Wekanhlanmẹ de sọn Jiwheyẹwhe Owanyinọ Dè

OWE tẹwẹ a yiwanna hugan?⁠— Ovi delẹ nọ yiwanna owe he nọ dọho gando kanlin lẹ go. Devo lẹ nọ yiwanna owe he bẹ yẹdide susu hẹn lẹ. Owe enẹlẹ hihia nọ vivinamẹ taun.

Ṣigba owe he yọnhugan to aihọn lọ pete mẹ wẹ yin dehe nọ dọ nugbo na mí dogbọn Jiwheyẹwhe dali lẹ. Dopo to owe enẹlẹ mẹ họakuẹ hú dehe pò lẹpo. Detẹ wẹ to yé mẹ?⁠— Biblu wẹ.

Etẹwutu wẹ Biblu do yin nujọnu sọmọ?⁠— Na Jiwheyẹwhe dè wẹ e wá sọn wutu wẹ. E dọ mẹhe ewọ yin na mí podọ onú dagbe he e na wà na mí lẹ. Podọ e sọ dọ nuhe mí dona wà nado hẹn homẹ etọn hùn na mí. E taidi wekanhlanmẹ de sọn Jiwheyẹwhe dè.

Eyin e jlo Jiwheyẹwhe, e sọgan ko kàn Biblu lọ pete to olọn mẹ bo na ze e na gbẹtọ lẹ. Ṣigba e ma wàmọ. Dile etlẹ yindọ linlẹn Jiwheyẹwhe tọn lẹ wẹ to e mẹ, devizọnwatọ etọn aigba ji tọn lẹ wẹ e yizan nado kàn suhugan adà Biblu tọn.

Nawẹ Jiwheyẹwhe wà enẹ gbọn?⁠— Nado yọ́n lehe e wà enẹ gbọn, lẹnnupọndo ehe ji. To whenuena mí sè ogbè mẹde tọn to ladio mẹ, e sọgan yin fidindẹn taun de wẹ mẹlọ to hodọ sọn. Eyin mí to televiziọn pọ́n, mí tlẹ sọgan mọ yẹdide gbẹtọ lẹ tọn sọn otò devo lẹ mẹ to aihọn lọ mẹ, podọ mí sọgan sè nuhe dọ yé te.

Gbẹtọ lẹ tlẹ sọgan yì osun mẹ to agahun yetọn he nọ yì osun mẹ lẹ mẹ, podọ yé sọgan dọho hlan aigba ji sọn dọ́n. Be a yọ́n enẹ ya?⁠— Eyin gbẹtọ lẹ sọgan wà enẹ, be Jiwheyẹwhe ma sọgan dọho sọn olọn mẹ ya?⁠— E sọgan wàmọ gbau! Etlẹ ko wàmọ sọn whenu dindẹn gbọ́n whẹpo gbẹtọ lẹ do wá basi ladio kavi televiziọn.

Mose yin dawe de he sè ogbè Jiwheyẹwhe tọn tlọlọ. Mose ma sọgan mọ Jiwheyẹwhe gba, ṣigba e sè ogbè Jiwheyẹwhe tọn. Gbẹtọ livi susu wẹ tin to finẹ whenuena ehe jọ. To gbènẹgbè, Jiwheyẹwhe tlẹ hẹn osó daho de nado whàn gìgìgì, bọ hẹviosò dọnú bọ abì sọ gbòdlán. Gbẹtọ lẹ yọnẹn dọ Jiwheyẹwhe wẹ dọho, ṣigba obu di yé taun. Enẹwutu yé dọna Mose dọmọ: “A dike Jiwheyẹwhe dọho hẹ mí blo, mí nikaa kú.” To godo mẹ, Mose kàn nuhe Jiwheyẹwhe dọna ẹn lẹ dai. Podọ nuhe Mose kandai lọ tin to Biblu mẹ.​—⁠Eksọdusi 20:​18-21.

Mose wẹ kàn owe atọ́n he jẹnukọn to Biblu mẹ lẹ. Ṣigba e mayin ewọ dopo kẹdẹ wẹ kàn Biblu gba. Jiwheyẹwhe yí nudi sunnu 40 zan nado kàn adà daho hugan Biblu tọn. Sunnu ehelẹ nọgbẹ̀ to ojlẹ dindẹn taun die, podọ yé yí owhe susu zan whẹpo do dotana Biblu kinkàn. Mọwẹ, e dẹnsọ owhe 1 600! Nuhe paṣamẹ hugan wẹ yindọ, dile etlẹ yindọ delẹ to sunnu ehelẹ mẹ ma tlẹ mọ yedelẹ pọ́n sọ, nuhe yé kandai lẹpo wẹ sọgbe pẹpẹ hẹ yedelẹ.

Delẹ to sunnu he Jiwheyẹwhe yizan nado kàn Biblu lẹ mẹ diyin. Mahopọnna dọ lẹngbọhọtọ de wẹ Mose yin dai, e wá lẹzun nukọntọ na akọta Islaeli tọn. Sọlọmọni yin ahọlu nuyọnẹntọ de podọ adọkunnọ hugan to aihọn mẹ. Ṣigba kinkantọ delẹ ma diyin sọmọ gba. Amọsi nọ penukundo ovotin lẹ go.

Humọ, Biblu-kàntọ dopo yin doto de. Be a yọ́n oyín etọn ya?⁠— E nọ yin Luku. Kinkantọ devo sọ yin takuẹ-ṣinyantọ de. Ewọ nọ yin Matiu. Podọ dopo yin whẹ̀yidọtọ de, he yọ́n osẹ́n sinsẹ̀n Juvi lẹ tọn ganji. Ewọ wẹ kàn owe susu to Biblu mẹ hú mẹhe pò lẹpo. Be a yọ́n oyín etọn ya?⁠— Paulu wẹ. Podọ devi Jesu tọn lẹ, Pita po Johanu po, he sọ yin Biblu-kantọ lẹ ko yin whèhutọ lẹ dai.

Susu to Biblu-kàntọ ehelẹ mẹ kàn nuhe Jiwheyẹwhe na wá basi to sọgodo lẹ. Nawẹ yé wagbọn do yọ́n onú lọ lẹ whẹpo yé do jọ?⁠— Jiwheyẹwhe wẹ na nudọnamẹ lọ sunnu enẹlẹ. E dọ nuhe na wá jọ lẹ na yé.

To ojlẹ he mẹ Jesu, Mẹplọntọ Daho lọ tin to aigba ji, suhugan adà Biblu tọn ko yin kinkàn. Todin, flindọ Mẹplọntọ Daho lọ ko nọ̀ olọn mẹ pọ́n. E yọ́n nuhe Jiwheyẹwhe basi lẹ. Be ewọ lọsu yise dọ Jiwheyẹwhe dè wẹ Biblu wá sọn ya?⁠— Mọwẹ.

Eyin Jesu dọho na gbẹtọ lẹ dogbọn azọ́n Jiwheyẹwhe tọn lẹ dali, e nọ hia sọn Biblu mẹ. To whedelẹnu, e nọ hia sọn tamẹ. Jesu sọ hẹn nudọnamẹ susu wá na mí sọn Jiwheyẹwhe dè. Jesu dọmọ: “Yẹn sọ dọ hlan aihọn onú he yẹn sè sọn e dè lẹ.” (Johanu 8:26) Jesu ko sè nususu sọn Jiwheyẹwhe dè na e ko nọpọ́ hẹ Jiwheyẹwhe pọ́n wutu. Ṣigba fie wẹ mí sọgan hia nuhe Jesu dọ lẹ te?⁠— Sọn Biblu mẹ. Popolẹpo wẹ yin kinkàndai na mí nado hia.

Na taun tọn, to whenuena Jiwheyẹwhe yí gbẹtọ lẹ zan nado kàn ẹn, yé kàn ẹn dai to ogbè he yé nọ dó lẹ mẹ. Enẹ wẹ zọ́n bọ suhugan adà Biblu tọn yin kinkàndai to Heblugbe mẹ, delẹ yin to Alamaikigbe mẹ, bọ susu yin to Glẹkigbe mẹ. Na mẹsusu to egbehe ma sọgan hia ogbè enẹlẹ wutu, Biblu ko yin lilẹdo ogbè devo lẹ mẹ. To egbehe, apadewhe Biblu tọn sọgan yin hihia to nuhe hugan ogbè 2 260 mẹ. Pọ́n lehe sọha enẹ sù sọ! Biblu yin wekanhlanmẹ Jiwheyẹwhe tọn hlan gbẹtọ lẹ to filẹpo. Ṣigba, mahopọnna whla nẹmu he vọkan etọn ko yin bibasi, Jiwheyẹwhe dè wẹ wẹndomẹ lọ wá sọn.

Nuhe Biblu dọ lẹ yin nujọnu na mí. E ko yin kinkàndai sọn whenu dindẹn die. Ṣigba e dọhodo nuhe to jijọ to egbehe lẹ ji. Podọ e sọ dọ nuhe Jiwheyẹwhe na wá basi to madẹnmẹ. Nuhe e dọ lẹ nọ hẹnmẹ jaya! E na mí todido jiawu de.

Biblu sọ dọ lehe Jiwheyẹwhe jlo dọ mí ni zan gbẹzan mítọn gbọn na mí. E do nuhe sọgbe po dehe ma sọgbe po hia mí. E jẹ dọ hiẹ ni yọ́n ehe, podọ yẹn lọsu ga. E dọna mí dogbọn mẹhe wà onú ylankan lẹ dali po nuhe jọ do yé go po. Ehe na gọalọna mí nado dapana oyà he yé ji lẹ. E sọ dọna mí dogbọn mẹhe wà nuhe sọgbe lẹ dali po kọdetọn dagbe he yé duvivi etọn lẹ po. Ehe lẹpo yin kinkàndai na mí nido mọaleyi sọn e mẹ.

Ṣigba nado mọaleyi sọn Biblu mẹ hugan, mí dona yọ́n gblọndo na kanbiọ de. Kanbiọ lọ wẹ yindọ, Mẹnu wẹ na mí Biblu? Etẹwẹ hiẹ na dọ?⁠— Biblu lọ pete wẹ wá sọn Jiwheyẹwhe dè. Eyin mọwẹ, nawẹ mí sọgan dohia dọ mí yin nuyọnẹntọ nugbonugbo gbọn?⁠— Gbọn todidoai na Jiwheyẹwhe bo wà nuhe e dọ lẹ dali.

Enẹwutu mí dona nọ yí whenu zan nado hia Biblu dopọ. Eyin mí mọ wekanhlanmẹ de yí sọn mẹhe mí yiwanna taun de dè, mí nọ hia ẹ whlasusu. Na e yin nuhọakuẹ na mí wutu. Nukun he mí dona yí do pọ́n Biblu lọsu niyẹn, na wekanhlanmẹ de wẹ e yin sọn Mẹhe yiwanna mí hugan lọ dè. E yin wekanhlanmẹ de sọn Jiwheyẹwhe owanyinọ dè.