Lehe Hiẹ Sọgan Plọnnu Dogbọn Jiwheyẹwhe Dali Do

Gbọn Biblu hihia dali wẹ hiẹ sọgan plọnnu dogbọn Jehovah dali. Jiwheyẹwhe ko ṣinyán gbẹtọvi tangan delẹ sọn whenu dindẹn die nado kàn linlẹn etọn lẹ dai. Kandai enẹlẹ yin yiylọdọ Biblu. Gbọn Biblu hihia dali to egbehe mí nọ plọnnu dogbọn Jiwheyẹwhe dali. Na Biblu bẹ ohó, kavi wẹndomẹ Jehovah tọn hẹn wutu, e sọ nọ yin yiylọdọ Ohó Jiwheyẹwhe tọn. Mí sọgan yí nuhe Biblu dọ lẹ sè na Jehovah ma nọ dolalo pọ́n gbede. “E gló Jiwheyẹwhe nado dolalo.” (Heblu lẹ 6:18) Ohó Jiwheyẹwhe tọn bẹ nugbo lọ hẹn.—Johanu 17:17.

Biblu yin dopo to nunina họakuẹ hugan he Jiwheyẹwhe na mí lẹ mẹ. E taidi wekanhlanmẹ de sọn otọ́ owanyinọ de dè hlan ovi etọn lẹ. E dọna mí dogbọn opagbe Jiwheyẹwhe tọn dali nado diọ aigba zun nọtẹn jiawu de nado nọ̀—yèdọ paladisi. E dọ nuhe ewọ ko wà wayi lẹ na mí, nuhe e to wiwà todin, podọ nuhe e na wà to sọgodo na ovi nugbonọ etọn lẹ. E sọ nọ gọalọna mí nado didẹ nuhahun mítọn lẹ podọ nado mọ ayajẹ.—2 Timoti 3:16, 17.

Kunnudetọ Jehovah Tọn lẹ tọn lẹ yin họntọn Jiwheyẹwhe tọn; yé na gọalọna we nado yọ́n nuhe Biblu nọ plọnmẹ lẹ. Saa dọna yé poun dọ hiẹ jlo na plọn Biblu. Yé ma nọ biọ akuẹ na ehe gba. (Matiu 10:8) Dogọ, hiẹ sọgan yì opli Klistiani tọn lẹ. Ehelẹ nọ yin bibasi to nọtẹn sinsẹ̀n-basi tọn he nọ yin yiylọdọ Plitẹnhọ Ahọluduta tọn lẹ mẹ. Eyin hiẹ nọ yì opli Klistiani tọn lẹ, hiẹ na whẹ́n po awuyiya po to oyọnẹn Jiwheyẹwhe tọn towe mẹ.

Hiẹ sọgan plọnnu dogbọn Jiwheyẹwhe dali sọn nuhe e ko basi lẹ mẹ. Di apajlẹ, Biblu dọmọ: “Jiwheyẹwhe dá olọn po aihọn po.” (Gẹnẹsisi 1:1) To whenuena Jehovah dá “olọn,” e basi owhè. Todin etẹwẹ enẹ dọna mí dogbọn Jiwheyẹwhe dali? E dọna mí dọ Jehovah tindo huhlọn daho. Ewọ kẹdẹ wẹ sọgan basi nude he tindo huhlọn taidi owhè. E sọ dọna mí dọ Jehovah yin nuyọnẹntọ, na e biọ nuyọnẹn nado basi owhè, he nọ na yozò po hinhọ́n po bọ onú ma nọ ṣikọna ẹn pọ́n gbede.

Nudida Jehovah tọn dohia dọ e yiwanna mí. Lẹnnupọndo atin-to-aimẹ sinsẹ́n wunmẹ voovo he tin to aigba ji lẹ ji. Jehovah sọgan ko wleawuna atin-to-aimẹ sinsẹ́n wunmẹ dopo poun na mí—kavi tlẹ gọ̀n ma wleawu depope tọn. Kakatimọ, Jehovah na mí atin-to-aimẹ sinsẹ́n wunmẹ susu lẹ he gbọnvo to kiklo, sinmẹ, po otọ́n po mẹ. Ehe dohia dọ Jehovah mayin Jiwheyẹwhe owanyinọ kẹdẹ gba ṣigba e sọ yin alọtlútọ taun bo nọ homẹtọnpọn bosọ jọmẹ.—Psalm 104:24.