Nawẹ Hiẹ Nọ Namẹ Ayinamẹ Gbọn?

Be mẹdevo lẹ ko kàn ayinamẹ sè we pọ́n ya? Di apajlẹ, be mẹde ko kanse we pọ́n dọ: ‘Etẹwẹ n’na wà? Ma yì nuwiwa lọ tẹnmẹ ya? Ma wà azọ́n ehe ya? Ma biọ họntọn mẹ hẹ omẹ ehe ya?’

Gbẹtọ ahundoponọ lẹ sọgan biọ alọgọ towe nado basi nudide lẹ—yèdọ nudide he sọgan yinuwado haṣinṣan he yé tindo hẹ họntọn lẹ, hagbẹ whẹndo tọn lẹ, podọ etlẹ yin Jehovah ji. Etẹ ji wẹ hiẹ na ze ayinamẹ towe sinai do? To paa mẹ, nawẹ hiẹ nọ na ayinamẹ mẹdevo lẹ gbọn? Vlavo whẹho lọ yin nujọnu kavi lala, Howhinwhẹn lẹ 15:28 dọ dọ, ‘ayiha dodonọ tọn nọ lẹnayihamẹpọn nado gblọn.’ Pọ́n lehe nunọwhinnusẹ́n Biblu tọn atọ́n ehelẹ sọgan gọalọna we do eyin a jlo na na ayinamẹ mẹde.

1 Mọnukunnujẹ Ninọmẹ lọ mẹ Ganji.

“Ewọ he gblọnho jẹnukọnna sisè, nululu po winyan po wẹ na ẹn.”—HOWH. 18:13.

Nado na ayinamẹ dagbe, mí dona mọnukunnujẹ ninọmẹ po pọndohlan mẹhe kàn ayinamẹ biọ lọ tọn po mẹ. Di apajlẹ, eyin mẹde ylọ we bo kàn fie e na gbọn wá owhé towe gbè biọ, etẹwẹ hiẹ dona yọnẹn whẹ́ nado sọgan gọalọ? Be a sọgan jlẹ ali dagbe hugan lọ na ẹn eyin a ma yọ́n fie e tin te ya? E na vẹawu! Mọdopolọ, mí dona yọ́n ninọmẹ po pọndohlan mẹhe to ayinamẹ dín lọ tọn po nado sọgan na anademẹ he sọgbe. Vlavo onú delẹ gando ninọmẹ etọn go he mí ma yọnẹn, ehe ji mí dona lẹnnupọndo whẹpo do na gblọndo. Eyin mí ma mọnukunnujẹ ninọmẹ mẹde tọn mẹ ganji, mí sọgan na ẹn ayinamẹ he na hẹn ẹn jẹflumẹ dogọ.—Luku 6:39.

Yọ́n Obá He mẹ E Ko Basi Dodinnanu Jẹ. E nasọ yin nuyọnẹnnu nado kanse mẹhe to ayinamẹ dín lọ dọ: “Nunọwhinnusẹ́n Biblu tọn tẹlẹ wẹ a lẹndọ e gando whẹho lọ go?” “Adà dagbe kavi ylankan tẹlẹ wẹ nudide voovo he ji a lẹnnupọndo lẹ bẹhẹn?” “Obá tẹ mẹ wẹ a ko basi dodinnanu jẹ?” “Ayinamẹ tẹwẹ mẹdevo lẹ, taidi mẹho agun tọn lẹ, mẹjitọ towe lẹ, kavi mẹhe nọ deanana oplọn towe, ko na we?”

Gblọndo kanbiọ ehelẹ tọn sọgan gọalọna mí nado yọ́n obá he mẹ mẹlọ ko dindonanu jẹ. Podọ mí nasọ yọnẹn eyin nuhe mẹlọ “jlo na sè” wẹ e jlo dọ mí ni dọ. (2 Tim. 4:3) Humọ, mí dona yí nuhe mẹdevo lẹ ko dọna ẹn do lẹnpọn mẹ whẹpo do na ayinamẹ mítọn.

2 Nọ Yì Agbọ́ji.

“Omẹ dopodopo dona nọ yawu nado sè, whleawu nado dọho.”—JAK. 1:19.

Mí sọgan yawu na gblọndo po ahundopo po. Ṣigba be mọwiwà na yin nuyọnẹnnu, titengbe eyin mí to hodọdo whẹho he ji mí ma ko basi dodinnanu susu do de ji ya? Howhinwhẹn lẹ 29:20 dọmọ: “Hiẹ mọ mẹhe yawu to ohó etọn mẹ de? Todido tin na nulunọ hú na ewọ.”

Nọ hẹn ẹn diun dọ ayinamẹ towe tin to kọndopọ mẹ hẹ nuyọnẹn he tin to Ohó Jiwheyẹwhe tọn mẹ. Kanse dewe dọ, ‘Be pọndohlan po “gbigbọ aihọn tọn” po yinuwado linlẹn ṣie ji wẹ ya?’ (1 Kọl. 2:12, 13) Flindọ ayinamẹ nina po ahundopo po kẹdẹ ma ko pé. To whenue apọsteli Pita sè azọ́ndenamẹ sinsinyẹn he Jesu dona hẹndi godo, e na ayinamẹ Jesu dọmọ: “Wàlẹblanu na dewe, Oklunọ; ehe ma na jọ do gowe gbede.” Etẹwẹ mí sọgan plọn sọn nuyiwa Pita tọn mẹ? Mí plọn dọ eyin mí ma tin to aṣeji, nuhe mí dọ po ahundopo po sọgan nọgodona ‘linlẹn gbẹtọ lẹ tọn, e ma yin Jiwheyẹwhe tọn gba.’ (Mat. 16:21-23) Lehe e yin nujọnu dọ mí ni nọ lẹnnupọn whẹpo do dọho do sọ! To popolẹpo mẹ, be numimọ mítọn ma tindo dogbó taun yijlẹdo nuyọnẹn Jiwheyẹwhe tọn go ya?—Job 38:1-4; Howh. 11:2.

3 Whiwhẹ Dewe bo Yí Biblu Zan.

“Yẹn ma nọ wà nudepope sọn ojlo ṣie mẹ; ṣigba yẹn to onú ehelẹ dọ kẹdẹdile Otọ́ lọ plọn mi do.”—JOH. 8:28.

Be hiẹ na dọ dọ, “Eyin yẹn wẹ to otẹn towe mẹ, n’na . . .”? Eyin gblọndo kanbiọ lọ tọn tlẹ họnwun taun, e na yọ́n dọ a ni plọnnu sọn apajlẹ whiwhẹ tọn he Jesu zedai mẹ. Ewọ tindo nuyọnẹn po numimọ po taun hugan gbẹtọvi depope; ṣogan e dọmọ: “Yẹn ma dọho sọn ojlo ṣie titi mẹ gba, ṣigba Otọ́ lọ lọsu . . . wẹ ko degbena mi gando nuhe yẹn dona dọ taun lọ go.” (Joh. 12:49, 50) Nuplọnmẹ po ayinamẹ Jesu tọn lẹ po nọ tin to kọndopọ mẹ hẹ ojlo Otọ́ etọn tọn to whepoponu.

Di apajlẹ, mí hia to Luku 22:49 mẹ dọ devi Jesu tọn lẹ kanse e eyin yé dona yiavùnlọna ẹn to whenue ewọ jlo na yin wiwle. Devi dopo yí ohí zan nado yiavùnlọna ẹn. Doayi e go dọ kandai Matiu 26:52-54 tọn he dọhodo nujijọ dopolọ ji dohia dọ etlẹ yin to ojlẹ sinsinyẹn enẹ mẹ, Jesu yí whenu zan nado do nuhe ojlo Jehovah tọn yin hia devi lọ. Na Jesu yọ́n nunọwhinnusẹ́n he tin to Gẹnẹsisi 9:6 mẹ gọna dọdai Psalm 22 po Isaia 53 po tọn, e penugo nado na anademẹ nuyọnẹn tọn he whlẹn gbẹtọ lẹ bosọ hẹn homẹhun Jehovah.

4 Nọ Yí Owe Sinai Do Biblu ji lẹ Zan.

“Na nugbo tọn, mẹnu wẹ afanumẹ nugbonọ podọ nuyọnẹntọ lọ he oklunọ etọn de do devizọnwatọ whégbè tọn etọn lẹ ji, nado na núdùdù yetọn yé to ojlẹ sisọ mẹ?”—MAT. 24:45.

Jesu ko deazọ́nna pipli afanumẹ dejidego de tọn nado nọ na mí núdùdù gbigbọmẹ tọn. Eyin a jlo na na ayinamẹ kavi anademẹ do whẹho titengbe lẹ ji, be a nọ yí whenu zan nado basi dodinnanu sisosiso to owe sinai do Biblu ji lẹ mẹ ya?

Index des publications Watch Tower po Watchtower Librarya po bẹ nudọnamẹ susu he họnwun lẹ hẹn. Lehe e na yin nuṣiwa do sọ nado yí nukunpẹvi do pọ́n nudọnamẹ họakuẹ ehelẹ! Hosọ fọtọ́n susu wẹ tin to yé mẹ po alọdlẹndonu susu po, he sọgan gọalọna mẹhe to ayinamẹ dín de. Be hiẹ nọ tẹnpọn nado gọalọna mẹdevo lẹ nado dindona nunọwhinnusẹ́n Biblu tọn lẹ bo lẹnnupọndo Ohó Jiwheyẹwhe tọn ji ya? Kẹdẹdile yẹdide alidohiamẹ tọn sọgan gọalọna mẹde nado yọ́n ali he e na gbọn yì fie e jei do, owe sinai do Biblu ji lẹ sọgan gọalọna mẹde nado basi nudide he na hẹn ẹn penugo nado jẹ yanwle ogbẹ̀ madopodo tọn kọ̀n.

Mẹho agun tọn susu ko plọn wẹnlatọ lẹ nado nọ dindonanu to Index po Watchtower Library po mẹ. Gbọnmọ dali, yé nọ gọalọna mẹmẹsunnu po mẹmẹyọnnu yetọn lẹ po nado basi nudide he sinai do Owe-wiwe ji lẹ. Ehe nọ gọalọna wẹnlatọ lẹ nado penukundo nuhahun he yé to pipehẹ lẹ go bosọ wleawuna aṣa lọ nado nọ basi dodinnanu bo nọ ganjẹ awuwledainanu gbigbọmẹ tọn Jehovah tọn lẹ go. To aliho ehe mẹ, yé nọ “plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.”—Heb. 5:14.

5 Nọ Yí Owe Sinai Do Biblu ji lẹ Zan.

“Na nugbo tọn, mẹnu wẹ afanumẹ nugbonọ podọ nuyọnẹntọ lọ he oklunọ etọn de do devizọnwatọ whégbè tọn etọn lẹ ji, nado na núdùdù yetọn yé to ojlẹ sisọ mẹ?”—MAT. 24:45.

To popolẹpo mẹ, mẹdopodopo wẹ dona basi nudide na ede gando ayinamẹ he e na hodo go. Jehovah na mímẹpo mẹdekannujẹ lọ nado de vlavo eyin mí na dike nunọwhinnusẹ́n etọn lẹ ni deanana mí kavi lala. (Deut. 30:19, 20) Ninọmẹ delẹ nọ biọ dọ nunọwhinnusẹ́n Biblu tọn susu ni yin yiyizan, podọ to godo mẹ, mẹhe to ayinamẹ dín lọ wẹ dona basi nudide etọn titi. Sinai do whẹho lọ kavi owhe mẹhe to ayinamẹ mítọn dín lọ tọn ji, e sọgan biọ dọ mí ni kanse míde dọ, ‘Be n’tindo jlọjẹ nado dọhodo whẹho ehe ji ya?’ To whedelẹnu, e sọgan yọ́n hugan nado dọna mẹhe to ayinamẹ dín lọ nado yì mọ mẹho agun tọn lẹ kavi, eyin jọja de wẹ mẹlọ, nado yì mọ mẹjitọ etọn lẹ.

[Nudọnamẹ odò tọn]

[Apotin/Yẹdide to weda 8]

To Sinsẹ̀n-Bibasi Whẹndo Tọn Whenu

To sinsẹ̀n-bibasi whẹndo tọn whenu, naegbọn mì ma na basi dodinnanu nado dín gblọndo kanbiọ he yin kinkanse mì to agọe lẹ tọn? Hosọ po nunọwhinnusẹ́n Biblu tọn tẹlẹ po wẹ sọgan gọalọna mẹhe kàn kanbiọ mọnkọtọn lẹ sè? Di apajlẹ, mí ni dọ dọ mẹmẹsunnu kavi mẹmẹyọnnu de jlo na biọ họntọn mẹ bo kàn ayinamẹ sè. Gbọn Index kavi Watchtower Library yiyizan dali, mì dín hosọ he gandego tlọlọ lẹ jẹnukọn. Di apajlẹ, to Index mẹ, mì sọgan pọ́n hosọ lọ “Fréquentations” [họntọnmẹninọ] kavi “Mariage” [alọwle]. Enẹgodo, mì pọ́n hogo he tin to oglọ yetọn lẹ nado mọ alọdlẹndonu he dọhodo whẹho lọ ji lẹ. Whenue mì to hosọ tangan de pọ́n, mì doayi e go eyin e bẹ hosọ devo he tindo kanṣiṣa hẹ nuhe dín mì te lẹ hẹn to aga.

[Apotin to weda 9]

Mí dopẹ́ dọ titobasinanu Jehovah tọn hẹn ẹn yọnbasi na mí nado na kavi mọ ayinamẹ dagbe hugan lẹ yí. Biblu dọmọ: “Ohó nuyọnẹntọ lẹ tọn nọ taidi opò tlọ́ntlọ́n, podọ taidi oṣó he yin whiwhè do nude mẹ, mọwẹ mẹhe to ohó nuyọnẹn tọn bẹpli lẹ te; lẹngbọhọtọ dopo dè wẹ yé nọ wá sọn.” (Yẹwh. 12:11, NW) Kẹdẹdile “opò tlọ́ntlọ́n” nọ yin yiyizan nado deanana kanlin lẹ do, ayinamẹ dagbe he yin nina po owanyi po nọ deanana ahunjijlọnọ lẹ do ali jijlọ ji. “Oṣó he yin whiwhè do nude mẹ” nọ hẹn nulọ dote. Mọdopolọ, ayinamẹ dagbe nina sọgan hẹn kọdetọn he dẹn-to-aimẹ lẹ wá. Homẹ nuyọnẹntọ lẹ tọn nọ hùn nado gbadopọnna ‘ohó nuyọnẹn tọn he yin bibẹpli lẹ,’ podọ ehe nọ do nuyọnẹn “lẹngbọhọtọ dopo” yetọn, Jehovah tọn hia.

Nọ hodo apajlẹ Lẹngbọhọtọ lọ tọn eyin a to ayinamẹ na. Lẹblanulọkẹyi nankọ die nado nọ dotoai bo nọ na ayinamẹ dagbe lẹ to whedepopenu he dotẹnmẹ lọ hundote! Na nugbo tọn, eyin ayinamẹ mítọn lẹ nọ sinai do nunọwhinnusẹ́n Biblu tọn lẹ ji, yé na gọalọna mẹhe to ayinamẹ dín lọ bo na hẹn ale wá na ẹn kakadoi.