Tito-to-Whinnu Na Awuwiwlena Nugopipe Taidi Hodọtọ po Mẹplọntọ Po

VLAVO yọpọvu kavi mẹho de wẹ hiẹ yin, sunnu kavi yọnnu, nuplọnmẹ ehe sọgan gọalọna we nado dọho po kọdetọn dagbe dogọ po bo lẹzun mẹhe pegan ganji taidi mẹplọntọ Ohó Jiwheyẹwhe tọn tọn.

Azọ́n lẹ na nọ yin didena mẹhe ze yinkọ dai to Wehọmẹ Lizọnyizọn Yẹwhehọluduta tọn mẹ lẹ gbọn nugopọntọ wehọmẹ tọn dali. To weda atọ̀n he bọdego lẹ ji, hiẹ na mọ owe ayinamẹ tọn towe titi. Sọha he jẹnukọnna jẹhẹnu hodidọ tọn voovo lẹ yin sọha nupinplọn lọ tọn to weda he bọdego lẹ ji. To nupinplọn enẹlẹ mẹ hiẹ na mọ zẹẹmẹ nuhe adà hodidọ po mẹpinplọn tọn ehelẹ po yinyọnẹn bẹhẹn tọn podọ nuhewutu dopodopo do yin nujọnu. Hiẹ nasọ mọ anademẹ alọgọnamẹ tọn gando lehe hiẹ na basi wadotana ayinamẹ he to yinyin nina lọ tọn do go.

Ohia sinmẹnọ he tin to owe ayinamẹ tọn lọ ji dlẹnalọdo jẹhẹnu hodidọ tọn he yọn-na-yizan na azọ́ndenamẹ he bẹ (1) wehihia na mẹplidopọ lẹ, (2) wadohia hẹ omẹ awe kavi humọ, kavi (3) hodidọ na agun lọ hẹn. Nugopọntọ wehọmẹ tọn na de jẹhẹnu hodidọ tọn he ji hiẹ na wazọ́n do. E yọ́n hugan nado wazọ́n do jẹhẹnu hodidọ tọn dopo ji to ojlẹ dopo mẹ. Hiẹ na mọaleyi gbọn hihodo ayinamẹ heyin nina to vivọnu oplọn heyin didenamẹ lọ tọn lẹ dali. Eyin hiẹ do kunnudenu hia dọ hiẹ ko yí ayinamẹ he tin to oplọn heyin didena we mẹ lọ do yizan mẹ po kọdetọn dagbe po, ayinamẹtọ towe na de jẹhẹnu hodidọ tọn devo na we.

Eyin azọ́ndenamẹ towe dona yin nukunpedego taidi wadohia de, hiẹ dona basi tito lehe wadohia lọ na yin bibasi do tọn. Todohukanji lehe wadohia lẹ na yin bibasi do tọn sọawuhia to weda 82 ji, ṣigba e mayin todohukanji ehe kẹdẹ wẹ hiẹ sọgan yizan gba. Ayinamẹtọ towe sọgan na ayinamẹ dọ hiẹ ni tẹ́n aliho wadohia bibasi tangan de tọn pọ́n nado sọgan tindo numimọ, kavi e sọgan dike hiẹ ni basi nudide lọ.

Owe ehe hihia po hihodo ayinamẹ lọ lẹ po etlẹ yin to whenuena hiẹ ma to awuwlena azọ́ndenamẹ wehọmẹ tọn lẹ sọgan yidogọna nukọnyiyi towe tlala. Vlavo hiẹ sọgan gbadopọnna oplọn dopo to osẹ dopodopo mẹ.

Mahopọnna lehe e ko dẹ̀n sọ bọ hiẹ ko to mahẹ tindo to wehọ lọ mẹ kavi to mahẹ tindo to lizọnyizọn kunnudegbe tọn mẹ, dotẹnmẹ gbẹ́ tin na nukọnyiyi. Na hiẹ ni mọaleyi to gigọ́mẹ sọn nuplọnmẹ he nọ yin awuwlena gbọn Wehọmẹ Lizọnyizọn Yẹwhehọluduta tọn gblamẹ.