Nupinplọn 16

Dide Towe Nado Sẹ̀n Jiwheyẹwhe

Etẹwẹ hiẹ sọgan wà nado lẹzun họntọn Jiwheyẹwhe tọn de? (1, 2)

Nawẹ hiẹ na basi klandowiwe towe hlan Jiwheyẹwhe gbọn? (1)

Whetẹnu wẹ hiẹ dona yin bibaptizi? (2)

Nawẹ hiẹ sọgan mọ huhlọn yí nado gbọṣi nugbonọ-yinyin hlan Jiwheyẹwhe mẹ gbọn? (3)

1. Nado sọgan lẹzun họntọn Jiwheyẹwhe tọn, hiẹ dona tindo oyọnẹn dagbe nugbo Biblu tọn (1 Timoti 2:3, 4), tindo yise to onú he hiẹ ko plọn lẹ mẹ (Heblu lẹ 11:6), lẹnvọjọ sọn ylando towe lẹ mẹ (Owalọ lẹ 17:30, 31), podọ diọ aliho gbẹzan towe tọn. (Owalọ lẹ 3:19) Enẹgodo owanyi towe na Jiwheyẹwhe dona whàn we nado klan dewe do wiwe hlan ẹn. Ehe zẹẹmẹdo dọ to odẹ̀ mẹdetiti tọn, nuglọ tọn de mẹ hiẹ na dọna ẹn dọ hiẹ to dewe ze jo na ẹn nado wà ojlo etọn.—Malku 8:34; Lomunu lẹ 12:1.

2. To whenuena hiẹ ko plọn Ohó Jiwheyẹwhe Tọn jẹ obá dewe kinklandowiwe hlan Jiwheyẹwhe tọn mẹ godo, hiẹ dona yin bibaptizi. (Matiu 28:19, 20) Baptẹm nọ dike mẹlẹpo ni yọnẹn dọ hiẹ ko klan dewe do wiwe hlan Jehovah. Enẹwutu baptẹm tin na kiki mẹhe ko whẹn jẹ obá he mẹ yè sọgan basi dide nado sẹ̀n Jiwheyẹwhe lẹ te mẹ. To whenuena mẹde yin bibaptizi, agbasa etọn pete dona yin yinylọ́n do sinmẹ na ojlẹ de.a—Malku 1:9, 10; Owalọ lẹ 8:36.

3. To whenuena hiẹ ko basi klandowiwe de godo, Jehovah na to nukundo dọ hiẹ ni nọgbẹ sọgbe hẹ opagbe towe. (Psalm 50:14; Yẹwhehodọtọ 5:4, 5) Lẹgba na tẹnpọn nado doalọtena we sọn Jehovah sinsẹ̀n mẹ. (1 Pita 5:8) Ṣigba dọnsẹpọ Jiwheyẹwhe to odẹ̀ mẹ. (Filippinu lẹ 4:6, 7) Plọn Ohó etọn egbesọegbesọ. (Psalm 1:1-3) Tẹdo agun lọ go gligli. (Heblu lẹ 13:17) Gbọn onú ehe lẹpo wiwà dali, hiẹ na mọ huhlọn yí nado gbọṣi nugbonọ-yinyin mẹ hlan Jiwheyẹwhe. Gbọnmọ dali hiẹ na sọgan wà nuhe Jiwheyẹwhe biọ to asi we lẹ kakadoidoi!

[Nudọnamẹ odò tọn]