Oplọn Tindo Ale

BE HIẸ ko pọ́n gbẹtọ lẹ gbede dile yé to atin-sinsẹ́n ṣinyan ya? Mẹsusu nọ doayi awusọhia po kiklo etọn po go nado yọnẹn eyin e ko bia. Mẹdelẹ nọ whlẹ́n atin-sinsẹ́n lọ pọ́n. Mẹdevo lẹ nọ doalọ e go, bo tlẹ nọ fínyọ́n ẹn pọ́n. Ṣogan mẹdevo lẹ nọ dà ẹ pọ́n, bo nọ ze dopo do alọ dopodopo mẹ nado yọ́n dehe tindo osin ganji. Etẹwẹ omẹ ehelẹ to linlẹnpọn? Yé to zẹẹmẹ gigọ́ lẹ keje pọ́n, to vogbingbọn lẹ pọ́n, flin dehe yé ko ṣinyan wayi lẹ, bo to nuhe yé mọ todin lẹ yijlẹdo nuhe yé ko yọnẹn dai go. Ale dagbe de to tenọpọn yé na yé na whẹho lọ ayidonugo sọwhiwhe tọn.

Na nugbo tọn, ale Ohó Jiwheyẹwhe tọn pinplọn tọn klo tlala hugan enẹ. Eyin oplọn mọnkọtọn tin to otẹn titengbe de mẹ to gbẹzan mítọn lẹ mẹ, yise mítọn nọ dolido, owanyi mítọn nọ siso, lizọnyizọn mítọn nọ lẹzun sinsẹ́nnọ dogọ, bọ nudide he mí basi lẹ nọ dekunnu dọ mí tindo wuntuntun po nuyọnẹn jijọ-di-Jiwheyẹwhe tọn po. Gando ale mọnkọtọn lẹ go, Howhinwhẹn lẹ 3:15 dọmọ: “Nuhe hiẹ sọgan jlo lẹpo, nude matin bọ yè sọgan sọ jlẹ do e go.” Be hiẹ to numimọ ale mọnkọtọn lẹ tọn tindo ya? Aliho he mẹ hiẹ nọ plọnnu te sọgan yin họ̀nhungàn de.—Kọl. 1:9, 10.

Etẹwẹ oplọn yin? E hugan wehihia mọmọ tọn poun. E bẹ nugopipe apọ̀nmẹ tọn towe lẹ yiyizan nado gbadopọnna hosọ de po sọwhiwhe po kavi to aliho he gbloada mẹ hẹn. E bẹ kikeje nuhe hiẹ hia pọ́n, yíyí ì jlẹdo nuhe hiẹ ko yọnẹn dai go, podọ didoayi whẹwhinwhẹ́n heyin nina na hodidọ lẹ go hẹn. To nupinplọn whenu, lẹnnupọn sisosiso do linlẹn depope heyin didohia he sọgan yin onú yọyọ na we ji. Lẹnnupọn ga, do lehe hiẹ sọgan yí ayinamẹ Owe-wiwe tọn zan to gigọ́mẹ do ji. Taidi Kunnudetọ Jehovah tọn de, hiẹ nasọ jlo nado lẹnnupọndo dotẹnmẹ hundote lẹ ji nado yí nudọnamẹ lọ zan nado gọalọna mẹdevo lẹ. E họnwun dọ, oplọn bẹ ayihamẹlinlẹnpọn hẹn.

Tintin to Ninọmẹ Dagbe Ayiha Tọn Mẹ

To awuwiwle nado plọnnu whenu, hiẹ nọ de Biblu, owe depope he hiẹ lẹn nado yizan, wekantin, podọ vlavo kandai-wema de tọ́n. Ṣigba be hiẹ nọ wleawuna ahun towe ga ya? Biblu dọna mí dọ Ẹzla ‘wleawuna ahun etọn nado to osẹ́n OKLUNỌ tọn dín, podọ nado nọ basi i, podọ nado nọ plọnmẹ osẹ́ndoai lẹ po whẹdida lẹ po to Islaeli mẹ.’ (Ẹzla 7:10) Etẹwẹ awuwle ahun mẹ tọn mọnkọtọn bẹhẹn?

Odẹ̀ nọ hẹn mí penugo nado bẹ oplọn Ohó Jiwheyẹwhe tọn jẹeji po walọ he sọgbe po. Mí jlo dọ ahun mítọn, yèdọ nuhe mí yin to hòmẹ, ni kẹalọyi nudọnamẹ he Jehovah nọ na mí. To bẹjẹeji nupinplọn dopodopo tọn, vẹ̀ Jehovah na alọgọ gbigbọ etọn tọn. (Luku 11:13) Biọ to e si nado gọalọna we nado mọnukunnujẹ zẹẹmẹ nuhe hiẹ na plọn tọn mẹ, lehe e gando lẹndai etọn go do, lehe e sọgan gọalọna we nado yọ́n dagbe gbọnvona oylan do, lehe hiẹ dona yí nunọwhinnusẹ́n etọn lẹ do yizan mẹ gbọn, podọ lehe nudọnamẹ lọ gando haṣinṣan towe hẹ ẹ go do. (Howh. 9:10) Dile hiẹ to nuplọn, ‘nọ to nuyọnẹn biọ zọnmii to Jiwheyẹwhe si.’ (Jak. 1:5) Gbọn ahundopo dali gbeje dewe pọ́n to hinhọ́n nuhe hiẹ plọn tọn mẹ dile hiẹ to alọgọ Jehovah tọn dín nado sukúndona linlẹn ylankan lẹ kavi ojlo awugblenamẹ tọn lẹ. “Yí opẹ́ do jihàn hlan OKLUNỌ” to whepoponu na nuhe e nọ dehia lẹ. (Ps. 147:7) Bibẹ oplọn jẹeji po odẹ̀ po nọ dekọtọn do haṣinṣan pẹkipẹki tintindo hẹ Jehovah mẹ, na e nọ hẹn mí penugo nado setonuna ẹn dile e to hodọ na mí gbọn Ohó etọn gblamẹ.—Ps. 145:18.

Todidoai mọnkọtọn nọ hẹn omẹ Jehovah tọn lẹ gbọnvona nuplọntọ devo lẹ. Nuhe gbayipe wẹ e yin to mẹhe ma tindo mẹdezejo jijọ-di-Jiwheyẹwhe tọn lẹ ṣẹnṣẹn nado tindo ayihaawe bo mọhodọ do nuhe yin kinkàndai go. Ṣigba enẹ mayin walọyizan mítọn gba. Mí dejido Jehovah go. (Howh. 3:5-7) Eyin mí ma mọnukunnujẹ nude mẹ, mí ma nọ gbọn goyiyi dali wá tadona lọ kọ̀n dọ nuṣiwa wẹ e dona yin gba. Dile mí to dindin bo to dòkùn na gblọndo lọ lẹ, mí nọ nọtepọn Jehovah. (Mika 7:7) Taidi Ẹzla, mí tindo yanwle lọ nado yí nuhe mí plọn do yizan mẹ bo plọnmẹ nuhe mí ko plọn lẹ. Po ayilinlẹn ahun mẹ tọn ehe po, mí na mọ dona susugege yí sọn oplọn mítọn mẹ.

Lehe Yè Nọ Plọnnu Gbọn

Kakati nado bẹjẹeji sọn hukan 1 bo zindonukọn jẹ vivọnu poun, yí whenu zan whẹ́ nado keje hosọ kavi weta lọ blebu pọ́n jẹnukọn to owe lọ mẹ. Bẹjẹeji gbọn nulẹnpọndo hogbe he yin yiyizan to hosọ lọ mẹ lẹ ji dali. Ehe wẹ hosọ nuhe hiẹ jlo na plọn tọn. Enẹgodo yí sọwhiwhe do doayi kanṣiṣa he hóvila lẹ tindo hẹ hosọ lọ go. Gbadopọnna yẹdide lẹpo, apotin nudọnamẹ tọn, kavi apotin mẹpinplọn tọn he tin to hosọ lọ mẹ lẹ. Kanse dewe dọ: ‘Sọgbe hẹ dogbapọnnanu ehe, etẹwẹ yẹn sọgan plọn? Aliho tẹmẹ wẹ e na yin nuhọakuẹ na mi te?’ Ehe na deanana we to oplọn towe mẹ.

Todin dín gblọndo lẹ mọ. Hosọ oplọn Atọ̀họ̀-Nuhihọ́ Lọ Tọn po owe delẹ po tọn nọ bẹ kanbiọ heyin zinzinjẹgbonu lẹ hẹn. Dile hiẹ to hukan dopodopo hia, alemọyinu wẹ e na yin nado dohiagona gblọndo lẹ. Eyin kanbiọ oplọn tọn lẹ ma tlẹ tin, hiẹ sọgan gbẹ́ dohiagona nuagokun titengbe he hiẹ jlo nado flin lẹ. Eyin linlẹn de yin yọyọ na we, yí whenu vude dogọ zan do e ji nado hẹn ẹn diun dọ hiẹ mọnukunnujẹemẹ ganji. Tin to aṣeji nado mọ apajlẹ kavi aliho hoyijlẹdohogo tọn lẹ he na yọn-na-yizan na we to lizọnyizọn kunnudegbe tọn mẹ kavi he hiẹ sọgan yizan to azọ́ndenamẹ hodidọ tọn he ja de mẹ. Lẹnnupọndo omẹ tangan delẹ ji he yise yetọn sọgan yin hinhẹn lodo eyin hiẹ má nuhe hiẹ to pinplọn hẹ yé. Dohiagona nuagokun he hiẹ jlo na yizan, bo gbadopọnna yé to vivọnu oplọn towe tọn.

Dile hiẹ to dogbapọnna nudọnamẹ lọ, hia wefọ dide lẹ. Gbadopọnna kanṣiṣa he wefọ dopodopo tindo hẹ lẹndai blebu hukan lọ tọn.

Hiẹ sọgan dukosọ hẹ nuagokun he hiẹ ma mọnukunnujẹemẹ ganji kavi he hiẹ na jlo nado gbadopọnna kitokito dogọ lẹ. Kakati nado dike yé ni fẹayihasẹna we, basi kandai de nado gbadopọnna ehelẹ to godo mẹ. Nuagokun lẹ nọ saba yin hinhẹn họnwun dile hiẹ hia pipòtọ hukan lọ tọn lẹ. Eyin e mayin mọ, hiẹ sọgan basi dodinnanu dogọ. Etẹlẹ wẹ sọgan yin kinkàndai na ayidonugo mọnkọtọn? Vlavo wefọ dide de tin he hiẹ ma mọnukunnujẹemẹ ganji. Kavi hiẹ sọgan gọ̀n ma mọ kanṣiṣa he e tindo hẹ hosọ he to yinyin dogbapọnna lọ po awubibọ po. Vlavo hiẹ lẹndọ hiẹ mọnukunnujẹ linlẹn tangan de mẹ to owe lọ mẹ ṣigba e mayin jẹ obá lọ mẹ nado basi zẹẹmẹ etọn na mẹdevo gba. Kakati nado dapana ehelẹ poun, e sọgan yin nuyọnẹnnu nado basi dodinnanu do yé ji to whenuena hiẹ ko dotana nuhe a to pinplọn to alọnu.

To whenuena apọsteli Paulu kàn wekanhlanmẹ gigọ́ etọn hlan Klistiani Heblu tọn lẹ, e yì agbọji to dáglámẹ bo dọmọ: “Nuagokun tangan lọ die.” (Heb. 8:1, NW) Be hiẹ nọ na dewe nuflinmẹ mọnkọtọn sọn ojlẹ de mẹ jẹ devo mẹ ya? Lẹnnupọndo nuhewutu Paulu wàmọ ji. To weta he jẹnukọn lẹ mẹ to wekanhlanmẹ gbọdo etọn mẹ, e ko dohia dọ Klisti taidi Yẹwhenọ Daho hugan Jiwheyẹwhe tọn ko biọ olọn lọsu mẹ. (Heb. 4:14–5:10; 6:20) Ṣogan, gbọn nùzinzindo nuagokun tangan enẹ ji to bẹjẹeji weta 8 tọn dali, Paulu to awuwlena ayiha wehiatọ etọn lẹ tọn nado lẹnnupọn sisosiso do lehe e gando gbẹzan yetọn lẹ go do ji. E dohia dọ Klisti ko sọawuhia to Jiwheyẹwhe nukọn na yé bo ko hùn aliho dote na yé nado biọ “ofi he wé gbahu” olọn mẹ tọn enẹ mẹ. (Heb. 9:24; 10:19-22) Todido dejidego yetọn na gọalọ nado whàn yé nado yí ayinamẹ yinukọn dogọ he wekanhlanmẹ ehe bẹhẹn gando yise, akọ́ndonanu, po walọyizan Klistiani tọn po go do yizan mẹ. Mọdopolọ, to whenuena mí to nuplọn, ayidonugo zizedo nuagokun tangan lẹ ji na gọalọna mí nado yọ́n lehe hosọ lọ yin awuwlena gbọn bo na zín whẹwhinwhẹ́n titengbe he wutu mí dona yinuwa to kọndopọmẹ hẹ ẹ do ayiha mítọn lẹ mẹ.

Be oplọn mẹdetiti tọn towe na whàn we nado yinuwa ya? Kanbiọ titengbe de wẹ ehe yin. To whenuena hiẹ plọn nude, kanse dewe dọ: ‘Nawẹ ehe dona yinuwado walọyizan ṣie po yanwle ṣie lẹ po ji to gbẹ̀mẹ gbọn? Nawẹ yẹn sọgan yí nudọnamẹ ehe zan nado didẹ̀ nuhahun de, nado basi nudide de, kavi jẹ yanwle de kọ̀n gbọn? Nawẹ yẹn sọgan yí ì zan na whẹndo ṣie, to lizọnyizọn kunnudegbe tọn mẹ, podọ to agun mẹ gbọn?’ Gbadopọnna kanbiọ ehelẹ to odẹ̀ mẹ, bo lẹnnupọndo ninọmẹ tangan he mẹ hiẹ sọgan yí oyọnẹn towe zan te lẹ ji.

To weta kavi hosọ de fifó godo, yí whenu zan nado basi dogbapọnnanu kleun de. Pọ́n eyin hiẹ sọgan flin nuagokun tangan lẹ po linlẹn he nọgodona yé lẹ po. Afọdide ehe na gọalọna we nado flin nudọnamẹ lọ na yizan sọgodo tọn.

Nuhe Yè Na Plọn

Taidi omẹ Jehovah tọn lẹ, mí tindo nususu nado plọn. Ṣigba fie wẹ mí dona bẹsọn? To azán dopodopo gbè, mí na wà dagbe nado plọn wefọ po zẹẹmẹ lẹ po sọn Dogbapọnna Owe-Wiwe Egbesọegbesọ mẹ. To sẹmẹsẹmẹ, mí nọ yì opli agun tọn lẹ, podọ nuhe yin pinplọn to awuwlena opli lẹ mẹ na gọalọna mí nado mọaleyi jẹ obá daho mẹ. To yidogọmẹ na ehe, mẹdelẹ ko gbọn nuyọnẹn dali yí whenu zan nado plọn delẹ to owe Klistiani tọn lẹ heyin zinzinjẹgbonu whẹpo yé do plọn nugbo lọ. Mẹdevo lẹ nọ dè adà Biblu hihia sẹmẹsẹmẹ tọn yetọn delẹ bo nọ plọn wefọ enẹlẹ sisosiso.

Eyin ninọmẹ towe lẹ ma na we dotẹnmẹ nado yí sọwhiwhe do plọn nudọnamẹ he na yin dogbapọnna to opli sẹmẹsẹmẹ agun tọn ji lẹpo ka lo? Dapana omọ̀ lọ nado yìn nukun gbọn nudọnamẹ lọ lẹ ji na hiẹ saa jlo na plọn ẹn poun wutu kavi, dehe tlẹ ylan hugan wẹ, ma nado plọn ẹn paali na hiẹ ma sọgan plọn ẹn fó wutu. Kakatimọ, basi nudide do nuhe hiẹ sọgan plọn ji, bo plọn enẹ ganji. Nọ wàmọ to sẹmẹsẹmẹ. To nukọn mẹ, dovivẹnu nado gbloadana nupinplọn towe nado bẹ opli he pò lẹ hẹn.

“Jlọ Whédo Towe Dote”

Jehovah yọnẹn dọ tatọ́ whẹndo tọn lẹ dona wazọ́n sinsinyẹn nado wleawu onú lẹ tọn na mẹyiwanna yetọn lẹ. “Wleawu azọ́n towe tọn dai to gbonu,” wẹ Howhinwhẹn lẹ 24:27 dọ, “bosọ yí vivẹnu do jloai to ogle towe mẹ.” Ṣogan, nuhudo gbigbọmẹ whẹndo towe tọn lẹ ma sọgan yin nukunpẹvi yí do pọ́n gba. Enẹwutu, wefọ lọ zindonukọn dọmọ: “To godo ehe tọn, [jlọ whédo towe dote, NW ].” Nawẹ tatọ́ whẹndo tọn lẹ sọgan wà ehe gbọn? Howhinwhẹn lẹ 24:3 dọmọ: ‘Wuntuntun wẹ yè do nọ jlọ whédo de.’

Nawẹ wuntuntun sọgan hẹn ale wá na whédo towe gbọn? Wuntuntun yin nugopipe apọ̀nmẹ tọn nado mọnú zẹ̀ nuhe yọ́nmọ go. E sọgan yin didọ po gbesisọ po dọ oplọn whẹndo tọn kọdetọn dagbenọ de nọ bẹjẹeji po nupinplọn sọwhiwhe tọn whẹndo lọ lọsu tọn po. Nawẹ hagbẹ whẹndo towe tọn lẹ to nukọnyi to gbigbọ-liho gbọn? Dotoai po sọwhiwhe po to hodọdopọ hẹ yé whenu. Be yé tindo gbigbọ lewuwu tọn kavi mẹhẹndohomẹ tọn wẹ ya? Be yanwle agbasanu bibẹpli tọn wẹ yin ahunmẹdunamẹnu yetọn ya? To whenuena hiẹ tin to lizọnyizọn kunnudegbe tọn mẹ hẹ ovi towe lẹ, be yé nọ voawu nado do yedelẹ hia to hagbẹ yetọn lẹ nukọn taidi Kunnudetọ Jehovah tọn lẹ ya? Be yé nọ duvivi tito-to-whinnu Biblu hihia po oplọn whẹndo tọn towe po ya? Be yé to aliho Jehovah tọn hẹn zun aliho gbẹninọ yetọn tọn nugbonugbo ya? Taidi tatọ́ whẹndo tọn de, ayidonugo sọwhiwhe tọn na do nuhe hiẹ dona wà hia nado sọgan wleawuna jẹhẹnu gbigbọmẹ tọn lẹ bo dó yé do ahun mẹ na hagbẹ dopodopo whẹndo lọ tọn.

Gbadopọnna Atọ̀họ̀-Nuhihọ́ Lọ Tọn po Réveillez-vous! po nado mọ hosọ he dọhodo nuhudo tangan lẹ ji. Enẹgodo dọ nuhe na yin pinplọn na whẹndo lọ jẹnukọn na yé nido sọgan lẹnnupọndo nudọnamẹ lọ ji. Hẹn ojlẹ nupinplọn lọ tọn yin awuvivinu. Matin mẹhihò kavi winyandido hagbẹ whẹndo lọ tọn depope, zinnudo nuhọakuẹ-yinyin nudọnamẹ he to yinyin dogbapọnna lọ tọn ji, bo yí ì zan tlọlọ na nuhudo whẹndo towe tọn lẹ. Hẹn dopodopo yetọn tindo mahẹ. Gọalọna mẹdopodopo nado mọ lehe Ohó Jehovah tọn “pé” nado wleawuna nuhe mí tindo nuhudo etọn pẹpẹ to gbẹ̀mẹ do.—Ps. 19:7.

Ale lọ lẹ Mimọyi

Ayidonugotọ he ma tindo nukunnumọjẹnumẹ gbigbọmẹ tọn lẹ sọgan plọnnu gando wẹkẹ, ninọmẹ aihọn tọn lẹ, podọ etlẹ yin gando yedelẹ go ṣigba nọ gboawupo nado mọnukunnujẹ zẹẹmẹ nujọnu nuhe yé to mimọ lẹ tọn mẹ. To alọ devo mẹ, po alọgọ gbigbọ Jiwheyẹwhe tọn po, mẹhe nọ plọn Ohó Jiwheyẹwhe tọn to gbesisọmẹ lẹ sọgan mọ alọnuzọ́n Jiwheyẹwhe tọn, hẹndi dọdai Biblu tọn, po dohia lẹndai Jiwheyẹwhe tọn na gbẹtọvi tonusetọ heyin didona lẹ po to onú ehelẹ mẹ.—Malku 13:4-29; Lom. 1:20; Osọ. 12:12.

Dile enẹ tlẹ yin nujiawu do sọ, e ma dona hẹn mí zun goyitọ gba. Kakatimọ, dogbapọnna Ohó Jiwheyẹwhe tọn egbesọegbesọ nọ gọalọna mí nado gbọṣi whiwhẹnọ-yinyin mẹ. (Deut. 17:18-20) E sọ nọ whlá mí sọn huhlọn “oklọ ylando tọn” mẹ na eyin Ohó Jiwheyẹwhe tọn tin togbẹ̀ to ahun mítọn lẹ mẹ, e yọnbasi taun dọ mẹdindọn ylando tọn ma na dùto gbemima mítọn nado nọavunte sọta ẹ ji gba. (Heb. 2:1; 3:13; Kọl. 3:5-10) Enẹwutu, mí na to “zọnlinzin dole e jẹna Oklunọ to nukundagbe lẹpo mẹ, [dile mí to nukọnzindo nado] yin sinsẹ́nnọ to azọ́n dagbe lẹpo mẹ.” (Kọl. 1:10) Mọwiwà wẹ yin yanwle mítọn to Ohó Jiwheyẹwhe tọn pinplọn mẹ, podọ wadotana etọn bibasi wẹ ale daho hugan lọ.