Yọ́n Lehe Hiẹ Dona Nọ Na Gblọndo Do

KANBIỌ delẹ nọ tin taidi atingbó lẹ. Adọ̀ tangan yetọn nọ tin to dòglọ. Enẹ zẹẹmẹdo dọ adọ̀ tangan whẹho de tọn nọ saba yin nujọnu hugan kanbiọ lọ lọsu.

Yèdọ to whenuena apàpà gblọndo tọn to sisọ́ hokansetọ lọ, yinyọ́n lehe hiẹ dona nọ na gblọndo do sọgan bẹ tuntunwun nuhe hiẹ na dọ go po adà whẹho lọ tọn he ji hiẹ na dọhodo po hẹn. (Joh. 16:12) To whẹho delẹ mẹ, dile Jesu dohia apọsteli etọn lẹ do, mẹde sọgan kàn nudọnamẹ he ewọ ma dona yọnẹn kavi he ma na hẹn ale depope wá na ẹn sè.—Owalọ 1:6, 7.

Owe-wiwe na mí ayinamẹ dọmọ: “Mì gbọ hogbe mìtọn ni tin po ojọmiọn po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo do.” (Kọl. 4:6) Enẹwutu, whẹpo mí nido na gblọndo, e mayin nuhe mí na dọ kẹdẹ ji wẹ mí dona lẹnnupọndo gba ṣigba lehe mí na dọ ẹ gbọn ga.

Yọ́n Pọndohlan Hokansetọ lọ Tọn

Sadusi lẹ tẹnpọn nado yí kanbiọ de do dómọwle Jesu gbọn fọnsọnku nawe de tọn he ko wlealọ whlasusu dali. Ṣigba, Jesu yọnẹn dọ yé ma yise to fọnsọnku mẹ na taun tọn gba. Enẹwutu to gbeyiyi etọn mẹ, e na gblọndo kanbiọ yetọn tọn to aliho de mẹ he yinuwa hẹ pọndohlan agọ̀ heyin adọ̀ dodonu tọn lọ na kanbiọ enẹ. Jesu yí hoyijlẹdohogo huhlọnnọ po kandai Owe-wiwe tọn he yé jẹakọ hẹ po zan nado dlẹnalọdo nuhe yé ma ko lẹnnupọndeji pọ́n gbede dai—yèdọ kunnudenu họnwun dọ Jiwheyẹwhe na fọ́n oṣiọ lẹ sọnku na nugbo tọn. Gblọndo etọn paṣa agọjẹdomẹtọ etọn lẹ sọmọ bọ obu di yé nado kàn nudepope biọ ẹ yinukọn dogọ.—Luku 20:27-40.

Nado yọ́n lehe hiẹ dona nọ na gblọndo do, hiẹ sọ dona tunwun pọndohlan po nuhe to ahunmẹduna hokansetọ towe lẹ po go. Di apajlẹ, klasigbẹ́ kavi azọ́nwatọgbẹ́ de sọgan kanse we nuhewutu hiẹ ma nọ basi hùnwhẹ Noẹli tọn. Naegbọn ewọ do kanse? Be whẹwhinwhẹ́n lọ to ahunmẹduna ẹn na nugbo tọn wẹ, kavi e to pipaṣa ẹ poun vlavo eyin hiẹ yin aliglọnna nado dugbẹ wẹ? Nado dindona, e sọgan biọ dọ hiẹ ni kàn nuhe fọ́n kanbiọ lọ dote sè. Enẹgodo na gblọndo dile e jẹ do. Hiẹ sọgan sọ yí dotẹnmẹ hundote lọ zan nado do lehe anademẹ Biblu tọn lẹ hihodo nọ basi hihọ́na mí sọn adà gbọjẹzan tọn enẹlẹ he ko lẹzun agbànpẹnmẹnu bo ko hẹn gbẹtọ lẹ jẹflumẹ si hia.

Mí ni dọ dọ hiẹ yin oylọ-basina nado dọho na pipli wehọmẹvi de tọn dogbọn Kunnudetọ Jehovah tọn lẹ dali. To nuzedonukọnnamẹ towe godo, yé sọgan kàn kanbiọ lẹ sè. Eyin kanbiọ lọ lẹ sọawuhia nado yin ahundopo tọn bo to tlọlọ, gblọndo tlọlọ he bọawu lẹ sọgan yọ́n hugan. Eyin kanbiọ lọ lẹ do nuvẹun hia, e sọgan yọ́n hugan nado basi zẹẹmẹ kleun de jẹnukọnna gblọndo towe dogbọn nuhe sọgan basi vọjladona pọndohlan he mẹsusu tindo do whẹho mọnkọtọn lẹ ji podọ nuhewutu Kunnudetọ Jehovah tọn lẹ dè nado hodo nujinọtedo Biblu tọn dali. E nọ saba yin alemọyinu nado pọ́n kanbiọ mọnkọtọn lẹ hlan taidi hosọ he duahunmẹna yé lẹ, e mayin taidi avùnnukundiọsọmẹ lẹ gba—dile etlẹ yindọ yé sọgan ko yin kinkanse to aliho enẹ mẹ. Enẹwutu, gblọndo towe na hùn dotẹnmẹ lọ dote nado hẹn pọndohlan mẹplidopọ towe lẹ tọn gbloada, bo na yé nudọnamẹ he sọgbe. Humọ hiẹ na penugo nado basi zẹẹmẹ dodonu Owe-wiwe tọn na nuyise mítọn lẹ.

Etẹwẹ na yin nuyiwa towe hlan azọ́nmẹyimẹdotọ he ma jlo nado na we gbọjẹ sọn azọ́nmẹ nado yì plidopọ de? Jẹnukọn whẹ́, lẹnnupọndo onú lẹ ji sọn pọndohlan etọn mẹ. Be didọna ẹn dọ hiẹ na wà ogàngodo-zọ́n to whedevonu sọgan didẹ̀ whẹho lọ ya? Eyin hiẹ basi zẹẹmẹ na ẹn dọ nudọnamẹ he nọ yin nina to plidopọ mítọn lẹ ji nọ gọalọna mí nado yin azọ́nwatọ nugbonọ, he go yè sọgan dejido lẹ, be enẹ sọgan hẹn diọdo de wá ya? Eyin hiẹ dohia dọ hiẹ to dagbenu etọn lẹ ze do lẹnpọn mẹ, vlavo ewọ lọsu na na ayidonugo dagbe hlan nuhe e yọnẹn nado yin onú titengbe to gbẹzan towe mẹ. Ṣigba eyin e jlo dọ hiẹ ni doalọ to nuyiwa nugbomadọ tọn de mẹ ka lo? Gbigbẹ́ to aliho he họnwun mẹ to pọmẹ po pọndohlan Owe-wiwe tọn de didetọ́n po na do teninọ towe hia. Ṣigba be e ma na yọ́n hugan eyin hiẹ yihojlẹdohogo hẹ ẹ jẹnukọn dọ mẹhe jlo nado dolalo kavi jẹajo na ẹn sọgan sọ dolalo na ewọ lọsu kavi jẹajo do e ga ya?

To alọ devo mẹ, vlavo wehọmẹvi de wẹ hiẹ yin bọ a ma jlo na tindo mahẹ to nuwiwa wehọmẹ tọn he sọta Owe-wiwe lẹ mẹ. Flindọ, mẹplọntọ lọ sọgan nọma tindo pọndohlan dopolọ lẹ hẹ we, podọ azọngban etọn wẹ e yin nado hẹnmẹ setonu to klasi. Avùnnukundiọsọmẹ he pannukọn we lẹ wẹ (1) nado na ayidonugo hlan nuhe duahunmẹna ẹn, (2) nado yí sisi do basi zẹẹmẹ teninọ towe tọn, podọ (3) nado kúdo nuhe hiẹ yọnẹn dọ e na hẹn homẹ Jehovah tọn hùn ji. Nado tindo kọdetọn dagbe hugan, e sọgan biọ nususu hugan didọ nuhe hiẹ yise tlọlọ poun. (Howh. 15:28) Eyin yọpọvu wẹ hiẹ yin, matin ayihaawe otọ́ kavi onọ̀ towe na gọalọna we nado wleawuna nuhe hiẹ na dọ.

To whedelẹnu, e sọgan biọ dọ hiẹ ni gbẹ́ owhẹ̀ heyin sisàdokọna we dai gbọn mẹhe tin to otẹn aṣẹpipa tọn de mẹ dali. Pònọ de, ahọluzọnwatọ de, kavi whẹdatọ de sọgan biọ dọ hiẹ ni na gblọndo kanbiọ lẹ tọn dogbọn tonusisena osẹ́n tangan de, teninọ towe na nuhe dù kadaninọ Klistiani tọn, kavi nuyiwa towe dohlan mahẹ tintindo to hùnwhẹ mẹdezejona otò mẹtọn tọn lẹ mẹ dali. Nawẹ hiẹ na na gblọndo gbọn? “To walọmimiọn po osi [sisosiso] po mẹ,” wẹ Biblu na ayinamẹ dọ. (1 Pita 3:15) Humọ, kanse dewe nuhewutu whẹho ehelẹ do duahunmẹna yé, bo gbọn osi dali yigbena ahunmẹdunamẹnu enẹ. Enẹgodo lo? Apọsteli Paulu dlẹnalọdo jlọjẹ hihọ́-basinamẹ osẹ́n Lomu tọn, enẹwutu hiẹ sọgan dlẹnalọdo jlọjẹ sọgbe hẹ osẹ́n he gando whẹho towe go lẹ. (Owalọ 22:25-29) Vlavo nugbo lẹ gando teninọ Klistiani fliflimẹ tọn lẹ po Kunnudetọ Jehovah tọn lẹ lẹdo aihọn pé po go na hẹn pọndohlan ahọluzọnwatọ lọ tọn gbloada dogọ. Kavi hiẹ sọgan dlẹnalọdo lehe aṣẹpipa Jiwheyẹwhe tọn yinyọnẹn nọ whàn gbẹtọ lẹ nado setonuna osẹ́n gbẹtọ tọn he sọgbe lẹ matin yẹnuwiwa do. (Lom. 13:1-14) Eyin ninọmẹ lọ gbọnvona ehe, didọ whẹwhinwhẹ́n Owe-wiwe tọn lẹ na teninọ towe sọgan yin alọkẹyi to aliho dagbe mẹ.

Nukun He Hokansetọ lọ Nọ Yí Do Pọ́n Owe-Wiwe

To dide lehe gblọndo na yin nina do whenu, hiẹ sọgan sọ tindo nuhudo nado lẹnnupọndo nukun he hokansetọ towe nọ yí do pọ́n Owe Wiwe ji. Jesu wà ehe to whenuena e to gblọndo na na kanbiọ Sadusi lẹ tọn gando fọnsọnku go. To yinyọnẹn mẹ dọ wekinkan Mose tọn lẹ kẹdẹ wẹ yé kẹalọyi, Jesu yihojlẹdohogo do kandai he tin to Pẹntateki mẹ de ji, bo bẹ hodidọ etọn lẹ jẹeji gbọn didọ dali dọmọ: “Ṣigba dọ yè fọ́n oṣiọ, yèdọ Mose dohia.” (Luku 20:37) Hiẹ lọsu sọgan mọ ẹn yin alenu nado yihodọ sọn adà Biblu tọn he todoaitọ towe kẹalọyi bo jẹakọ hẹ lẹ mẹ.

Etẹwẹ eyin todoaitọ towe ma dejido Biblu go? Doayi nuhe apọsteli Paulu wà to hodidọ etọn mẹ to Alẹọpagu, dile e yin kinkàndai to Owalọ lẹ 17:22-31 mẹ do go. E má nugbo Owe-wiwe tọn lẹ hẹ yé matin hoyidọ tlọlọ sọn Biblu mẹ. Hiẹ sọgan wà nudopolọ to fie e biọ domọ te. To fidelẹ e sọgan biọ dọ hiẹ ni dọho whlasusu hẹ mẹde whẹpo do basi alọdlẹndonu tlọlọ tọn hlan Biblu. Eyin hiẹ wá dlẹnalọdo Biblu, e sọgan yin nuyọnẹnnu to tintan whenu nado dọ whẹwhinwhẹ́n delẹ he wutu e do jẹ na dogbapọn kakati nado dọ ẹ po nujikudo po dọ Ohó Jiwheyẹwhe tọn wẹ e yin. Nalete, yanwle towe dona yin nado na kunnudenu he họnwun dogbọn lẹndai Jiwheyẹwhe tọn dali podọ, to nukọn mẹ, nado dike todoaitọ towe ni mọ nuhe Biblu dọ na ede. Biblu nọ diọ linlẹn namẹ hugan nudepope he mílọsu lẹ sọgan dọ.—Heb. 4:12.

‘Po Dagbewanyi po to Whepoponu’

Po gbesisọ po, na Jehovah yin dagbewanyinọ wutu, devizọnwatọ etọn lẹ yin didọna nado dike hogbe yetọn lẹ ni yin “po [dagbewanyi] po to whepoponu, ehe ojẹ̀ pe.” (Kọl. 4:6; Eks. 34:6) Ehe zẹẹmẹdo dọ mí dona nọ dọho po homẹdagbe po, etlẹ yin to whenuena e sọgan taidi nuhe mẹlọ ma jẹna. Hogbe mítọn lẹ dona jọmẹ, e mayin po fifiẹ po kavi to aliho nululu tọn mẹ gba.

Mẹsusu tin to kọgbidinamẹnu daho glọ, bọ yé nọ tindo numimọ mẹzunzun tọn egbesọegbesọ. Omẹ mọnkọtọn lẹ sọgan dọho po fifiẹ po to whenuena mí dla yé pọ́n. Etẹwẹ dona yin gbeyiyi mítọn? Biblu dọmọ: “Hogbe dẹẹdẹ nọ lẹ́ homẹgble sẹ̀.” Hogbe mọnkọtọn sọgan sọ fahomẹna mẹhe tindo pọndohlan agọ̀ de. (Howh. 15:1; 25:15) Walọyizan po kọnugbè he do homẹdagbe hia po sọgan dọ̀n mẹhe nọ tindo numimọ hodidọ kanyinylan tọn egbesọegbesọ lẹ dogo sọmọ bọ yé sọgan dotoaina wẹndagbe he mí hẹnwa lọ.

Mí ma tindo ojlo to nudindọn hẹ mẹhe ma nọ do sisi hia na nugbo lẹ mẹ gba. Kakatimọ, ojlo mítọn wẹ nado yihojlẹdohogo sọn Owe-wiwe mẹ hẹ mẹhe na na mí dotẹnmẹ nado wàmọ lẹ. Mahopọnna ninọmẹ he mí pehẹ, mí ni hẹn ẹn do ayiha mẹ dọ mí dona nọ na gblọndo nujikudo tọn po homẹdagbe po dọ opagbe họakuẹ Jiwheyẹwhe tọn lẹ yin dehe go yè sọgan dejido.—1 Tẹs. 1:5.

Nudide Mẹdetiti Tọn lẹ po Whẹho Ayihadawhẹnamẹnu Tọn lẹ Po

Eyin Biblu plọntọ de kavi yisenọ hatọ de kàn nuhe ewọ dona wà to ninọmẹ tangan de mẹ sè, etẹwẹ na yin gblọndo towe? Hiẹ sọgan yọ́n nuhe hiẹ na dewe titi na wà. Ṣigba mẹdopodopo wẹ dona hẹn agbàn nudide etọn titi lẹ tọn to gbẹ̀mẹ. (Gal. 6:5) Apọsteli Paulu basi zẹẹmẹ dọ emi na tuli “tonuse yise tọn” hlan mẹhe ewọ dọyẹwheho na lẹ. (Lom. 16:26) Apajlẹ dagbe de wẹ enẹ yin na mí nado hodo. Mẹhe nọ basi nudide kiki nado hẹn homẹ mẹplọntọ Biblu tọn etọn kavi gbẹtọvi devo de tọn hùn to gbẹtọ sẹ̀n, e ma to gbẹnọ gbọn yise dali gba. (Gal. 1:10) Enẹwutu, gblọndo tlọlọ he bọawu sọgan nọ ma hẹn pekọ wá na mẹhe to ohó lọ kanse.

Eyin mọwẹ, nawẹ hiẹ sọgan yigbe to aliho he sọgbe hẹ anademẹ Biblu tọn lẹ gbọn? Hiẹ sọgan dọ̀n ayidonugo wá nunọwhinnusẹ́n Biblu tọn he sọgbe lẹ po apajlẹ he tin to kandai Biblu tọn mẹ lẹ po ji. To whẹho delẹ mẹ, hiẹ sọgan do lehe yè nọ basi dodinnanu do hia ẹ na e nido sọgan dín nunọwhinnusẹ́n po apajlẹ enẹlẹ po mọ na ede. Hiẹ tlẹ sọgan dọhodo nunọwhinnusẹ́n lọ lẹ po nuhọakuẹ-yinyin apajlẹ lọ lẹ tọn po ji ṣigba ma yí yé zan na ninọmẹ he to aimẹ lọ blo. Kanse mẹlọ eyin ewọ mọ nude he sọgan gọalọna ẹn nado basi nudide nuyọnẹn tọn to yé mẹ. Na ẹn tuli nado lẹnnupọndo nuhe na hẹn homẹ Jehovah tọn hùn ji sinai do nunọwhinnusẹ́n po apajlẹ ehelẹ po ji. Gbọnmọ dali hiẹ to alọgọna ẹn nado ‘plọn huhlọn nulẹnpọn etọn titi lẹ nado yọ́n vogbingbọn to dagbe po oylan po ṣẹnṣẹn.’—Heb. 5:14.

Gblọndo Nina to Opli Agun Tọn lẹ Ji

Opli agun Klistiani tọn lẹ nọ saba wleawuna dotẹnmẹ hundote lẹ na mí nado basi ogbeyí gbangba tọn na yise mítọn. Aliho dopo he mẹ mí nọ wà enẹ te wẹ gbọn gblọndo nina hlan kanbiọ lẹ dali. Nawẹ mí dona na gblọndo gbọn? Po ojlo de po nado dona Jehovah, kavi dọho dagbe gando ewọ go. Nuhe psalm-kantọ Davidi wà niyẹn to whenuena e tin ‘to pipli gbẹtọgun lẹ tọn mẹ.’ (Ps. 26:12) Mílọsu lẹ dona nọ na gblọndo to aliho he na nọ na tuli hatọ yisenọ lẹ mẹ, bo whàn yé hlan “owanyi po azọ́n dagbe lẹ po” kọ̀n, dile apọsteli Paulu dotuhomẹnamẹ do. (Heb. 10:23-25) Awuwiwle jẹnukọn sọn whégbè sọgan gọalọna mí nado basi wadotana ehe tọn.

Eyin hiẹ yin yiylọ nado na gblọndo, hẹn hodidọ towe lẹ bọawu, họnwun, podọ do glido. Ma dọhodo hukan lọ blebu ji blo; dọhodo nuagokun dopo poun ji. Eyin hiẹ na apadewhe gblọndo lọ tọn poun, enẹ na na mẹdevo lẹ dotẹnmẹ hundote lọ nado basi zẹẹmẹ dogọ lẹ. Na taun tọn, alemọyinu wẹ e yin nado zinnudo wefọ heyin dide to hukan lọ mẹ lẹ ji. To mọwiwà whenu, dovivẹnu nado dọ̀n ayidonugo wá adà wefọ he yọn-na-yizan na nuagokun he to yinyin dogbapọnna lọ ji. Plọn nado nọ na gblọndo to hogbe towe titi lẹ mẹ kakati nado nọ hia ẹ tlọlọ sọn hukan lọ mẹ. Ma yin tuklado blo eyin hiẹ ma na gblọndo lọ to aliho he sọgbe pẹpẹ mẹ. Enẹ nọ jọ to whedelẹnu do mẹlẹpo he to gblọndo na go.

E họnwun dọ yinyọ́n lehe mí dona nọ na gblọndo do bẹ hugan gblọndo lọ lọsu yinyọnẹn hẹn. E nọ biọ wuntuntun. Ṣigba lehe e nọ hẹn pekọ wá do sọ eyin hiẹ na gblọndo he wá sọn ahun towe mẹ bo yinuwado ahun mẹdevo lẹ tọn ji!—Howh. 15:23.