Awuwiwlena Todohukanji

TO WHENUENA azọ́n yin didenamẹ nado na hodidọ de, mẹsusu nọ jẹtukla nado kàn ẹn dai, bẹsọn homẹbibiọ ji jẹ tadonahó kọ̀n. Whẹpo do dotana hodidọ lọ, kandaiwema susu sọgan ko yin awuwlena. Nuyiwa lọ sọgan yí ganhiho susu.

Be aliho he mẹ hiẹ nọ wleawuna hodidọ towe lẹ te niyẹn ya? Be hiẹ na jlo nado plọn aliho he bọawu hugan de ya? Eyin hiẹ plọn lehe yè nọ wleawuna todohukanji de do, hiẹ ma na tindo nuhudo nado kàn nulẹpo dai ba gba. Ehe na na we whenu susu dogọ nado plọn hodidọ lọ. E mayin dọ e na bọawu na we nado na hodidọ towe kẹdẹ wẹ gba ṣigba todidoai hlan ẹn na fọnjlodotenamẹ taun bo na whàn mẹplidopọ towe lẹ dogọ.

Nugbo wẹ dọ, todohukanji tangan de nọ yin awuwlena, na togunmẹho he nọ yin didọ to agun mẹ lẹ. Ṣigba, e ma nọ yinmọ na suhugan hodidọ devo lẹ tọn gba. Hogo kavi hosọ de poun sọgan yin didena we. Kavi hiẹ sọgan yin didọna nado gbadopọnna zinjẹgbonu tangan de. To whedelẹnu nudọnamẹ kleun delẹ wẹ na yin nina we poun. Na azọ́ndenamẹ mọnkọtọn lẹpo, hiẹ dona wleawuna todohukanji towe titi.

Apajlẹ he tin to weda 41 na gọalọna we nado yọ́n lehe todohukanji kleun de sọgan yin awuwlena do. Doayi e go dọ dopodopo hóvila lẹ tọn bẹsọn adà amiyọnlọ tọn mẹ bo yin kinkàn po wekun daho lẹ po. Nudọnamẹ he nọgodona hóvila dopodopo nọ yin sislẹ́ do oglọ etọn. Nuagokun devo lẹ he na yin yiyizan nado hẹn nudọnamẹ enẹlẹ họnwun nọ yin sislẹ́ do oglọ yetọn bọ tẹnmẹ kleun de nọ tin to adà amiyọnlọ tọn mẹ. Gbadopọnna todohukanji ehe ganji. Doayi e go dọ hóvila awe lọ lẹ tindo kanṣiṣa tlọlọ hẹ hosọ lọ. Doayi e go ga, dọ nuagokun he tin to oglọ na yé lẹ ma yin nudọnamẹ ojlofọndotenamẹ tọn lẹ poun gba. Kakatimọ, dopodopo nọ nọgodona hóvila he glọ e sọawuhia te.

To whenuena hiẹ wleawuna todohukanji de, e sọgan gọ̀n ma taidi apajlẹ dehe yin nina tọn pẹpẹ. Ṣigba eyin hiẹ mọnukunnujẹ anademẹ he hukan he jẹnukọn lọ bẹhẹn lẹ mẹ, ehelẹ na gọalọna we nado tò nudọnamẹ towe lẹ bo wleawuna hodidọ dagbe de to ojlẹ kleun de mẹ. Nawẹ hiẹ na bẹjẹeji gbọn?

Gbadopọnna, De Hosọ, bo Tò Nudọnamẹ Dodinnanu Towe Tọn Lẹ

Hiẹ tindo nuhudo hosọ de tọn. Hosọ towe mayin hogo paa he hogbe dopo de sọgan nọtena poun gba. Ahọ́nkan linlẹn he hiẹ jlo nado detọ́n tọn wẹ e yin, podọ e nọ do aliho he mẹ hiẹ basi tito nado dọhodo hosọ towe ji te hia. Eyin hosọ de yin dide, gbadopọnna hogbe tangan dopodopo ganji. Eyin hodidọ towe do hosọ dide lọ ji dona yin didesọn owe zinjẹgbonu de mẹ, plọn owe enẹ po hosọ lọ po to ayiha mẹ. Eyin hogo de poun wẹ yin didena we, to whenẹnu azọngban towe wẹ e na yin nado de hosọ lọ. Ṣigba, whẹpo do wàmọ, hiẹ sọgan mọ ẹn yin alọgọnamẹnu nado basi dodinnanu delẹ. Gbọn ayiha towe hùnhùn do nùvo dali, hiẹ na nọ saba mọ linlẹn devo lẹ.

Dile hiẹ ze afọdide ehelẹ, nọ to kinkanse dewe dọ: ‘Naegbọn nudọnamẹ ehe do yin nujọnu na mẹplidopọ ṣie lẹ? Etẹwẹ yin yanwle ṣie?’ E ma dona yin nado dọhodo nudọnamẹ lọ ji kavi nado na hodidọ he fọnjlodotenamẹ poun wẹ gba, ṣigba nado basi wadotana nuhe na hẹn ale wá na mẹplidopọ towe lẹ tọn. Eyin yanwle towe ko họnwun hezeheze, kàn ẹn dai. Nọ to nuflin dewe gandego dile hiẹ to awuwle.

To whenuena hiẹ ko yọ́n lẹndai towe bo ko de hosọ he sọgbe hẹ ẹ (kavi gbadopọnna lehe hosọ dide towe sọgbe hẹ yanwle towe do) godo, hiẹ sọgan basi dodinnanu do onú tangan de ji. Dín nudọnamẹ he na yin nuhọakuẹ titengbe na mẹplidopọ towe lẹ. Ma tindo pekọ po linlẹn paa lẹ po blo, ṣigba dín nuagokun tangan he gọ́ na nudọnamẹ bo yin alọgọnamẹnu na nugbo tọn lẹ. Yin lẹnpọn dagbenọ to sọha dodinnanu he hiẹ na basi tọn mẹ. To suhugan whẹho lẹ tọn mẹ hiẹ na wá tindo nudọnamẹ susu hugan nuhe hiẹ sọgan zan, enẹwutu hiẹ dona ṣinyan dehe sọgbe.

Yọ́n nuagokun he ji hiẹ dona dọhodo lẹ nado sọgan ze hosọ towe donukọnnamẹ bo jẹ yanwle towe kọ̀n. Ehelẹ na lẹzun linlẹn dodonu tọn towe lẹ, yèdọ todohukanji tangan towe. Nuagokun nẹmu wẹ e dona bẹhẹn? Vlavo awe ko pé na hodọdopọ gli de, podọ atọ́n ko nọ saba pé na hodọdopọ he na tlẹ dẹn na ganhiho dopo. Eyin nuagokun tangan lẹ ma sù, e na yọnbasi taun dọ mẹplidopọ towe lẹ ni flin yé.

Tlolo he hiẹ ko tindo hosọ towe po nuagokun tangan lẹ po to ayiha mẹ, tò nudọnamẹ dodinnanu towe tọn lẹ. Magbe do dehe tindo kanṣiṣa tlọlọ hẹ nuagokun tangan towe lẹ ji. De zẹẹmẹ gigọ́ lẹ he na hẹn nuzedonukọnnamẹ towe yin onú yọyọ. Eyin hiẹ de wefọ lẹ nado nọgodona nuagokun tangan lọ lẹ, doayi linlẹn he na gọalọna we nado yihojlẹdohogo do wefọ enẹlẹ ji to aliho he gọna zẹẹmẹ de mẹ go. Hẹn nudọnamẹ dopodopo do nuagokun tangan etọn glọ. Eyin delẹ to nudọnamẹ lọ lẹ mẹ ma sọgbe hẹ nuagokun tangan towe lẹ, de yé sẹ̀—eyin e tlẹ yin ojlofọndotenamẹnu taun—kavi hẹn yé do kandai-sẹdotẹn de mẹ nado yí yé zan to whedevonu. Hẹn nudọnamẹ dagbe hugan lẹ kẹdẹ go. Eyin hiẹ tẹnpọn nado dọhodo nususu ji, hiẹ na dọho po awuyiya susu po bọ nuzedonukọnnamẹ towe ma na họnwun. E pọnte hugan nado dọhodo nuagokun vude ji he tindo nuhọakuẹ nujọnu tọn na mẹplidopọ lẹ bo wà enẹ ganji. Ma dù ganmẹ blo.

Todin, tò nudọnamẹ towe do whinnuwhinnu eyin hiẹ ma ko wàmọ dai. Wẹndagbe kàntọ Luku wà ehe. To whenuena e ko bẹ nugbo susugege he gando hosọ etọn go lẹ pli, e wlan yé to “whinnuwhinnu.” (Luku 1:3) Hiẹ sọgan tò nudọnamẹ towe lẹ sọgbe hẹ ojlẹ he mẹ yé jọ kavi lẹdo nujijọ lọ tọn, vlavo sọgbe hẹ whẹwhinwhẹ́n po nugandomẹgo po kavi nuhahun po pọngbọ po, sinai do nuhe na tindo kọdetọn dagbe hugan nado jẹ yanwle towe kọ̀n ji. Hiẹ ma dona diọ sọn linlẹn de ji jẹ devo ji to ajijimẹ gba. Hosetọ towe lẹ dona yin anadena po awubibọ po sọn linlẹn de ji jẹ devo ji, matin nùvo he ma sọgan yin didasa po awubibọ po lẹ. Kunnudenu heyin nina lẹ dona plan mẹplidopọ lẹ jẹ tadona lẹnpọn dagbe tọn lẹ kọ̀n. Dile hiẹ to nuagokun towe lẹ tò, lẹnnupọndo numọtolanmẹ todoaitọ towe lẹ tọn do nuzedonukọnnamẹ towe ji. Be e na bọawu na yé nado mọnukunnujẹ hoyijlẹdohogo towe mẹ ya? Be yé na yin whinwhàn nado yinuwa do nuhe yé sè lẹ ji, to kọndopọmẹ hẹ yanwle he hiẹ tindo to ayiha mẹ ya?

Enẹgodo, wleawuna homẹbibiọ he fọ́n ojlo dote to hosọ towe mẹ bo dohia mẹplidopọ towe lẹ dọ nuhe ji hiẹ jlo na dọhodo yin nuhọakuẹ taun na yé. E sọgan yin alọgọnamẹnu nado kàn vude to nuhe hiẹ na dọ jẹnukọn lẹ mẹ dai. To godo mẹ, wleawuna tadona mẹwhinwhàn tọn he sọgbe hẹ yanwle towe.

Eyin hiẹ yawu wleawuna todohukanji towe, hiẹ na tindo whenu nado ṣinyankẹ́n na ẹn whẹpo do na hodidọ lọ. Hiẹ sọgan mọ nuhudo lọ nado yí sọha nulinlẹn tọn lẹ, apajlẹ de, kavi numimọ de do nọgodona linlẹn tangan delẹ. Nujijọ agọe tọn de kavi linlin he fọnjlodotenamẹ gbayipe delẹ yiyizan sọgan gọalọna mẹplidopọ towe lẹ nado yawu mọ lehe nudọnamẹ lọ yọn-na-yizan do. Dile hiẹ to dogbapọnna hodidọ towe, hiẹ sọgan wá mọ dotẹnmẹ hundote susu dogọ nado diọadana nudọnamẹ lọ sọgbe hẹ mẹplidopọ towe. Nuyiwa dogbapọnnanu po kẹ́nṣinyannanu tọn po yin dandannu nado yí nudọnamẹ dagbe lọ lẹ zan nado na hodidọ kọdetọn dagbenọ de.

Hodọtọ delẹ sọgan tindo nuhudo kandai he dite taun tọn hugan mẹdevo lẹ. Ṣigba eyin hiẹ tò nudọnamẹ towe lẹ do nuagokun tangan vude poun glọ, bo de nuhe ma nọgodona ehelẹ na taun tọn sẹ̀, bosọ wleawuna linlẹn towe lẹ do whinnuwhinnu, hiẹ na mọ dọ po numimọ vude po, hiẹ ma na tindo nuhudo nado nọ kàn nulẹpo dai ba gba. Lehe enẹ sọgan pò whenu dai namẹ do sọ! Podọ jẹhẹnu hodidọ tọn towe lẹ na pọnte. E na do kunnudenu hia dọ hiẹ to alemọyi na nugbo tọn sọn Wehọmẹ Lizọnyizọn Yẹwhehọluduta tọn mẹ.