Lehe Dodinnanu Nọ Yin Bibasi Do
AHỌLU SỌLỌMỌNI “payi dagbedagbe, e dindona, bosọ yí howhinwhẹn susu bọdai hajihaji.” Etẹwutu? Na e tindo ojlo to ‘ohó he sọgbe nugbo lẹ’ kinkàn mẹ wutu. (Yẹwh. 12:9, 10) Luku “doafọna onú lẹpo [po gbesisọ po, NW] sọn dòdó” nado sọgan dọ nujijọ gbẹzan Klisti tọn lẹ to whinnuwhinnu. (Luku 1:3) Devizọnwatọ Jiwheyẹwhe tọn awe ehelẹ to dodinnanu basi.
Etẹwẹ dodinnanu zẹẹmẹdo? E zẹẹmẹdo sọwhiwhe yíyí do dín nudọnamẹ dogbọn whẹho tangan de dali. E bẹ wehihia hẹn, bo biọ dọ yè ni yí nunọwhinnusẹ́n nupinplọn tọn lẹ zan. E sọ sọgan bẹ hokinkanse gbẹtọ lẹ hẹn.
Ninọmẹ tẹlẹ wẹ nọ biọ dodinnanu? Apajlẹ vude die. Oplọn mẹdetiti tọn towe kavi Biblu hihia towe sọgan fọ́n kanbiọ he duahunmẹna we lẹ dote. Mẹhe hiẹ dekunnuna sọgan fọ́n kanbiọ de dote he hiẹ na jlo nado mọ nudọnamẹ tangan do e ji nado na gblọndo. Hiẹ sọgan ko yin azọ́ndena nado na hodidọ de.
Mì gbọ mí ni lẹnnupọndo azọ́ndenamẹ enẹ ji nado na hodidọ de. Nuhe ji yè biọ dọ hiẹ ni dọho do sọgan taidi nuhe mẹlẹpo jẹakọ hẹ. Nawẹ hiẹ sọgan yí ì zan na agun lọ gbọn? Hẹn ẹn pẹnzin gbọn dodinnanu bibasi dali. Eyin hiẹ yí kunnudenu dopo kavi awe kavi apajlẹ he sọgbe hẹ ohó towe bo fọnjlodotena mẹplidopọ towe lẹ do nọgodona ẹn, nuagokun he sọgan taidi nuhe họnwun dai nọ lẹzun dehe gọna nudọnamẹ dogọ, bo tlẹ nọ whànmẹ. Owe zinjẹgbonu he ji hiẹ to azọ́nwa do sọgan ko yin awuwlena na wehiatọ lẹ lẹdo aihọn pé, ṣigba hiẹ dona gbloadana nuagokun lọ lẹ, bo basi dohia yetọn, bo yí yé zan na agun kavi mẹde. Nawẹ hiẹ na wà ehe gbọn?
Whẹpo do jẹ dodinnanu towe ji, lẹnnupọndo mẹplidopọ towe lẹ ji. Etẹwẹ yé na ko yọnẹn to alọnu din? Etẹwẹ yé tindo nuhudo nado yọnẹn? Enẹgodo yọ́n yanwle towe. Be nado basi zẹẹmẹ? nado dutomẹji? nado jẹagọdonu? kavi nado whànmẹ wẹ ya? Zẹẹmẹ-bibasi nọ biọ dọ yè ni wleawuna nudọnamẹ dogọ nado hẹn whẹho de họnwun. Dile etlẹ yindọ nugbo tangan lẹ sọgan họnwun, hiẹ sọgan tindo nuhudo nado basi zẹẹmẹ gigọ́ do whenue kavi lehe nuhe yin didọ lọ na yin wiwà do ji. Nado dutomẹji nọ biọ dọ yè ni na whẹwhinwhẹ́n he dlẹnalọdo nuhewutu nude do yinmọ, gọna kunnudenu lẹ nina. Agọjẹdonu nọ biọ dọ yè ni tindo oyọnẹn adà awe whẹho de tọn ganji bo yí sọwhiwhe do gbadopọnna kunnudenu heyin yiyizan. Nugbo wẹ dọ, e mayin ohó he nọ dutomẹji lẹ kẹdẹ wẹ mí nọ dín gba ṣigba aliho lẹ nado ze nugbo lẹ donukọnnamẹ to aliho he jọmẹ mẹ. Mẹwhinwhàn nọ bẹ ahun mẹ bibiọ hẹn. E zẹẹmẹdo nado dozolanmẹna mẹplidopọ towe lẹ bo fọ́n ojlo yetọn dote nado yinuwa do nuhe to yinyin hodọdeji lọ ji. Apajlẹ jọnun gbẹzan mẹhe ko ze afọdide mọnkọtọn lẹ tọn, yèdọ to awusinyẹnnamẹnu glọ, sọgan gọalọ nado biọ ahun mẹ.
Be hiẹ ko wleawufo todin nado bẹjẹeji ya? E ma ko yá gba. Gbadopọnna lehe nudọnamẹ he hiẹ tindo nuhudo etọn na sù sọ. Ganmẹ sọgan yin adà titengbe de. Eyin mẹdevo lẹ wẹ hiẹ jlo na ze nudọnamẹ lọ donukọnna, nukunwhiwhe nẹmu wẹ hiẹ na tindo nado wà ẹ? Be nukunwhiwhe atọ́n wẹ? Kavi nukunwhiwhe kande-atọ́n? Be ganmẹ lọ tin to onù dopo ji, taidi to opli agun tọn lẹ tẹnmẹ, kavi e sọgan diọ, taidi to plọnmẹ Biblu de whenu kavi to dlapọn lẹngbọhọtọ tọn de whenu wẹ ya?
To godo mẹ, azọ́nwanu dodinnanu tọn tẹlẹ wẹ hiẹ tindo? To yidogọmẹ na dehe hiẹ tindo to whégbè, be devo lẹ tin to wesẹdotẹn Plitẹnhọ Ahọluduta tọn mìtọn mẹ ya? Be mẹmẹsunnu he ko to Jehovah sẹ̀n na owhe susu lẹ na dike bọ hiẹ na zan azọ́nwanu dodinnanu tọn yetọn lẹ ya? Be wesẹdotẹn otò tọn de tin to lẹdo towe mẹ fie owe alọdlẹndonu tọn lẹ sọgan yin yiyizan te eyin e biọ domọ ya?
Yíyí Azọ́nwanu Dodinnanu Tọn Mítọn Tintan lọ Zan—Yèdọ Biblu
Eyin dodinnanu towe bẹ zẹẹmẹ wefọ de tọn hẹn, bẹjẹeji po Biblu lọsu po.
Gbadopọnna Lẹdo Hodidọ lọ Tọn. Kanse dewe dọ: ‘Mẹnu wẹ wefọ ehe to hodọna? Etẹwẹ wefọ he lẹdo e lẹ dohia na nuhe dù ninọmẹ he zọ́n bọ ohó lọ do yin didọ lẹ kavi walọyizan mẹhe go hodidọ lọ gando lẹ tọn?’ Zẹẹmẹ gigọ́ mọnkọtọn lẹ sọgan nọ gọalọna mí to whepoponu nado mọnukunnujẹ wefọ de mẹ, podọ yé sọgan sọ hẹn hodidọ he mẹ hiẹ sọgan yí yé zan te yin awuvivinu.
Di apajlẹ, Heblu lẹ 4:12 nọ saba yin hoyidọ sọn e mẹ nado dohia dọ huhlọn Ohó Jiwheyẹwhe tọn nọ whàn ahun bo nọ yinuwado ogbẹ̀ lẹ ji. Lẹdo hodidọ lọ tọn hẹn nukunnumọjẹnumẹ mítọn siso dogọ do lehe enẹ sọgan yinmọ gbọn ji. E dọhodo numimọ Islaeli tọn lẹ ji to owhe 40 zungbo mẹ tọn lẹ whenu whẹpo yé do biọ aigba he Jehovah ko dopagbe etọn na Ablaham ji. (Heb. 3:7–4:13) “Ohó Jiwheyẹwhe tọn,” yèdọ opagbe etọn nado hẹn yé biọ otẹn gbọjẹ tọn de mẹ to kọndopọmẹ hẹ alẹnu etọn hẹ Ablaham, ma kú gba; e tin to ogbẹ̀ bo to mìzọnmìzọn ji nado mọ hẹndi. Islaelivi lẹ tindo whẹwhinwhẹ́n lẹpo nado do yise hia to e mẹ. Ṣigba, dile Jehovah plan yé sọn Egipti jẹ Osó Sinai tọn kọ̀n podọ hlan Aigba Pagbe tọn ji, yé do yise matindo hia pludopludo. Enẹwutu, gbọn nuyiwa yetọn hlan aliho he mẹ Jiwheyẹwhe hẹn ohó etọn di do dali, nuhe tin to ahun yetọn lẹ mẹ sọawuhia. Mọdopolọ to azán mítọn gbè, ohó dopagbe Jiwheyẹwhe tọn nọ de nuhe tin to ahun gbẹtọ lẹ tọn mẹ hia.
Gbadopọnna Alọdlẹndonu-Ṣẹnṣẹn Tọn Lẹ. Biblu delẹ tindo alọdlẹndonu-ṣẹnṣẹn tọn lẹ. Be towe tindo ya? Eyin mọwẹ, ehelẹ sọgan gọalọna we. Doayi apajlẹ de go sọn Les Saintes Écritures—Traduction du monde nouveau mẹ. Pita tintan 3:6 dlẹnalọdo Sala taidi apajlẹ he jẹ na asi Klistiani lẹ nado hodo. Alọdlẹndonu-ṣẹnṣẹn tọn hlan Gẹnẹsisi 18:12 nọgodona enẹ gbọn didohia dali dọ Sala nọ pọ́n Ablaham hlan taidi oklunọ “to ede homẹ.” Enẹwutu, taliai etọn yin sọn ahun mẹ wá. To yidogọmẹ na nukunnumọjẹnumẹ mọnkọtọn lẹ, alọdlẹndonu-ṣẹnṣẹn tọn lẹ sọgan deanana we hlan wefọ he do hẹndi dọdai Biblu tọn de hia lẹ kavi apajlẹ alẹnu Osẹ́n tọn de. Ṣigba, yọnẹn dọ lẹndai alọdlẹndonu-ṣẹnṣẹn tọn delẹ mayin nado basi zẹẹmẹ mọnkọtọn lẹ gba. Yé sọgan dlẹnalọdo linlẹn dopolọ lẹ poun kavi nudọnamẹ whenuho kavi lẹdo tọn.
Dindona po Todohukanji Alọdlẹndonu Biblu Tọn Po. Todohukanji alọdlẹndonu Biblu tọn wẹ todohukanji debọdo-dego hogbe heyin yiyizan to Biblu mẹ lẹ tọn. E sọgan gọalọna we nado mọ wefọ he tindo kanṣiṣa hẹ hosọ he hiẹ to dodinnanu basi deji lọ lẹ. Dile hiẹ to yé yizan, hiẹ na mọ zẹẹmẹ gigọ́ alọgọnamẹ tọn devo lẹ. Hiẹ na mọ kunnudenu “ohia” nugbo tọn he tin to Ohó Jiwheyẹwhe tọn mẹ. (2 Tim. 1:13) Traduction du monde nouveau bẹ alọdlẹndonu tangan “Todohukanji Hogbe Biblu Tọn Lẹ” hẹn. Concordance complète sọ gbloada taun hugan. Eyin e tin-to-aimẹ to ogbè towe mẹ, e na deanana we hlan wefọ he bẹ hogbe tangan dopodopo he tin to Biblu mẹ lẹpo hẹn.
Pinplọn Nado Yí Azọ́nwanu Dodinnanu Tọn Devo lẹ Zan
Apotin he tin to weda 33 mẹ slẹ́ azọ́nwanu dodinnanu tọn devo lẹ he ko yin awuwlena gbọn “afanumẹ nugbonọ, nuyọnẹntọ” lọ dali. (Mat. 24:45-47) Suhugan ehelẹ tọn tindo todowhinnu hogo lẹ tọn, podọ susu tindo todohukanji de to godo, he yin awuwlena nado gọalọna we nado mọ nudọnamẹ tangan lẹ. To vivọnu owhe dopodopo tọn, alọdlẹndonu hosọ tọn lẹ nọ yin zinzinjẹgbonu to Atọ̀họ̀-Nuhihọ́ Lọ Tọn po Réveillez-vous! po mẹ na hosọ owhe enẹ tọn lẹpo.
Jijẹakọhẹ wunmẹ nudọnamẹ he tin to owe sinai do Biblu ji ehelẹ mẹ sọgan hẹn dodinnanu yá. Di dohia, mí ni dọ dọ hiẹ jlo na yọ́n nude dogbọn dọdai, sinsẹ̀n-nuplọnmẹ, walọyizan Klistiani tọn, kavi nunọwhinnusẹ́n Biblu tọn lẹ yiyizan dali. E yọnbasi dọ Atọ̀họ̀-Nuhihọ́ Lọ Tọn ni bẹ nuhe hiẹ to dindin hẹn. Réveillez-vous! nọ dọhodo nujijọ alọnu tọn lẹ, nuhahun egbezangbe tọn lẹ, sinsẹ̀n, lẹnunnuyọnẹn, po gbẹtọ aigba voovo lẹ tọn po ji. Zẹẹmẹ bibasi do kandai dopodopo ji to Wẹndagbe lẹ mẹ to aliho todohukanji ojlẹ hihia tọn mẹ sọawuhia to owe lọ Dawe Klohugan lọ He Nkọtọn Ma Nọgbẹ̀ Pọ́n mẹ. Hodọdopọ wefọ debọdo-dego owe Biblu tọn blebu lẹ yin mimọ to owe mọnkọtọn lẹ taidi Osọhia—Hẹndi Pete Etọn Sẹpọ!, Payi Dọdai Daniẹli Tọn Go!, po bladopọ awe Dọdai Isaia Tọn—Hinhọ́n de na Gbẹtọvi Lẹpo po mẹ. To Comment raisonner à partir des Écritures mẹ, hiẹ na mọ gblọndo pekọhẹnwanamẹ tọn lẹ na kanbiọ Biblu tọn kanweko susu he nọ saba yin finfọndote to sinsẹ̀nzọn kunnudegbe tọn mẹ lẹ. Na nukunnumọjẹnumẹ hezeheze tintindo do sinsẹ̀n devo lẹ, nuplọnmẹ yetọn lẹ, po dodonu whenuho tọn yetọn lẹ po ji, pọ́n L’humanité à la recherche de Dieu. Alọnuwe lọ Kunnudetọ Jehovah Tọn lẹ—To Ojlo Jiwheyẹwhe Tọn Wà to Pọmẹ Lẹdo Aihọn Pe bẹ zẹẹmẹ gigọ́ delẹ hẹn gando whenuho egbezangbe Kunnudetọ Jehovah tọn lẹ tọn go. Na zẹẹmẹ gigọ́ do nuhe ko yin wiwadotana to yẹwheho wẹndagbe lọ tọn didọ lẹdo globu pé ji, pọ́n Atọ̀họ̀-Nuhihọ́ Lọ Tọn 1er janvier he yin zinzinjẹgbonu to agọe. Étude perspicace des Écritures yin otànwe po bẹplidopọ yẹdide otò Biblu mẹ tọn po. Eyin hiẹ tindo nuhudo zẹẹmẹ gigọ́ tọn gando gbẹtọ lẹ, nọtẹn lẹ, onú lẹ, ogbè, kavi nujijọ whenuho tọn he tindo kanṣiṣa hẹ Biblu lẹ go, asisa he yọnhugan de wẹ ehe yin. Vlavo delẹ to owe ehe lẹ mẹ tin to ogbè he hiẹ se de mẹ
“Index des Publications de la Société Watch Tower.” Index ehe, he yin zinzinjẹgbonu to nuhe hugan ogbè 20 mẹ, na deanana we nado mọ nudọnamẹ to owe mítọn voovo lẹ mẹ. E yin mimá do adà alọdlẹndonu hosọ tọn po alọdlẹndonu wefọ tọn po mẹ. Nado yí alọdlẹndonu hosọ tọn zan, dín hogbe he nọtena hosọ he hiẹ jlo nado gbadopọnna. Nado yí alọdlẹndonu wefọ tọn zan, dín wefọ he hiẹ na jlo nado mọnukunnujẹemẹ ganji to todohukanji wefọ lẹ tọn mẹ. Eyin nude ko yin zinzinjẹgbonu to ogbè towe mẹ do hosọ kavi wefọ enẹ ji to owhe he Index lọ bẹhẹn lẹ mẹ, hiẹ na mọ todohukanji alọdlẹndonu lẹ tọn he hiẹ na pọ́n. Yí nukinkan he tin to Index lọ nukọn zan nado yọ́n sándogli yinkọ owe heyin alọdlẹndo lẹ tọn. (Di apajlẹ, po alọgọ enẹ po, hiẹ na mọ dọ w99 1/3 15 dlẹnalọdo Atọ̀họ̀-Nuhihọ́ Lọ Tọn heyin 1999 tọn, zinjẹgbonu 1er mars tọn, weda 15.) Hóvila taun taun lẹ taidi “Numimọ Lizọnyizọn Kunnudegbe tọn lẹ” po “Otàn Gbẹzan Kunnudetọ Jehovah tọn lẹ tọn” po sọgan yin alọgọnamẹnu nado wleawuna nuzedonukọnnamẹ mẹwhinwhàn tọn lẹ na agun lọ.
To whenuena e yindọ dodinnanu bibasi sọgan biọ ayidonugo mẹtọn lẹpo, tin to aṣeji ma nado yin ayihafẹsẹna. Ze ayiha do yanwle towe ji nado dín nudọnamẹ he jẹ na azọ́n he hiẹ to wiwà to alọnu. Eyin Index lọ deanana we hlan asisa tangan de, lẹhlan weda heyin nina (lẹ), enẹgodo yí hóvila po hodidọ tintan hukan lẹ tọn po zan nado deanana we hlan nudọnamẹ he hiẹ to dindin lẹ kọ̀n. Eyin zẹẹmẹ wefọ Biblu tọn tangan de wẹ hiẹ to dindin, dín wefọ dide lọ mọ to weda he ji hiẹ yin alọdlẹndo whẹ́. Enẹgodo gbadopọnna zẹẹmẹ he tin lẹdo e lẹ.
“Watchtower Library” to CD-ROM Ji. Eyin hiẹ tindo zomọ nudọnamẹ-sẹdo tọn de, hiẹ sọgan mọaleyi sọn Watchtower Library to CD-ROM ji yiyizan mẹ, ehe bẹ owe mítọn voovo lẹ hẹn. Aliho dodinnanu tọn he bọawu nado yizan lọ nọ hẹnmẹ penugo nado dín hogbe de, bẹplidopọ hogbe lẹ tọn, kavi wefọ de to depope to owe he tin to Watchtower Library mẹ lẹ mẹ. Eyin azọ́nwanu dodinnanu tọn ehe ma tlẹ tin-to-aimẹ to ogbè towe mẹ, hiẹ sọgan penugo nado mọaleyi sọn e mẹ to ogbè devo he hiẹ jẹakọ hẹ he nọ yin yiyizan gbayipe de mẹ.
Wesẹdotẹn Yẹwhehọluduta Tọn Devo Lẹ
To wekanhlanmẹ gbọdo etọn awetọ hlan Timoti mẹ, Paulu biọ to sunnu jọja lọ si nado hẹn “owe [hihá lẹ], humọ owe ayú tọn nẹlẹ” wá na ẹn to Lomu. (2 Tim. 4:13) Paulu yọ́n nuhọakuẹ owe delẹ tọn bo nọ sẹ̀ yé do. Hiẹ sọgan wà nudopolọ. Be hiẹ nọ sẹ̀ vọkan Atọ̀họ̀-Nuhihọ́ Lọ Tọn, Réveillez-vous!, po Lizọnyizọn Ahọluduta Tọn Mítọn towe lẹ po do to whenuena ehelẹ tlẹ ko yin pinplọn to opli agun tọn lẹ ji godo ya? Eyin mọwẹ, hiẹ na tindo yé to aimẹ nado yizan taidi azọ́nwanu dodinnanu tọn lẹ, gọna owe Klistiani tọn devo he hiẹ ko tindo lẹ. Agun susu nọ tindo owe sinai do Biblu ji voovo lẹ to wesẹdotẹn Plitẹnhọ Ahọluduta tọn mẹ. Ehelẹ tin na agun lọ blebu nado yizan to Plitẹnhọ Ahọluduta tọn mẹ.
Tindo Kandai-Sẹdotẹn Mẹdetiti Tọn
Tin to aṣeji na nudọnamẹ ojlofọndotenamẹ tọn he hiẹ sọgan yizan to whenuena hiẹ to hodọ bo to mẹplọn lẹ. Eyin hiẹ mọ linlin lẹ, sọha nulinlẹn tọn, kavi apajlẹ he hiẹ sọgan yizan to lizọnyizọn towe mẹ to linlinwe kavi linlinnamẹwe de mẹ, sán adà lọ kavi basi vọkan nudọnamẹ lọ tọn. Yí azán lọ, hosọ linlinwe lọ tọn, podọ vlavo yinkọ wekantọ kavi zinjẹgbonutọ lọ tọn dogọ. To opli agun tọn lẹ ji, basi kandai nuagokun hoyijlẹdohogo lẹ tọn po apajlẹ he sọgan gọalọna we nado basi zẹẹmẹ nugbo lọ tọn na mẹdevo lẹ po. Be hiẹ ko lẹnnupọndo apajlẹ dagbe de ji pọ́n ṣigba bo ma tindo dotẹnmẹ hundote lọ nado yí ì zan to afọdopolọji ya? Kàn ẹn dai, bo hẹn ẹn do kandai-sẹdotẹn de mẹ. To mahẹ tintindo to Wehọmẹ Lizọnyizọn Yẹwhehọluduta tọn mẹ na ojlẹ delẹ godo, hiẹ na ko wleawuna nuzedonukọnnamẹ delẹ. Kakati nado ze kandai hodidọ towe tọn helẹ dlán, sẹ̀ yé do. Dodinnanu he hiẹ ko basi sọgan sọawuhia nado yọn-na-yizan to nukọn mẹ.
Dọho hẹ Gbẹtọ Lẹ
Gbẹtọ lẹ yin asisa họakuẹ nudọnamẹ tọn. To whenuena Luku to kandai Wẹndagbe etọn tọn bẹpli, kunnudenu dohia dọ e bẹ nudọnamẹ susu pli gbọn hokinkanse kunnudetọ yinukundomọ lẹ dali. (Luku 1:1-4) Vlavo Klistiani hatọ de sọgan tá hinhọ́n do whẹho de ji he hiẹ ko to vivẹnudo nado basi dodinnanu do e ji. Sọgbe hẹ Efesunu lẹ 4:8, 11-16, Klisti nọ yí ‘nunina to sunnu lẹ mẹ’ zan nado gọalọna mí nado whẹ́n to “oyọnẹn [he pegan] Ovi Jiwheyẹwhe tọn tọn mẹ.” Hokinkanse mẹhe tindo numimọ to Jiwheyẹwhe sinsẹ̀n mẹ enẹlẹ sọgan dè linlẹn yọn-na-yizan lẹ tọ́n. Hodidọ hẹ gbẹtọ lẹ sọgan sọ do nuhe yé to linlẹn hia, podọ ehe sọgan gọalọna we nado wleawuna nudọnamẹ he yọn-na-yizan nugbonugbo.
Keje Kọdetọn Towe lẹ Pọ́n
To likun yiyà godo, okún lọ dona yin dide sọn ofló mẹ. Nudopolọ wẹ e yin na kọdetọn dodinnanu towe tọn. Whẹpo e nido sọgbe na yizan, hiẹ dona de nuhe họakuẹ dovo na nuhe yin lankan.
Eyin hodidọ de mẹ wẹ hiẹ na yí nudọnamẹ lọ zan te, kanse dewe dọ: ‘Be nuagokun he yẹn lẹn nado yizan na yí onú dagbe de dogọ hosọ he yẹn jlo na zedonukọnnamẹ na taun tọn ya? Kavi, dile etlẹ yindọ nudọnamẹ lọ fọnjlodotenamẹ, be e taidi nuhe na lẹ́ ayidonugo sẹ̀ sọn hosọ he ji yẹn dona dọho do lọ wẹ ya?’ Eyin hiẹ to nulẹnpọndo nujijọ agọe tọn lẹ yiyizan ji kavi nudọnamẹ sọn asisa lẹnunnuyọnẹn kavi amasin-zọ́nwiwa tọn he nọ to didiọ tẹgbẹ̀ lẹ mẹ, hẹn ẹn diun dọ nudọnamẹ lọ yin agọe tọn. Yọnẹn ga, dọ nuagokun delẹ to owe hoho mítọn lẹ mẹ sọgan ko yin vivọjlado, enẹwutu gbadopọnna nuhe ṣẹṣẹ yin zinzinjẹgbonu do hosọ lọ ji to agọe.
Nuhudo vonọtaun tin na mẹdehihọ́ eyin hiẹ de nado bẹ nudọnamẹ pli sọn asisa aihọn tọn lẹ mẹ. Ma wọ̀n gbede blo dọ Ohó Jiwheyẹwhe tọn yin nugbo. (Joh. 17:17) Jesu wẹ tin to otẹn tangan lọ mẹ nado hẹn lẹndai Jiwheyẹwhe tọn di. Enẹwutu, Kọlọsinu lẹ 2:3 dọmọ: “Mẹhe mẹ yè yí adọkunnu nuyọnẹn tọn po zìnzìn lẹpo po tọn whlá do.” Keje kọdetọn dodinnanu tọn towe lẹ pọ́n sọn pọndohlan enẹ mẹ. Na nuhe dù dodinnanu aihọn mẹ tọn, kanse dewe dọ: ‘Be owe ehe to hójlẹ zẹjlẹgo wẹ, to hopàdọ wẹ, kavi ma mọnú yì nukọn? Be e yin kinkàn po mẹwhinwhàn ṣejannabi tọn kavi ajọwiwa tọn po wẹ ya? Be asisa dejidego devo lẹ kọngbedopọ hẹ ẹ ya? Hú popolẹpo, be e tin to gbesisọmẹ hẹ nugbo Biblu tọn ya?’
Howhinwhẹn lẹ 2:1-5 na tuli mí nado to oyọnẹn, nukunnumọjẹnumẹ, po wuntuntun po dín zọnmii ‘taidi fataka, podọ taidi adọkunnu whiwhlá lẹ.’ Enẹ bẹ kanvinván po ahọsumẹ susugege lẹ po hẹn. Dodinnanu nọ biọ vivẹnudido, ṣigba wiwà ẹ na gọalọna we nado mọ nuhe yin linlẹn Jiwheyẹwhe tọn do whẹho lẹ ji, nado jla linlẹn agọ̀ lẹ do, podọ nado hẹn nugbo lọ go gligli. E nasọ yí zẹẹmẹ po zohunhun po dogọ nuzedonukọnnamẹ towe lẹ, bo hẹn yé yin awuvivinu nado na podọ homẹhunnu nado sè.