhiho 1 000 000 000 zan to owhe dopo mẹ to wẹndagbe lọ lilá mẹ, podọ hugan mẹyọyọ 300 000 wẹ yin bibaptizi. Lẹndopọ owe heyin didogbonu lẹ tọn yiaga biọ vọkan livi donu kanweko lẹ mẹ.