Be Hiẹ Jlo Na Yọ́n Nususu Dogọ Do Biblu Ji Ya?

Naegbọn Biblu Hihia Do Sọgbe?

BIBLU gbọnvo tlala na owe devo lẹ. E bẹ anademẹ owanyinọ sọn Jiwheyẹwhe de hẹn. (1 Tẹsalonikanu lẹ 2:13) Eyin hiẹ yí nuhe Biblu nọ plọnmẹ lẹ zan, hiẹ na mọ ale daho yí. Hiẹ na hẹn owanyi towe na Jiwheyẹwhe jideji bo na dọnsẹpọ ẹ pẹkipẹki, yèdọ Ewọ mẹhe nọ na “nunina dagbedagbe po nunina he sọgbe lẹpo po.” (Jakobu 1:17) Hiẹ na wá yọ́n lehe hiẹ na dọnsẹpọ ẹ do to odẹ̀ mẹ. To tukla whenu, hiẹ sọgan mọ alọgọ Jiwheyẹwhe tọn yí. Eyin hiẹ hẹn gbẹzan towe sọgbe hẹ nujinọtedo Biblu tọn lẹ, Jiwheyẹwhe na na we ogbẹ̀ madopodo.—Lomunu lẹ 6:23.

Biblu bẹ nugbo delẹ hẹn he nọ hẹn mí tindo nukunnumọjẹnumẹ. Mẹhe mọ oyọnẹn Biblu tọn yí lẹ nọ vò sọn nukunnumamọjẹnumẹ he dugan do gbẹzan mẹsusu tọn ji si. Di apajlẹ, oyọnẹn nugbo tọn do nuhe nọ jọ eyin yè kú godo ji, nọ de mí sọn obu mẹ dọ mẹhe ko kú lẹ sọgan gbleawuna mí kavi dọ hẹnnumẹ po họntọn mítọn he ko kú lẹ po tin to awufiẹsa mẹ. (Ezekiẹli 18:4) Nuplọnmẹ Biblu tọn do fọnsọnku ji nọ miọnhomẹna mẹhe ko hẹn mẹvivẹ yetọn lẹ bu to okú mẹ. (Johanu 11:25) Nugbo lọ yinyọnẹn gando angẹli ylankan lẹ go nọ gọalọna mí nado dapana owù afinyọnnuwiwa tọn lẹ bosọ nọ gọalọna mí nado mọnukunnujẹ nuhewutu nuhahun do sù sọmọ to aigba ji mẹ.

Nunọwhinnusẹ́n Jiwheyẹwhe tọn he tin to Biblu mẹ lẹ plọn mí nado nọgbẹ̀ to aliho de mẹ he na hẹn mí tin to dagbe mẹ to agbasaliho. Di apajlẹ, ‘jlẹkajinọ-yinyin’ nọ yidogọna agbasalilo dagbe. (1 Timoti 3:2) ‘Míde kiklọ́ sọn dihó agbasalan po gbigbọ tọn lẹ po mẹ’ nọ hẹn mí dapana awugble hinhẹnwa na agbasalilo mítọn. (2 Kọlintinu lẹ 7:1) Osi-mẹdetiti tọn po ayajẹ po nọ tin to alọwle mẹ to whenuena ayinamẹ Jiwheyẹwhe tọn he tin to Biblu mẹ lẹ yin hihodo.—1 Kọlintinu lẹ 6:18.

Eyin hiẹ yí Ohó Jiwheyẹwhe tọn zan, hiẹ na yin homẹhunnọ tlala. Oyọnẹn Biblu tọn nọ gọalọna mí nado mọ jijọho po pekọ po, e sọ nọ na mí todido. E nọ gọalọna mí nado wleawuna jẹhẹnu dagbe lẹ taidi awuvẹmẹ, owanyi, ayajẹ, jijọho, homẹdagbe, po yise po. (Galatianu lẹ 5:22, 23; Efesunu lẹ 4:24, 32) Jẹhẹnu mọnkọtọn lẹ nọ gọalọna mí nado yin asu kavi asi, otọ́ kavi onọ̀, visunnu kavi viyọnnu dagbe.

Be hiẹ ko lẹnnupọn gando sọgodo go pọ́n ya? Dọdai Biblu tọn lẹ dohia mí dọ mí to gbẹ̀nọ to ojlẹ ayidego tọn de mẹ to whenuho gbẹtọvi tọn mẹ. Dọdai ehelẹ ma dọho do ninọmẹ egbezangbe tọn lẹ kẹdẹ ji gba, ṣigba yé sọ dohia dọ to madẹnmẹ, Jiwheyẹwhe na diọ aigba ehe zun paladisi de.—Osọhia 21:3, 4.

Alọgọ de Nado Mọnukunnujẹ Biblu Mẹ

Vlavo hiẹ ko tẹnpọn nado hia Biblu, ṣigba hiẹ mọ dọ e ma bọawu nado mọnukunnujẹemẹ. E sọgan yindọ hiẹ ma yọ́n fihe hiẹ na pọ́n to Biblu mẹ nado mọ gblọndo na kanbiọ towe lẹ. Eyin mọwẹ, yọnẹn dọ mẹsusu wẹ tin to ninọmẹ ehe mẹ. Mímẹpo wẹ tindo nuhudo alọgọ tọn nado mọnukunnujẹ Ohó Jiwheyẹwhe tọn mẹ. Kunnudetọ Jehovah tọn lẹ nọ plọn Biblu hẹ gbẹtọ livi susu lẹ vọnu to nudi aigba 235 lẹ ji. Homẹ yetọn na hùn nado gọalọna hiẹ lọsu.

E nọ saba yọ́n hugan nado plọn Biblu to aliho debọdo-dego tọn mẹ, bẹsọn nuplọnmẹ bẹjẹeji tọn lẹ ji. (Heblu lẹ 6:1) Dile hiẹ to nukọnzindo, hiẹ na penugo nado dù “núdùdù sinsinyẹn”—yèdọ nugbo he siso lẹ. (Heblu lẹ 5:14) Biblu wẹ asisa dejidego lọ. Owe sinai do Biblu ji lẹ taidi Etẹwẹ Jiwheyẹwhe Biọ to Mí Si?, na gọalọna we nado mọnukunnujẹ alọdlẹndonu Owe-wiwe tọn lẹ mẹ do hosọ voovo lẹ ji.

Be Hiẹ Jlo Nado Yí Whenu Zan to Sẹmẹsẹmẹ Nado Mọnukunnujẹ Biblu Mẹ Ya?

Oplọn Biblu tọn sọgan nọ saba yin tito basina to ojlẹ po nọtẹn he vòawu na we po mẹ. Mẹsusu nọ plọnnu to owhé yetọn lẹ gbè. Mẹdelẹ tlẹ nọ plọnnu gbọn alokan mẹ. Oplọn lọ ma nọ yin anadena hẹ gbẹtọ susu lẹ to pọmẹ gba, ṣigba nọ yin anadena hẹ mẹdopodopo sọgbe hẹ ninọmẹ, oyọnẹn, po lehe e yọ́nwe do po. Mẹtẹnpọn de ma tin gba, podọ hiẹ ma na yin winyando gba. Kanbiọ towe lẹ gando Biblu go na mọ gblọndo yí, hiẹ nasọ plọn lehe hiẹ na dọnsẹpọ Jiwheyẹwhe pẹkipẹki do.

Vọnu wẹ plọnmẹ Biblu mọnkọtọn. (Matiu 10:8) E nọ yin zizedonukọnna gbẹtọ lẹpo vọnu mahopọnna sinsẹ̀n yetọn. Humọ, mí nọ ze e donukọnna mẹhe ma tlẹ tin to sinsẹ̀n depope mẹ lẹ ṣigba he tindo ojlo nujọnu tọn nado hẹn oyọnẹn yetọn gando Ohó Jiwheyẹwhe tọn go jideji.

Mẹnu lẹ wẹ sọgan tindo mahẹ to oplọn lọ mẹ? Whẹndo towe pete. Depope to họntọn towe he a basi oylọna lẹ mẹ sọgan tindo mahẹ to nupinplọn lọ mẹ. Kavi eyin hiẹ jlo, oplọn lọ sọgan yin bibasi hẹ hiẹ dopo kẹdẹ.

Mẹsusu nọ klan ganhiho dopo dovo to sẹmẹsẹmẹ nado plọn Biblu. Eyin hiẹ sọgan yí whenu susu humọ zan kavi eyin hiẹ ma tindo whenu sọmọ to osẹ dopodopo mẹ, Kunnudetọ lẹ na ze yedelẹ jo nado gọalọna we.

Oylọ-Basinamẹ Nado Plọnnu

Mí basi oylọna we dọ hiẹ ni dọnsẹpọ Kunnudetọ Jehovah tọn lẹ. Aliho dopo nado wà ehe wẹ nado kanwe hlan dopo to adlẹsi he tin to odò lẹ mẹ. Tito na yin bibasi na mẹde nado wá plọn Biblu hẹ we vọnu to whégbè.

□ Mì do vọkan alọnuwe Etẹwẹ Jiwheyẹwhe Biọ to Mí Si? dopo hlan mi.

□ Jaale dín mi mọ na nuhe dù plọnmẹ Biblu whégbè tọn vọnu de.

Adavo devo de yin didohia, owefọ Biblu tọn lẹpo wá sọn Biblu Wiwe Lọ Gun-Alada mẹ.