Paladisi Ko Sẹpọ!

Onú ylankan he to jijọ to aigba ji todin lẹ dohia dọ Paladisi ko sẹpọ. Biblu dọ dọ mí na mọ ojlẹ awusinyẹn tọn lẹ whẹpo Paladisi lọ nado wá. Mí to gbẹnọ to ojlẹ mọnkọtọn lẹ mẹ todin! Delẹ die to nuhe Biblu dọ dọ e na jọ lẹ mẹ:

Awhàn daho lẹ. “Akọta na fọ́n do akọta ji, ahọludu do ahọludu ji.” (Matiu 24:7) Dọdai ehe ko mọ hẹndi yí. Sọn 1914 gbọ́n, wẹkẹ-whàn awe ko yin fùnfùn po awhàn pẹvipẹvi devo lẹ po. Livi susu gbẹtọ lẹ tọn ko kú to yé mẹ.

Gbigbayipe azọ̀nylankan tọn. “Azọ̀nylankan . . . na tin” to ofi susu. (Luku 21:11) Be ehe ko mọ hẹndi ya? Mọwẹ. Azọ̀n agbasa wiwọ̀ tọn, ahun-zọ̀n, pẹ́nwe, ovà, SIDA, po azọ̀nylankan devo lẹ po ko hù livi susu gbẹtọ lẹ tọn.

Whèdomẹ núdùdù tọn. Gbẹtọ susu lẹ wẹ tin lẹdo aihọn pé he ma tindo núdùdù he pemẹnu nado dù. Livi susu gbẹtọ lẹ tọn wẹ nọ kú huvẹ to owhe dopodopo mẹ. Ohia devo die dọ Paladisi na wá to madẹnmẹ. Biblu dọmọ: “Huvẹ . . . nasọ tin.”—Malku 13:8.

Aigba sisọsisọ. “Aigba sisọsisọ . . . na tin to ofi susu.” (Matiu 24:7) Ehe lọsu ko mọ hẹndi yí to ojlẹ mítọn mẹ. Hugan gbẹtọ livi dopo wẹ ko kú to aigba sisọsisọ mẹ sọn 1914.

Mẹylankan lẹ. Gbẹtọ lẹ na yin ‘owanyi na akuẹ tọ́’ po “owanyi na yede tọ́” po. Yé na yin “owanyi na aṣọ́ hú Jiwheyẹwhe tọ́.” Ovi lẹ na yin “tolivẹtọ do mẹjitọ go.” (2 Timoti 3:1-5) Be hiẹ ma yigbe dọ gbẹtọ susu wẹ yin omẹ mọnkọtọn lẹ to egbehe ya? Yé ma tindo sisi na Jiwheyẹwhe, podọ yé nọ fọ́n nuhahun dote na mẹhe jlo nado plọnnu dogbọn Jiwheyẹwhe dali lẹ.

Sẹ́nhẹngba. “Ylanwa na sudeji” ga. (Matiu 24:12) Vlavo hiẹ na yigbe dọ sẹ́nhẹngba ko ylan deji hugan lehe e te do to owhe susu lẹ die wayi. Filẹpo wẹ gbẹtọ lẹ tin to owù ajojẹdomẹ, mẹhodu, kavi awugblenamẹ tọn mẹ te.

Ehe lẹpo dohia dọ Ahọluduta Jiwheyẹwhe tọn ko sẹpọ. Biblu dọmọ: “Whenuena mì mọ onú helẹ to jijọ, mì ni yọnẹn dọ ahọludu Jiwheyẹwhe tọn tin sẹpọ.” (Luku 21:31) Etẹwẹ Ahọluduta Jiwheyẹwhe tọn yin? E yin gandudu Jiwheyẹwhe tọn sọn olọn mẹ wá he na hẹn Paladisi wá aigba ehe ji. Ahọluduta Jiwheyẹwhe tọn na yí tẹnmẹ to gandudu gbẹtọvi lẹ tọn si.—Daniẹli 2:44.