Owe de Na We Ya?

“To owe susu pinplọn mẹ, opodo matin,” wẹ Sọlọmọni dọ to nudi owhe 3 000 delẹ die wayi. (Yẹwhehodọtọ 12:12) Ayidonugo enẹ sọgbe to egbehe hugan gbede pọ́n. To yidogọna owe yọn-na-yizan nukundeji tọn lẹ, fọtọ́n susu owe yọyọ lẹ tọn nọ yin zinzinjẹgbonu to whemẹwhemẹ. To owe susu he mẹ yè sọgan ṣinyan sọn helẹ, naegbọn hiẹ dona hia Biblu?

SUHUGAN gbẹtọ lẹ tọn nọ hia owe lẹ vlavo nado deayidai kavi nado mọ nudọnamẹ lẹ yí, kavi vlavo na whẹwhinwhẹ́n awe lẹ. Onú dopolọ sọgan yin nugbo gando Biblu hihia go. E sọgan hẹn ninọmẹ mẹtọn pọnte, etlẹ yin wehihia ayidedai tọn. Ṣigba nuhe Biblu yin hugan enẹ. Asisa dopo akàn oyọnẹn tọn wẹ e yin.—Yẹwhehodọtọ 12:9, 10.

Biblu na gblọndo kanbiọ he gbẹtọ lẹ ko lẹnnupọn deji na whenu dindẹn lẹ die—kanbiọ lẹ dogbọn ojlẹ he wayi mítọn, ojlẹ dintọn mítọn, po sọgodo mítọn po dali. Mẹsusu nọ kanse dọmọ: Fie wẹ mí wá sọn? Etẹwẹ yin lẹndai ogbẹ̀ tọn? Nawẹ mí sọgan mọ ayajẹ to gbẹ̀mẹ gbọn? Be ogbẹ̀ na tin to aigba ji kakadoi ya? Etẹwẹ sọgodo tindo to sẹdotẹnmẹ na mí?

Bẹplidopọ huhlọn kunnudenu heyin zizedonukọnnamẹ tofi lẹpo dohia hezeheze dọ Biblu sọgbe bosọ yin nugbo. Mí ko gbadopọnna lehe ayinamẹ yọn-na-yizan etọn sọgan gọalọna mí nado zan gbẹzan he tindo zẹẹmẹ podọ gbẹzan ayajẹ tọn to egbehe do. To whenuena e yindọ gblọndo etọn lẹ dogbọn ojlẹ ehe dali yin pekọhẹnwanamẹnu, po jide po gblọndo etọn lẹ dogbọn ojlẹ he wayi dali po dọdai etọn lẹ po dogbọn sọgodo dali jẹ na ayidonugo sọwhiwhe tọn.

Lehe Yè Sọgan Mọ Alè Susu Hugan Yí Gbọn

Suhugan gbẹtọ lẹ tọn ko jẹ Biblu hia ji ṣigba doalọte to whenuena yé mọ dọ adà etọn delẹ vẹawu nado yin nukunnumọjẹemẹ. Eyin enẹ ko yin numimọ towe, onú delẹ tin he sọgan gọalọ.

Dè lẹdogbedevomẹ to ogbè egbezangbe tọn mẹ he go yè sọgan ganjẹ de, taidi Les Saintes Écritures—Traduction du monde nouveau.a Mẹdelẹ nọ bẹjẹeji gbọn hihia kandai Wẹndagbe gbẹzan Jesu tọn lẹ po, mẹhe nuplọnmẹ nuyọnẹnnọ etọn lẹ, taidi dehe yin mimọ to Yẹwhehodidọ Osó ji tọn mẹ lẹ, do oyọnẹn dodonu gbẹtọ tọn hia bo basi todohukanji lehe mí sọgan hẹn gbẹzan mítọn pọnte to gbẹ̀mẹ.—Pọ́n Matiu weta 5 jẹ 7.

To yidogọna Biblu hihia, hogo lẹ pinplọn to aliho debọdo-dego tọn mẹ sọgan gọna oplọn. Ehe bẹ dogbapọnna nuhe Biblu dọ do hogo tangan de ji hẹn. E sọgan paṣawe nado plọn nuhe Biblu dọ na taun tọn dogbọn hogo mọnkọtọn lẹ taidi alindọn, olọn, aigba, ogbẹ̀, po okú po dali, gọna Ahọluduta Jiwheyẹwhe Tọn—nuhe e yin po wadotana he e na basi po.b Kunnudetọ Jehovah Tọn lẹ tindo tito-to-whinnu de na hogo Biblu tọn lẹ pinplọn debọdo-dego, ehe nọ yin ninamẹ vọnu. Hiẹ sọgan dindona gbọn wekinkan hlan zinjẹgbonutọ lẹ dali, to yiyi adlẹsi he sọgbe heyin titodohukanji to weda 2 lọ zan.

To dogbapọnna kunnudenu lọ po godo, mẹsusu ko dotana dọ Biblu wá sọn Jiwheyẹwhe dè, mẹhe Owe wiwe lẹ dohia taidi “Jehovah.” (Psalm 83:18) Hiẹ sọgan gọn mayin dududeji dọ Biblu yin sọn olọn mẹ wá. Ṣigba naegbọn hiẹ ma nado gbadopọnna ẹn na dewe? Mí deji dọ to aliho nuwiwa debọdo-dego heyin nupinplọn, ayihamẹlẹnpọn, podọ vlavo tintindo numimọ nuhọakuẹ yọn-na-yizan nuyọnẹn magbọvọ etọn tọn lẹ na dewe po godo, hiẹ na wá tindo numọtolanmẹ dọ Biblu na nugbo tọn yin owe de na gbẹtọ lẹpo, podọ hugan mọ—owe de na we.

[Nudọnamẹ odò tọn lẹ]