Nuagokun lẹ Yin Nùzindeji

ETẸWẸ yin nuagokun lẹ to hodidọ de mẹ? Ehelẹ ma yin adà ojlofọndotenamẹ tọn heyin didọ to daglamẹ poun gba. Yé yin linlẹn nujọnu tọn heyin hodọdeji to gigọ́mẹ lẹ. Linlẹn ehelẹ yin dandannu nado jẹ yanwle towe kọ̀n.

Onú titengbe he na gọalọna we nado zinnudo nuagokun lẹ ji wẹ nugopipe lọ nado ṣinyan nujidọhodo towe lẹ bo tò yé linsinlinsin. Nudọnamẹ he nọ yin mimọ to dodinnanu bibasi do hodidọ de ji whenu nọ saba sù hugan dehe sọgan yin yiyizan. Nawẹ a na wagbọn do yọ́n nudọnamẹ he na yin yiyizan lẹ?

Jẹnukọn whẹ́, lẹnnupọndo mẹplidopọ towe lẹ ji. Be yé ma yọ́n nudepope do hosọ towe ji wẹ, kavi yé jẹakọ hẹ ẹ ganji? Be suhugan yetọn kọngbedopọ hẹ nuhe Biblu dọ do e ji, kavi be mẹdelẹ tindo ayihaawe wẹ ya? Avùnnukundiọsọmẹ tẹlẹ wẹ yé nọ pannukọn to gbẹninọ egbesọ tọn mẹ dile yé to vivẹnudo nado yí nuhe Biblu dọ do hosọ lọ ji do yizan mẹ? Awetọ, hẹn ẹn diun dọ a hẹn yanwle he wutu hiẹ to hodọna mẹplidopọ enẹ do hogo he a jlo na yizan ji do ayiha mẹ hezeheze. Yí afọdide awe ehelẹ zan nado gbadopọnna nujidọhodo towe bo ṣinyan nuhe yọn-na-yizan lẹ kẹdẹ.

Eyin todohukanji hodidọ tọn de ko yin nina we, he tindo hosọ po nuagokun lẹ po, a dona tẹdo e go. Ṣigba, nuhọakuẹ nuhe a to zizedonukọnnamẹ tọn na yin hinhẹn pọnte taun eyin a hẹn nuhe yin hodọdeji to aga lẹ do ayiha mẹ dile a to nuagokun dopodopo gbà do flinflin. Eyin todohukanji de ma yin nina we, azọngban towe wẹ e yin nado de nuagokun lẹ.

Eyin nuagokun towe lẹ tin to ayiha mẹ na we hezeheze bọ a ko wleawuna zẹẹmẹ gigọ́ lẹ do dopodopo yetọn ji, e na bọawu na we nado na hodidọ lọ. Podọ mẹplidopọ towe lẹ sọgan mọaleyi sọn e mẹ hugan.

Aliho Voovo lẹ Nado Tò Nujidọhodo Towe. Aliho voovo lẹ wẹ sọgan yin yiyizan nado tò nudọnamẹ he tin to hodidọ towe mẹ. Dile hiẹ jẹakọ hẹ yé, a na mọ dọ aliho susu wẹ yọn-na-yizan, sinai do yanwle towe ji.

Aliho he bọawu dopo wẹ nado má nujidọhodo lẹ do hóvila lẹ glọ. (Nuagokun dopodopo yin nujọnu na e nọ hẹn hosetọ towe lẹ nado mọnukunnujẹ hosọ lọ mẹ dogọ kavi gọalọna we nado jẹ yanwle towe kọ̀n.) Aliho devo wẹ nado dọ nujijọ lẹ debọdo-dego. (Di apajlẹ, nuhe jọ jẹnukọnna Osingigọ lọ sọgan yin didọ jẹnukọn, bọ nuhe jọ jẹnukọnna vasudo Jelusalẹm tọn to owhe 70 W.M. na yin didọ bọdego, enẹgodo, nujijọ azán mítọn gbè tọn lẹ sọgan hopódona.) Aliho atọ̀ntọ wẹ nado do nuyiwa de po kọdetọn etọn po hia. (Ehe sọgan yin wiwà to aliho awe lẹpo mẹ. Di apajlẹ, a sọgan bẹjẹeji po ninọmẹ agọe tọn de po, yèdọ kọdetọn lọ, bo na wá do nuyiwa lọ hia to enẹgodo.) Aliho ẹnẹtọ bẹ vogbingbọn nude tọn didohia hẹn. (Hiẹ sọgan do vogbingbọn he tin to dagbe po oylan po ṣẹnṣẹn hia.) To whedelẹnu a sọgan yí aliho he hugan dopo zan na hodidọ de.

To whenuena Stefani yin owhẹ̀ lalo tọn sadokọna to Tohodọtọ Ju lẹ tọn nukọn, e na hodidọ huhlọnnọ de to aliho debọdo-dego tọn mẹ. Dile a to hodidọ etọn lẹ hia to Owalọ lẹ 7:2-53 mẹ, doayi e go dọ nuagokun he e yizan lẹ hẹn lẹndai de di. Jẹnukọn whẹ́, Stefani hẹn ẹn họnwun dọ ewọ to whenuho he mẹplidopọ etọn lẹ ma sọgan gbẹdai de dọ. Enẹgodo, e zinnudeji dọ dile etlẹ yindọ Josẹfu yin gbigbẹdai gbọn nọvisunnu etọn lẹ dali, Jiwheyẹwhe yí ì zan nado wleawuna whlẹngán. To nukọnyiyi mẹ, e dohia dọ Juvi lẹ vẹtolina Mose, mẹhe Jiwheyẹwhe to yiyizan. E dotana gbọn nùzindeji dali dọ gbigbọ he Ju hohowhenu tọn lẹ dohia yin nudopolọ po dehe mẹhe hù Jesu Klisti lẹ dohia po.

Ma Yí Nuagokun Susu Hugan Zan Blo. Nuagokun vude poun wẹ e nọ biọ nado gbà hosọ depope do flinflin. To whẹho susu mẹ, e ma nọ biọ hugan atọ́n. Ehe yin nugbo mahopọnna lehe hodidọ towe na dẹnsọ, vlavo na nukunwhiwhe 5, 10, 30, kavi humọ. Ma tẹnpọn nado zinnudo nuagokun susu hugan ji blo. Linlẹn voovo vude poun wẹ mẹplidopọ towe lẹ na penugo nado flin ganji to hodidọ de mẹ. Podọ dile hodidọ lọ dite do, mọwẹ nuagokun etọn lẹ dona tindo huhlọn bo yin zẹẹmẹ basina ganji do niyẹn.

Mahopọnna nuagokun sọha nẹmu he a yizan, hẹn ẹn diun dọ dopodopo yin gbigbà do flinflin ganji. Na dotẹnmẹ he pé mẹplidopọ lẹ nado lẹnnupọndo nuagokun dopodopo ji na e nido gbọṣi ayiha yetọn mẹ.

Hodidọ towe dona bọawu. Ehe ma nọ sinai do lehe nujidọhodo towe sù sọ ji to whepoponu gba. Eyin linlẹn towe lẹ yin titò do hóvila vude glọ bọ a gbà ehelẹ do flinflin debọdo-dego, hodidọ lọ na yin hihodo bo na yin finflin po awubibọ po.

Zinnudo Nuagokun Towe lẹ Ji. Eyin nujidọhodo towe lẹ yin titò ganji, e ma na sinyẹnawu nado zinnudo nujọnu-yinyin nuagokun lọ lẹ tọn ji to hodidọ towe mẹ gba.

Aliho tintan lọ nado zinnudo nuagokun de ji wẹ nado ze kunnudenu lẹ, wefọ lẹ, po nujidọhodo devo lẹ po donukọnnamẹ to aliho de mẹ bọ ehelẹ na ze ayidonugo do linlẹn tangan hodidọ lọ tọn ji bo basi zẹẹmẹ gigọ́ do e ji. Nuagokun flinflin devo lẹpo dona hẹn nuagokun lọ họnwun bo do nugbo-yinyin etọn hia kavi basi zẹẹmẹ gigọ́ do e ji. Ma yí linlẹn he ma sọgbe hẹ ẹ lẹ dogọ na yé vivi sisè poun wutu blo. Dile a to hodọdo nuagokun flinflin lẹ ji, do kanṣiṣa he yé tindo hẹ nuagokun he yé nọgodona lọ hia hezeheze. Ma jo yé do na mẹplidopọ lẹ nado pà ẹ dọ blo. Kanṣiṣa lọ sọgan yin didohia gbọn hogbe tangan he zinnudo linlẹn tangan lọ ji vivọdọ kavi bladopọ nuagokun lọ tọn vivọdọ sọn ojlẹ de mẹ jẹ devo mẹ dali.

Hodọtọ delẹ nọ zinnudo nuagokun lẹ ji gbọn sọha yíyí na yé dali. Nugbo wẹ dọ aliho dopo niyẹn nado zinnudo nuagokun lẹ ji, ṣigba mí ma dona yí nukunpẹvi do pọ́n nujidọhodo mítọn dide po sọwhiwhe po gba. Humọ, e dona yin zizedonukọnnamẹ po lẹnpọn dagbe po.

Hiẹ sọgan basi dide nado dọ nuagokun towe jẹnukọn whẹpo do ze kunnudenu he nọgodona ẹn lẹ donukọnnamẹ. Ehe na gọalọna mẹplidopọ lẹ nado yọ́n pinpẹn nuhe bọdego lẹ tọn, bo nasọ zinnudo nuagokun enẹ ji. A sọgan vọ́ nùzindo nuagokun lọ ji gbọn bladopọ etọn bibasi to whenuena e ko yin gbigbà do flinflin godo dali.

To Lizọnyizọn Kunnudegbe Tọn Mẹ. Nunọwhinnusẹ́n heyin hodọdeji to aga lẹ yọn-na-yizan na hodidọ tlọlọ lẹ nina po hodọdopọ lẹ po to kunnudegbe. To awuwle whenu, nọ ze ninọmẹ tangan depope he to ahunmẹduna mẹhe tin to lẹdo lọ mẹ lẹ do lẹnpọn mẹ. De hosọ he na hẹn ẹn yọnbasi nado do lehe todido he tin to Biblu mẹ na didẹ̀ ninọmẹ enẹ do hia. A sọgan de nuagokun awe nado dọhodo hosọ enẹ ji. De wefọ he a na yizan nado nọgodona nuagokun enẹlẹ. Enẹgodo, wleawuna lehe a na bẹ hodidọ towe jẹeji do. Awuwle mọnkọtọn nọ hẹn ẹn yọnbasi nado diọada dile hodọdopọ lọ biọ do. E nasọ gọalọna we nado dọ nuhe whétọ lẹ na flin.