Hodidọ po Nujikudo Po

TO WHENUENA mẹde dọho po nujikudo po, mẹdevo lẹ nọ mọ dọ e yí nuhe dọ e te sè mlẹnmlẹn. Nujikudo mọnkọtọn sọawuhia to lizọnyizọn apọsteli Paulu tọn mẹ. E wlanwe hlan mẹhe lẹzun yisenọ to Tẹsalonika lẹ dọmọ: “Wẹndagbe mítọn ma wá mì de to ohó kẹdẹ mẹ gba, ṣigba to [nujikudo dolido] mẹ ga.” (1 Tẹs. 1:5) Nujikudo enẹ sọawuhia to aliho he mẹ e nọ dọho te podọ to aliho gbẹninọ etọn tọn mẹ. Nujikudo dolido dona sọawuhia to aliho he mẹ mí nọ ze nugbo Biblu tọn lẹ donukọnnamẹ te ga.

Nujikudo didohia ma zẹẹmẹdo dọ a dona nọ tẹdo linlẹn towe titi lẹ go, bo yin hẹngogonọ kavi goyitọ gba. Kakatimọ, to whenuena mẹhe tindo nujikudo to hodọ gando nuhe tin to Ohó Jiwheyẹwhe tọn mẹ lẹ go, hodidọ etọn nọ do yise dolido hia.—Heb. 11:1.

Whenue Nujikudo Dona Yin Didohia Lẹ. Nujọnu wẹ e yin nado dọho po nujikudo po to whenue a tin to kunnudegbe. Gbẹtọ lẹ nọ saba doayi aliho he mẹ a to hodọ te go hugan owẹ̀n towe. Yé nọ mọ nuhe yin numọtolanmẹ towe gando nuhe dọ a te go. Nujikudo towe sọgan dohia dọ a tindo nuhe họakuẹ tlala de nado má hugan lehe hogbe lẹ kẹdẹ na wà do.

Nujikudo sọ dona yin didohia to hodidọ na yisenọ hatọ lẹ whenu. Apọsteli Pita wlan wekanhlanmẹ gbọdo etọn tintan ‘nado na tulimẹ bo dekunnu dọ ehe wẹ nugbo ojọmiọn Jiwheyẹwhe tọn.’ To ehe mẹ, e dotuhomẹna mẹmẹsunnu lẹ dọmọ: “Mì nọte [gli].” (1 Pita 5:12) To wekinkan hlan agun he tin to Lomu whenu, apọsteli Paulu do nujikudo he hẹn ale wá na yé hia. E wlan dọmọ: “Yè hẹn mi yọnẹn dọ, okú, kavi ogbẹ̀, kavi angẹli lẹ, kavi ogán lẹ, kavi huhlọn lẹ, kavi onú whenu he tọn lẹ, kavi onú he ja lẹ. Kavi aga, kavi odò, kavi nudida devo de ma na tin sọgan nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ gba.” (Lom. 8:38, 39) Paulu sọ wlanwe po nujikudo po gando dandannu lọ go nado dọyẹwheho na mẹdevo lẹ, podọ zohunhun etọn to lizọnyizọn lọ mẹ na kunnudenu họnwun dọ ewọ lọsu yọ́n nujọnu-yinyin etọn. (Owalọ 20:18-21; Lom. 10:9, 13-15) To egbehe, mẹho agun tọn lẹ dona do nujikudo mọnkọtọn hia dile yé to mẹplọn sọn Ohó Jiwheyẹwhe tọn mẹ.

To oplọn whenu podọ to ojlẹ devo lẹ mẹ, mẹjitọ lẹ dona nọ dọho po nujikudo po to whenuena yé to hodọdo onú gbigbọmẹ tọn lẹ ji hẹ ovi yetọn lẹ. Ehe nọ biọ dọ mẹjitọ lẹ ni yiwanna Jiwheyẹwhe po aliho etọn lẹ po to ahun yetọn mẹ. Enẹgodo yé na penugo nado dọho po nujikudo po na ovi yetọn lẹ, ‘na sọn susugege ayiha tọn mẹ wẹ onù nọ dọ.’ (Luku 6:45; Deut. 6:5-7) Nujikudo mọnkọtọn tintindo nasọ whàn mẹjitọ lẹ nado ze apajlẹ ‘yise matin yẹnuwiwa’ tọn de dai.—2 Tim. 1:5.

Na taun tọn, nujọnu wẹ e yin nado dọho po nujikudo po to whenuena yise towe yin whiwhlepọn. Wehọmẹvigbẹ́, mẹplọntọ, kavi azọ́nwatọgbẹ́ de sọgan kàn nuhe zọ́n bọ a ma nọ tindo mahẹ to hùnwhẹ tangan de mẹ sè. Gblọndo nujikudo, mẹhẹnlẹnnupọn tọn towe sọgan gọalọna ẹn nado na sisi teninọ sinai do Biblu ji towe. Eyin mẹde tẹnpọn nado klọ we biọ walọ ylankan taidi nugbomadọ, amasin-adínọ ṣiṣizan, kavi fẹnnuwiwa zanhẹmẹ tọn mẹ ka lo? Onú titengbe wẹ e yin nado hẹn ẹn họnwun dọ hiẹ ma na tindo mahẹ to walọ mọnkọtọn mẹ gba podọ nude matin he na yin bibasi nado diọ linlẹn towe. Ehe biọ dọ a ni dọho po nujikudo po to whenuena a to oylọ lọ gbẹdai. To whenuena Josẹfu to nuzedonukọnnamẹ fẹnnuwiwa asi Pọtifali tọn gbẹ́, e dọ po nujikudo dolido po dọmọ: “Na yẹn sọgan wà oylan daho he do, bo waylan do Jiwheyẹwhe?” To whenuena yọnnu lọ tẹkudeji dọ e na mlọnai hẹ emi janwẹ, Josẹfu họ̀n sọn owhé lọ gbè.—Gẹn. 39:9, 12.

Lehe Nujikudo Nọ Yin Didohia Do. Hogbe towe lẹ sọgan wà nususu nado do nujikudo towe hia. To ojlẹ susu mẹ, Jesu nọ bẹ hodidọ titengbe lẹ jẹeji gbọn didọ dali dọmọ: “Nugbo, nugbo, wẹ yẹn dọhlan we.” (Joh. 3:3, 5, 11; 5:19, 24, 25) Nujikudo Paulu tọn yin didohia to hodidọ mọnkọtọn lẹ mẹ taidi “Yè hẹn mi yọnẹn dọ,” “Yẹn yọnẹn, yè sọ hẹn mi yise gbọn Jesu Oklunọ dali,” podọ “Nugbo wẹ yẹn to didọ . . . yẹn ma dolalo.” (Lom. 8:38; 14:14; 1 Tim. 2:7) Gando hẹndi hogbe etọn tọn go, to whedelẹnu Jehovah nọ gbọdo yẹwhegán etọn lẹ nado dọho po nùzindonuji po, taidi “E ma na nọma wá.” (Hab. 2:3) Eyin a to alọdlẹndo dọdai ehelẹ, a sọgan yí hogbe dopolọ lẹ zan. Eyin a nọ dejido Jehovah go kakati ni yin do dewe go, bosọ nọ dọho na mẹdevo lẹ po sisi po, hogbe he nọ do nujikudo mọnkọtọn hia lẹ na dekunnu dọ a tindo yise he lodo.

Nujọnu-yinyin hodidọ towe tọn po huhlọn he a yí do dọ ẹ po sọgan sọ do nujikudo hia ga. Dohia nukunta towe tọn lẹ, gowhinwhàn, agbasa yí do basi dohia, popolẹpo wẹ nọ yidogọna ẹn, dile etlẹ yindọ aliho voovo mẹ wẹ gbẹtọ lẹ nọ do yé hia te. Eyin a tlẹ nọ kuwinyan kavi nọ dọho dẹẹdẹ to jọwamọ-liho, nujikudo towe na sọawuhia eyin hiẹ yin dududeji mlẹnmlẹn dọ nugbo wẹ nuhe a to didọ bọ mẹdevo lẹ dona sè.

Na nugbo tọn, dohia nujikudo tọn depope he mí yizan ma dona yin yẹnuwiwa tọn gba. Eyin gbẹtọ lẹ mọ dọ mí to yẹdoklọmẹ wẹ kakati nado dọho sọn ahun mẹ wá, yé sọgan wá tadona lọ kọ̀n dọ owẹ̀n mítọn ma vó nude. Enẹwutu, hú popolẹpo, nọ dọho to jọwamọ-liho. Eyin mẹplidopọ daho wẹ a to hodọna, vlavo hiẹ dona zegbèyiaga bo dọho po huhlọn po. Ṣigba yanwle towe dona yin nado dọho po ahundopo po, podọ to jọwamọ-liho.

Alọgọ Nujikudo Didohia Tọn Lẹ. To whenuena e yindọ nujikudo nọ bẹ numọtolanmẹ he a tindo do nudọnamẹ towe lẹ ji hẹn, awuwle dagbe yin nujọnu. Nudọnamẹ lẹ vivọkan sọn owe de mẹ poun bo hia ẹ to enẹgodo ma ko pé gba. Hiẹ dona mọnukunnujẹ nudọnamẹ lọ mẹ ganji bo penugo nado dọ ẹ to hogbe towe titi lẹ mẹ. Hiẹ dona yin dududeji mlẹnmlẹn dọ nugbo wẹ podọ nuhe dọ a te yin nuhọakuẹ na mẹplidopọ towe lẹ. Ehe zẹẹmẹdo dọ to whenuena a to awuwlena hodidọ towe, a dona ze ninọmẹ yetọn po nuhe yé sọgan ko yọnẹn do hosọ lọ ji lẹ po kavi numọtolanmẹ he yé sọgan tindo gandego do lẹnpọn mẹ.

E nọ bọawu na mẹdevo lẹ nado mọ nujikudo mítọn eyin hodidọ mítọn dídí. Enẹwutu, to yidogọmẹ na awuwiwlena nudọnamẹ dagbe lẹ, wazọ́n vẹkuvẹku do hodidọ towe ji. Na ayidonugo vonọtaun hlan adà azọ́n towe tọn he biọ hodidọ po zohunhun dogọ po, na hiẹ nido sọgan ze e donukọnnamẹ tlọlọ matin kandai towe mẹ pinpọ́n zẹjlẹgo. Flin nado hodẹ̀ na dona Jehovah tọn do vivẹnudido towe lẹ ji. Gbọnmọ dali, hiẹ na ‘wleawuna adọgbigbo gbọn Jiwheyẹwhe mítọn dali’ nado dọho po nujikudo po gando nugbo-yinyin po nujọnu-yinyin owẹ̀n towe tọn po go.—1 Tẹs. 2:2.