Do Ojlo Hia to Mẹdevo Mẹ

TO WHENUENA mí to nugbo Biblu tọn má hẹ mẹdevo lẹ, mí dona wà nususu hugan hodidọ poun. Mí dona biọ ahun yetọn mẹ. Aliho dopo nado wà ehe wẹ yin ojlo ahundoponọ mẹdetiti tọn didohia todoaitọ mítọn lẹ. Ojlo mọnkọtọn sọgan yin didohia to aliho voovo lẹ mẹ.

Lẹnnupọndo Pọndohlan Todoaitọ Towe lẹ Tọn Ji. Apọsteli Paulu nọ lẹnnupọndo fie todoaitọ etọn lẹ wá sọn po pọndohlan yetọn lẹ po ji. E basi zẹẹmẹ dọmọ: “Hlan Ju lẹ yẹn lẹ́ dee zun Ju de, na yẹn nido duale Ju lẹ tọn: hlan yé he tin to osẹ́n glọ lẹ, taidi to osẹ́n glọ, na yẹn nido duale yé he tin to osẹ́n glọ lẹ tọn; hlan yé he tin matin osẹ́n lẹ, taidi matin osẹ́n, he ma tin matin osẹ́n hlan Jiwheyẹwhe, ṣigba to osẹ́n glọ hlan Klisti, na yẹn nido duale yé he tin matin osẹ́n lẹ tọn; hlan madogánnọ lẹ yẹn lẹzun madogánnọ, na yẹn nido duale madogánnọ lẹ tọn: yè yí mi do basi onú popo hlan gbẹtọ lẹpo, na yẹn nido gbọn onú popo mẹ whlẹn pẹvide gán. Na wẹndagbe tọn wutu wẹ yẹn to ehe wà, na yẹn nido yin mimátọ to e mẹ hẹ mì.” (1 Kọl. 9:20-23) Nawẹ mí sọgan ‘lẹzun onú popo hlan gbẹtọ lẹpo’ to egbehe gbọn?

Eyin a tindo dotẹnmẹ hundote lọ nado doayi mẹdevo lẹ go, etlẹ yin na ojlẹ gli de whẹpo do dọho hẹ yé, a sọgan yọ́n nude gando ojlo po ninọmẹ yetọn lẹ po go. Be a sọgan dọ azọ́n he yé nọ wà ya? Be a mọ kunnudenu nuyise sinsẹ̀n yetọn tọn depope ya? Be nudepope do ninọmẹ whẹndo yetọn tọn hia ya? Be a sọgan diọadana nuzedonukọnnamẹ towe sọgbe hẹ nuhe go a doayi lẹ, nado hẹn ẹn yin ojlofọndotenamẹnu dogọ na todoaitọ towe lẹ ya?

Hinhẹn nuzedonukọnnamẹ towe yin ojlofọndotenamẹnu na biọ dọ a ni lẹnnupọn jẹnukọn do lehe a na dọnsẹpọ gbẹtọ lẹ to aigba-denamẹ mìtọn ji do. To fidelẹ, ehe nọ bẹ jonọ he wá sọn aigba devo lẹ ji hẹn. Eyin jonọ mọnkọtọn lẹ nọ nọ̀ aigba-denamẹ mìtọn ji, be a ko mọ aliho de nado dekunnuna yé po kọdetọn dagbe po ya? To whenuena e yindọ ojlo Jiwheyẹwhe tọn wẹ e yin dọ “wunmẹ gbẹtọ lẹpo tọn ni yin whinwhlẹngán bo wá oyọnẹn he sọgbe nugbo tọn kọ̀n,” yí ì do basi yanwle towe nado ze owẹ̀n Ahọluduta lọ tọn donukọnnamẹ to aliho he na dọ̀n mẹhe a dukosọ hẹ lẹpo dogo mẹ.—1 Tim. 2:4, NW.

Dotoai po Sọwhiwhe Po. Dile etlẹ yindọ Jehovah nọ yọn nuhe na wà e te lẹpo, e nọ dotoaina mẹdevo lẹ. Yẹwhegán Mikaia mọ numimọ de to ehe mẹ Jehovah to tulina angẹli lẹ nado dọ linlẹn yetọn lẹ do lehe whẹho de na yin nukunpedego gbọn ji. To enẹgodo, Jiwheyẹwhe na dotẹnmẹ dopo to angẹli lọ lẹ mẹ nado wà nuhe angẹli lọ ko na ayinamẹ etọn. (1 Ahọ. 22:19-22) To whenuena Ablaham do ahunmẹdunamẹnu etọn hia do whẹdida he na yin hinhẹnṣẹ do Sọdọmi ji, Jehovah gbọn homẹdagbe dali dike ni dọ numọtolanmẹ etọn. (Gẹn. 18:23-33) To lizọnyizọn mítọn mẹ, nawẹ mí sọgan hodo apajlẹ Jehovah tọn to todidoai mẹ gbọn?

Na tuli mẹdevo lẹ nado dọ linlẹn yetọn lẹ. Nọ kàn kanbiọ he sọgbe sè, bo nọ na yé dotẹnmẹ ganji nado na gblọndo. Dotoai ganji. Ayidonugo mẹtọnhopọn tọn towe na na yé tuli nado dọho po awuvivo po. Eyin gblọndo yetọn do nude hia dogbọn dagbemẹ-ninọ yetọn dali, yí zìnzìn do kanhose yinukọn dogọ. Ma tẹnpọn nado mọdona aṣlihó yetọn lẹ blo, ṣigba dovivẹnu nado yọ́n yé ganji. Na pipà yé na nuhe yé dọ eyin a sọgan wàmọ po ahundopo po. Eyin a ma tlẹ kọngbedopọ hẹ pọndohlan yetọn, yí homẹdagbe do yọ́n pinpẹn nuhe yé dọ tọn.—Kọl. 4:6.

Ṣigba mí dona payi, ma nado dike ojlo he mí tindo to gbẹtọ lẹ mẹ ni zẹ̀pá. Yinyin ahunmẹduna dogbọn mẹdevo lẹ dali ma na mí aṣẹ nado nọ dín tintlindo aṣli yetọn lẹ tọn gba. (1 Pita 4:15) Mí dona họ́ míde na omẹ vijinu awetọnọ de ni ma do mọnukunnujẹ ojlo dagbe he mí to didohia mẹ to aliho agọ̀ mẹ. To whenuena e yindọ nuhe nọ yin pinpọnhlan taidi ojlo he sọgbe tintindo to mẹdevo lẹ mẹ to otò de mẹ gbọnvona devo tọn, podọ to pọndohlan gbẹtọ lẹ tọn mẹ, wuntuntun dona yin yiyizan.—Luku 6:31.

Awuwle na gọalọna mí nado yin todoaitọ dagbe. Eyin mí mọnukunnujẹ owẹ̀n mítọn mẹ hezeheze, e nọ gọalọna mí nado voawu bo na ayidonugo mẹdevo lẹ to jọwamọ-liho. Ehe nọ hẹn yé voawu bo sọgan hẹn yé tindo ojlo dogọ nado dọho hẹ mí.

Mí nọ gbògbéna mẹdevo lẹ gbọn todidoai na yé dali. (Lom. 12:10) E nọ na kunnudenu dọ mí yọ́n pinpẹn linlẹn po numọtolanmẹ yetọn lẹ po. E tlẹ sọgan whàn yé nado na ayidonugo pẹkipẹki nuhe mí tindo nado dọ. Enẹwutu e sọgbe dọ Ohó Jiwheyẹwhe tọn ni na ayinamẹ mí nado “nọ yawu nado sè, [bo nọ] whleawu nado gblọn.”—Jak. 1:19.

Gọalọna Mẹdevo lẹ Nado Yinukọn. Mẹdevo lẹ tọn hihopọn na whàn mí nado nọ lẹnnupọndo mẹhe do ojlo hia lẹ ji bo na nọ basi gọyìpọn na yé, nado sọgan má nugbo Biblu tọn he sọgbe hẹ nuhudo yetọn lẹ hẹ yé. To whenuena a to awuwlena dlapọn he na bọdego, lẹnnupọndo nuhe go a doayi dogbọn dali yetọn to dlapọn he wayi lẹ whenu. Wleawuna nudọnamẹ do hosọ he to ahunmẹduna yé ji. Zinnudo nuhọakuẹ yọn-na-yizan nudọnamẹ lọ tọn ji, bo gọalọna yé nado mọ lehe yé sọgan mọaleyi sọn nuhe plọn yé te mẹ do.—Isa. 48:17.

Eyin hosetọ towe hùngona ninọmẹ kavi nuhahun he ko to tuklado e de, pọ́n ehe hlan taidi dotẹnmẹ hundote vonọtaun de nado má wẹndagbe lọ hẹ ẹ. Hodo apajlẹ Jesu tọn, mẹhe nọ tin to awuwle mẹ whepoponu nado miọnhomẹna ayimajainanọ lẹ. (Malku 6:31-34) Họ́ dewe sọta whlepọn lọ nado wleawuna pọngbọ afọdopolọji tọn kavi nado na ayinamẹ he ma whèwhín. Ehe sọgan hẹn omẹ lọ nado lẹndọ a ma tindo ojlo nujọnu tọn to emi mẹ. Kakatimọ, do awuvẹmẹ hia. (1 Pita 3:8) Enẹgodo basi dodinnanu to owe sinai do Biblu ji lẹ mẹ, bo wleawuna nudọnamẹ mẹjlọdote tọn he na gọalọna omẹ lọ nado dù to nuhahun etọn ji. Na nugbo tọn, mẹtọnhopọn owanyinọ tintindo na hosetọ towe na glọnalina we ma nado dọ aṣlihó he e dọna we lẹ tọ́n adavo eyin whẹwhinwhẹ́n dagbe tin nado wàmọ.—Howh. 25:9.

Na taun tọn, mí dona do ojlo mẹdetiti tọn hia plọnmẹ Biblu mítọn lẹ. Nọ hodẹ̀ do nuhudo nuplọntọ dopodopo tọn tamẹ, bo nọ wleawuna oplọn lọ po nuhudo enẹlẹ po to ayiha mẹ. Kanse dewe dọ, ‘Afọdide devo tẹwẹ e dona ze nado to nukọn yì zọnmii to gbigbọmẹ?’ Yí owanyi do gọalọna nuplọntọ lọ nado mọnukunnujẹ nuhe Biblu po owe “afanumẹ nugbonọ, nuyọnẹntọ” lọ tọn lẹ po dọ do whẹho lọ ji mẹ. (Mat. 24:45) To ninọmẹ delẹ mẹ, zẹẹmẹ bibasi do whẹho lọ ji poun sọgan nọma ko pé. E sọgan biọ dọ a ni dohia nuplọntọ lọ lehe e na yí nunọwhinnusẹ́n Biblu tọn delẹ zan do, po afọdide he e na ze nado dohia dọ e to yé yizan po.—Joh. 13:1-15.

E biọ jlẹkajininọ po wuntuntun po to whenuena mí to alọgọna mẹdevo lẹ nado hẹn gbẹzan yetọn lẹ sọgbe hẹ nujinọtedo Jehovah tọn lẹ. Gbẹtọ lẹ wá sọn ofi voovo lẹ bo tindo nugopipe he gbọnvo, podọ nukọnyiyi yetọn ma nọ yin to obá dopolọ mẹ gba. Enẹwutu, yin lẹnpọn dagbenọ to nuhe a to nukundo sọn mẹdevo lẹ si mẹ. (Flp. 4:5) Ma hẹn yé gánnu-gánnu nado basi diọdo lẹ to gbẹzan yetọn mẹ blo. Dike Ohó Jiwheyẹwhe tọn po gbigbọ etọn po ni whàn yé. Jehovah jlo dọ gbẹtọ lẹ ni desọn ojlo mẹ wá bo sẹ̀n emi po ahun lẹpo po, e mayin to mananọmawà glọ gba. (Ps. 110:3) To whenuena yé dona basi nudide mẹdetiti tọn lẹ, dapana linlẹn towe titi didọ na yé, podọ eyin mẹdevo lẹ tlẹ biọ dọ a ni wàmọ, payi ma nado basi nudide lẹ do alọmẹ na yé.—Gal. 6:5.

Na Alọgọ He Yọn-na-Yizan. Dile etlẹ yindọ dagbemẹ-ninọ gbigbọmẹ todoaitọ etọn lẹ tọn wẹ nọ duahunmẹna Jesu jẹnukọn, e sọ nọ tin to lẹnpọn mẹ na nuhudo yetọn devo lẹ ga. (Mat. 15:32) Eyin mí ma tlẹ tindo nususu sọmọ to alọnu, aliho dagbe susu tin he mẹ mí sọgan gọalọ te.

Ojlo tintindo to mẹdevo lẹ mẹ na whàn mí nado yin mẹtọnhopọntọ. Di apajlẹ, eyin ninọmẹ aimẹ tọn to tukladona hosetọ towe, a sọgan sẹtẹn jẹ fihe pọnte hugan, kavi basi tito nado zindonukọn to hodọdopọ lọ mẹ to whedevonu. Eyin a basi dlapọn to ojlẹ he mẹ alọnu etọn ján, biọ nado lẹkọwa to ojlẹ devo mẹ. Eyin kọmẹnu kavi jlodotọ de to azọ̀njẹ kavi tin to dotowhé, do mẹtọnhopọn hia gbọn kalti nudọdomẹ tọn kavi wekanhlanmẹ kleun de didohlan ẹn dali kavi a ni dla ẹ pọ́n. A sọgan sọ wleawuna núdùdù kleun de kavi wà nuhe jọmẹ devo lẹ eyin e sọgbe nado wàmọ.

Dile Biblu plọntọ lẹ to nukọnyi, yé sọgan tindo numọtolanmẹ ṣokẹdẹninọ tọn na yé ma to whenu susu sọmọ yizan hẹ gbẹdohẹmẹtọ yetọn dai tọn lẹ ba wutu. Jihọntọn hẹ yé. Yí whenu zan nado dọho hẹ yé to plọnmẹ Biblu yetọn godo podọ to ojlẹ devo lẹ mẹ. Na tuli yé nado wleawuna gbẹdido dagbe lẹ. (Howh. 13:20) Gọalọna yé nado yì opli Klistiani tọn lẹ. Nọ sinai hẹ yé to opli lẹ ji, bo nọ gọalọna yé nado penukundo ovi yetọn lẹ go na mẹlẹpo nido sọgan mọaleyi to gigọ́mẹ sọn tito-to-whinnu lọ mẹ.

Do Ojlo Hia sọn Ahun mẹ Wá. Ojlo tintindo to gbẹtọ lẹ mẹ mayin azọ́n he nọ yin pinplọn gba, ṣigba jẹhẹnu he nọ wá sọn ahun mẹ wẹ e yin. Lehe ojlo mítọn to mẹdevo lẹ mẹ siso sọ nọ sọawuhia to aliho susu mẹ. E nọ sọawuhia to lehe mí to todoai do mẹ podọ to nuhe mí to didọ mẹ. E nọ sọawuhia to homẹdagbe po mẹtọnhopọn he mí dohia mẹdevo lẹ po mẹ. Eyin mí ma tlẹ dọho kavi wà nudepope, e nọ sọawuhia to walọyizan po dohia nukunta tọn mítọn lẹ po mẹ. Eyin mí nọ hò mẹdevo lẹ tọn pọ́n nugbonugbo, matin ayihaawe yé na yọnẹn.

Whẹwhinwhẹ́n titengbe hugan he wutu mí dona do ojlo ahundoponọ hia to mẹdevo lẹ mẹ wẹ yindọ, mọwiwà nọ dohia dọ mí hodo apajlẹ owanyi po lẹblanu Otọ́ olọn mẹ tọn mítọn po tọn. Ehe nọ gọalọna mí nado dọ̀n hosetọ mítọn lẹ sẹpọ Jehovah po owẹ̀n he e ko ze do alọmẹ na mí nado hẹn gbayipe po. Enẹwutu, dile a to wẹndagbe lọ má hẹ mẹdevo lẹ, dovivẹnu ma nado nọ pọ́n ‘onú he yin towe kẹdẹ go, ṣigba . . . onú he yin mẹdevo tọn ga.’—Flp. 2:4.